1-2. (a) Why nao aposol Paul sei love hem “nambawan”? (b) Olketa wanem kwestin nao bae iumi storyim?

 TAEM aposol Paul discussim faith, hope, and love, hem sei: “Long thrifala samting hia, love nao hem nambawan.” (1 Cor. 13:13) Why nao Paul sei olsem? Lo future, iumi bae no needim faith lo olketa promis blo God abaotem niu world or hope for olketa promis hia bikos olketa bae fulfill finis. Bat iumi bae need for lovem Jehovah and lovem pipol evritaem. Tru nao, iumi bae gohed strongim love blo iumi for olketa for olowe.

² From iumi bae need for evritaem showimaot love, bae iumi storyim thrifala kwestin hia. First wan, why nao iumi shud lovem each other? Second wan, hao nao iumi savve showimaot love lo each other? And third wan, hao nao iumi savve gohed strongim love blo iumi for each other?

3. Why nao hem important for iumi lovem each other?

³ Why nao hem important for lovem each other? Wanfala reason, taem iumi showimaot love for olketa brata and sista, datwan pruvim iumi olketa tru Christian. Jesus talem olketa aposol: “Sapos iufala lovem iufala evriwan, pipol bae savve iufala  olketa disaepol bilong mi.” (John 13:35) And tu, taem iumi lovem each other hem mekem iumi wan mind. Paul sei love hem “barava mekem pipol for wan mind.” (Col. 3:14) Bat nara important reason tu stap for iumi lovem each other. Aposol John sei lo olketa nara Christian: “Man wea lovem God mas lovem brata bilong hem tu.” (1 John 4:21) Taem iumi showimaot love for each other, datwan pruvim iumi lovem God.

4-5. Storyim example wea showim hao love blo iumi for God hem connect witim love blo iumi for olketa brata and sista.

⁴ Hao nao love blo iumi for God hem connect witim love blo iumi for olketa brata and sista? For minim diswan, tingim hao heart blo iumi hem connect witim olketa nara part lo body. Taem wanfala doctor chekim pulse lo wrist blo iumi, hem savve kasem samfala information abaotem condition lo heart blo iumi. Wat nao iumi savve lanem from disfala example?

⁵ Taem doctor chekim pulse blo iumi, hem savve faendaot hao strong nao heart blo iumi. Lo sem wei, iumi savve faendaot hao strong nao love blo iumi for God if iumi chekim hao strong nao love blo iumi for olketa brata and sista. If iumi luksavve love blo iumi for olketa brata and sista hem katdaon, diswan maet showim love blo iumi for God hem wikdaon tu. Bat taem iumi evritaem showimaot love for olketa brata and sista, datwan hem saen wea showim love blo iumi for God hem strong.

6. If love blo iumi for olketa brata and sista hem katdaon, why nao diswan hem serious samting? (1 John 4:7-9, 11)

⁶ Hem barava serious samting if love blo iumi for olketa brata and sista hem katdaon. Why nao olsem? Bikos datwan showim frenship blo iumi witim Jehovah hem stap lo danger. Aposol John storyim klia datwan taem hem sei: “Sapos man no lovem brata bilong hem wea hem savve lukim, hard tumas for hem lovem God wea hem no savve lukim.” (1 John 4:20) Wat nao iumi lanem? Jehovah hapi lo iumi only if iumi “lovem iumi evriwan.”—Readim 1 John 4:7-9, 11.

7-8. Wat nao samfala wei wea iumi savve showimaot love lo each other?

⁷ Staka taem, iumi savve lukim hao Bible sei for iumi mas “lovem iumi evriwan.” (John 15:12, 17; Rome 13:8; 1 Thess. 4:9; 1 Pet. 1:22; 1 John 4:11) Love hem feeling insaed lo heart blo iumi, wea no eniwan savve lukim. So hao nao olketa narawan bae luksavve iumi lovem olketa? Hem bae showaot lo toktok and wat iumi duim.

⁸ Staka wei stap for iumi showimaot love for olketa brata and sista. Diswan hem samfala example: “Talem tru samting lo narawan.” (Zech. 8:16) “Stap gud witim narawan.” (Mark 9:50) Iumi mas willing for “showimaot respect long narawan.” (Rome 12:10) Iumi mas “acceptim narawan.” (Rome 15:7) “Evritaem forgivim [narawan].” (Col. 3:13) “Gohed helpem narawan wea kasem hard taem.” (Gal. 6:2) “Gohed . . . comfortim iufala evriwan.” (1 Thess. 4:18) “Gohed . . . strongim narawan.” (1 Thess. 5:11) And “prea for olketa narawan.”—Jas. 5:16.

9. Why nao taem iumi comfortim narawan hem showim iumi lovem olketa? (Lukim tu piksa.)

⁹ Bae iumi storyim wanfala wei wea iumi savve showimaot love for each other, wea paragraf 8 storyim. Paul sei: “Gohed . . . comfortim iufala evriwan.” Why nao taem iumi comfortim narawan hem showim iumi lovem olketa? Wanfala buk sei, word wea Paul  iusim for “comfortim” hem minim “for standap saed lo samwan for encouragem hem taem hem deal witim wanfala hard situation.” So taem iumi comfortim wanfala brata or sista wea feisim hard taem, iumi helpem hem for getap and gohed wakabaot followim road for kasem laef. And each taem iumi comfortim eni brata or sista, iumi showim iumi lovem hem.—2 Cor. 7:6, 7, 13.

10. Hao nao wei for tingim narawan hem connect witim wei for givim comfort?

¹⁰ For tingim narawan hem connect witim wei for comfortim olketa. Man wea tingim narawan, bae laek for givim comfort and help. So first iumi garem feeling for tingim narawan, then iumi savve comfortim hem. Paul showimaot from Jehovah tingim pipol dastawe hem comfortim olketa. Paul sei Jehovah hem “Dadi wea kaen and sorre long iumi, and hem God wea givim iumi comfort wea iumi needim.” (2 Cor. 1:3) Lo verse hia, Paul iusim disfala toktok “kaen and sorre” for describem feeling for tingim narawan. So taem Bible sei God hem Dadi, or hem Source blo datfala feeling for “kaen and sorre,” datwan showim hem barava tingim pipol. Datwan nao mekem hem for comfortim iumi lo “eni hard taem wea iumi kasem.” (2 Cor. 1:4) Olsem spring wata hem strongim man wea thirsty, Jehovah strongim and comfortim olketa wea kasem hard taem. Hao nao iumi savve followim example blo Jehovah for tingim and comfortim olketa narawan? Wanfala wei, hem for garem olketa fasin wea savve helpem iumi for tingim and comfortim narawan. Wat nao samfala fasin hia?

11. Olsem Colossae 3:12 and 1 Peter 3:8 storyim, wat nao olketa nara fasin wea bae helpem iumi for lovem and comfortim olketa narawan?

¹¹ Wat nao bae helpem iumi for gohed strongim love blo iumi and for “gohed . . . comfortim” each other evriday? Iumi need for gohed garem fasin olsem for sorre witim olketa wea safa, lovem olketa brata, and for kaen. (Readim Colossae 3:12; 1 Peter 3:8.) Hao nao olketa fasin hia savve helpem iumi? Taem iumi tingim narawan and olketa fasin hia kamap wei blo iumi, bae iumi barava laek for comfortim olketa wea kasem hard taem. Jesus sei: “Samting wea man tingting tumas abaotem nao bae hem storyim. Gudfala man bae talem gudfala samting bikos gudfala samting stap long heart bilong hem.” (Matt. 12:34, 35) For comfortim olketa brata and sista hem wanfala barava important wei wea iumi showimaot iumi lovem olketa.

12. (a) Why nao iumi need for gohed careful? (b) Wanem kwestin nao bae iumi storyim?

¹² Iumi laek “gohed for lovem iumi evriwan.” (1 John 4:7) Bat hem important for iumi tingim hao Jesus sei “love bilong staka bae no strong nao olsem bifor.” (Matt. 24:12) Jesus no sei dat staka lo olketa disaepol blo hem bae no showimaot love. Bat, iumi need for careful nogud attitude blo pipol lo world affectim iumi. From datwan, iumi bae storyim disfala important kwestin: Wat nao bae helpem iumi for luksavve if love blo iumi for olketa brata and sista hem still strong?

13. Wat nao savve helpem iumi for luksavve if love blo iumi for each other hem strong?

¹³ Wanfala wei for faendaot if love blo iumi hem still strong, hem for lukim hao iumi deal witim samfala situation. (2 Cor. 8:8) Aposol Peter storyim wanfala situation. Hem sei: “Important samting nao, iufala mas barava lovem narawan, bikos man wea garem love hem evritaem willing for forgivim narawan.” (1 Pet. 4:8) So hao iumi react taem narawan  mekem mistek or duim samting wea mekem iumi feel nogud, bae helpem iumi for savve if love blo iumi for olketa hem strong.

14. Olsem 1 Peter 4:8 storyim, wat kaen love nao iumi need for garem? Storyim example.

¹⁴ Distaem bae iumi lukluk gud lo wat Peter talem. Lo first part lo verse 8 hem describem love wea iumi need for garem. Hem nao for “barava lovem narawan.” Word wea Peter iusim for “barava,” hem minim for “stretchim samting.” Second part lo datfala verse hem storyim samting wea iumi savve duim taem iumi barava lovem narawan. Datwan savve helpem iumi for evritaem willing for forgive. Tingim diswan: Wanfala tebol hem garem staka stain lo hem. Hem possible for tekem kaleko and stretchim antap lo tebol for kavarem no wan or tufala stain nomoa, bat for kavarem evri stain. Lo sem wei tu, if iumi barava lovem olketa brata and sista, iumi savve kavarem, or forgivim no wan or tufala mistek nomoa, bat for “evritaem willing for forgivim” mistek blo olketa.

15. If love blo iumi for olketa brata and sista hem barava strong, wat nao bae iumi duim? (Colossae 3:13)

¹⁵ Love blo iumi for olketa brata and sista  shud barava strong mekem iumi savve forgivim mistek blo olketa, nomata samfala taem hem barava no isi. (Readim Colossae 3:13.) Taem iumi forgivim narawan, hem showim love blo iumi hem strong and iumi laek for mekem Jehovah hapi. Wat moa savve helpem iumi for forgivim mistek and samfala samting wea olketa narawan duim wea mekem iumi feel nogud?

16-17. Wat moa savve helpem iumi for forgivim smol mistek blo olketa brata and sista? Storyim example. (Lukim tu piksa.)

¹⁶ Hem gud for focus lo positive saed blo olketa brata and sista, and no lo negative saed. Bae iumi storyim wanfala example. Imaginim iu lo wanfala gathering witim olketa brata and sista. Iu barava enjoyim taem witim olketa and lo end blo datfala gathering, iu tekem wanfala grup photo. Iu tekem nara tufala photo moa incase first wan hem no luk gud. So iu garem thrifala photo. Bat lo wanfala, iu lukim wanfala brata no smile. Wat nao bae iu duim lo datfala photo? Iu deletem, bikos iu garem tufala photo wea evriwan and datfala brata tu smile.

¹⁷ Iumi savve comparem olketa photo wea iumi tekem witim olketa gud memory wea iumi garem abaotem olketa brata and sista. Iumi savve garem olketa gud memory lo olketa taem wea iumi spendem witim olketa brata  and sista. Bat maet lo wanfala taem, wanfala brata or sista talem or duim samting wea mekem iumi feel nogud. Hao, bae iu gohed tingim datwan, or bae iu deletem olsem datfala photo? (Prov. 19:11; Eph. 4:32) Iumi savve deletem memory wea iumi garem abaotem smol mistek wea brata or sista duim, bikos iumi garem staka gud memory abaotem taem wea iumi spendem witim hem. Olketa memory olsem hem barava spesol and iumi laek for keepim.

18. Wat nao olketa main point abaotem love wea iumi storyim lo disfala article?

¹⁸ Why nao iumi laek for gohed strongim love blo iumi for each other? Olsem iumi storyim finis, taem iumi lovem olketa brata and sista, datwan pruvim iumi lovem Jehovah. Wat nao iumi savve duim for showim iumi lovem olketa brata and sista? Wanfala wei, hem for comfortim olketa. Iumi bae “gohed . . . comfortim” each other if iumi garem feeling for tingim narawan. Hao nao iumi savve gohed strongim love blo iumi for each other? Taem iumi forgivim mistek blo olketa brata and sista nomata hem no isi.

19. Why nao iumi need for showimaot love lo each other distaem?

¹⁹ Why nao iumi need for showimaot love lo each other distaem? Peter sei: “Taem wea evri samting bae finis hem klosap nao. So . . . iufala mas barava lovem narawan.” (1 Pet. 4:7, 8) From end blo disfala nogud world hem barava klosap, wat nao iumi expectim? Jesus sei lo olketa follower blo hem: “Long evri kantri bae olketa heitim iufala bikos iufala olketa disaepol bilong mi.” (Matt. 24:9) For iumi gohed faithful lo Jehovah, iumi need for garem wan mind. If iumi lovem olketa brata and sista, Satan bae no savve divaedem iumi bikos love hem “mekem pipol for wan mind.”—Col. 3:14; Phil. 2:1, 2.