1, 2. Bihaen Moses dae, wanem nao wanfala hard samting wea Joshua feisim?

JOSHUA still tingim yet toktok bilong Jehovah wea sei: “Wakaman blong mi, Mosis, hemi dae finis nao, bat distaem, yu wetem olketa pipol ya mas mekredi fo katkros long Jodan Riva, mekem yufala go insaet long lan wea mi stat fo givim long yufala.” (Josua 1:1, 2) Datwan hem bigfala change long laef bilong Joshua, wea hem helpem Moses for samting olsem 40 year!

² From Moses bin leadim Israel for longtaem finis, Joshua maet ting olsem, ‘Waswe, pipol bilong God bae acceptim mi for kamap leader bilong olketa tu?’ (Diutronomi 34:8, 10-12) Wanfala buk explainim Josua 1:1, 2 olsem: Taem wea hem barava danger and hard tumas for wanfala kantri, hem nao taem wanfala leader changem narafala leader. Diswan happen bifor and nomata distaem tu.

3, 4. Hao nao God blessim Joshua from hem trustim hem, and wanem kwestin nao maet iumi askem iumiseleva?

³ Hem fitim for Joshua wari abaotem datwan. Bat hem trustim Jehovah and kwiktaem followim instruction bilong hem. (Josua 1:9-11) God blessim Joshua from hem trustim hem. Bible storyim hao Jehovah nao leadim Joshua and olketa Israelite, bat hem iusim  wanfala angel for duim diswan. Luk olsem disfala angel nao datfala Word, wea hem firstborn Son bilong God.—Eksodas 23:20-23; John 1:1.

⁴ Jehovah helpem nation bilong Israel for change for followim datfala niu leader, Joshua. Iumi tu stap long taem long history wea staka samting hem gohed for change, and maet iumi ting olsem, ‘From organization bilong God muv ahed kwiktaem and staka bigfala change kamap, why nao iumi fit for trustim Jesus olsem Leader wea Jehovah markem?’ (Readim Matthew 23:10.) For ansarem disfala kwestin, iumi bae storyim hao Jehovah leadim pipol bilong hem bifor taem olketa change kamap.

5. Wanem spesol samting nao Joshua lukim taem hem klosap kasem Jericho? (Lukim piksa long start bilong study.)

⁵ No longtaem bihaen olketa Israelite akrosim Jordan, Joshua lukim wanfala spesol samting. Taem hem klosap kasem Jericho, hem meetim wanfala man wea holem sword. From hem no savve hu nao datfala man, hem ask olsem: “Waswe, yu wanfala long mifala, o wanfala enemi?” Joshua barava sapraes taem datfala man sei hem chief long army bilong Jehovah, wea redi for protectim pipol bilong God. (Readim Josua 5:13-15.) Nomata samfala scripture long Bible sei Jehovah nao story long Joshua, iumi luksavve God iusim datfala angel for story for hem, olsem hem duim staka taem bifor.—Eksodas 3:2-4; Josua 4:1, 15; 5:2, 9; Acts 7:38; Gal. 3:19.

6-8. (a) Why nao samfala instruction bilong Jehovah maet no luk stret long eye bilong man? (b) Why nao olketa instruction hia barava stret and fitim? (Lukim footnote tu.)

⁶ Joshua kasem klia instruction from datfala Chief angel long hao for tekovarem taon bilong Jericho. Firstaem, luk olsem samfala long olketa instruction hia hem no wanfala gud idea. Olsem example, Jehovah komandim evri man for circumcise, wea datwan bae mekem olketa no fit for faet for samfala day. Waswe, long taem olsem hem best taem for olketa man hia circumcise?—Jenesis 34:24, 25; Josua 5:2, 8.

⁷ Maet olketa soldia bilong Israel ting olsem: ‘Hao nao mifala bae protectim famili bilong mifala sapos enemy attak?’ Bat seknomoa olketa herem nius hao olketa long Jericho satem “olketa geit long bikfala wolston blong taon ya bikos olketa fraetem ami blong Israel.” (Josua 6:1) Masbi datfala nius mekem olketa Israelite barava trustim go moa olketa instruction wea kam from God.

⁸ And tu, datfala angel komandim olketa Israelite for march raonem Jericho wantaem insaed sixfala day and long mek-seven day olketa bae march raonem for sevenfala taem. Samfala soldia maet ting olsem: ‘Mifala weistim taem for wanem nomoa ia!’ Bat Leader bilong olketa Israelite, wea no eniwan savve lukim, hem barava savve gud long wanem hem duim. Samting wea happen hem strongim faith bilong olketa Israelite, and tu, hem mekem olketa no need for faet againstim olketa strongfala soldia bilong Jericho.—Josua 6:2-5; Heb. 11:30. *

9. Why nao iumi shud followim olketa instruction wea kam from organization bilong God? Storyim example.

⁹ Wanem nao iumi savve lanem from disfala story? Samfala taem maet iumi no barava minim gud why organization duim samfala samting. Olsem example, maet firstaem iumi kwestinim why iumi iusim tablet and mobile long ministry, meeting, and for duim study  seleva. Maet iumi lukim gud samting wea iumi kasem sapos iumi iusim datwan. Taem iumi lukim gud samting wea kamaot from olketa change hia nomata maet firstaem iumi daot lelebet, datwan bae strongim faith bilong iumi and wei wea iumi wan mind witim olketa brata and sista bilong iumi.

10. Hu nao bihaenem datfala important meeting bilong governing body wea kamap long Jerusalem?

¹⁰ Samting olsem 13-fala year bihaen Cornelius kamap Christian, samfala Christian wea Jew gohed for mekhae long wei for circumcise. (Acts 15:1, 2) Taem wanfala raoa kamap long Antioch abaotem wei for circumcise, olketa mekem arrangement for Paul go storyim datwan witim governing body long Jerusalem. Hu nao bihaenem datfala arrangement? Paul sei: “Mi go long there bikos Lord hem showimaot klia mi shud go.” So hem barava klia, Christ nao directim datfala gogo mekem governing body nao stretem datfala raoa.—Gal. 2:1-3.

11. (a) Wanem nao tingting bilong samfala Christian wea Jew abaotem wei for circumcise? (b) Hao nao Paul showimaot hem hambol for sapotim olketa elder long Jerusalem? (Lukim footnote tu.)

¹¹ Christ givim direction long governing body for storyim klia olketa Christian wea no Jew no need for circumcise. (Acts 15:19, 20) Bat samfala year bihaen olketa mekem datfala disison, staka Christian wea Jew gohed for circumcisem olketa son bilong olketa. Taem olketa elder long Jerusalem herem hao samfala sei Paul no followim Law bilong Moses, olketa givim hem samfala instruction wea hem no expectim. * (Acts 21:20-26) Olketa talem Paul for tekem fofala man go long temple mekem pipol lukim hem “followim Law bilong Moses.” Maet Paul fit for kwestinim wanem olketa talem hem for duim, and sei olketa Christian wea Jew nao no garem stretfala tingting abaotem wei for circumcise. Bat hem luksavve wanem olketa elder talem hem for mekem evri Christian wan mind, so hem  hambol for followim instruction bilong olketa. Bat maet iumi ting olsem: ‘Why nao Jesus letem disfala problem abaotem wei for circumcise hem gohed for longtaem, nomata dae bilong hem finisim nao datfala Law bilong Moses?’—Col. 2:13, 14.

12. Why nao maet Christ letem taem go pas bifor hem stretem problem abaotem wei for circumcise?

¹² Samfala faendem hem hard for kwiktaem change followim wanfala niu wei for minim samting. Samfala Christian wea Jew needim moa taem for changem tingting bilong olketa. (John 16:12) Samfala faendem hem no isi for acceptim hao man no need for circumcise for showimaot spesol wei wea hem fren witim God. (Jenesis 17:9-12) Olketa narawan fraet nogud olketa Jew persecutim olketa bikos olketa duim samting wea difren. (Gal. 6:12) Bat gogo Christ provaedem moa direction thru long olketa leta wea Paul raetem.—Rome 2:28, 29; Gal. 3:23-25.

13. Wanem nao savve helpem iumi for tinghae long wei wea Christ lead distaem?

¹³ Taem iumi no really minim gud why samfala change kamap long organization, hem gud for iumi tingim bak hao Christ leadim pipol bilong God bifor. Nomata long taem bilong Joshua or long first century, Christ evritaem provaedem olketa wise direction for protectim pipol bilong God olsem wanfala grup, and for strongim faith bilong olketa and mekem olketa wan mind.—Heb. 13:8.

14-16. Hao nao direction wea kam from “datfala wakaman wea faithful and wise” showimaot Christ laek for strongim iumi long spiritual wei?

¹⁴ Jesus showimaot klia hem lovem and tingim spiritual saed bilong iumi taem hem iusim “datfala wakaman wea faithful and wise” for givim olketa direction long barava taem wea iumi needim. (Matt. 24:45) Marc, wea garem fofala pikinini hem sei: “Satan trae for spoelem kongregeson thru long wei wea hem attakim olketa famili. Bat encouragement wea iumi kasem distaem for conductim famili worship evri week hem showimaot klia olketa famili hed mas protectim famili bilong olketa!”

¹⁵ Taem iumi luksavve Christ nao leadim iumi, iumi bae barava minim hao hem laek for helpem iumi strong long spiritual wei. Patrick wea elder, hem sei: “Firstaem samfala no laekem wei for meet tugeta long smol field service grup long weekend.” Bat hem sei datfala arrangement showimaot klia wei wea Jesus lovem evriwan long kongregeson. Olsem example, samfala brata and sista wea savve feel shame or no go olowe long ministry, distaem olketa feel olsem olketa narawan tingim olketa and olketa savve duim moa samting long ministry. Diswan strongim faith bilong olketa.

¹⁶ And tu, Christ helpem iumi for evritaem tingim important waka wea gohed long earth distaem. (Readim Mark 13:10.) André, wanfala niu elder, hem evritaem trae for change followim olketa direction wea kam from organization bilong God. Hem sei: “Wei wea olketa katem daon namba bilong olketa wea waka long Bethel showimaot hem barava important distaem for iusim strong bilong iumi for duim preaching waka.”

17, 18. Why nao hem gud for tingim olketa gud samting wea iumi kasem from olketa change wea kamap no longtaem go nomoa?

¹⁷ Jesus Christ, King bilong iumi wea gohed for rul distaem, hem gohed givim direction for helpem iumi distaem and long future. Dastawe, iumi hapi taem iumi tingim olketa gud samting wea iumi kasem from olketa change wea kamap no longtaem go nomoa. Long famili worship, hem gud for storyim olketa gud samting wea iumi kasem from olketa change saed long olketa meeting evri week and long ministry.

 ¹⁸ Sapos iumi minim why iumi kasem olketa instruction from organization bilong Jehovah and gud samting wea iumi kasem, datwan bae helpem iumi for hapi for followim olketa direction hia. Iumi hapi from olketa katem daon namba bilong olketa literature wea olketa printim and iusim olketa niu technology. Diswan hem sevem selen and mekem preaching waka kasem evriwea long earth. So sapos hem fitim, iumi savve iusim olketa pablikeson and video long olketa tablet or mobile bilong iumi. Taem iumi duim olsem, iumi sapotim Christ for iusim selen bilong organization long wisefala wei.

19. Why nao iumi shud followim direction bilong Christ?

¹⁹ Taem iumi willing for followim direction bilong Christ, datwan strongim faith bilong olketa narawan and helpem iumi for wan mind. Taem André ting abaotem hao olketa katem daon namba bilong olketa Bethelite raonem world, hem sei: “Nambawan example bilong olketa wea bin waka long Bethel wea willing for followim olketa change hia, helpem mi for respectim olketa and trustim wei wea Christ hem lead. Olketa gohed for followim chariot bilong Jehovah taem olketa hapi for duim eni assignment wea olketa kasem.”

20, 21. (a) Why nao iumi trustim Christ wea hem Leader bilong iumi? (b) Wanem kwestin nao bae iumi storyim long next study?

²⁰ Leader bilong iumi, Jesus Christ, klosap for “winim olketa enemy bilong hem” and bae hem duim staka nambawan samting. (Rev. 6:2; Sams 45:4) Bat distaem, hem gohed for redyim pipol bilong God for niu world. Long datfala taem, iumi savve share insaed teaching and building waka wea bae gohed long taem bilong resurrection.

²¹ Sapos iumi gohed for trustim King bilong iumi nomata eni change kamap, bae hem leadim iumi go insaed niu world. (Readim Sams 46:1-3.) Samfala taem maet hem no isi for iumi change, especially taem iumi kasem samting long laef wea iumi no expectim. Bat hao nao iumi savve gohed garem peace long heart and garem strongfala faith long Jehovah? Iumi bae ansarem datfala kwestin long next study.