1-2. Olketa wanem situation nao iumi feisim wea semsem witim olketa Jew bifor wea kam bak lo Jerusalem? (Lukim box “ Lo Taem blo Haggai, Zechariah, and Ezra.”)

 WASWE, samfala taem iu wari abaotem future? Maet iu lusim waka blo iu for selen and iu wari abaotem hao for provaed for famili blo iu. Maet iu wari tu abaotem safety blo famili bikos gavman lo kantri no stable, or pipol againstim preaching waka blo iumi. Hao, iu feisim eni issue olsem? If olsem, bae iu hapi taem iu lukim hao Jehovah helpem olketa Israelite bifor wea deal witim semkaen problem.

² Olketa Jew wea stap lo Babylon for full laef olketa need for garem strong faith for lusim comfortable laef wea olketa garem, and for travel go lo kantri wea staka lo olketa no savve abaotem. No longtaem bihaen olketa arrive lo Jerusalem, olketa feisim hard taem saed lo selen, gavman blo kantri no stable, and pipol againstim olketa. Datwan mekem samfala for no focus lo waka for buildim bak temple blo Jehovah. So, lo samting olsem 520 B.C.E., Jehovah sendem profet Haggai and Zechariah for encouragem olketa for strong for duim moa waka blo hem. (Hag. 1:1; Zech. 1:1) Olsem iumi bae lukim, gud samting kamaot from encouragement wea tufala profet hia givim. Bat, klosap 50 year bihaen, olketa Jew wea kam bak from Babylon needim encouragement moa. So, Ezra, man wea garem skill for copyim Law, hem kam lo Jerusalem from Babylon for encouragem olketa for focus lo tru worship.—Ezra 7:1, 6.

3. Wat nao olketa kwestin wea iumi bae storyim? (Provebs 22:19, SIPB)

 ³ Olketa profesi wea Haggai and Zechariah talem helpem pipol blo God bifor for gohed trustim Jehovah nomata enemy againstim olketa. Olketa profesi hia savve helpem iumi tu distaem for gohed trustim hao Jehovah bae sapotim iumi nomata taem laef hem hard. (Readim Provebs 22:19, SIPB.) Taem iumi ting raonem message blo God wea Haggai and Zechariah talemaot, and example blo Ezra, iumi bae kasem ansa for olketa kwestin hia: Hao nao olketa hard samting wea kasem olketa Jew affectim olketa? Lo taem wea laef hard, why nao iumi shud gohed focus lo will blo God? And wat nao iumi savve duim for gohed trustim Jehovah lo olketa taem wea no isi?

4-5. Wat nao maet mekem olketa Jew for no gohed strong lo waka for buildim bak temple?

⁴ Taem olketa Jew arrive lo Jerusalem, olketa garem staka waka for duim. Stretawe, olketa buildim moa altar blo Jehovah and faondeson blo temple. (Ezra 3:1-3, 10) Bat gogo olketa lusim nao strong tingting wea olketa garem firstaem for duim datfala waka. Why nao olsem? Hem bikos olketa need for buildim tu haos blo olketa, wakem garden, and provaedem kaikai for famili. (Ezra 2:68, 70) And tu, olketa kasem hard taem from olketa enemy, wea plan for stopem waka for buildim bak temple.—Ezra 4:1-5.

⁵ Olketa Jew wea kam bak kasem tu hard taem saed lo selen and hard taem bikos rul blo Persia wea olketa stap anda lo hem lo datfala taem, hem no stable. Afta King Cyrus blo Persia dae lo 530 B.C.E., King Cambyses wea rul bihaen lo hem leadim army blo hem for faet againstim Egypt. Taem olketa gogo for Egypt, olketa soldia go pas lo territory lo Israel and luk olsem olketa demandim kaikai, wata, and ples for stap from olketa Israelite, and datwan mekem laef blo olketa hard go moa. Then taem next king Darius I start for rul, pipol still protest and againstim gavman. Olketa situation hia mekem staka wea kam bak from Babylon for wari abaotem hao for provaed for famili blo olketa. From olketa hard samting hia, samfala Jew tingse hem no raet taem yet for olketa buildim temple blo Jehovah.—Hag. 1:2.

6. Olsem Zechariah 4:6, 7 storyim, wat nao olketa nara hard taem wea olketa Jew kasem, and wat nao Zechariah assurem olketa abaotem?

⁶ Readim Zechariah 4:6, 7. Witim problem saed lo selen and gavman wea no stable, olketa Jew mas deal tu witim persecution. Lo 522 B.C.E., olketa enemy succeed lo plan blo olketa for banim waka for buildim bak temple blo Jehovah. Bat Zechariah assurem olketa Jew hao Jehovah bae iusim spirit blo hem wea garem bigfala paoa for helpem olketa for gohed, nomata olketa kasem hard taem. And lo 520 B.C.E., King Darius liftim ap datfala ban for buildim bak temple, and hem givim selen for sapotim and talem olketa governor for help.—Ezra 6:1, 6-10.

7. Taem olketa Jew wea kam bak focus lo will blo God, wat nao olketa blessing wea olketa kasem?

 ⁷ Jehovah iusim Haggai and Zechariah for talem promis blo hem lo olketa Jew hao hem bae helpem olketa, if olketa focus lo waka for buildim bak temple. (Hag. 1:8, 13, 14; Zech. 1:3, 16) Datwan encouragem olketa Jew for startim bak moa waka for buildim bak temple lo 520 B.C.E. and completim temple insaed faev year nomoa. From olketa Jew focus lo will blo God nomata laef blo olketa no isi, Jehovah sapotim olketa lo physical wei and lo spiritual wei tu. From datwan, olketa  gohed hapi for worshipim Jehovah.—Ezra 6:14-16, 22.

8. Hao nao Haggai 2:4 helpem iumi for focus lo waka blo God? (Lukim tu footnote.)

⁸ From big trabol barava klosap, iumi luksavve hem important for obeyim komand for duim preaching waka. (Mark 13:10) Bat maet hem no isi for iumi focus lo ministry if iumi kasem problem saed lo selen or pipol againstim preaching waka blo iumi. Wat nao savve helpem iumi for focus lo waka blo Jehovah? Iumi need for trustim hao “Jehovah, komanda blo olketa army” b hem stap witim iumi. Hem bae helpem iumi if iumi gohed focus lo waka blo hem winim wanem iumiseleva laekem. So iumi no need for fraetem eni samting.—Readim Haggai 2:4.

9-10. Hao nao wanfala couple experiencem wat Jesus talem lo Matthew 6:33 hem tru?

⁹ Tingim example blo Oleg and Irina, c wanfala couple wea pioneer. Bihaen tufala muv for help lo wanfala kongregeson lo nara area, tufala lusim waka blo tufala for selen bikos economy lo kantri hem barava nogud. Nomata tufala no faendem waka for samting olsem wan year, tufala luksavve Jehovah helpem tufala and samfala taem tufala receivim help from olketa brata and sista. Hao nao tufala deal witim datfala hard situation? Oleg, wea firstaem hem depress sei: “From mifala busy lo ministry datwan helpem mifala for focus lo barava important samting lo laef.” Taem hem and waef gohed lukaotem waka, tufala gohed busy lo ministry.

¹⁰ Wanday taem tufala kam bak lo haos from preaching, tufala faendaot wanfala klos fren hem travel kam for samting olsem 160 kilometer (100 mi) and tekem kam tufala basket  kaikai for tufala. Oleg sei: “Lo datfala day mifala luksavve hao Jehovah lukaftarem mitufala gud, and hao olketa lo kongregeson barava kea for mitufala tu. Mifala sure hao Jehovah no savve forgetim pipol blo hem nomata olketa tingse situation blo olketa hem hopeles.”—Matt. 6:33.

11. Wat nao iumi savve expectim if iumi focus lo waka wea God givim for iumi duim?

¹¹ Jehovah laekem iumi for focus lo waka for mek-disaepol wea savve sevem laef. Olsem iumi storyim lo  paragraf 7, Haggai encouragem pipol blo Jehovah for startim bak moa waka for buildim temple. If olketa duim olsem, Jehovah promis for ‘blessim olketa.’ (Hag. 2:18, 19) Iumi tu savve sure hao Jehovah bae blessim iumi if iumi focus lo waka wea hem givim for iumi duim.

12. Why nao Ezra and olketa Jew wea travel witim hem needim strong faith?

¹² Lo 468 B.C.E., Ezra travel witim second grup blo olketa Jew from Babylon go bak lo Jerusalem. For duim diswan, Ezra and olketa Jew hia need for garem strong faith. Olketa bae travel followim olketa road wea danger, and karem staka gold and silver wea king donatem for wakem temple. So hem isi for olketa man for steal attakim olketa. (Ezra 7:12-16; 8:31) And tu, olketa luksavve Jerusalem hem no sef. Staka pipol no stap lo datfala city, and olketa wall and gate blo hem needim repair. Wat nao iumi savve lanem from example blo Ezra lo hao for strongim trust blo iumi lo Jehovah?

13. Wat nao strongim trust blo Ezra lo Jehovah? (Lukim tu footnote.)

¹³ Ezra bin lukim hao Jehovah helpem pipol blo Hem lo taem blo test. Staka year go finis, lo 484 B.C.E., luk olsem Ezra stap lo Babylon taem King Ahasuerus givim order for killim dae evri Jew wea stap anda lo rul blo Persia. (Esther 3:7, 13-15) So laef blo Ezra and evri Jew stap lo danger! Taem olketa herem diswan, olketa wari tumas so olketa fasting and gohed for krae taem olketa prea lo Jehovah for help. (Esther 4:3) Imaginim hao Ezra and olketa Jew mas feel taem olketa wea plan for killim olketa, olketa nao dae! (Esther 9:1, 2) For sure, wat happen lo datfala taem redyim Ezra for olketa hard taem lo future, and strongim go moa trust blo hem lo hao Jehovah savve protectim pipol blo Hem. d

14. Wat nao wanfala sista lanem taem hem lukim hao Jehovah kea for hem lo hard taem wea hem feisim?

¹⁴ Taem iumi lukim hao Jehovah kea for iumi lo olketa hard taem, datwan savve strongim go moa trust blo iumi lo hem. Tingim example blo Anastasia, wea stap lo Eastern Europe. Hem finis from waka blo hem bikos hem laek for gohed neutral. Hem sei: “Diswan hem firstaem lo laef blo mi for no garem selen.” Hem sei tu: “Mi leavim datwan lo hand blo Jehovah and mi lukim hao hem kea for mi. If enitaem mi lusim moa waka blo mi, bae mi no fraet. If Dadi blo mi lo heven hem kea for mi tuday, hem bae kea for mi tumoro tu.”

15. Wat nao helpem Ezra for gohed trustim Jehovah? (Ezra 7:27, 28)

¹⁵ Ezra luksavve hand blo Jehovah stap witim hem. Taem Ezra ting abaotem staka taem wea Jehovah kea for hem finis, datwan helpem hem for gohed trustim Jehovah. Tingim disfala toktok: “Hand blo Jehovah, God blo mi, hem stap witim mi.” (Readim Ezra 7:27, 28.) Ezra talem semkaen toktok six taems insaed  Bible buk wea garem nem blo hem.—Ezra 7:6, 9; 8:18, 22, 31.

16. Lo wanem situation nao maet iumi savve lukim klia hand blo Jehovah lo laef blo iumi? (Lukim tu piksa.)

¹⁶ Jehovah savve helpem iumi taem iumi feisim wanfala hard situation. For example, taem iumi askem boss for taem off for attendim convention, or for adjustim taem blo iumi for waka mekem iumi savve attendim evri meeting, datwan givim chance for iumi lukim hand blo Jehovah lo laef blo iumi. Maet iumi bae sapraes for lukim hao Jehovah blessim datwan. Then, trust blo iumi lo Jehovah bae strong go moa.

17. Hao nao Ezra showim hem hambol taem hem feisim olketa hard situation? (Lukim piksa lo front page.)

¹⁷ Ezra hambol for prea lo Jehovah for help. Taem Ezra wari tumas abaotem olketa responsibility blo hem, hem hambol for prea lo Jehovah. (Ezra 8:21-23; 9:3-5) Attitude blo Ezra encouragem olketa narawan for sapotim hem and followim faith blo hem. (Ezra 10:1-4) So taem iumi wari tumas abaotem need or safety blo famili blo iumi, iumi mas barava trustim Jehovah and prea lo hem.

18. Wat nao savve helpem iumi for strongim go moa trust blo iumi lo Jehovah?

¹⁸ If iumi hambol for prea lo Jehovah for help and acceptim sapot from olketa brata and sista, trust blo iumi lo God bae strong go moa. Erika wea garem thrifala pikinini, gohed trustim Jehovah nomata taem hem feisim olketa barava hard taem. Insaed short taem nomoa, wanfala baby blo hem wea no born yet and hasband blo hem dae. Hem story olsem abaotem datfala situation: “Iu no savve hao nao bae Jehovah helpem iu. Iu savve kasem help lo olketa wei wea iu no expectim. Mi luksavve hao mi kasem ansa for staka prea blo mi taem olketa brata and sista talem and duim samting for helpem mi. If mi storyim situation blo mi lo olketa, olketa bae savve hao for helpem mi.”

19-20. Wat nao iumi savve lanem from olketa Jew wea no fit for go bak lo Jerusalem?

¹⁹ Iumi savve lane tu from gudfala example blo olketa Jew wea no fit for go bak lo Jerusalem. Samfala no fit for go bak bikos olketa olo, sik, or bikos lo situation blo famili. Nomata olsem, olketa hapi for sapotim olketa wea go bak taem olketa givim staka samting wea olketa bae needim for datfala temple. (Ezra 1:5, 6) Samting olsem 19 year afta first grup blo olketa Jew wea go bak lo Jerusalem,  olketa wea stap lo Babylon still sendem contribution go lo Jerusalem.—Zech. 6:10.

²⁰ Nomata iumi no fit for duim wat iumi laek for duim for Jehovah, iumi savve sure hao hem lukim evri samting wea iumi duim for hem from heart blo iumi. Hao nao iumi savve? Lo taem blo Zechariah, Jehovah talem profet blo hem for wakem wanfala kraon lo gold and silver. Hem bae wakem from gold and silver wea olketa Jew wea stap lo Babylon sendem kam. (Zech. 6:11) Datfala “spesol kraon” bae gohed remindim olketa lo olketa contribution wea olketa hapi for givim. (Zech. 6:14, ftn.) Iumi savve sure hao Jehovah bae no savve forgetim wat iumi duim for hem from heart blo iumi lo taem wea laef hem hard.—Heb. 6:10.

21. Wat nao bae helpem iumi for gohed trustim Jehovah nomata wanem bae happen lo future?

²¹ Iumi savve lo olketa last day distaem, iumi bae gohed feisim olketa hard situation, and olketa situation hia maet worse go moa lo future. (2 Tim. 3:1, 13) Nomata olsem, iumi no need for wari tumas. Tingim toktok blo Jehovah for pipol blo hem lo taem blo Haggai: “Mi stap witim iufala. . . . Iufala mas no fraet.” (Hag. 2:4, 5) Iumi tu savve sure Jehovah bae stap witim iumi if iumi gohed duim best blo iumi lo waka blo hem. Taem iumi applyim wat iumi laenem from olketa profesi blo Haggai and Zechariah and example blo Ezra, iumi bae gohed trustim Jehovah nomata wanem hard taem maet iumi feisim lo future.