1-2. Samfala taem, hao nao maet pipol treatim iumi nogud?

 JESUS storyim wanfala illustration abaotem widow woman wea gohed for askem wanfala judge for helpem hem kasem justice. For sure, olketa disaepol blo Jesus minim gud datfala story bikos staka pipol lo datfala taem safa from olketa narawan treatim olketa nogud. (Luke 18:​1-5) Iumi tu minim gud datfala story bikos samfala taem iumi mas deal witim injustice.

² Distaem staka pipol deal witim wei wea pipol heitim olketa, ting daonem olketa, and treatim olketa nogud, so iumi no sapraes taem pipol treatim iumi olsem tu. (Eccl. 5:8) Bat, wanfala samting wea maet iumi no expectim, hem taem wanfala brata or sista duim samting wea mekem iumi feel nogud. Hem tru, olketa brata and sista blo iumi no olsem olketa wea persecutim iumi. Really olketa no prefect, dastawe situation olsem savve kamap. Iumi savve lanem staka samting from wat Jesus duim taem pipol againstim hem. If iumi savve patient witim pipol wea persecutim iumi, then datwan minim iumi shud barava patient witim olketa brata and sista blo iumi! Taem pipol lo world or olketa brata and sista treatim iumi nogud, Jehovah feel hao? Hao, Jehovah kea abaotem wat hem happen lo iumi?

3. Hao, Jehovah kea abaotem iumi taem iumi safa from injustice, and why nao olsem?

³ Jehovah barava kea abaotem hao pipol treatim iumi. “Jehovah hem lovem justice.” (Ps. 37:28) Jesus promisim iumi dat Jehovah bae “barava duim stret samting . . . kwiktaem” and lo barava raet taem. (Luke 18:​7, 8) And klosap nao hem  bae finisim evri wei for safa and finis evri injustice.—Ps. 72:​1, 2.

4. Wat nao Jehovah provaedem for helpem iumi distaem?

⁴ Taem iumi gohed weitim datfala taem wea evri samting bae raeteous, Jehovah helpem iumi for deal witim injustice wea iumi kasem. (2 Pet. 3:13) Hem teachim iumi hao for avoidim wei for duim samting wea no wise taem samwan treatim iumi nogud. Jehovah provaedem perfect example blo Son blo hem Jesus, lo hao for iumi deal witim injustice. And Jehovah givim iumi olketa gud advaes lo Bible for followim taem samwan treatim iumi nogud.

KONTROLEM HAO IU REACT TAEM SAMWAN TREATIM IU NOGUD

5. Why nao iumi mas kontrolem hao iumi react taem pipol treatim iumi nogud?

⁵ Maet iumi barava feel nogud and safa from wei wea narawan treatim iumi nogud. (Eccl. 7:7) Olketa faithful servant blo Jehovah bifor, olsem Job and Habakkuk feel olsem tu. (Job 6:​2, 3; Hab. 1:​1-3) Hem normal for feel olsem, bat iumi need for barava kontrolem hao iumi react mekem iumi no duim samting wea karangge.

6. Wat nao iumi lanem from example blo Absalom? (Lukim tu piksa.)

⁶ Taem iumi kasem injustice, maet iumi laek for stretem datfala situation followim tingting blo iumiseleva. If iumi duim datwan, maet hem mekem situation for kamap worse. Tingim example blo Absalom, son blo King David. Absalom kros tumas taem haf brata blo hem Amnon, reipim sista blo hem, Tamar. For followim wat Law blo Moses talem, Amnon shud dae for wat hem duim. (Lev. 20:17) Nomata hem fitim for Absalom kros, hem shud no deal witim datfala situation followim tingting blo hemseleva.—2 Sam. 13:​20-23, 28, 29.

7. Taem man wea raetem psalm lukim injustice, hao nao datwan affectim hem?

⁷ Taem pipol wea duim nogud samting no kasem eni panis, maet iumi daotem if hem gud for iumi duim stret samting. Wanfala man wea raetem psalm lukim dat nomata wicked pipol spoelem olketa wea raeteous, olketa gohed for kasem gud samting nomoa. Hem sei: “Wicked pipol olsem nao, evriting isi nomoa for olketa.” (Ps. 73:12) From hem barava feel nogud lo injustice wea hem lukim, klosap hem lusim trust wea hem garem dat hem bae  kasem gud samting taem hem servem Jehovah. Hem sei: “Taem mi trae for ting raonem for mi minim, hem hard tumas for mi.” (Ps. 73:​14, 16) And hem sei tu: “Bat mi, leg blo mi klosap nomoa lusim stretfala road, mi klosap foldaon taem mi wakabaot.” (Ps. 73:2) Wanfala brata wea iumi maet kolem hem Alberto hem feisim sem samting tu.

8. Hao nao injustice hem affectim wanfala brata?

⁸ Samfala brata accusim Brata Alberto and sei hem stealim selen blo kongregeson, nomata hem no duim datwan. From datwan, Alberto lusim olketa privilege blo hem and staka lo kongregeson wea herem datfala story no respectim hem. Hem sei: “Mi feel nogud tumas, mi gohed kros, and mi feel wikdaon.” Hem letem wei wea hem feel nogud for affectim spiritual saed blo hem, and gogo hem inactive for faev years. Disfala experience showim wat hem savve happen if iumi gohed for feel nogud lo injustice wea iumi kasem.

FOLLOWIM EXAMPLE BLO JESUS LO HAO HEM DEAL WITIM INJUSTICE

9. Wat nao olketa injustice wea Jesus deal witim? (Lukim tu piksa.)

⁹ Jesus showimaot perfect example lo hao for deal witim injustice. Tingim hao famili blo hem and olketa narawan treatim hem nogud.  Olketa relative blo hem wea no biliv, accusim hem and sei hem karangge, olketa bigman blo religion sei hem waka witim olketa demon, and olketa soldia blo Rome tok spoelem hem, hitim hem, and gogo killim hem dae tu. (Mark 3:​21, 22; 14:55; 15:​16-20, 35-37) Nomata Jesus barava safa from datfala injustice wea hem kasem, hem no duim eni samting for pei bak. Wat nao iumi savve lanem from example blo Jesus?

10. Hao nao Jesus deal witim injustice wea hem kasem? (1 Peter 2:​21-23)

¹⁰ Readim 1 Peter 2:​21-23. a Jesus showim perfect example for iumi followim taem olketa narawan treatim iumi nogud. Hem savve lo taem for kwaet and taem for story. (Matt. 26:​62-64) Hem no ansarem evri false story wea olketa talem abaotem hem. (Matt. 11:19) And taem hem story, hem no tok spoelem or threatenim olketa wea persecutim hem. Jesus kontrolem hemseleva bikos “hem trustim God wea judge long raeteous wei.” Hem luksavve tingting blo Jehovah nao hem moa important. Hem trustim dat Jehovah bae deal witim injustice lo raet taem.

11. Wat nao samfala wei wea iumi savve kontrolem toktok blo iumi? (Lukim tu olketa piksa.)

¹¹ Iumi savve followim example blo Jesus taem iumi kontrolem wat iumi talem taem narawan treatim iumi nogud. Samfala injustice hem smol, so iumi no need for talem or duim eni samting nomoa. Or maet iumi disaed for no talem eni samting for avoidim wei for mekem situation worse. (Eccl. 3:7; Jas. 1:​19, 20) Bat lo olketa narataem, maet iumi need for tokaot for defendim samwan wea olketa treatim hem nogud or iumi need for  defendim truth. (Acts 6:​1, 2) If iumi disaed for talem samting, iumi shud traem best for story lo wei wea hambol and showimaot respect.—1 Pet. 3:15. b

12. Hao nao iumi showimaot iumi trustim “God wea judge long raeteous wei”?

¹² Iumi savve followim tu example blo Jesus taem iumi trustim “God wea judge long raeteous wei.” Taem olketa narawan treatim iumi nogud or no minim iumi, iumi trustim dat Jehovah savve lo wat hem happen. Datwan helpem iumi for deal witim datfala situation bikos iumi savve Jehovah bae stretem evri samting. Taem iumi leavim evriting lo hand blo Jehovah, datwan helpem iumi for no gohed kros or heitim narawan. Olketa negative feeling olsem savve mekem iumi for ova react, spoelem hapi blo iumi, and spoelem frenship blo iumi witim Jehovah.—Ps. 37:8.

13. Wat nao savve helpem iumi for gohed deal witim injustice?

¹³ Tru nao, hard for iumi barava followim example blo Jesus lo prefect wei. Samfala taem, iumi maet talem or duim samting wea iumi regretim bihaen. (Jas. 3:2) And samfala injustice maet barava hard for deal witim bikos hem spoelem iumi lo physical wei and affectim full laef blo iumi. If iu bin kasem kaen situation olsem, remember hao Jehovah savve wat iu gohed for deal witim. And Jesus barava minim feeling blo iu, bikos hem tu safa from pipol treatim hem nogud. (Heb. 4:​15, 16) Jehovah provaedem perfect example blo Jesus for helpem iumi, bat hem givim tu olketa gud advaes for helpem iumi taem pipol treatim iumi nogud. Distaem bae iumi storyim tufala verse lo buk blo Rome wea savve helpem iumi.

“LETEM GOD NAO FOR JUDGEM OLKETA”

14. Wat nao hem minim for “letem God nao for judgem olketa”? (Rome 12:19)

¹⁴ Readim Rome 12:19. Taem aposol Paul talem olketa Christian for “letem God nao for judgem olketa,” wat nao hem minim? Context blo disfala verse showim hao Jehovah nao hem Judge. Iumi letem Jehovah for Judge, taem iumi leavim injustice wea iumi kasem lo hand blo hem, for hem stretem lo taem wea hem markem and lo own wei blo hem. Bihaen samwan treatim nogud wanfala brata wea nem blo hem John, hem sei: “Mi mas faet againstim feeling for laek handolem datfala situation lo wei wea miseleva tingse hem stret. Rome 12:19 helpem mi for patient and trustim Jehovah.”

15. Why nao hem best for weitim Jehovah for stretem wanfala situation?

¹⁵ Iumi savve kasem gud samting taem iumi weitim Jehovah for stretem datfala situation. If iumi duim datwan, bae iumi no need for kare hevi lo datfala problem and feel nogud from iumi trae for stretem seleva. Jehovah promis for helpem iumi. Hem olsem Jehovah hem sei, ‘Leavim mi deal witim datfala injustice; Bae mi tek kea lo evriting.’ If iumi acceptim promis blo Jehovah for hem nao “changem bak nogud samting,” datwan bae helpem iumi for let go lo datfala problem and trustim hem bae stretem lo best wei. Datwan nao helpem Brata John wea iumi storyim finis. Hem sei, “If mi just weit lo Jehovah for stretem datfala problem, bae hem duim lo wei wea winim hao mi bae duim.”

GOHED DUIM GUD SAMTING FOR WINIM NOGUD SAMTING

16-17. Hao nao prea savve helpem iumi for ‘winim olketa nogud samting’? (Rome 12:21)

¹⁶ Readim Rome 12:21. Paul encouragem olketa Christian for ‘gohed for duim gud samting  mekem olketa winim olketa nogud samting.’ Lo Sermon blo Jesus lo Maunten, hem sei: “Gohed lovem olketa enemy bilong iufala and for prea for olketa wea spoelem iufala.” (Matt. 5:44) Hem nao wat Jesus duim. Tingim hao Jesus hem safa taem olketa soldia blo Rome nilam hem lo post. Hem hard for iumi imaginim pain wea hem kasem, wei wea olketa mek shame lo hem, and injustice wea hem deal witim.

¹⁷ Jesus no letem injustice wea kasem hem for winim hem. Instead for hem cursim olketa soldia, hem prea olsem: “Dadi, forgivim olketa bikos olketa no savve long wanem olketa duim.” (Luke 23:34) Wei for prea for olketa wea treatim iumi nogud savve helpem iumi for no kros, feel nogud, and hem helpem iumi for changem tingting blo iumi abaotem olketa wea spoelem iumi.

18. Hao nao prea helpem Alberto and John for deal witim injustice wea tufala kasem?

¹⁸ Prea helpem tufala brata wea iumi storyim lo disfala study for deal witim injustice wea tufala feisim. Alberto sei: “Mi prea for olketa brata wea treatim mi nogud. Staka taem, mi askem Jehovah for helpem mi for no gohed kros lo wat hem happen.” Iumi hapi tumas from Alberto hem gohed faithful for servem Jehovah moa. John sei: “Staka taem, mi prea for datfala brata wea mekem mi feel nogud. Prea helpem mi for garem stret tingting abaotem hem and for no judgem hem. And olketa prea hia mekem mi for garem peace lo mind.”

19. Wat nao iumi mas gohed duim go kasem end blo disfala system? (1 Peter 3:​8, 9)

¹⁹ Go kasem end blo disfala system, bae iumi feisim staka difren kaen injustice. Nomata wat happen, iumi shud no stop for prea lo Jehovah for helpem iumi. And tu, iumi mas gohed followim example blo Jesus lo hao hem deal witim wei wea pipol treatim hem nogud and gohed for followim olketa Bible principle. If iumi duim datwan, iumi savve sure iumi bae kasem blessing from Jehovah.—Readim 1 Peter 3:​8, 9.