Wat nao bae helpem iu for duim gud personal study? Diswan hem samfala idea wea savve helpem iu for faendem gud ples for study.

• Chusim wanfala naes ples for study. If fitim, faendem ples wea neat and klin, and garem inaf laet for read gud. Iusim wanfala desk or tebol, or chusim wanfala naes ples aotsaed.

• Faendem wanfala kwaet ples. Jesus chus for prea lo early “morning” lo “ples wea kwaet.” (Mark 1:35) If hem hard for iu garem kwaet ples for study, hem gud for story witim famili or olketa narawan wea iufala stap tugeta for letem olketa savve lo taem blo iu for study and askem olketa for no disturbim iu.

• Duim samting for helpem iu focus. No letem eni samting for disturbim iu. If iu iusim phone or tablet for study, offem olketa notification or onem aeroplane mode mekem no eniting disturbim iu. And if during lo study iu tingim wanfala samting wea iu need for duim, hem gud for iu raetem datwan mekem iu duim bihaen. If iu faendem hem hard for concentrate, stop lelebet and wakabaot, or standap and duim olketa stretch.