1, 2. (a) Wanem kaen peace nao iumi savve garem distaem? (b) Why nao iumi no garem yet peace evriwea long earth? (Lukim piksa long start bilong study.)

IUMI evriwan laekem peace, and iumi no laek for wari. Dastawe iumi thankiu long Jehovah from hem givim iumi “peace bilong God” wea savve protectim tingting bilong iumi for no gohed wari and feel nogud. (Phil. 4:6, 7) From iumi dedicate long Jehovah, iumi savve garem peace witim God and ‘fren gud witim hem.’—Rome 5:1.

² Bat, hem no kasem taem yet for God mekem peace kamap evriwea long earth. Iumi stap long olketa last day, dastawe iumi kasem staka problem wea savve mekem iumi wari. And tu, iumi stap midolwan pipol wea raf tumas. (2 Tim. 3:1-4) Iumi mas faet againstim Satan tu and olketa laea teaching wea hem mekhae long hem. (2 Cor. 10:4, 5) Bat samting wea savve mekem iumi wari tumas nao hem taem olketa relative wea no worshipim Jehovah againstim iumi. Samfala long olketa maet mekfani long wanem iumi bilivim or sei iumi mekem famili for divaed. Maet olketa sei bae iumi no part long famili sapos iumi gohed worshipim Jehovah. So wanem nao  stretfala tingting wea iumi shud garem taem famili againstim iumi? And hao nao iumi savve gohed garem peace taem diswan happen?

3, 4. (a) Hao nao teaching bilong Jesus hem affectim pipol? (b) Wanem nao savve mekem hem no isi for followim Jesus?

³ Jesus savve teaching bilong hem bae mekem pipol divaed and olketa wea followim hem mas no fraet taem olketa narawan againstim olketa. From diswan olketa famili tu bae no savve garem peace. Jesus sei: “No tingse mi kam for mekem evriwan long earth stap long peace. Mi kam for mekem pipol no stap gud tugeta. Mi kam for mekem son hem againstim dadi bilong hem, dota hem againstim mami bilong hem, and dota-in-law hem againstim mami-in-law bilong hem. Tru tumas, bae enemy bilong man nao olketa wea stap long sem haos witim hem.”—Matt. 10:34-36.

⁴ Jesus laekem pipol for savve long samting wea bae happen sapos olketa kamap disaepol bilong hem, dastawe hem sei: “No tingse mi kam for mekem evriwan long earth stap long peace.” Really goal bilong Jesus hem for teachim truth abaotem God long pipol and no for mekem famili divaed. (John 18:37) Bat olketa disaepol bilong hem need for savve samfala taem hem bae no isi for followim hem, especially taem olketa gudfala fren or eniwan long famili no insaed long truth.

5. Wanem nao olketa disaepol bilong Jesus feisim?

⁵ Jesus sei wanfala hard samting wea olketa disaepol mas willing for feisim hem wei wea famili againstim olketa. (Matt. 10:38) Olketa disaepol showimaot klia olketa followim Jesus taem olketa no givap nomata famili tok spoelem olketa or maet barava les long olketa. Nomata olketa mas lusim staka samting, bihaen olketa bae kasem staka samting winim wanem olketa lusim.—Readim Mark 10:29, 30.

6. Wanem nao iumi mas tingim sapos olketa relative againstim iumi?

⁶ Nomata sapos olketa relative againstim iumi bikos iumi worshipim Jehovah, iumi still lovem olketa. Bat iumi mas tingim hao love bilong iumi for God and Christ mas strong winim love wea iumi garem for eniwan. (Matt. 10:37) Iumi mas tingim tu hao Satan savve iusim love wea iumi garem for famili for mekem iumi no faithful long Jehovah. Distaem bae iumi storyim samfala hard samting wea savve kamap and hao iumi savve deal witim datwan.

7. Wanem kaen tingting nao iu shud garem sapos marit partner no worshipim Jehovah?

⁷ Bible sei olketa wea marit “bae kasem hard taem long laef bilong olketa.” (1 Cor. 7:28) So sapos iu maritim samwan wea no worshipim Jehovah, diswan maet mekem iu stress and wari hem big go moa. Nomata olsem, hem important for garem sem tingting olsem Jehovah abaotem marit. Hem sei iumi no fit for separate or divorcem marit partner from hem no worshipim Jehovah. (1 Cor. 7:12-16) Sapos hasband bilong iu no insaed long truth hem bae no leadim famili for worshipim Jehovah. Nomata olsem, waef mas gohed respectim hem bikos hem hed long famili. And sapos iu wanfala hasband wea waef no worshipim Jehovah, iu need for gohed lovem and lukaftarem hem.—Eph. 5:22, 23, 28, 29.

8. Wanem nao samfala kwestin wea iu savve ting raonem sapos marit partner no letem iu for duim samfala samting?

⁸ Wanem nao iu savve duim sapos marit partner bilong iu trae for kontrolem samting wea iu duim for worshipim Jehovah? Olsem example, hasband bilong wanfala sista letem hem for go preaching long samfala day nomoa long week. Sapos samting olsem kasem iu, tingim olketa kwestin hia: ‘Waswe, marit partner bilong mi barava no letem mi for worshipim Jehovah? Waswe, samting wea hem askem  mi for duim hem fitim nomoa?’ Taem iu garem balance tingting, bae iu no garem staka problem tumas insaed marit.—Phil. 4:5.

9. Hao nao dadi or mami savve teachim pikinini for respectim marit partner wea no worshipim Jehovah?

⁹ Hem no isi for trainim pikinini taem marit partner no worshipim Jehovah. Olsem example, iu need for teachim pikinini bilong iu for obeyim disfala komand long Bible wea sei: “Respectim dadi and mami bilong iufala.” (Eph. 6:1-3) Bat wanem nao iu shud duim sapos marit partner no followim olketa standard long Bible? Iu savve showimaot gudfala example for pikinini taem iu gohed respectim partner bilong iu. Tingim olketa gudfala wei bilong hem, and storyim hao iu tinghae long olketa gud samting wea hem duim. No talem olketa nogud samting abaotem partner bilong iu taem olketa pikinini stap. Bat iu savve storyim long olketa hao wei for worshipim Jehovah hem samting wea each wan mas chus for duim. From iu teachim olketa pikinini for garem gudfala wei, datwan savve mekem marit partner bilong iu for laek worshipim Jehovah.

10. Hao nao dadi or mami savve teachim pikinini nomata marit partner no worshipim God?

¹⁰ Samfala hasband or waef wea no worshipim Jehovah laekem olketa pikinini for join insaed olketa celebration and for olketa pikinini mas lanem olketa false teaching. Samfala hasband laek stopem waef for teachim Bible long olketa pikinini. Nomata olsem, waef bae traem best for teachim truth insaed Bible long olketa pikinini. (Acts 16:1; 2 Tim. 3:14, 15) Olsem example, hasband maet stopem waef for study witim olketa pikinini or for tekem olketa go long olketa meeting. Hem savve  respectim disison bilong hasband bilong hem, bat bae hem savve iusim evri chance wea hem garem for teachim olketa pikinini abaotem Jehovah and olketa standard bilong hem long Bible. (Acts 4:19, 20) Bat gogo, olketa pikinini seleva nao mas disaed sapos olketa laek for worshipim Jehovah.—Deut. 30:19, 20. *

11. Wanem nao maet mekem problem kamap midolwan iu and olketa relative wea no worshipim Jehovah?

¹¹ Taem iumi start studyim Bible witim olketa Witness, maet iumi no laek talem olketa long famili abaotem datwan. Bat taem faith bilong iumi start for grow, iumi luksavve iumi mas talem olketa iumi laek worshipim Jehovah. (Mark 8:38) Taem iu faithful long God, datwan maet mekem problem kamap midolwan iu and olketa insaed famili. Bae iumi storyim samfala samting wea iu savve duim for gohed garem peace and faithful long Jehovah.

12. Wanem nao maet mekem olketa relative againstim iumi, and hao nao iumi savve tingim feeling bilong olketa?

¹² Traem best for minim feeling bilong olketa relative wea no insaed truth. Iumi barava hapi bikos iumi savve long truth insaed Bible. Nomata olsem, olketa relative bilong iumi maet tingse Olketa Jehovah’s Witness laea long iumi for joinim religion bilong olketa. Maet olketa tingse iumi no lovem olketa nao bikos iumi no celebratem olketa holiday witim olketa. And tu, maet olketa tingse bae iumi kasem nogud samting bihaen iumi dae. Bat iumi mas traem best for minim feeling bilong olketa. Taem iumi lisin long wanem olketa talem, datwan bae helpem iumi for savve why olketa wari abaotem iumi. (Prov. 20:5) Aposol Paul trae for minim “evri didifren kaen man” mekem hem savve preach and teachim gud nius long olketa. Taem iumi duim olsem, diswan savve helpem iumi teachim truth long olketa relative.—1 Cor. 9:19-23.

13. Hao nao iumi savve story witim olketa relative wea no insaed truth?

¹³ Tok kaen long olketa. Bible sei: “Toktok bilong iufala mas evritaem kaen.” (Col. 4:6) Maet datwan hem no isi. Bat iumi savve askem holy spirit bilong Jehovah for helpem iumi kaen long olketa relative. Iumi shud trae for no argue witim olketa abaotem biliv bilong olketa. Sapos iumi feel nogud long samting wea olketa talem or duim long iumi, iumi savve followim example bilong olketa aposol. Paul sei: “Taem pipol tok spoelem mifala, mifala askem God for blessim olketa. Taem pipol spoelem mifala, mifala no givap. Taem pipol talem nogud samting abaotem mifala, mifala tok kaen long olketa.”—1 Cor. 4:12, 13.

14. Wanem gud samting nao savve happen taem iumi showimaot gudfala wei?

¹⁴ Gohed showimaot gudfala wei. Why nao datwan hem important? Bikos gud samting wea iumi duim savve affectim narawan winim samting wea iumi talem. (Readim 1 Peter 3:1, 2, 16.) Example bilong iu savve helpem olketa relative for luksavve Olketa Jehovah’s Witness garem olketa hapi marit, savve lukaftarem gud olketa pikinini, olketa followim Bible principle, and for garem laef wea hapi and satisfae. Nomata sapos olketa relative no acceptim truth, iumi hapi bikos iumi savve gudfala wei bilong iumi mekem Jehovah hapi.

15. Hao nao iumi savve plan firstaem mekem iumi no argue witim olketa relative?

¹⁵ Plan gud firstaem. Ting abaotem olketa samting wea maet mekem wei for argue kamap midolwan iu and olketa relative. Then disaedem hao iu bae deal witim datwan. (Prov. 12:16, 23) Hem nao samting wea wanfala sista long Australia hem duim. Dadi-in-law bilong hem barava againstim truth and samfala taem hem savve kros. So taem hem  and hasband redi for ringim hem, tufala savve prea for Jehovah helpem tufala for story kaen long hem. Tufala ting raonem firstaem olketa story wea bae mekem olketa no argue. And for mekem olketa no story longtaem tumas nogud datwan lead go long wei for argue abaotem religion, tufala savve markem nomoa hao long olketa bae story.

16. Taem iu and olketa relative argue, wanem nao savve helpem iu for no feel guilty?

¹⁶ Tru nao, samfala taem hem hard for misstim wei for argue witim olketa relative. Taem iufala argue olsem, maet iu feel guilty bikos iu lovem olketa and laek mekem olketa hapi. Bat tingim wei wea iu faithful long Jehovah hem mas winim love bilong iu for famili. Taem iu duim olsem, maet datwan helpem olketa relative for luksavve wei for worshipim Jehovah hem barava important. Iumi no savve forcem eniwan for acceptim truth. Bat iu savve helpem olketa narawan for luksavve wei wea iu followim Jehovah hem barava helpem iu. And Jehovah hem givim chance long olketa tu for worshipim hem.—Isa. 48:17, 18.

17, 18. Wanem nao savve helpem iu taem wanfala famili member lusim Jehovah?

¹⁷ Taem wanfala famili member hem disfellowship or disassociate from kongregeson, datwan no isi samting for deal witim. Hem savve mekem iumi feel olsem samwan busarem iumi long wanfala naef. Hao nao iumi savve deal witim datwan?

¹⁸ Gohed duim olketa spiritual samting. Taem iu kasem hard taem olsem, iu need for strongim faith bilong iu. Readim Bible evriday, prepare and attendim olketa meeting, gohed duim preaching waka, and prea long Jehovah for strongim iu for no givap. (Jude 20, 21) Waswe sapos iu duim olketa samting hia bat iu still feel nogud? No givap! Gohed duim olketa spiritual samting. Gogo, datwan bae helpem iu for kontrolem tingting and feeling bilong iu. Hem nao samting wea happen long man wea raetem Psalm 73. Hem feisim wanfala hard taem and hem no isi for hem kontrolem tingting and feeling bilong hem. Wei wea hem gohed worshipim Jehovah helpem hem for garem stretfala tingting moa. (Ps. 73:16, 17) Taem iu gohed for faithful, iu savve olsem tu.

19. Hao nao iu savve respectim discipline wea Jehovah givim?

¹⁹ Respectim discipline wea Jehovah givim. Nomata discipline wea Jehovah givim hem savve mekem man barava feel nogud firstaem, diswan bae helpem iumi evriwan, and datfala man wea disfellowship tu. (Readim Hebrew 12:11.) Iumi mas respectim komand bilong Jehovah for “no fren” and associate witim olketa wea disfellowship. (1 Cor. 5:11-13) Nomata diswan hem no isi, sapos no eni need kamap, iumi mas stap klia long wei for just story witim olketa long phone, text message, leta, e-mail, or social network.

20. Wanem nao iumi shud gohed hope for hem?

²⁰ Gohed for garem hope. Bible sei love “evritaem garem hope,” dastawe iumi gohed hope olketa wea iumi lovem wea disfellowship bae kam bak long Jehovah. (1 Cor. 13:7) Sapos iu lukim datfala famili member start for changem wei bilong hem, iu savve prea for hem mekem hem kasem strong from Bible and for hem acceptim invitation bilong Jehovah wea sei: “Kam bak long mi.”—Isa. 44:22.

21. Wanem nao iu savve duim sapos famili againstim iu bikos iu followim Jesus?

²¹ Jesus sei iumi mas lovem hem winim eniwan. And hem barava sure olketa disaepol bilong hem bae no fraet and gohed faithful long hem nomata famili againstim olketa. So sapos famili againstim iu bikos iu followim Jesus, depend long Jehovah and askem hem for helpem iu for no givap. (Isa. 41:10, 13) Iu savve hapi from iu savve Jehovah and Jesus hapi long iu and bae blessim faithful fasin bilong iu.