1. Wat nao tingting blo aposol Paul abaotem olketa ministerial servant?

 OLKETA ministerial servant duim important waka lo kongregeson. Aposol Paul barava tinghae lo olketa man hia wea loyal. For example, taem hem raet for olketa Christian lo Philippi, hem talem greetings for olketa ministerial servant and olketa elder lo there.—Phil. 1:1.

2. Hao nao Brata Luis feel abaotem waka blo hem olsem ministerial servant?

² Nomata if olketa brata wea baptaes olketa young or olo, olketa hapi tumas taem olketa duim waka olsem ministerial servant. For example, Devan kamap ministerial servant taem hem 18 years. Bat Brata Luis, kamap ministerial servant taem hem winim 50 years old. Luis talem sem samting olsem olketa nara brata wea duim disfala waka, hem sei: “Hem nambawan privilege for mi waka olsem wanfala ministerial servant, especially taem mi ting abaotem hao kongregeson showimaot love for mi!”

3. Wat nao olketa kwestin wea bae iumi storyim?

³ If iu wanfala brata wea baptaes finis and no ministerial servant yet, hao sapos iu markem datwan olsem goal blo iu? Wat nao reason wea motivatim iu for laek for duim datwan? And wat nao olketa qualification wea stap lo Bible wea iu need for kasem? Lo disfala article, bae iumi kasem ansa for olketa kwestin hia. Bat firstaem, bae iumi discussim wat nao waka blo wanfala ministerial servant.

 WAT NAO WAKA BLO MINISTERIAL SERVANT?

4. Wat nao waka blo wanfala ministerial servant? (Lukim tu piksa.)

⁴ Wanfala ministerial servant hem brata wea baptaes and wea holy spirit nao appointim hem, mekem hem savve helpem olketa elder for duim waka lo kongregeson. Samfala ministerial servant duim waka for mek sure olketa pablisa garem inaf territory and literature for duim ministry. Olketa narawan help for klinim and maintainim Kingdom Hall. Olketa ministerial servant duim waka olsem attendant and operatim saond and video equipment during lo olketa kongregeson meeting. Staka lo olketa samting wea olketa ministerial servant duim, hem olketa physical waka. Bat main samting nao, olketa ministerial servant mas spiritual man, olketa lovem Jehovah and followim raeteous standard blo hem. And tu, olketa barava lovem olketa brata and sista. (Matt. 22:​37-39) Wat nao wanfala baptaes brata savve duim for reach aot for kamap ministerial servant?

5. Hao nao wanfala brata savve reach aot for kamap ministerial servant?

⁵ Bible storyim olketa qualification for appointim olketa brata for kamap ministerial servant. (1 Tim. 3:​8-10, 12, 13) Iu savve reach aot for disfala privilege taem iu studyim olketa qualification hia wea stap lo Bible and waka hard for kasem. Bat firstaem, iu need for ting raonem gud wat nao olketa reason wea motivatim iu for laek reach aot.

WAT NAO REASON WEA MOTIVATIM IU FOR LAEK REACH AOT?

6. Wat nao reason wea shud motivatim iu for duim eni waka for helpem olketa brata and sista? (Matthew 20:28; lukim tu piksa.)

⁶ Man wea showimaot best example hem Jesus Christ, love wea hem garem for Dadi blo hem and pipol nao motivatim hem. Datfala love mekem hem for waka hard and duim olketa waka wea pipol ting daonem. (Readim Matthew 20:28; John 13:​5, 14, 15) If love nao hem reason blo iu for reach aot, Jehovah bae blessim iu and helpem iu for kasem goal for qualify for kamap ministerial servant.—1 Cor. 16:14; 1 Pet. 5:5.

7. Why nao wanfala brata shud no praod?

⁷ Lo world distaem, pipol evritaem admirem olketa wea promotim olketa seleva. Bat organization blo Jehovah no olsem. If brata  hem lovem olketa narawan olsem Jesus, hem no aftarem paoa, or authority ovarem olketa narawan, or laekem hae position. If olketa appointim man wea praod lo kongregeson, maet hem les for duim waka wea olketa need for duim for lukaftarem sheepsheep blo Jehovah bat wea pipol ting daonem. Maet bae hem ting kaen waka olsem no fitim hem. (John 10:12) Jehovah bae no blessim waka blo eniwan wea hem praod or mekhae lo hemseleva.—1 Cor. 10:​24, 33; 13:​4, 5.

8. Wat nao kaonsel wea Jesus givim lo olketa aposol blo hem?

⁸ Olketa klos fren blo Jesus tu laek for reach aot for kasem samfala privilege, bat samfala taem, rong reason nao motivatim olketa. Tingim tufala aposol blo Jesus—James and John. Tufala askem Jesus for givim spesol position lo tufala insaed lo Kingdom. Jesus no praisem tufala for wei wea tufala laek aftarem hae position. Instead, hem sei olsem lo 12-fala aposol blo hem: “Sapos eniwan long iufala laek for bigman, hem mas kamap man for helpem iufala. And eniwan long iufala wea laek for leader mas kamap wakaman bilong evriwan.” (Mark 10:​35-37, 43, 44) If olketa brata garem raet motive, wea hem nao for laek duim samting for helpem narawan, bae olketa kamap blessing for kongregeson.—1 Thess. 2:8.

WAT NAO SAVVE HELPEM IU FOR LAEK REACH AOT?

9. Wat nao iu savve duim for helpem iu for laek reach aot?

⁹ For sure iu lovem Jehovah and laek for helpem olketa narawan. Nomata olsem, maet iu no laek for duim olketa extra waka wea wanfala ministerial servant shud duim. Wat nao iu savve duim for mekem iu laek for helpem narawan? Tingim hapi wea bae iu kasem from wei for helpem olketa brata and sista. Jesus sei: “Man wea givim samting hem barava hapi winim man wea kasem samting.” (Acts 20:35) Jesus barava showimaot diswan lo laef blo hem. Hem kasem trufala hapi taem hem helpem olketa narawan, and iu tu savve kasem datwan.

10. Hao nao Jesus showim dat hem hapi for helpem olketa narawan? (Mark 6:​31-34)

¹⁰ Tingim wanfala example lo hao Jesus showim dat hem hapi for helpem olketa narawan. (Readim Mark 6:​31-34.) Wantaem, Jesus and olketa aposol blo hem taed. Olketa laek go lo wanfala kwaet ples for rest. Bat wanfala big crowd wea laek for herem teaching blo Jesus kasem lo there firstaem. Fitim nomoa for Jesus sei no lo olketa, bikos hem and olketa fren blo hem no even garem taem for “kaikai.” Or hem isi for Jesus just storyim tu-thri samting nomoa then talem olketa for go bak. Bat bikos love nao muvim Jesus, hem “teachim olketa plande samting.” And hem gohed teachim olketa go kasem taem hem “gogo for naet.” (Mark 6:35) Reason why hem duim datwan, hem no bikos hem mas duim, bat bikos hem “barava sorre tumas long olketa.” Hem barava laek for teachim olketa bikos hem lovem olketa. For helpem olketa narawan hem mekem Jesus barava hapi.

11. Hao nao Jesus provaedem physical help for olketa wea lisin lo hem? (Lukim tu piksa.)

¹¹ Taem Jesus helpem datfala crowd, hem no just teachim olketa nomoa. Hem provaedem tu olketa physical need blo olketa. Hem duim mirakol for provaedem kaikai and talem olketa disaepol blo hem for sharem. (Mark 6:41) Taem hem duim olsem, hem teachim olketa disaepol for helpem olketa narawan. Hem showim dat physical waka for helpem narawan hem important. Datwan hem semsem  witim waka blo olketa ministerial servant. Tingim hapi wea olketa aposol kasem taem olketa waka witim Jesus for sharem datfala kaikai, and “evriwan kaikai and olketa fulap nao”! (Mark 6:42) Bat, datwan hem no only taem wea Jesus tingim olketa narawan winim hemseleva. Jesus givim full laef blo hem lo earth for helpem pipol. (Matt. 4:23; 8:16) Jesus kasem hapi and satisfae taem hem teachim olketa narawan and hambol for provaedem need blo olketa. For sure iu tu bae kasem hapi taem iu willing for reach aot for kamap ministerial servant.

12. Why nao no eniwan lo iumi shud feel olsem hard for iumi duim samting for helpem kongregeson?

¹² If iu feel dat iu no garem eni spesol savve or skill, no discourage. For sure iu garem olketa quality wea savve barava helpem kongregeson. Maet hem gud for readim and prea abaotem toktok blo Paul wea stap lo 1 Corinth 12:​12-30. Toktok blo Paul showimaot klia dat iu and evri nara servant blo Jehovah garem important waka for duim insaed kongregeson. If iu no qualify yet for kamap ministerial servant, no discourage. Instead, hao sapos iu traem best for duim wat iu fit for duim for Jehovah and olketa brata and sista? Iu savve sure olketa elder bae luksavve lo wat iu fit for duim and givim assignment wea bae fitim iu.—Rome 12:​4-8.

13. Wat nao iumi lanem abaotem olketa qualification for ministerial servant?

¹³ Tingim nara reason why iu shud reach aot for qualify for kamap ministerial servant: Klosap evri qualification hia hem apply lo evri Christian. Really, evri Christian shud fren klos witim Jehovah, experiencem hapi from wei for give, and showimaot gud example olsem wanfala Christian. Wat nao samfala specific samting wea wanfala brata savve duim for reach aot?

HAO FOR REACH AOT

14. Wat nao hem minim for “garem mature tingting”? (1 Timothy 3:​8-10, 12)

¹⁴ Distaem iumi bae storyim olketa qualification wea stap lo 1 Timothy 3:​8-10, 12. (Readim.) Wanfala ministerial servant mas “garem mature tingting.” Disfala toktok samfala transleitim olsem, “serious,” “man wea olketa respectim,” or “responsible.” Datwan hem no minim iumi mas no laflaf or mekfani. (Eccl. 3:​1, 4) Bat, hem minim iu shud tek serious lo olketa responsibility blo iu. If olketa narawan lukim iu garem gud reputation for  evritaem reliable and olketa fit for depend lo iu, olketa lo kongregeson bae respectim iu.

15. Wat nao hem minim for “tok tru evritaem” and “no greedy for kasem samting”?

¹⁵ Disfala toktok,“tok tru evritaem” hem minim iu no laea, honest, and olketa narawan fit for trustim iu. Evritaem duim wat iu talem, and no pretend nomoa for olketa narawan lukim. (Prov. 3:32) “No greedy for kasem samting” minim iu honest taem iu deal witim narawan saed lo bisnis and lo hao iu handolem selen. Iu bae no mekius lo olketa brata and sista for mek selen from olketa.

16. (a) Wat nao “no drinkim tumas wine” hem minim? (b) Wat nao hem minim for “garem gudfala konsens”?

¹⁶ For “no drinkim tumas wine” hem minim iu no ova tumas for drinkim alcohol or garem reputation for drink tumas. For man “garem gudfala konsens” minim iu live followim olketa standard blo Jehovah. Nomata iu no perfect, iu garem peace lo mind bikos iu savve iu garem gud relationship witim God.

17. Taem olketa elder ‘testim olketa brata for lukim sapos olketa fit,’ wat nao wanfala brata savve duim for olketa elder trustim hem? (1 Timothy 3:10; lukim tu piksa.)

¹⁷ Disfala toktok, “testim olketa . . . firstaem for lukim sapos olketa fit,” hem minim olketa elder luksavve dat olketa savve trustim iu for duim olketa responsibility. So, taem olketa elder givim iu wanfala assignment, followim gud instruction and gaedlaen wea organization provaedem. Mek sure iu minim gud hao for duim datfala assignment and wat taem iu shud completim datwan. Taem iu duim gud each assignment blo iu, bae olketa narawan lo kongregeson lukim datwan and tinghae lo wei wea iu progress gud. Iufala olketa elder, lukaotem chance for trainim olketa brata wea baptaes. (Readim 1 Timothy 3:10.) Hao, eni baptaes brata wea hem teenager or young winim datwan hem stap lo kongregeson blo iu? Hao, olketa showimaot gud example lo hao olketa duim study seleva? Hao, olketa savve givim koment evritaem lo meeting and share lo field ministry? If olsem, givim olketa assignment wea fitim age and situation blo olketa. Taem iufala duim olsem, hem minim iufala ‘testim olketa for lukim sapos olketa fit.’ Then nomata olketa kasem samting olsem 18 or 19 years old, maet olketa bae fit for qualify for kamap ministerial servant.

18. Wat nao hem minim for ‘no eniwan accusim iu lo eni samting’?

¹⁸ Disfala toktok, “no eniwan accusim olketa long eni samting,” minim dat no eniwan shud  garem eni reason for accusim iu lo eni serious sin. Hem tru, samfala taem pipol savve accusim iu lo samting wea no tru. Jesus tu olketa accusim hem lo samting wea no tru, and hem talem dat olketa follower blo hem bae experiencem sem samting tu. (John 15:20) Bat, if iu keepim wei blo iu klin, olsem Jesus, iu bae garem gud reputation lo kongregeson.—Matt. 11:19.

19. Wat nao hem minim for “garem wanfala waef nomoa”?

¹⁹ “Mas garem wanfala waef nomoa.” If iu marit, iu mas followim original standard blo Jehovah, wea hem nao for wanfala man maritim wanfala woman nomoa. (Matt. 19:​3-9) Wanfala Christian man shud no enitaem durong. (Heb. 13:4) Bat, samfala samting moa involve lo diswan. Iu mas loyal lo waef blo iu, and no showimaot interest wea no fitim lo olketa nara woman.—Job 31:1.

20. Hao nao man savve “lukaftarem gud” famili blo hem?

²⁰ “Lukaftarem gud olketa pikinini and evriwan wea stap long haos.” If iu hed blo famili, iu mas tek serious lo olketa responsibility blo iu. Conductim famili worship evritaem. Traem best for waka staka taem lo ministry witim each member lo famili blo iu. Helpem pikinini blo iu for fren klos lo Jehovah. (Eph. 6:4) Man wea lukaftarem gud famili blo hem savve lukaftarem gud kongregeson.—Comparem 1 Timothy 3:5.

21. If iu no wanfala ministerial servant yet, wat nao iu savve duim?

²¹ Olketa brata, if iu no wanfala ministerial servant yet, plis prea and ting raonem information lo disfala article. Study abaotem olketa qualification for kamap ministerial servant and waka hard for qualify. Ting abaotem love blo iu for Jehovah and olketa brata an sista. Strongim feeling for laek helpem olketa. (1 Pet. 4:​8, 10) Kasem datfala hapi wea kamap from wei for helpem spiritual famili blo iu. Jehovah bae barava blessim hard waka blo iu for reach aot for kamap wanfala ministerial servant!—Phil. 2:13.