STUDY ARTICLE 49
Waswe, Jehovah Bae Ansarem Olketa Prea blo Mi?
“Iufala bae kol kam lo mi and kam and prea lo mi, and mi bae lisin lo iufala.”—JER. 29:12.
SONG 41 Plis Herem Prea Bilong Mi
ARTICLE BAE STORYIM a
1-2. Why nao maet iumi tingse Jehovah no ansarem olketa prea blo iumi?
“FAENDEM hapi blo iu lo Jehovah, and bae hem givim iu samting wea heart blo iu laekem.” (Ps. 37:4) Datwan hem nambawan promis! Bat hao, iumi shud expectim Jehovah for givim evri samting wea iumi askem stretawe? Why nao disfala kwestin hem barava important? Tingim olketa example hia. Wanfala singol sista prea lo Jehovah for helpem hem kasem invitation for attendim Skul for Olketa Kingdom Evangelizer. Bat samfala year go pas, and hem still no kasem invitation. Wanfala young brata askem Jehovah for helpem hem recover from wanfala big sik mekem hem savve duim moa samting lo kongregeson. Bat health blo hem nating impruv. Wanfala dadi and mami prea for pikinini blo tufala for no lusim truth. Bat pikinini hia disaed for lusim Jehovah.
2 Maet iu tu prea lo Jehovah for wanfala samting, bat iu no receivim. From datwan, maet iu tingse Jehovah ansarem nomoa prea blo olketa narawan bat no prea blo iu. Or maet iu tingse iu mas duim wanfala rong samting. Hem nao hao sista Janice b hem feel. Hem and hasband blo hem prea lo Jehovah bikos tufala laekem tumas for waka lo Bethel. Hem sei: “Mi barava sure hao no long taem nomoa bae mitufala waka lo Bethel.” Bat bihaen samfala year, tufala still no kasem invitation for go lo Bethel. Janice sei: “Mi sorre and konfius. Mi wonder wat nao mi duim wea mekem Jehovah no hapi lo mi. Mi prea staka taem and talem Jehovah hao mi laek waka lo Bethel. Why nao hem no ansarem prea blo mi?”
3. Wat nao bae iumi discussim lo disfala article?
3 Samfala taem, maet iumi wonder if Jehovah lisin lo olketa prea blo iumi. Samfala faithful man lo bifor tu feel olsem. (Job 30:20; Ps. 22:2; Hab. 1:2) Wat nao savve helpem iu for sure hao Jehovah bae no ignorem olketa prea blo iu? (Ps. 65:2) For kasem ansa for datfala kwestin, bae iumi storyim firstaem ansa for olketa kwestin hia: (1) Wat nao Jehovah bae duim for iumi? (2) Wat nao Jehovah laekem iumi for duim? (3) Why nao maet iumi need for adjustim samfala samting wea iumi prea abaotem?
WAT NAO JEHOVAH BAE DUIM FOR IUMI?
4. Olsem Jeremiah 29:12 talem, wat nao Jehovah promis for duim?
4 Jehovah promis for lisin lo olketa prea blo iumi. (Readim Jeremiah 29:12.) God lovem olketa wea faithful for worshipim hem so bae hem no savve ignorem prea blo olketa. (Ps. 10:17; 37:28) Bat diswan no minim bae hem givim evri samting wea iumi askem. Maet iumi need for weit go kasem niu world bifor iumi kasem samfala samting wea iumi askem lo hem.
5. Wat nao Jehovah tingim taem hem lisin lo olketa prea blo iumi? Explainim.
5 Jehovah tingim plan blo hem taem hem lisin lo olketa prea blo iumi. (Isa. 55:8, 9) Wanfala part lo plan blo hem, hem for disfala earth fulap witim pipol wea hapi for obey and stap anda lo rul blo hem. Bat Satan sei olketa pipol bae hapi if olketa rulim olketa seleva. (Gen. 3:1-5) For pruvim wat Satan talem hem no tru, Jehovah allowim olketa man for rulim olketa seleva. Bat, rulership blo olketa man hem kosim staka problem wea iumi kasem distaem. (Eccl. 8:9) Iumi luksavve Jehovah bae no finisim evri problem hia distaem. If Jehovah duim olsem, samfala bae tingse rulership blo olketa man hem fit for solvem olketa problem blo iumi.
6. Why nao iumi sure hao Jehovah lovem iumi and hem fair taem hem ansarem olketa prea blo iumi?
6 Jehovah maet ansarem olketa sem prea lo difren wei. For example, taem King Hezekiah barava sik, hem begim Jehovah for helpem hem gud bak. Jehovah ansarem prea blo hem taem hem healim hem. (2 Ki. 20:1-6) Bat, taem aposol Paul begim Jehovah for aotem “wanfala nila wea stap long body” blo hem, wea maet hem wanfala health problem, Jehovah no finisim datwan. (2 Cor. 12:7-9) Tingim tu example blo aposol James and Peter. King Herod laek for killim tufala dae. Kongregeson prea for Peter and luk olsem olketa prea for James tu. Gogo, olketa killim dae James, bat wanfala angel rescuem Peter. (Acts 12:1-11) Maet iumi wonder, ‘Why nao Jehovah sevem Peter bat James nomoa?’ Bible no talem eniting abaotem datwan. c Wat iumi sure lo hem nao, olketa wei blo Jehovah hem evritaem “followim justice.” (Deut. 32:4) And iumi savve hao Jehovah lovem Peter and James. (Rev. 21:14) Samfala taem, Jehovah maet no ansarem olketa prea blo iumi lo hao iumi expectim. Bat bikos iumi sure hao Jehovah lovem iumi and hem fair taem hem ansarem olketa prea blo iumi, iumi no kwestinim hao hem chus for ansarem iumi.—Job 33:13.
7. Wat nao iumi trae for avoidim, and why nao olsem?
7 Iumi trae for no comparem situation blo iumi witim situation blo narawan. For example, maet iumi askem Jehovah for helpem iumi lo wanfala samting, bat iumi no kasem datwan. Gogo, iumi herem samwan prea for sem samting, and luk olsem Jehovah ansarem prea blo hem. Sista Anna hem experiencem datwan. Hem prea for hasband blo hem Matthew for maet recover from cancer. Lo semtaem, tufala olo sista tu sik lo cancer. Staka taem Anna prea for Matthew and tufala sista hia. Tufala sista hia recover bat Matthew hem dae. Firstaem, Anna wonder if Jehovah nao helpem tufala sista hia for gud bak. And if olsem, why nao Jehovah no ansarem prea blo hem for hasband blo hem recover? Really, iumi no savve why tufala sista hia recover. Bat wat iumi savve nao Jehovah bae finisim evri samting wea mekem iumi safa distaem, and hem barava laek for resurrectim olketa fren blo hem wea dae.—Job 14:15
8. (a) Olsem Isaiah 43:2 storyim, wat nao Jehovah duim for helpem iumi? (b) Hao nao prea savve helpem iumi taem iumi feisim hard taem? (Lukim video Prea Savve Helpem Iumi for No Givap lo Olketa Hard Taem.)
8 Jehovah bae evritaem helpem iumi. Jehovah hem Dadi wea lovem iumi, so hem no laek for lukim iumi safa. (Isa. 63:9) Nomata olsem, hem no preventim evri hard situation from iumi, wea olsem olketa river or fire. (Readim Isaiah 43:2.) Bat, hem promis for helpem iumi for winim olketa hard situation hia. And nomata wanem hard taem iumi feisim distaem, Jehovah bae evritaem mek sure iumi gohed faithful for worshipim hem. And tu, Jehovah bae givim holy spirit for strongim iumi for no givap. (Luke 11:13; Phil. 4:13) From datwan, iumi savve sure hem bae givim wat iumi needim for no givap and for gohed faithful lo hem. d
WAT NAO JEHOVAH LAEKEM IUMI FOR DUIM?
9. Olsem James 1:6, 7 storyim, why nao iumi need for trustim hao Jehovah bae helpem iumi?
9 Jehovah laekem iumi for trustim hem. (Heb. 11:6) Samfala taem, iumi maet feel olsem olketa problem blo iumi hem barava hard for iumi deal witim. Maet iumi even tingse Jehovah bae no helpem iumi. Bat Bible assurem iumi hao paoa blo God savve helpem iumi for “klae ovam wanfala wall.” (Ps. 18:29) So instead for daot, iumi shud garem faith and trustim Jehovah bae ansarem olketa prea blo iumi.—Readim James 1:6, 7.
10. Storyim example wea showim hao iumi savve duim samting followim prea blo iumi.
10 Jehovah laekem iumi for duim samting followim prea blo iumi. For example, maet wanfala brata askem Jehovah for helpem hem for tekem taem off from waka, mekem hem attendim convention. Hao nao maet Jehovah ansarem datfala prea? Hem maet helpem datfala brata for no fraet for go askem boss blo hem. Bat datfala brata need for go lukim boss and ask for tekem taem off. Hem maet need for go ask staka taem. Maet hem even askem nara wakaman for tufala exchange shift. And if no eni wei nao, maet hem savve ask for tekem unpaid leave.
11. Why nao iumi shud prea staka taem abaotem wat hem important lo iumi?
11 Jehovah laekem iumi for prea staka taem abaotem wat hem important lo iumi. (1 Thess. 5:17) Jesus showimaot samfala samting wea iumi ask for hem bae iumi no kasem stretawe. (Luke 11:9) So no givap, bat gohed prea lo Jehovah from heart. (Luke 18:1-7) Taem iumi gohed for prea abaotem wanfala samting, iumi showim lo Jehovah hao datwan hem important lo iumi. And iumi showim tu dat iumi garem faith lo hao hem savve helpem iumi.
WHY NAO MAET IUMI NEED FOR ADJUSTIM SAMFALA SAMTING WEA IUMI PREA ABAOTEM?
12. (a) Taem iumi prea and ask for samting, wat nao wanfala kwestin wea iumi shud ting raonem, and why nao olsem? (b) Hao nao iumi savve mek sure iumi respectim Jehovah taem iumi prea lo hem? (Lukim box “ Hao, Mi Respectim Jehovah Taem Mi Prea and Askem Hem Samting?”)
12 If iumi no receivim wat iumi prea for hem, maet iumi need for ting raonem thrifala kwestin. First wan, ‘Waswe mi prea for stret samting?’ Staka taem, iumi tingse iumi savve lo samting wea hem best for iumi. Bat maet olketa samting wea iumi askem bae no helpem iumi lo laef. If iumi prea abaotem wanfala problem, maet best solution for datfala problem hem difren from wat iumi askem. And samfala samting wea iumi askem, maet no fitim will blo Jehovah. (1 John 5:14) Tingim example blo datfala dadi and mami wea iumi storyim finis. Tufala prea lo Jehovah for helpem pikinini blo tufala for no lusim truth. Datwan luk olsem hem stret samting for askem. Bat, Jehovah bae no forcem eniwan for worshipim hem. Hem laekem each wan lo iumi, includim olketa pikinini blo iumi, for disaed seleva for worshipim hem. (Deut. 10:12, 13; 30:19, 20) So datfala parents savve askem Jehovah for helpem tufala for teach and kasem heart blo pikinini, mekem pikinini bae lovem and fren witim Jehovah.—Prov. 22:6; Eph. 6:4.
13. Olsem Hebrew 4:16 storyim, wat taem nao Jehovah bae helpem iumi? Explainim.
13 Second kwestin hem, ‘Waswe, hem raet taem for Jehovah givim wat mi askem lo hem?’ Iumi maet tingse iumi need for kasem ansa for olketa prea blo iumi stretawe. Bat, Jehovah nao savve lo best taem for helpem iumi. (Readim Hebrew 4:16.) Taem iumi no stretawe receivim wat iumi askem, maet iumi tingse ansa blo Jehovah hem ‘No.’ Bat maet ansa blo hem ‘Nomoa yet.’ For example, tingim datfala young brata wea prea lo Jehovah for helpem hem kamap gud from sik blo hem. If Jehovah duim mirakol for kiurim hem, Satan bae sei datfala brata gohed worshipim Jehovah only bikos Jehovah healim hem. (Job 1:9-11; 2:4) Tingim tu hao Jehovah markem finis taem for hem kiurim evri difren kaen sik. (Isa. 33:24; Rev. 21:3, 4) And go kasem datfala taem, Jehovah bae no duim mirakol for healim olketa sik blo iumi. So datfala brata savve askem Jehovah for strongim hem and for helpem hem garem peace lo mind mekem hem savve deal witim datfala sik, and gohed faithful lo God.—Ps. 29:11.
14. Wat nao iumi lanem from experience blo Janice?
14 Tingim Janice wea iumi storyim finis, wea prea lo Jehovah abaotem Bethel service. Afta faev years, hem just luksavve Jehovah bin ansarem olketa prea blo hem. Hem sei: “Jehovah iusim datfala taem for teachim and trainim mi. Mi need for strongim trust blo mi lo hem. Mi need for impruvim personal study habit blo mi. And mi need for lane for hapi, nomata wat nao mi duim lo service blo Jehovah.” Gogo, Janice and hasband blo hem kasem invitation for duim circuit waka. Janice ting go bak and sei: “Jehovah bin ansarem olketa prea blo mi, bat lo wei wea mi no expectim. Hem tek-taem for mi understandim hao ansa wea Jehovah givim hem barava spesol. Mi thankiu lo Jehovah for givim mi disfala chance for experiencem hao hem lovem mi and kaen lo mi.”
If iu tingse Jehovah no ansarem prea blo iu, then hem gud for prea abaotem olketa nara samting (Lukim paragraf 15) f
15. Why nao maet iumi need for no specific tumas lo prea blo iumi? (Lukim tu piksa.)
15 Third kwestin hem, ‘Hao, prea blo mi specific tumas?’ Nomata hem gud for specific lo prea blo iumi, maet samfala taem hem gud for no specific tumas mekem iumi lukim wat nao Jehovah laekem iumi for duim. Tingim datfala singol sista wea prea lo Jehovah for helpem hem kasem invitation for attendim Skul for Olketa Kingdom Evangelizer. Hem laek for attendim datfala skul mekem hem serve lo ples wea garem need. So taem hem gohed prea and weit for kasem invitation for attendim datfala skul, hem savve askem Jehovah tu for helpem hem luksavve lo olketa wei for hem expandim ministry blo hem. (Acts 16:9, 10) Then hem savve duim samting followim prea blo hem taem hem askem circuit overseer, if eni kongregeson wea klosap hem needim samfala pioneer moa. Or hem savve raet lo eni branch and ask if need hem stap lo eni ples for samfala Kingdom pablisa. e
16. Wat nao iumi savve sure lo hem?
16 Olsem iumi lanem finis, iumi sure hao Jehovah lovem iumi and hem fair taem hem ansarem olketa prea blo iumi. (Ps. 4:3; Isa. 30:18) Samfala taem, maet iumi no kasem ansa wea iumi expectim. Bat Jehovah bae no ignorem olketa prea blo iumi. Hem lovem iumi tumas. Hem bae no savve lusim iumi. (Ps. 9:10) So gohed for “evritaem trustim hem,” and prea lo hem from heart.—Ps. 62:8.
SONG 43 Prea for Talem Thankiu
a Disfala article bae explainim why iumi savve trustim hao Jehovah lovem iumi and hem fair taem hem ansarem olketa prea blo iumi.
b Mifala changem samfala nem.
c Lukim article “Waswe, Iumi Trustim Jehovah lo Evri Samting?” lo Wastaoa blo February 2022, par. 3-6.
d For samfala information moa abaotem hao Jehovah helpem iumi for deal witim olketa hard taem, watchim video Prea Savve Helpem Iumi for No Givap lo Olketa Hard Taem lo jw.org.
e If iu laek for kasem olketa instruction lo hao iu savve serve lo nara branch territory, lukim Organize for Duim Will blo Jehovah, chap. 10, par. 6-9.
f OLKETA PIKSA: Tufala sista prea bifor tufala apply for Skul for Olketa Kingdom Evangelizer. Gogo, wanfala kasem invitation, bat narawan nomoa. Datfala sista wea no kasem invitation no feel nogud, bat hem prea lo Jehovah for helpem hem luksavve lo olketa nara wei for hem expandim ministry blo hem. Then hem raet lo branch office for talem hao hem willing for serve lo ples wea garem need.
