STUDY ARTICLE 41
Gohed Faithful lo Taem blo “Bigfala Trabol”
“Yufala hu i tinghevi long [Jehovah], yufala mas lavem hem. [Jehovah] hemi gohed fo lukaftarem gudfala long olketa pipol wea tingting blong olketa hemi stap strong long hem.”—SAMS 31:23.
SONG 129 Iumi Bae No Givap
WANEM IUMI BAE STORYIM *
1-2. (a) Wanem nao olketa nation bae klosap for announcem? (b) Olketa wanem kwestin nao iumi need for ansarem?
TINGIM go taem wea olketa nation bae announcem datfala toktok, ‘peace and security’ wea iumi bin weit for herem. Olketa maet tok praod dat world hem barava sef and garem peace winim eni narataem bifor. Olketa nation laekem pipol for tingse olketa garem full kontrol lo evri samting wea happen lo world. Batawea, olketa bae no fit for kontrolem nao next samting wea bae happen. Why nao olsem? Olsem Bible hem profesi abaotem bae “seknomoa olketa bae finis, . . . and bae hem hard for olketa ranawe.”—1 Thess. 5:3.
2 Iumi need for ansarem olketa important kwestin hia: Wanem nao bae happen lo taem blo “bigfala trabol”? Wanem nao Jehovah expectim iumi for duim lo datfala taem? And hao nao iumi savve redyim iumiseleva distaem for gohed faithful taem iumi go thru lo bigfala trabol?—Matt. 24:21.
WANEM NAO BAE HAPPEN LO TAEM BLO “BIGFALA TRABOL”?
3. Olsem Revelation 17:5, 15-18 storyim, hao nao bae God distroem “Bigfala Babylon”?
3 Readim Revelation 17:5, 15-18. “Bigfala Babylon” bae distroe! Olsem iumi storyim finis, olketa nation bae no fit for kontrolem samting wea bae happen lo datfala taem. Why nao olsem? “Diswan hem bikos God [bae] mekem olketa garem tingting for duim samting wea hem laekem.” Wanem nao God laekem? Hem laek for distroem evri false religion, wea insaed diswan hem olketa blo Christendom. * God putim datfala tingting insaed lo heart blo “tenfala horn” blo datfala “wild animal wea kala bilong hem red.” Tenfala horn hem minim evri gavman wea sapotim datfala “wild animal” wea hem nao United Nation. (Rev. 17:3, 11-13; 18:8) Taem wea olketa gavman hia attakim false religion, datwan hem saen wea showimaot bigfala trabol hem start. Datwan hem wanfala big samting wea bae affectim full world.
4. (a) Wanem nao olketa reason wea maet olketa nation iusim for sei olketa fit for attakim false religion? (b) Wanem nao olketa wea bin member blo olketa religion hia bae duim?
4 Iumi no savve wanem nao olketa reason wea olketa nation maet iusim for sei olketa fit for attakim Bigfala Babylon. Olketa maet sei olketa religion nao mekem hem hard for garem peace and sei olketa evritaem poke nose lo politik. Or maet olketa sei olketa religion hipimap staka selen tumas and garem staka property. (Rev. 18:3, 7) So luk olsem lo disfala attak, maet no evri member blo olketa religion hia bae distroe. Bat, luk olsem olketa religion nao olketa nation bae finisim. Taem olketa religion hia distroe, olketa wea member blo religion hia bifor bae luksavve olketa leader blo olketa no duim wanem olketa promisim, and taem olsem, olketa bae no laek luksavve lo religion blo olketa.
5. Wanem nao Jehovah promisim abaotem bigfala trabol and why nao olsem?
5 Bible no talem hao long nao bae hem tek for finisim bigfala Babylon, bat iumi savve datwan bae no gohed for longfala taem. (Rev. 18:10, 21) Jehovah hem promis hao hem bae no letem bigfala trabol for “gohed for longfala taem” mekem “olketa wea hem chusim” and tru religion bae no distroe. (Mark 13:19, 20) Bat wanem nao Jehovah expectim iumi for duim lo start blo bigfala trabol go kasem war blo Armageddon?
GOHED MEKHAE LO TRU WORSHIP BLO JEHOVAH
6. Why nao hem no inaf for just lusim false religion nomoa?
6 Olsem iumi storyim lo last study, Jehovah expectim olketa wea worshipim hem for stap klia from Bigfala Babylon. Nomata olsem, diswan no minim for just lusim false religion nomoa. Bat iumi mas disaed strong for mekhae lo tru religion, wea hem klin worship blo Jehovah. Tingim tufala wei wea iumi savve duim datwan.
Mas no enitaem missim wei for hipap tugeta lo olketa meeting nomata lo olketa hard taem. (Paragraf 7 storyim diswan) *
7. (a) Hao nao iumi savve gohed strong for followim olketa raeteous standard blo Jehovah? (b) Hao nao Hebrew 10:24, 25 helpem iumi for luksavve wei for meet tugeta hem barava important, especially lo taem wea iumi stap?
7 First samting, iumi mas gohed strong for followim olketa raeteous standard blo Jehovah. Iumi no acceptim olketa wei and standard blo disfala world. Olsem example, iumi no acceptim evri wei for duim sex wea no stret, insaed diswan hem wei for man maritim man and olketa narafala wei for homosexual. (Matt. 19:4, 5; Rome 1:26, 27) Mek-tu, iumi mas gohed for worship witim olketa nara Christian. Iumi duim datwan lo eni ples, maet lo Kingdom Hall or sapos need hem kamap, lo haos blo olketa nara Witness, or maet lo ples wea no eniwan savve. Nomata wanem nao happen, iumi mas no letem eni samting disturbim schedule blo iumi for go lo olketa meeting. Important samting nao, iumi need for hipap tugeta taem iumi “lukim datfala day hem kakam klosap.”—Readim Hebrew 10:24, 25.
8. Lo wanem wei nao message blo iumi maet bae change lo future?
8 Lo taem blo datfala bigfala trabol, luk olsem message wea iumi bae talemaot bae hem change. Distaem, iumi preachim gud nius abaotem Kingdom and iumi traem best for helpem pipol kamap disaepol. Bat lo datfala taem, maet iumi bae talemaot wanfala strong message wea Bible sei hem olsem hail ston. (Rev. 16:21) Maet iumi bae talemaot hao world blo Satan hem redi for finis. Lo datfala taem nao, bae iumi savve wanem nao datfala message and hao for talemaot. Waswe, bae iumi iusim olketa sem wei for duim ministry wea iumi bin duim for winim wan handred year finis? Or bae iumi iusim olketa nara wei moa? Iumi lukluk nomoa, iumi no savve yet. Nomata hao nao iumi bae duim datwan, luk olsem iumi bae garem datfala privilege for no fraet for talemaot judgment message blo Jehovah!—Esikiel 2:3-5.
9. Wanem nao maet olketa nation duim taem olketa herem message blo iumi, bat wanem nao iumi sure lo hem?
9 Luk olsem, message blo iumi bae mekem olketa nation for trae for finisim disfala preaching waka for olowe. Olsem iumi depend lo Jehovah distaem for sapotim iumi lo preaching waka, iumi bae needim sapot blo hem tu lo datfala taem. Iumi sure God blo iumi bae givim paoa for strongim iumi for duim wanem hem laekem.—Maeka 3:8.
GOHED REDI FOR TAEM WEA OLKETA ATTAKIM PIPOL BLO GOD
10. Olsem Luke 21:25-28 storyim, hao nao bae pipol feel lo taem blo bigfala trabol?
10 Readim Luke 21:25-28. Taem blo bigfala trabol, pipol bae seke tumas taem olketa lukim evriting wea bifor olketa tingse bae stap for olowe, hem start for brekdaon. Olketa bae wari tumas and fraet bikos laef blo olketa hem stap lo danger lo disfala barava nogud taem lo history blo olketa man. (Sefenaea 1:14, 15) Lo datfala taem, luk olsem laef bae barava hard go moa for evriwan, nomata for pipol blo Jehovah tu. From iumi no part blo world, maet bae iumi feisim olketa hard samting. Maet iumi bae no garem tu olketa samting wea iumi needim.
11. (a) Why nao Olketa Jehovah’s Witness bae kamap main target blo olketa nation? (b) Why nao iumi no need for fraetem bigfala trabol?
11 Insaed bigfala trabol, olketa pipol wea religion blo olketa distroe maet kros bikos olketa lukim hao Olketa Jehovah’s Witness nao only religion wea stap yet. Just tingim go hao datwan bae mekem olketa kros tumas, maet olketa bae iusim tu social media for letem pipol savve hao olketa barava kros. Olketa nation and ruler blo olketa, Satan, bae barava heitim iumi bikos iumi nomoa religion wea stap. Olketa no kasem goal blo olketa for finisim evri religion lo earth. So iumi bae kamap main target blo olketa. Taem hia nao, olketa nation bae kamap datfala Gog blo Magog. * Olketa bae hipap tugeta and iusim evri paoa blo olketa for attakim pipol blo Jehovah. (Esikiel 38:2, 14-16) Taem iumi ting abaotem olketa samting hia wea bae happen hem maet mekem iumi wari bikos iumi no barava savve lo evri samting. Bat samting iumi sure lo hem nao: Iumi no need for fraetem datfala big trabol. Bikos Jehovah bae givim iumi instruction for sevem laef blo iumi. (Sams 34:19) Iumi bae fit for “standap stret and apim hed” blo iumi, bikos iumi savve ‘taem for God sevem iumi hem klosap.’ *
12. Hao nao “datfala wakaman wea faithful and wise” redyim iumi for olketa samting wea bae happen lo future?
12 “Datfala wakaman wea faithful and wise” redyim iumi for gohed faithful lo taem blo bigfala trabol. (Matt. 24:45) Olketa duim diswan lo staka wei, wanfala example nao hem olketa convention program blo 2016, 2017, and 2018. Olketa program hia encouragem iumi for strongim olketa fasin wea iumi need for garem taem day blo Jehovah kakam klosap. Distaem bae iumi reviewim moa olketa fasin hia.
GOHED STRONGIM WEI WEA IU FAITHFUL, NO GIVAP, AND NO FRAET
Redi distaem mekem iu savve sev lo “bigfala trabol” (Paragraf 13-16 storyim diswan) *
13. Hao nao iumi savve strongim wei wea iumi faithful lo Jehovah, and why nao iumi mas duim datwan distaem?
13 Wei for faithful: Theme blo 2016 convention program hem “Gohed for Faithful Long Jehovah!” Datfala program teachim iumi sapos iumi garem klos wei for fren witim Jehovah, iumi bae faithful lo hem. Datfala program remindim iumi hao iumi savve fren gud witim Jehovah sapos iumi prea strong from heart and barava studyim gud Bible. Taem iumi duim olsem, datwan strongim iumi for winim nomata olketa barava bigfala test. Taem world blo Satan hem gogo for end, iumi expectim hao faithful fasin blo iumi for God and Kingdom blo hem bae kasem test wea winim enitaem bifor. Luk olsem pipol bae gohed for tok spoelem iumi. (2 Pet. 3:3, 4) Diswan maet happen especially taem staka test moa kamap saed lo wei for neutral. Iumi mas strongim wei wea iumi faithful distaem mekem iumi savve gohed faithful lo taem blo bigfala trabol.
14. (a) Wanem change nao bae kamap saed lo olketa brata wea leadim waka lo earth? (b) Why nao iumi need for gohed faithful lo datfala taem?
14 Lo taem blo big trabol, wanfala change bae kamap saed lo olketa brata wea leadim waka lo earth. From evri anointed wan wea stap yet lo earth bae go lo heven and bae faet insaed war blo Armageddon. (Matt. 24:31; Rev. 2:26, 27) Datwan minim Governing Body bae no stap witim iumi lo earth. Nomata olsem, datfala big crowd bae gohed for organize gud. Olketa brata wea qualify wea olketa part lo nara sheep bae leadim waka lo earth. Iumi bae need for showimaot iumi faithful taem iumi sapotim olketa brata hia and followim direction wea God givim olketa. Laef blo iumi hem depend lo datwan!
15. Hao nao iumi savve strongim wei wea iumi no givap, and why nao hem important for duim datwan distaem?
15 Wei for no givap: Theme blo 2017 convention program hem “No Givap!” Datfala program helpem iumi for strongim wei wea iumi no givap taem iumi kasem test. Iumi lanem tu hao wei for no givap hem no depend lo taem wea laef hem isi nomoa. Taem iumi depend lo Jehovah datwan savve strongim wei wea iumi no givap. (Rome 12:12) Iumi no forgetim promis wea Jesus talem, taem hem sei: “Man wea bae sev nao hem man wea no givap go kasem taem world hem finis.” (Matt. 24:13) Disfala promis minim nomata lo eni hard taem wea iumi feisim, iumi mas gohed faithful. Each taem wea iumi no givap lo olketa test wea iumi kasem, datwan bae mekem iumi kamap moa strong bifor start blo big trabol.
16. Wanem nao helpem iumi for no fraet, and hao nao iumi savve strongim wei blo iumi for no fraet distaem?
16 Wei for no fraet: Theme blo 2018 convention program hem “No Fraet!” Datfala program remindim iumi hao wei for no fraet hem no depend lo wei blo iumiseleva. Bat trufala wei for no fraet hem semsem witim wei for no givap, iumi savve garem datwan only sapos iumi depend lo Jehovah. Hao nao iumi savve strongim wei wea iumi depend lo hem? Hem nao taem iumi readim Bible evriday and ting raonem hao Jehovah sevem pipol blo hem lo bifor. (Sams 68:20; 2 Pet. 2:9) Taem olketa nation bae attakim iumi lo datfala big trabol, iumi need for no fraet and trustim Jehovah winim eni narataem bifor. (Sams 112:7, 8; Heb. 13:6) Sapos iumi depend lo Jehovah distaem, bae iumi no fraet taem iumi feisim datfala attak blo Gog. *
LUK FORWARD LO TAEM WEA IU BAE SEV
Jesus and army blo hem lo heven klosap nao bae olketa faet insaed disfala war blo Armageddon for distroem olketa enemy blo God! (Paragraf 17 storyim diswan)
17. Why nao iumi shud no fraetem Armageddon? (Lukim piksa lo kava.)
17 Olsem iumi storyim finis lo last study, for full laef blo iumi, iumi stap lo olketa last day. Bat iumi garem tu disfala hope for go thru lo bigfala trabol. Datfala war blo Armageddon nao hem last samting wea bae barava finisim world blo Satan. Nomata olsem, iumi no need for fraetem eni samting. Why nao olsem? Bikos diswan hem war blo God. (Provebs 1:33; Esikiel 38:18-20; Sekaraea 14:3) Taem Jehovah givim komand, Jesus Christ bae leadim army blo hem for go faet. Jesus witim evri anointed wan wea resurrect and staka million angel. Olketa bae faet againstim Satan, olketa demon blo hem, and army blo hem lo earth.—Daniel 12:1; Rev. 6:2; 17:14.
18. (a) Wanem nao Jehovah hem promisim? (b) Hao nao Revelation 7:9, 13-17 helpem iumi for barava trustim hao iumi bae sev lo future?
18 Jehovah promis hao no eni weapon wea pipol iusim for againstim iumi bae win. (Aesaea 54:17) “Wanfala big crowd” blo olketa faithful pipol blo Jehovah bae “no dae long datfala big trabol”! Then olketa bae gohed for worshipim hem. (Readim Revelation 7:9, 13-17.) Bible helpem iumi for barava trustim hao iumi bae sev lo future! Iumi savve Jehovah bae protectim olketa wea faithful. (Sams 31:23) Evriwan wea lovem and praisem Jehovah bae hapi tumas for lukim wei wea hem bae kliarem holy nem blo hem.—Esikiel 38:23.
19. Wanem kaen laef nao iumi weitim wea klosap for kamap lo earth?
19 Tingim hao toktok wea stap lo 2 Timothy 3:2-5, maet olketa changem for fitim wei blo pipol lo niu world and laef bae barava free from world blo Satan. (Lukim box “ Wei blo Pipol lo Datfala Taem.”) Brata George Gangas, * wea hem wanfala member lo Governing Body bifor story olsem: “Tingim go laef lo world wea evriwan bae brata or sista! Klosap nao iumi bae garem privilege for laef lo niu world. Olsem Jehovah wea stap for olowe, iu bae stap laef for olowe. Iumi bae stap for olowe.” Datwan hem wanfala nambawan hope!
SONG 122 Gohed for Strong!
^ par. 5 Iumi savve hao wanfala “bigfala trabol” hem klosap nao for affectim evri pipol. Lo datfala taem, wanem nao bae happen lo iumi? Wanem nao Jehovah expectim iumi for duim? Olketa wanem kaen fasin nao iumi mas strongim distaem, mekem iumi gohed faithful lo taem blo bigfala trabol? Bae iumi storyim datwan lo disfala study.
^ par. 3 MINING BLO WANFALA TOKTOK: Christendom hem minim olketa religion wea sei olketa Christian, bat olketa no teachim pipol for worshipim Jehovah lo wei wea followim olketa standard blo hem.
^ par. 11 MINING BLO WANFALA TOKTOK: Datfala toktok Gog blo Magog (wea olketa kolem lo Gog tu) hem minim olketa nation wea join tugeta for faet againstim pipol blo Jehovah lo taem blo bigfala trabol.
^ par. 11 For savve moa abaotem wanem bae happen wea lead go lo war blo Armageddon lukim chapter 21 lo buk God’s Kingdom Rules! For savve moa abaotem hao Gog blo Magog bae attak and hao Jehovah bae sevem pipol blo hem lo taem blo Armageddon lukim chapter 17 and 18 lo buk Pure Worship of Jehovah—Restored At Last! Or iu savve lukim Wastaoa blo July 15 2013, page 3-8, and tu, Wastaoa blo July 15 2015, page 14-19.
^ par. 16 Datfala 2019 convention program wea garem theme “Love No Savve Finis!” helpem iumi for luksavve hao iumi gohed stap sef anda lo protection blo Jehovah.—1 Cor. 13:8.
^ par. 19 Lukim article “Every Samting wea Hem Duim Go Followim Hem” lo Wastaoa blo January 1, 1995.
