MI BARAVA hapi from mi garem Christian parents, Fred and Edna Molohan, wea teachim mi for lovem God. Taem mi born long 1934, parents bilong mi olketa Bible Student (Olketa Jehovah’s Witness) for 20 year finis. Mifala stap long Parsons, wanfala smol taon long southeastern Kansas. Mifala joinim wanfala kongregeson wea klosap evriwan olketa anointed Christian. Famili bilong mifala enjoyim wei for attendim olketa kongregeson meeting evritaem and for preachim truth abaotem Bible long olketa narawan. Staka taem long olketa Saturday mifala savve duim street waka, wea distaem iumi kolem pablik witnessing. Samfala taem mifala savve taed bat Dadi savve tekem mifala for kaikaim ice cream bihaen preaching.

Smol kongregeson bilong mifala garem big territory wea insaed diswan hem samfala smol taon and staka farm wea stap raonem olketa ples hia. Taem mifala preach long olketa farmer, mifala savve exchangem olketa literature for olketa vegetable and fresh egg (wea olketa just kolektem). Samfala taem olketa givim laef kokorako. From dadi givim olketa contribution for olketa literature finis, kaikai wea olketa givim mekem hem isi for dadi provaed for famili bilong mifala.

Parents bilong mi baem wanfala phonograph wea olketa iusim long preaching waka. Mi smol tumas so mi no savve hao for pleim datwan, bat mi barava hapi for helpem Dadi and Mami taem tufala pleim olketa tok bilong Brata Rutherford long olketa return visit and Bible study.

Dadi mekem car bilong mifala wea hem wanfala 1936 Ford for kamap wanfala saond car. Hem putim wanfala big speaker antap long ruf bilong hem. Disfala car barava helpem mifala for spredim Kingdom message long pipol. Staka taem mifala savve pleim firstaem wanfala music recording for mekem pipol interest, then mifala pleim wanfala Bible tok. Taem  mifala pleim datfala tok finis, mifala savve offerim literature long pipol wea interest.

Long wanfala smol taon long Cherryvale, Kansas, olketa police no letem Dadi for putim datfala saond car long park, ples wea staka pipol savve relax long olketa Sunday, bat olketa letem aotsaed long park. So Dadi duim wanem olketa talem and hem draevem car long narasaed long road wea feisim kam datfala park. Datwan mekem pipol savve herem kam datfala message, and hem gohed pleim datfala program. Evritaem mi barava enjoyim wei for waka witim Dadi and big brata bilong mi, Jerry, long olketa taem olsem.

Long olketa year midolwan 1935 and 1940, mifala duim olketa spesol campaign long territory wea pipol barava againstim mifala. Olsem mi storyim long start, mifala savve wekap long midolnaet and go kwaet front long haos bilong pipol for putim olketa tract or buklet andanit long door bilong olketa. Bihaen, mifala savve go meet aotsaed long taon and checkim sapos police arrestim eniwan long mifala.

Nara wei wea mifala duim ministry hem nao wei for duim information march. Mifala savve werem olketa saen and march long taon for preachim Kingdom message. Mi tingim wantaem, olketa brata and sista march long taon bilong mifala and olketa werem saen wea sei: “Religion Is a Snare and a Racket.” Olketa wakabaot insaed long taon for samting olsem 1.6 kilometer and then olketa kam bak long haos bilong mifala. Gud samting nao, no eniwan againstim olketa taem olketa march bat olketa meetim staka pipol wea interest.

Staka taem famili bilong mi savve travel from Kansas go long Texas for attendim olketa convention. Dadi waka for wanfala railroad company wea olketa kolem Missouri-Kansas-Texas Railroad (olketa kolem tu long M-K-T, or Katy, Railroad). Datwan mekem mifala savve go free long train for olketa convention and for visitim olketa relative. Big brata bilong mami bilong mi, Fred Wismar, and waef bilong hem, Eulalie, stap long taon wea olketa kolem Temple, long Texas. Uncle Fred lanem truth bihaen long year 1900 taem hem young. Bihaen hem baptaes, hem teachim wanem hem lanem long olketa sista bilong hem, and wanfala long olketa hem mami bilong mi. Staka brata long central Texas savve gud long hem, and hem serve olsem wanfala zone servant (wea distaem olketa kolem circuit overseer). Hem kaen and hapi man, and mi evritaem laek for stap witim hem. Hem strong long truth, and example bilong hem barava helpem mi taem mi young.

Long 1941, famili bilong mifala travel long train for go long St. Louis, Missouri, for attendim wanfala big convention. Olketa invaetem evri young wan for sidaon klosap long platform for herem tok bilong Brata Rutherford wea garem title “Children of the King.” Long end long tok, evri young wan sapraes for kasem wanfala niu buk Children. Brata Rutherford and samfala nara brata wea helpem hem, givim buk hia long each wan long mifala. Winim 15,000 young wan nao kasem datfala spiritual blessing.

 Long April 1943, mifala attendim “Call to Action” Assembly long Coffeyville, Kansas. Long datfala taem, mifala herem hao evri kongregeson bae garem niu skul wea olketa kolem Theocratic Ministry Skul. Mifala kasem tu wanfala buklet wea garem 52 leson for iusim long datfala skul. Bihaen long datfala sem year, mi givim first tok bilong mi. Datfala assembly hem spesol long mi tu bikos mi and samfala narawan baptaes long wanfala pool klosap long wanfala farm. Wata insaed datfala pool hem kol tumas.

Mi finisim hae skul long 1951 and mi mas mekem samfala disison abaotem wanem for duim long laef bilong mi. Brata bilong mi Jerry bin serve long Bethel, so mi tu barava laek for serve long Bethel. So mi sendem application bilong mi long Brooklyn office. Wanem mi disaedem barava helpem mi long spiritual wei. No longtaem bihaen, olketa appruvim application bilong mi, and mi kasem invitation for go waka long Bethel long March 10, 1952.

Mi barava laek waka long printery for help for mekem olketa magasin and olketa nara pablikeson. Bat olketa no assignim mi for datfala waka. Mi kasem assignment for waka olsem wanfala waiter and bihaen for waka long kitchen. Mi barava enjoyim datfala waka and mi lanem staka samting. Wei wea olketa mekem schedule bilong kitchen hem mekem mi garem free taem for iusim Bethel library for duim study seleva. Diswan strongim faith bilong mi and helpem mi for grow long spiritual wei. And tu, diswan strongim goal bilong mi for duim waka bilong Jehovah long Bethel for olowe. Jerry lusim Bethel long 1949 and hem maritim Patricia, bat tufala stap klosap long Brooklyn. Tufala evritaem helpem and encouragem mi taem mi just kam long Bethel.

No longtaem bihaen mi stap long Bethel, olketa start for lukaotem olketa brata wea waka long Bethel for kamap olketa Bethel speaker. Olketa brata wea nem bilong olketa stap long datfala list kasem assignment for visitim olketa kongregeson wea stap 322 kilometer from Brooklyn and for waka witim kongregeson long preaching waka. Mi kasem privilege for insaed datfala list. Mi fraet lelebet taem mi givim first pablik tok. Bifor, olketa tok hia hem wan hour. Staka taem mi savve go long train for visitim olketa kongregeson. Mi tingim wantaem, long Sunday aftanun long 1954, mi redi for go bak long New York long wanfala train and mi shud arrive bak long Bethel long evening. Bat wanfala strong wind and snow hem kamap. So engine bilong datfala train hem no waka. Gogo, mifala arrive long New York City long samting olsem faev o’klok long morning nao. Then from there mi go long nara train for Brooklyn. Taem mi arrive, mi go stret long kitchen for waka. Mi leit lelebet and barava taed bikos mi wekap full naet. Bat mi no tingim olketa samting hia bikos mi tingim hapi wea mi kasem taem mi helpem olketa brata and sista and for meetim olketa niu fren.

Long olketa first year wea mi stap long Bethel, mi kasem assignment for joinim Bible study program wea kamap evri week long WBBR wea hem radio station bilong iumi. Datfala studio stap long mek-tu story long building long 124 Columbia Heights. Brata Alexander Macmillan, wea serve long Bethel for longtaem, hem evritaem joinim olketa radio program hia. Mifala savve kolem hem Brata Mac. Hem wanfala nambawan example for mifala olketa young Bethelite bikos hem gohed faithful long Jehovah nomata hem kasem staka hard taem.

Long 1958, mi kasem assignment for waka witim olketa wea attendim Gilead Skul. Waka bilong mi hem for helpem olketa wea graduate for tekem visa bilong olketa and for arrangem gogo bilong olketa faithful brata and sista hia. Long datfala taem, fare long plane hem barava expensive tumas, so samfala missionary nomoa savve travel long plane. Staka wea travel go long olketa kantri long Africa and Asia savve go long olketa kago ship. Bihaen, taem fare long plane hem cheap, staka missionary savve go long plane for kasem assignment bilong olketa.

Long 1960, mi arrange for chartam plane from United States for go long Europe for olketa  international convention long 1961. Mi tu go long wanfala long olketa convention hia long Hamburg, Germany. Bihaen datfala convention, mi and thrifala nara brata long Bethel haerem wanfala car and go thru long Germany for kasem Italy, for visitim branch office long Rome. From there, mifala go long France, and akrosim Pyrenees Mountain, and kasem Spain, wea long datfala taem olketa banim waka bilong iumi. Mifala pasolem samfala pablikeson for luk olsem present for givim long olketa brata and sista bilong iumi long Barcelona. Mifala barava hapi for meetim olketa! Then mifala draev go moa long Amsterdam, and mifala kasem plane for kam bak long New York.

Long 1962, mi kasem assignment for mekem olketa arrangement for 583 brata and sista for attendim olketa spesol international convention raonem world. Disfala arrangement hem for “Everlasting Good News” Assembly wea kamap long 1963. Mifala mekem olketa arrangement for brata and sista hia for travel raonem world for attendim olketa convention hia long Europe, Asia, and South Pacific. And olketa bae go long Honolulu, Hawaii, and gogo olketa go kasem Pasadena, California. Mifala arrangem tu for olketa visitim Lebanon and Jordan, and olketa lanem staka samting taem olketa lukim samfala ples wea Bible storyim. Department bilong mifala arrangem plane for go long hem and hotel for stap and olketa visa for olketa kantri wea bae olketa kasem.

Nara samting wea mekem 1963 hem barava spesol long mi, hem bikos long June 29 mi maritim Lila Rogers from Missouri, wea hem kamap member long Bethel famili long 1960. Wanfala week bihaen wedding bilong mitufala, mi and Lila joinim datfala grup for travel raonem world and visitim Greece, Egypt, and Lebanon. From Beirut mifala flae go long Jordan, wea no farawe nomoa. From gavman stopem samfala samting saed long waka bilong iumi long Jordan, olketa no savve givim visa for Olketa Jehovah’s Witness, so mifala no savve wanem nao bae happen taem mifala arrive long there. Mifala barava hapi taem mifala arrive and lukim olketa brata and sista standap antap long smolfala terminal and holem banner wea sei, “Welkam Olketa Jehovah’s Witness”! Hem barava naes tumas for lukim olketa ples wea Bible story abaotem! Mifala visitim ples wea Abraham, Isaac, and Jacob stap, olketa ples wea Jesus and olketa aposol preach long hem, and wea tru Christian religion hem start and spred go kasem evri ples long earth.—Acts 13:47.

For 55 year, Lila hem faithful for sapotim mi long evri assignment bilong mitufala. Tu-thri taem mitufala visitim Spain and Portugal taem gavman banim waka bilong iumi long there. Mifala savve encouragem olketa brata and sista, and givim olketa literature and nara samting wea olketa needim. Mitufala visitim tu samfala brata bilong iumi wea stap long prison long Cádiz, Spain. Mi barava hapi tumas bikos mi garem chance for givim tok for encouragem olketa.

Start kam long 1963, mi garem privilege for help for mekem olketa arrangement for olketa wea travel long olketa international convention long Africa,  Australia, Central and South America, Europe, Asia, Hawaii, New Zealand, and Puerto Rico. Mitufala Lila enjoyim and no forgetim olketa convention wea mitufala attendim, olsem convention long 1989, long Warsaw, Poland. Staka brata from Russia attendim datfala big convention. Datwan hem first convention wea olketa attendim! Mifala meetim olketa brata and sista wea stap long prison long Soviet Union for staka year from faith bilong olketa.

Nara privilege wea mi barava enjoyim hem for visitim olketa branch office raonem world for strongim and encouragem olketa Bethelite and olketa missionary. Long last visit bilong mifala long South Korea, mifala meetim 50-fala brata wea stap long prison long Suwon. Olketa brata hia gohed hapi nomoa and luk forward moa for duim ministry. Wei wea mifala meetim olketa hem barava encouragem mifala!—Rome 1:11, 12.

Long olketa year wea go pas, mi lukim hao Jehovah barava blessim pipol bilong hem winim enitaem bifor. Long 1943, taem mi baptaes samting olsem 100,000 pablisa nomoa stap, bat distaem winim 8,000,000 pipol nao worshipim Jehovah long 240 kantri. Olketa wea graduate from Gilead duim big waka for help for mekem disfala waka grow. Mi hapi tumas from mi bin waka witim staka missionary long olketa year wea go pas and helpem olketa for travel go long assignment bilong olketa.

Mi hapi tumas from taem mi young yet, mi disaed for apply for waka long Bethel and duim moa samting long waka bilong Jehovah. Jehovah barava blessim mi kam kasem distaem. Mitufala hapi tumas for waka long Bethel, and tu, for winim 50 year mi and Lila enjoyim wei for waka long ministry witim olketa kongregeson long Brooklyn and mifala garem staka gudfala fren.

Distaem mi gohed waka long Bethel and Lila gohed for sapotim mi. Nomata mi winim 84 year, mi hapi from mi fit for duim waka yet and mi savve help witim waka for deal witim olketa leta wea kam long branch.

Iumi hapi tumas for part long nambawan organization bilong Jehovah and for lukim hao pipol wea worshipim Jehovah barava difren from olketa wea no worshipim hem. Toktok long Malakae 3:18 barava kamap tru. Hem sei: “Long datfala taem, bae yufala luksave wea olketa stretfala pipol hu i obeim mi i barava deferen from olketa nogud pipol hu i nating obeim mi.? Hem nao toktok blong [Jehovah] hu hemi garem evri paoa.” Evriday iumi lukim world bilong Satan hem kamap moa worse and pipol no hapi and no garem eni hope. Bat olketa wea lovem and worshipim Jehovah, olketa hapi and garem hope for future nomata laef distaem hem barava hard tumas. Hem nambawan privilege for talem gud nius abaotem Kingdom long olketa narawan! (Matt. 24:14) Klosap nao Kingdom bilong God bae finisim disfala nogud world and startim niu world wea iumi bae kasem olketa nambawan blessing wea God promisim, olsem wei for garem gud health and laef olowe. Then long datfala taem, evri faithful wakaman bilong Jehovah bae laef olowe long disfala earth.