1, 2. (a) Wanem nao main waka long laef bilong Jesus, and why nao olsem? (b) From iumi “waka tugeta witim God,” wanem nao savve helpem iumi for duim gud ministry bilong iumi?

JESUS CHRIST hem wanfala carpenter and wanfala teacher. (Mark 6:3; John 13:13) Hem savve tumas hao for duim gud tufala waka hia. From hem wanfala carpenter, hem lane hao for iusim gud olketa tul for wakem olketa samting from timba. And from hem wanfala teacher hem savve tumas hao for iusim olketa Holy Raeting for helpem pipol minim olketa truth insaed Bible. (Matt. 7:28; Luke 24:32, 45) Taem Jesus 30 year, hem lusim olketa carpenter tul bilong hem bikos hem savve waka bilong hem for teach nao hem barava important. Hem sei wei for talemaot gud nius abaotem Kingdom bilong God hem wanfala reason why God sendem hem kam long earth. (Matt. 20:28; Luke 3:23; 4:43) Jesus ting long ministry olsem main waka long laef bilong hem, and hem laekem olketa narawan for joinim hem for duim datfala waka.—Matt. 9:35-38.

² Maet iumi evriwan no carpenter, bat iumi evriwan olketa teacher bilong gud nius. Datfala waka barava important bikos Bible sei iumi “waka tugeta witim God.” (1 Cor. 3:9; 2 Cor. 6:4) Iumi garem sem tingting olsem man wea raetem Psalm wea sei: “Evri toktok blong [Jehovah] hemi barava tru.” (Sams 119:159, 160) Dastawe taem iumi duim ministry, iumi laek for “iusim long stretfala wei datfala toktok bilong God wea tru.” (Readim 2 Timothy 2:15.) So,  iumi laek for trainim iumiseleva for savve gud hao for iusim Bible, wea hem nao main tul for teachim olketa narawan truth abaotem Jehovah, Jesus, and Kingdom. For helpem iumi, organization bilong Jehovah provaedem olketa nambawan tul wea iumi need for savve gud hao for iusim, mekem iumi duim gud ministry bilong iumi. Olketa tul hia stap insaed Teaching Toolbox.

3. Wanem important samting nao iumi shud tingim taem iumi duim ministry, and hao nao Acts 13:48 helpem iumi for duim datwan?

³ Maet iu ting why nao iumi kolem long Teaching Toolbox and no Preaching Toolbox? For “preach” hem minim for talemaot wanfala message, bat for “teach” hem minim for explainim gud datfala message mekem hem kasem heart bilong man and muvim hem for followim wanem hem lanem. Long disfala lelebet taem wea iumi garem for preach, goal bilong iumi hem for startim Bible study and teachim truth long pipol. Diswan minim iumi mas traem best for lukaotem olketa wea “showimaot olketa laekem laef olowe” and helpem olketa for worshipim Jehovah.—Readim Acts 13:44-48.

4. Hao nao bae iumi luksavve long olketa wea “laekem laef olowe” and hao nao iumi savve faendem olketa?

⁴ Hao nao bae iumi luksavve olketa wea “showimaot olketa laekem laef olowe”? Olsem olketa Christian long first century, only wei for faendem pipol olsem hem for duim preaching waka. Iumi need for followim wanem Jesus talem taem hem sei: “Long olketa taon or vilij wea iufala go long hem, lukaotem man wea fit for iufala visitim hem witim message bilong iufala.” (Matt. 10:11) Iumi no expectim pipol wea no interest, praod, or wea no laekem spiritual samting for acceptim gud nius. Iumi lukaotem pipol wea honest, hambol, and barava laek for savve long tru samting. Iumi olsem Jesus taem hem wanfala carpenter. Maet firstaem hem lukaotem stretfala tree for iusim for mekem furniture, door, yoke, or nara samting. Taem hem faendem finis, hem tekem toolbox bilong hem, iusim savve wea hem garem and mekem olketa furniture. Iumi tu savve duim datwan taem iumi lukaotem pipol wea garem honest heart.—Matt. 28:19, 20.

5. Wanem nao iumi need for savve long hem abaotem Teaching Toolbox wea iumi garem? Storyim example. (Lukim piksa long start bilong study.)

⁵ Insaed long wanfala toolbox, each tul iumi iusim for wanfala waka. Olsem example, tingim olketa tul wea Jesus iusim taem hem carpenter. * Hem needim olketa tul for measurem, markem timba, katem, drillim, sheipim, levelem, and for joinim olketa pis timba tugeta. Long sem wei tu, insaed Teaching Toolbox, iumi garem each tul for iusim for wanfala waka. So hem gud for iumi luk insaed toolbox and savve hao for iusim olketa important tul hia wea iumi garem.

6, 7. (a) Hao nao iumi savve iusim contact card? (b) Meeting invitation hem for wanem?

⁶ Contact Card. Disfala tul hem smol bat hem savve help long bigfala wei. Hem helpem pipol for savve long iumi and for go long website bilong iumi, wea olketa savve lanem staka samting abaotem iumi and savve ask for Bible study. Long jw.org, winim 400,000 pipol ask finis for Bible study, and evriday staka handred pipol savve ask for Bible study! So hem gud for iumi tekem samfala card witim iumi, mekem taem chance kamap, iumi savve iusim for witness long pipol wea iumi meetim.

⁷ Invitation. Iumi savve iusim meeting invitation for tufala samting. Long kava hem sei: “Iu savve studyim Bible witim Olketa Jehovah’s Witness.” Then hem sei iu savve  duim diswan “long olketa pablik meeting or witim wanfala man nomoa.” So disfala tul hem no for pipol savve long iumi nomoa, bat hem for invaetem “olketa wea luksavve olketa needim God” for studyim Bible witim iumi. (Matt. 5:3) Bat pipol welkam for attendim meeting witim iumi nomata olketa acceptim Bible study or nomoa. Sapos olketa attend, bae olketa lukim and herem hao iumi teachim staka samting from Bible.

8. Why nao hem important for pipol kam nomata long wanfala meeting nomoa? Storyim wanfala example.

⁸ Hem barava important for gohed invaetem pipol for kam nomata long wanfala meeting nomoa. Why? Mekem olketa lukim hao iumi enjoyim staka spiritual kaikai and iumi barava difren from Bigfala Babylon wea barava hangre long spiritual wei. (Aesaea 65:13) Tu-thri year go finis, Ray and Linda, wanfala hasband and waef long United States luksavve long diswan. Tufala bilivim God and laek for savve moa abaotem hem, so tufala start for go long evri church long datfala taon. Staka difren religion and church nao stap long there. Bifor tufala go long olketa church hia, tufala sei bae tufala lukluk for tufala samting. First samting, tufala laek for mas lanem samting from church wea tufala attendim, and mek-tu samting, olketa member bilong datfala church mas luk olsem pipol wea worshipim God. Bihaen samfala year, tufala kasem evri church bat tufala nating lanem eni samting and lukluk bilong pipol wea go long olketa church hia nating showimaot respect. Bihaen tufala go aot from last church long list bilong tufala, Linda go waka and Ray go bak long haos. Taem Ray go bak, hem draev pasim wanfala Kingdom Hall and hem ting olsem, ‘Mi shud go and faendaot hao nao religion bilong olketa?’ Datwan hem best samting wea hem duim! Evriwan long Kingdom Hall kaen and welkamim hem and olketa werem kaleko wea barava fitim. Ray sidaon long front and barava hapi long wanem hem lanem! Samting wea happen hem olsem wanem aposol Paul talem abaotem man wea firstaem for hem kam long Christian meeting. Hem sei: “God hem barava stap witim iufala.” (1 Cor. 14:23-25) Bihaen datwan, Ray attendim evri meeting long Sunday, then hem kam long evri midweek meeting. Gogo Linda tu start for attend, and nomata tufala winim 70 year, tufala acceptim Bible study and gogo tufala baptaes.

9, 10. (a) Why nao hem isi for iusim olketa tract? (b) Storyim hao for iusim tract Wanem Nao Kingdom Bilong God?

⁹ Tract. Iumi garem eitfala tract insaed toolbox bilong iumi and hem isi tumas for iusim for startim story. Olketa releasem olketa tract hia long 2013, and kam kasem distaem olketa printim samting olsem faev billion copy! Samting wea barava gud long olketa tul hia, hem bikos sapos iu lane hao for iusim wanfala, iu bae savve hao for iusim evriwan, bikos olketa wakem long sem stael nomoa. Hao nao iu savve iusim wanfala tract for startim story witim samwan?

¹⁰ Maet iu laek for iusim tract Wanem Nao Kingdom Bilong God? Showim long haosholder kwestin long front and askem hem: “Waswe, eni taem iu bin ting raonem wanem nao Kingdom bilong God? Waswe, iu tingse hem . . . ?” Then askem hem which wan long thrifala ansa hia nao hem tingim. Winim wei for sei ansa bilong hem stret or nomoa openem next page, long heding, “Bible Hem Sei” and then storyim Daniel 2:44 and Isaiah 9:6. Then, sapos hem fitim, iu savve gohed for story. Last samting, showim hem kwestin wea stap long bihaen wea garem title “Samting for Tingim”: “Taem Kingdom bilong God hem rul, hao nao bae laef bilong pipol long datfala taem?” Datfala kwestin bae lead go for iutufala story moa bihaen. Taem iu go bak for  lukim hem, iu savve storyim leson 7 long brochure Gud Nius From God!, wea hem wanfala tul for startim Bible study.

11. Wanem nao goal bilong olketa magasin, and wanem nao iumi shud savve long hem abaotem olketa magasin hia?

¹¹ Magasin. Olketa pablisim and transleitim olketa Wastaoa and Wekap! magasin long staka languis long world! From staka pipol nao savve readim olketa magasin hia, olketa topic long kava subject bilong datfala magasin hem for mekem pipol evriwea interest for readim. Iumi shud iusim olketa tul hia for mekem man interest for savve wanem nao important long laef distaem. Bat for iumi iusim gud olketa magasin hia, iumi need for savve firstaem hu nao olketa designim disfala magasin for hem.

12. (a) Olketa wakem Wekap! for hu, and wanem nao goal bilong hem? (b) Wanem gud experience nao iu kasem taem iu iusim disfala tul?

¹² Wekap! Olketa wakem for pipol wea maet garem lelebet savve or no savve eniting abaotem Bible. Maet olketa no savve abaotem olketa Christian teaching, no trustim religion, or maet olketa no savve hao Bible savve helpem olketa. Wanfala main goal bilong Wekap! hem for helpem reader for bilivim God hem stap. (Rome 1:20; Heb. 11:6) And tu, for strongim faith bilong reader hao Bible hem really “toktok bilong God.” (1 Thess. 2:13) Thrifala main topic long olketa kava subject for 2018 hem nao, “Hao Iumi Savve Hapi,” “12-Fala Samting for Helpem Famili Hapi,” and “Samting for Helpem Iumi Taem Samwan Dae.”

13. (a) Olketa wakem pablik Wastaoa for hu? (b) Wanem gud experience nao iu kasem taem iu iusim disfala tul?

¹³ Wastaoa. Olketa pablik Wastaoa magasin hem storyim olketa spiritual samting and hem for olketa wea tinghae lelebet long God and Bible. Nomata maet olketa savve samfala samting long Bible bat olketa no garem stretfala savve abaotem olketa teaching insaed. (Rome 10:2; 1 Tim. 2:3, 4) Thrifala main topic long olketa kava subject for 2018 ansarem olketa kwestin hia: “Waswe, Bible Still Fitim Distaem?,” “Wanem Nao Bae Happen Long Future?,” and “Waswe, God Lovem Iu?”

14. (a) Wanem nao goal bilong fofala video wea stap long Teaching Toolbox? (b) Wanem gud experience nao iu kasem taem iu iusim olketa video hia?

¹⁴ Video. Long taem bilong Jesus, olketa carpenter iusim nomoa olketa hand tul. Bat distaem, olketa carpenter iusim electric tul olsem saw, drill, sanding machine, and staka nara samting. Long sem wei tu, iumi garem olketa naes video for showim long pipol. Fofala long olketa video wea stap long toolbox: Why Nao Hem Gud for Studyim Bible?, Hao Nao Mifala Conductim Wanfala Bible Study?, Wanem Nao Mifala Duim Long Kingdom Hall?, and Hu Nao Olketa Jehovah’s Witness? Olketa shortfala video wea no winim tufala minute barava gud for iusim taem iumi preach. Iumi savve iusim olketa nara video wea long lelebet taem iumi duim return visit and witim pipol wea garem taem for story. Olketa tul hia hem for muvim pipol for studyim Bible and attendim olketa meeting bilong iumi.

15. Storyim example wea showimaot hao olketa video bilong iumi savve affectim man taem hem herem long languis bilong hem.

¹⁵ Olsem example, wanfala sista meetim wanfala woman from Micronesia, wea languis bilong hem Yapese. Datfala sista showim hem video, Why Nao Hem Gud for Studyim Bible? long languis bilong hem. Taem video start woman hia sei: “Diswan hem languis bilong mi. Mi sapraes tumas! Toktok bilong man hia here olsem man long island bilong mi. Hem  story long languis bilong mi!” Bihaen, hem sei bae hem readim and lukim evriting long languis bilong hem long jw.org. (Comparem Acts 2:8, 11.) Nara example. Wanfala sista long United States sendem link bilong datfala sem video long website bilong iumi bat long languis bilong nephew bilong hem wea stap long nara kantri. Bihaen nephew hia lukim finis, hem e-mail go long datfala sista and sei: “Mi interest long part wea storyim Satan nao rulim disfala world. So mi ask for wanfala Bible study.” Diswan hem interesting bikos datfala nephew stap long kantri wea olketa stopem waka bilong iumi!

16. Storyim wanem nao waka bilong each brochure: (a) Followim Toktok Bilong God Mekem Iu Laef Olowe. (b) Gud Nius From God! (c) Hu Nao Duim Wanem Jehovah Laekem Distaem?

¹⁶ Brochure. Hao nao bae iu teachim truth long samwan wea no savve gud for read or wea no garem literature long languis bilong hem? Wanfala tul for duim datwan, hem nao brochure Followim Toktok Bilong God Mekem Iu Laef Olowe. * Wanfala nambawan tul for startim Bible study hem nao datfala brochure Gud Nius From God! Iu savve showim samwan 14-fala topic wea stap bihaen long datfala brochure and letem hem chusim which wan nao hem interest long hem. Then startim study long datfala leson. Waswe, iu traem idea hia long eni return visit bilong iu finis? Mek-thri brochure long toolbox bilong iumi hem nao Hu Nao Duim Wanem Jehovah Laekem Distaem? Olketa wakem diswan for teachim Bible study for savve long organization. For lane for iusim disfala tul witim Bible study, lukim March 2017 Christian Laef and Ministry Bilong Iumi—Meeting Buk.

17. (a) Wanem nao waka bilong each study buk? (b) Wanem nao olketa wea laek for baptaes need for duim, and why nao olsem?

¹⁷ Buk. Bihaen iu startim study witim samwan long wanfala brochure, iu savve changem go study bilong iutufala insaed datfala buk Wanem Nao Iumi Savve Lanem Long Bible? Disfala tul helpem study for savve moa samting abaotem olketa main Bible teaching. Bihaen iutufala finisim disfala buk, and iu lukim student bilong iu muv ahed gud, iu savve gohed study witim hem insaed datfala buk Gohed Kasem Gud Samting From Love Bilong God. Disfala tul savve help for teachim study hao for followim olketa Bible principle evriday. Tingim hao nomata bihaen hem baptaes, olketa niu wan hia need for gohed for study and finisim disfala buk. Diswan bae barava helpem olketa for garem strong faondeson long truth.—Readim Colossae 2:6, 7.

18. (a) Wanem nao 1 Timothy 4:16 encouragem iumi for duim taem iumi teachim truth, and wanem nao kamaot from datwan? (b) Wanem nao goal bilong iumi taem iumi iusim disfala Teaching Toolbox?

¹⁸ Iumi Olketa Jehovah’s Witness garem responsibility for teachim “datfala gud nius” wea savve helpem pipol for kasem laef olowe. (Col. 1:5; readim 1 Timothy 4:16.) For helpem iumi duim diswan, iumi garem Teaching Toolbox wea fulap witim staka tul wea iumi needim. (Lukim “ Teaching Toolbox.”) Hem gud for iumi barava savve hao for iusim olketa tul hia. Each wan long iumi savve disaedem which literature long datfala toolbox nao iumi savve iusim for storyim gud nius long olketa wea interest and wanem taem for duim datwan. Tingim, goal bilong iumi hem no for just givim literature nomoa, and iumi shud no givim tu long pipol wea no interest. Goal bilong iumi hem for helpem pipol wea hambol, garem honest heart, and wea hangre for spiritual kaikai. Olketa hia “showimaot olketa laekem laef olowe.”—Acts 13:48; Matt. 28:19, 20.