Hulda Kasem Aim blo Hem
THRIFALA sista blo iumi stap lo wanfala smol island lo Indonesia wea olketa kolem lo Sangir Besar. If iu go lo there samfala year bifor, bae iu lukim thrifala hia waka tugeta lo beach. Staka pipol lo datfala island savve lo olketa bikos lo ministry waka wea olketa duim for teachim pipol abaotem Bible. Bat taem iu lukim olketa lo beach, difren waka nao olketa duim.
Island blo Sangir Besar north Indonesia
First samting wea olketa sista hia savve duim, olketa go lo sea and faendem olketa big ston and karem bak lo beach. Samfala ston hem big olsem olketa soccer ball. Then, olketa sidaon lo olketa stul and iusim hammer for smashim olketa ston hia gogo hem mas smol winim size blo egg blo chicken. Bihaen datwan, olketa putim olketa ston hia lo olketa baket and karem go ap for ples wea olketa stap. Then, olketa putim olketa ston hia lo olketa big bag mekem hem isi for loadim lo olketa trak for olketa iusim olsem gravol for wakem road.
Hulda, kolektem olketa ston lo beach
Wanfala lo olketa sista hia hem Hulda. Situation blo hem allowim hem for spendem moa taem for duim datfala waka winim nara tufala. Hem evritaem iusim selen wea hem kasem from datwan for peim need blo famili blo hem. Bat distaem, hem garem wanfala aim and hem sevem selen for datwan. Hem laek for peim wanfala tablet mekem hem savve accessim JW Library® app. Hulda savve olketa video and olketa nara samting wea stap lo disfala app bae helpem hem lo ministry and savve helpem hem for minim go moa Bible.
Hulda evritaem duim datfala waka mekem hem savve provaedem need blo famili blo hem. Bat for wan and haf month, hem waka for nara extra tu hour evriday mekem hem kasem aim blo hem. Gogo, hem garem inaf selen for peim wanfala tablet.
Hulda holem tablet blo hem
Hulda sei: “Nomata body hem soa and mi barava taed from mi smasem olketa ston, mi forgetim datwan nao taem mi iusim niu tablet blo mi wea helpem mi for duim gud ministry and hem isi for mi prepare for olketa meeting.” Hem sei tu tablet wea hem garem helpem hem for connect witim evriwan lo kongregeson for olketa meeting, and for duim preaching waka during lo datfala pandemic. Iumi hapi hao sista blo iumi Hulda kasem aim blo hem.
