1-2. Wat nao “gud” waka wea wanfala elder savve duim?

 IF IU bin serve olsem ministerial servant for samfala taem finis, maet iu klosap for qualify for serve olsem elder. Hao, iu laek for reach aot for duim datfala “gud” waka?—1 Tim. 3:1.

² Wat nao waka blo wanfala elder? Wanfala elder bae leadim preaching waka, hem duim best for teach and duim shepherding, and strongim kongregeson thru lo toktok and example blo hem. Dastawe, Bible kolem olketa elder hia wea waka hard, olketa “olsem present.”—Eph. 4:8.

3. Hao nao wanfala brata savve qualify for kamap elder? (1 Timothy 3:​1-7; Titus 1:​5-9)

³ Hao nao iu savve qualify for kamap elder? For qualify for kamap elder, hem no semsem witim wat man need for duim for qualify for waka for selen. Staka taem, for iu kasem wanfala waka, olketa boss lo company savve luk for olketa basic skill wea iu garem for duim datfala waka. Bat for kamap elder hem difren, iu need for duim moa samting winim wei for garem skill for preach and teach. Iu need for kasem olketa qualification lo Bible wea stap lo 1 Timothy 3:​1-7 and Titus 1:​5-9. (Readim.) Lo disfala article bae iumi storyim thrifala main samting wea olketa elder need for duim: Garem gud reputation insaed and aotsaed lo kongregeson, showim gud example  olsem hed blo famili, and willing for helpem kongregeson.

GAREM GUD REPUTATION

4. Wat nao hem minim for “no garem blame long eni samting”?

⁴ For qualify for kamap elder, iu mas “no garem blame long eni samting,” datwan minim iu garem gud reputation lo kongregeson bikos wei blo iu hem gud. And tu, iu shud “man wea pipol aotsaed tinghae long hem.” Maet pipol aotsaed tok daonem iu bikos lo biliv blo iu, bat olketa shud no garem eni reason for kwestinim honest fasin blo iu or wei blo iu. (Dan. 6:​4, 5) Hem gud for askem iuseleva, ‘Hao, mi garem gud reputation insaed and aotsaed lo kongregeson?’

5. Hao nao iu savve showim dat iu “lovem gud samting”?

⁵ If iu “lovem gud samting,” iu bae ting positive abaotem olketa narawan and talem olketa iu tinghae lo gudfala wei blo olketa. Iu bae hapi for duim gud samting for olketa narawan and even willing for duim extra samting for olketa. (1 Thess. 2:8; lukim “lover of goodness” lo English study note blo Titus 1:8.) Why nao datfala quality hem important for olketa elder garem? Bikos olketa mas spendem staka taem blo olketa for shepherdim kongregeson and duim olketa nara assignment. (1 Pet. 5:​1-3) Nomata olsem, hapi wea iu kasem from iu helpem olketa narawan hem winim eni sakrifaes wea iu duim for olketa.—Acts 20:35.

6. Hao nao man savve showimaot hem “welkamim narawan”? (Hebrew 13:​2, 16; lukim tu piksa.)

⁶ Iu showimaot iu “welkamim narawan” taem iu duim gud tings for olketa narawan, includim olketa wea no klos fren blo iu. (1 Pet. 4:9) Wanfala reference buk describem man wea showimaot welkam, hem sei: “Door lo haos blo hem—and heart blo hem—open for olketa stranger.” Hem gud for askem iuseleva, ‘Wat nao reputation blo mi saed lo wei for welkamim olketa visitor?’ (Readim Hebrew 13:​2, 16.) Man wea garem wei for welkam hem willing for sharem wat hem garem witim olketa visitor, includim olketa wea no garem staka samting, and olketa servant blo Jehovah wea waka hard, olsem olketa circuit overseer and olketa visiting speaker.—Gen. 18:​2-8; Prov. 3:27; Luke 14:​13, 14; Acts 16:15; Rome 12:13.

7. Hao nao wanfala elder savve showimaot hem “no laekem tumas selen”?

 ⁷ “No laekem tumas selen.” Diswan minim dat iu no focus lo olketa material samting. Nomata iu rich or poor, Kingdom nao main samting lo laef blo iu. (Matt. 6:33) Iu savve iusim taem, energy, and olketa nara samting wea iu garem for helpem iu gohed worshipim Jehovah, lukaftarem famili, and for helpem kongregeson. (Matt. 6:24; 1 John 2:​15-17) Hem gud for askem iuseleva: ‘Hao nao mi ting lo selen? Hao, mi satisfae nomoa for garem wat mi needim? Or mi focus lo wei for kasem staka selen and staka material samting?’—1 Tim. 6:​6, 17-19.

8. Wat nao samfala wei wea showim dat iu “no ova tumas long eni samting” and ‘kontrolem iuseleva’?

⁸ If iu “no ova tumas long eni samting” and “kontrolem seleva,” hem minim iu balance lo evri samting iu duim lo laef. Datwan includim for no ova tumas lo kaikai, drink, kaleko and lukluk blo iu, and saed lo olketa recreation wea iu duim. Iu no followim laef stael blo disfala world. (Luke 21:34; Jas. 4:4) Iu savve kontrolem feeling blo iu, and no kros nomata narawan duim samting for mekem iu feel nogud. Iu “no man for drunk,” and iu no garem reputation olsem samwan wea savve drink tumas. Hem gud for askem iuseleva, ‘Hao, wat mi duim showim mi no ova tumas long eni samting and mi kontrolem miseleva?’

9. Wat nao hem minim for “garem gudfala tingting” and “organize gud”?

⁹ If iu “garem gudfala tingting,” hem minim iu careful for disaedem olketa samting followim Bible principle. Iu ting raonem gud olketa Bible principle, and datwan helpem iu for garem understanding and wei for minim samting. Iu no kwiktaem for concludem samting. Instead, iu mek sure dat iu savve gud lo evri information firstaem. (Prov. 18:13) Taem olsem, iu savve mekem olketa balance disison wea followim tingting blo Jehovah. If iu “organize gud,” iu bae organize and followim taem. Olketa narawan bae ting lo iu olsem man for followim direction and samwan wea olketa fit for trustim. Olketa quality hia mekem iu for garem gud reputation. Distaem bae iumi storyim hao for kasem olketa qualification lo Bible abaotem wei for showim gud example olsem famili hed.

SHOWIMAOT GUD EXAMPLE OLSEM FAMILI HED

10. Hao nao man savve “lukaftarem gud famili bilong hem”?

¹⁰ If iu wanfala hasband and laek for qualify for kamap elder, reputation blo famili blo iu bae affectim qualification blo iu. Dastawe, iu need for “lukaftarem gud famili bilong [iu].” Iu need for garem reputation wea showim hao iu wanfala loving and responsible famili hed. Diswan minim dat iu tekem lead lo famili lo evri samting saed lo worship. Why nao datwan important tumas? Aposol Paul sei: “Sapos man no savve hao for lukaftarem gud famili bilong hem, hard tumas for hem lukaftarem kongregeson bilong God.”—1 Tim. 3:5.

11-12. Hao nao samting wea olketa famili member duim hem affectim qualification blo dadi? (Lukim tu piksa.)

¹¹ If iu wanfala dadi, olketa pikinini blo iu wea younger then 18 years olketa “mas obey and showimaot respect.” Iu need for teachim and trainim olketa lo loving wei. Iu laekem olketa pikinini blo iu for hapi and laflaf and plei olsem evri pikinini. Nomata olsem, bikos iu trainim olketa gud, olketa bae obey, showimaot respect, and garem gud behaviour. And tu, iu mas duim best for helpem pikinini blo iu for fren gud witim Jehovah, followim Bible principle, and progress for baptaes.

 ¹² “Olketa pikinini bilong hem biliv and no eniwan accusim olketa and sei olketa olobaot or bighed.” If wanfala pikinini lo famili wea baptaes finis or wea klosap for baptaes hem duim wanfala serious sin, hao nao datwan bae affectim dadi? If dadi fail for provaedem training and discipline, maet hem bae no qualify for serve olsem elder.—Lukim Wastaoa blo October 15, 1996, page 21, par. 6-7.

HELPEM KONGREGESON

13. Hao nao iu savve showimaot iu ‘no forcem tingting blo iu’ and ‘no bighed for laek followim tingting bilong iuseleva’?

¹³ Olketa brata wea showimaot olketa naesfala Christian quality savve barava helpem kongregeson. Man wea “no forcem tingting bilong hem long narawan” hem help for keepim peace. If iu laekem olketa narawan for ting lo iu olsem man wea no forcem tingting blo hem, lisin and willing for herem tingting blo olketa. During lo meeting blo olketa brata, hao, iu willing for sapotim disison blo majority if datwan no brekem eni law or principle lo Bible? If iu “no bighed for laek followim tingting bilong [iuseleva]” hem minim iu bae no insist for duim samting followim hao iuseleva laekem. Iu luksavve hao hem important for lisin lo tingting or idea blo olketa narawan. (Gen. 13:​8, 9; Prov. 15:22) Iu “no man for raoa” or “kros kwiktaem.” Instead for raf or no laek for agree, iu kaen and tingim feeling blo narawan. From iu laek for stap gud witim narawan, iu nao first wan for duim samting for mek peace, even taem situation hem no isi. (Jas. 3:​17, 18) Kaenfala toktok blo iu savve affectim attitude blo olketa narawan, includim olketa wea againstim iumi.—Judg. 8:​1-3; Prov. 20:3; 25:15; Matt. 5:​23, 24.

14. Wat nao hem minim for “no wanfala niu disaepol,” and wat nao hem minim for “faithful”?

¹⁴ For wanfala brata qualify for kamap elder “hem mas no wanfala niu disaepol.” Nomata iu no need for stap lo truth for staka year bifor iu kamap elder, bat iu needim taem for kamap  wanfala mature Christian. Bifor iu kasem appointment olsem elder, iu mas showim dat iu hambol and willing for weit lo Jehovah for kasem eni assignment, olsem Jesus. (Matt. 20:23; Phil. 2:​5-8) Iu savve pruvim iu “faithful” taem iu hol strong lo Jehovah and olketa raeteous standard blo hem, and taem iu followim olketa direction from organization blo hem.—1 Tim. 4:15.

15. Hao, wanfala brata mas savve tumas for givim tok bifor hem qualify for elder? Explainim.

¹⁵ Olketa scripture storyim klia hao olketa overseer mas “savve hao for teach.” Hao, datwan minim iu mas savve tumas for givim tok? Nomoa. Staka elder wea qualify, maet olketa no best pablik speaker, bat olketa savve teach gud lo ministry and duim shepherding. (Lukim “qualified to teach” lo English study note blo 1 Timothy 3:2; comparem 1 Corinth 12:​28, 29 and Ephesus 4:11.) Nomata olsem, iu need for evritaem waka hard for impruvim olketa skill blo iu for teach. Hao nao iu savve duim datwan?

16. Hao nao iu savve kamap wanfala gud teacher? (Lukim tu piksa.)

¹⁶ “Mas barava faithful for followim toktok bilong God long wei wea hem teach.” For kamap gudfala teacher, iu mas iusim Bible taem iu givim tok and givim kaonsel lo samwan. Iu mas studyim gud Bible and olketa pablikeson blo iumi. (Prov. 15:28; 16:23; lukim “holding firmly to the faithful word” lo English study note blo Titus 1:9.) Taem iu study, lukluk gud lo hao for applyim stret olketa scripture. And taem iu teach, traem best for kasem heart blo audience. Iu savve impruvim hao iu teach if iu askem and followim olketa idea from olketa elder wea garem experience. (1 Tim. 5:17) Olketa elder mas “fit for . . . encouragem” olketa brata and sista and samfala taem olketa mas givim kaonsel or even “stretem” olketa tu. Taem olketa elder duim datwan, olketa mas evritaem kaen. If iu kaen and showim love and iusim toktok blo God for teach, iu bae barava helpem olketa narawan bikos  iu followim example blo datfala Nambawan Teacher, Jesus.—Matt. 11:​28-30; 2 Tim. 2:24.

GOHED FOR REACH AOT

17. (a) Wat nao savve helpem olketa ministerial servant for gohed reach aot? (b) Wat nao olketa elder shud tingim taem olketa evaluatim wanfala brata for kasem appointment? (Lukim box “ No Ova Tumas Taem Iufala Evaluatim Samwan.”)

¹⁷ Afta samfala ministerial servant reviewim olketa qualification for kamap elder, maet olketa feel olsem olketa bae hard for qualify. Bat tingim, Jehovah and organization blo hem no expectim iu for showim evri quality hia lo perfect wei. (1 Pet. 2:21) And paoa blo holy spirit blo Jehovah nao bae helpem iu for garem olketa qualification hia. (Phil. 2:13) Hao, iu laek for impruvim eni specific quality blo iu? Prea lo Jehovah abaotem datwan. Duim research lo datfala topic, and askem wanfala elder for samfala idea lo hao for impruv.

18. Wat nao evri ministerial servant kasem encouragement for duim?

¹⁸ Iumi evriwan, includim olketa wea serve olsem elder finis, laek for gohed garem olketa quality wea iumi discussim lo disfala article. (Phil. 3:16) Hao, iu wanfala ministerial servant? Reach aot! Askem Jehovah for trainim iu and helpem iu for duim moa samting for servem hem and helpem kongregeson. (Isa. 64:8) Bae Jehovah barava blessim wei wea iu traem best for qualify for serve olsem elder.