Lo datfala Treaty of Versailles, olketa startim tu wanfala niu organization wea olketa kolem League of Nations. Goal blo datfala organization hem for “helpem evri kantri lo world for waka tugeta and for evri kantri kasem peace and security.” Staka religion wea sei olketa Christian sapotim datfala League of Nations. Datfala Federal Council of the Churches of Christ lo America praisem datfala organization and sei “diswan nao stand for Kingdom blo God lo disfala earth saed lo politik.” Datfala council showimaot olketa sapotim datfala League of Nations taem olketa sendem pipol blo olketa go for attendim datfala Paris Peace Conference. Wanfala lo olketa delegate hia hem sei datfala conference hem “start blo wanfala niu taem lo history blo world.”

Wanfala niu samting lo history hem start for kamap lo datfala taem tu, bat hem no bikos lo datfala peace conference. Hem saed lo preaching waka. Lo 1919 Jehovah strongim moa pipol blo hem for duim preaching waka winim eni taem bifor. Bat bifor disfala waka savve gohed, olketa big change mas kamap for olketa Bible Student.

Election for chusim olketa director for Watch Tower Bible and Tract Society hem savve kamap evri year, and lo datfala year olketa markem for kamap lo Saturday January 4, 1919. Bat Joseph Rutherford, wea lead lo waka lo datfala taem, hem witim nara sevenfala brata stap lo prison lo Atlanta, Georgia, U.S.A. So kwestin hem kamap, from olketa brata hia stap lo prison, waswe bae olketa savve electim olketa moa? Or waswe, bae olketa nara brata nao changem olketa?

Taem Brata Rutherford lo prison, hem wari abaotem wanem bae happen lo organization. Hem savve samfala brata ting hem gud for electim nara brata for kamap president. From diswan, hem raetem wanfala leta go lo olketa, and recommendim Brata Evander Coward for kamap president. Rutherford storyim hao Brata Coward hem wanfala brata wea “kwaet,” “wise,” and hem “gohed faithful lo waka blo Lord.” Bat, olketa nara brata garem difren idea, olketa laek for muvim datfala election for bihaen sixfala month. Olketa lawyer blo olketa brata lo prison agree lo datwan  tu. Taem olketa gohed for storyim datwan, samfala brata start for feel no gud.

Then wanfala samting hem happen, wea Brata Richard Barber sei hem help for daonem datfala feeling. Wanfala lo olketa brata hem sei: “Mi no savve lo wanem law askem iumi for duim, bat samting wea mi savve lo hem nao hem wanem iumi mas duim for faithful lo God. Jehovah laekem iumi for faithful lo hem. And best wei for showimaot iumi faithful lo God hem nao for iumi electim moa Brata Rutherford olsem president.”—Sams 18:25.

Brata Alexander Macmillan wea hem tu prisoner witim Brata Rutherford tingim bak next day bihaen datfala election taem Brata Rutherford kam noknok lo wall blo prison cell blo hem and sei: “Givim kam hand blo iu.” Then Brata Rutherford givim hem wanfala telegram. Taem Brata Macmillan lukim datfala short message hem kwiktaem savve wanem nao datwan minim. Datfala message sei: “RUTHERFORD WISE VAN BARBER ANDERSON BULLY AND SPILL DIRECTOR FIRST THRIFALA OFFICER LOVE FOR EVRIWAN.” Diswan minim olketa electim bak olketa sem brata for kamap olketa director and Joseph Rutherford and William Van Amburgh olketa still waka yet olsem officer. So, Brata Rutherford hem still gohed olsem president.

Taem eitfala brata hia lo prison olketa faithful Bible Student askem pipol for saenem wanfala pepa for mekem olketa brata for kamap free. Olketa brata and sista hia wea no fraet kasem samting olsem 700,000 signature from pipol. Bat lo Wednesday, March 26, 1919, bifor olketa sendem go datfala petition, Brata Rutherford and olketa nara brata hia olketa release from prison.

Insaed lo speech blo Brata Rutherford for olketa wea welkamim hem, hem sei: “Mi barava sure hao wanem iumi evriwan experiencem hem redyim iumi for olketa hard taem wea bae kam. . . . Wei wea iufala faet hard hem no for aotem olketa brata blo iufala from prison nomoa. Datwan hem no main samting. . . . Wei wea iufala faet hard hem nao for witness abaotem disfala Truth, and olketa wea duim datwan olketa kasem nambawan blessing.”

Olketa samting wea happen lo taem blo datfala trial hem maet pruvim hao Jehovah nao directim olketa samting. Lo May 14, 1919, datfala appeal kot hem givim disison: “Olketa wea kot accusim lo disfala case no garem . . . stret trial wea olketa shud kasem, and from datwan kot aotem datfala judgment.” Olketa brata bin kasem sentence for olketa serious crime, and nomata sapos olketa daonem sentence blo olketa or sapos olketa kasem pardon for wanem olketa duim, judgment blo olketa bae stap lo record blo kot. Bat olketa no kasem eni charge. From datwan, Judge Rutherford still duim waka blo hem saed lo law for defendim pipol blo Jehovah lo Supreme Court blo United States, and hem gohed for duim datwan bihaen hem release from prison.

Brata Macmillan sei: “Mifala no sidaon nating and gohed weit nomoa for Lord tekem mifala lo heven. Mifala luksavve hao mifala mas duim samting for faendaot wanem nao Lord hem laekem mifala for duim.”

Bat olketa brata lo hedquarter hard for stretawe duim moa datfala waka wea olketa bin duim for staka year finis. Why nao olsem? Bikos taem olketa lo prison, evri printing plate wea olketa savve iusim for printim literature hem distroe finis. Diswan mekem olketa feel wikdaon lelebet, and samfala brata tingse maet preaching waka bae stop nao.

Waswe, eniwan bae interest yet lo datfala message blo Kingdom wea olketa Bible Student preachim? For kasem ansa, Brata Rutherford disaed for givim wanfala tok. Olketa invaetem evriwan for kam. Brata Macmillan sei: “Sapos no eniwan kam lo datfala meeting, iumi savve preaching waka hem stop nao.”

So lo Sunday, May 4, 1919, nomata lo datfala taem, Brata Rutherford hem sik tumas, hem givim datfala tok: “The Hope for Distressed Humanity” lo Los Angeles, California. Samting olsem 3,500 nao attend, bat staka handred go bak nomoa bikos no eni spes. Lo next day, nara 1,500 pipol moa attend. So olketa brata kasem ansa nao. Pipol barava interest lo datfala message!

Next samting wea olketa brata duim hem barava affectim hao olketa Jehovah’s Witness preach kam kasem distaem.

The Watch Tower blo August 1, 1919, talemaot hao wanfala convention bae kamap lo Cedar Point, Ohio lo start blo September. Wanfala young Bible Student wea kam from Missouri, Clarence Beaty hem sei “Evriwan barava luk forward for mas go lo there.” Winim 6,000 brata and sista nao hipap, and datwan staka winim nao wanem olketa expectim. Samting wea mekem  evriwan lo datfala hipap for hapi go moa, hem bikos winim 200 nao baptaes lo Lake Erie.

Lo September 5, 1919, lo mek-faev day blo datfala convention, Brata Rutherford givim wanfala tok, “Address to Co-laborers,” and hem announcem wanfala niu magasin wea olketa kolem The Golden Age. * Datfala magasin hem for “talemaot olketa important nius, and datfala magasin explainim from Bible why nao olketa big samting gohed for happen distaem.”

Evri Bible Student kasem encouragement for no fraet for preach and for iusim datfala niu pablikeson. Wanfala leta wea storyim hao for organizem datfala waka, hem sei: “Each faithful [baptaes] wan mas tingim hao hem wanfala nambawan privilege for duim disfala waka, and mas mekius lo disfala chance, and duim best for preach evriwea lo world.” Staka nao acceptim datfala invitation! Lo December, olketa faithful Kingdom pablisa kasem finis winim 50,000 subscription for niufala magasin.

Lo end blo 1919, pipol blo Jehovah organize moa and kamap strong for gohed. And tu, samfala important profesi abaotem olketa last day hem fulfill. Datfala profesi lo Malachi 3:1-4 abaotem wei for God stretem pipol blo hem and mekem olketa kamap klin hem fulfill. Pipol blo Jehovah kamap free from “Bigfala Babylon,” and Jesus hem chusim nao “datfala wakaman wea faithful and wise.” * (Rev. 18:2, 4; Matt. 24:45) So olketa Bible Student redi nao for duim waka wea Jehovah laekem olketa for duim.