“Taem mi sorre and barava feel iusles, mi kasem encouragement from Jehovah taem mi lisin lo olketa song lo JW Broadcasting^®.”—Lorraine, U.S.A.

“Olketa Kingdom song” hem part lo worship blo olketa Christian. (Col. 3:16) If iu lane for memorizim olketa song hia, olketa savve helpem iu nomata iu no garem songbuk or wanfala electronic device. Trae followim olketa idea hia for helpem iu for memorizim olketa song.

• Readim gud olketa word for understandim mining. If iu understandim mining blo samting, bae hem isi for iu rememberim. Lyrics blo evri song blo iumi, and lyrics blo olketa original song and olketa song blo olketa pikinini, hem available lo jw.org. Anda Library sekson, go lo Music.

• Raetem lyrics blo olketa song. Diswan bae helpem iu for rememberim gud olketa lyrics hia.—Deut. 17:18.

• Practice for singsing big. Readim or singim wanfala song staka taem.

• Testim memory blo iu. Trae for rememberim olketa word taem iu no lukluk lo lyrics, and then lukim if iu rememberim gud.