1. Why nao hem fitim for iumi worshipim Jehovah nomoa?

JEHOVAH nomoa fit for iumi worshipim bikos hem nao wakem evri samting and givim laef lo iumi. (Rev. 4:11) Bat, wanfala danger hem stap. Nomata iumi lovem and respectim Jehovah, maet iumi letem olketa nara samting for affectim wei wea iumi shud lovem and worshipim Jehovah nomoa. Iumi need for luksavve hao nao datwan savve kamap. Firstaem, iumi bae storyim wanem nao hem minim for worshipim Jehovah nomoa.

2. Olsem Eksodas 34:14 storyim, sapos iumi worshipim Jehovah nomoa, wanem nao bae iumi duim?

² Lo Bible, wei for barava lovem Jehovah hem join witim wei for worshipim hem nomoa. Iumi bae no letem eniwan or eni nara samting for spoelem wei wea iumi worshipim Jehovah nomoa.—Readim Eksodas 34:14.

3. Why nao iumi garem gudfala reason for lovem Jehovah?

³ Love blo iumi for Jehovah hem no blind. Why nao olsem? Bikos iumi savve pruvim olketa samting wea iumi lanem abaotem hem. Iumi laekem tumas olketa gudfala wei blo hem. Iumi savve lo olketa samting wea hem laekem and no laekem, and iumi agree witim datwan. Iumi savve lo plan blo hem for olketa man, and iumi sapotim datwan. Iumi barava hapi for garem disfala privilege for fren witim Jehovah. (Sams 25:14) Evri samting wea iumi lanem abaotem Creator blo iumi hem mekem iumi fren gud witim hem.—Jas. 4:8.

4. (a) Wanem nao Satan iusim for mekem iumi no barava lovem Jehovah? (b) Wanem nao bae iumi storyim lo disfala study?

 ⁴ Satan kontrolem disfala world, and hem iusim datwan for switim disfala feeling wea iumi garem for laekem olketa normal samting lo laef and hem iusim tu olketa wik point blo iumi. (Eph. 2:1-3; 1 John 5:19) Goal blo Satan hem for mekem iumi lovem olketa nara samting mekem iumi no lovem Jehovah nomoa. Bae iumi storyim tufala wei wea Satan iusim for duim diswan. First samting, hem trae for mekem iumi aftarem selen, and mek-tu, hem trae for mekem iumi chusim olketa entertainment wea nogud.

5. Why nao iumi mas keakea nogud iumi start for garem wei for lovem selen?

⁵ Hem normal samting for laek garem inaf kaikai, garem olketa naes kaleko and gud ples for stap. Nomata olsem, iumi mas keakea nogud iumi start for garem wei for lovem selen. Staka pipol lo world olketa “laekem tumas selen” and olketa nara samting wea man savve baem witim selen. (2 Tim. 3:2) Jesus savve olketa follower blo hem maet kasem test for garem datkaen wei. Dastawe Jesus sei: “No eniwan savve waka for tufala boss, bikos bae hem heitim narawan and lovem narawan, or bae hem faithful long narawan and ting daonem narawan. Iufala no savve worshipim God and long semtaem busy for kasem staka selen.” (Matt. 6:24) Samwan wea worshipim Jehovah and lo semtaem hem spendem staka taem and strong blo hem for kasem olketa riches blo disfala world, hem olsem hem trae for waka for tufala boss. From datwan, bae hem no isi for hem gohed worshipim Jehovah nomoa.

6. Wanem nao iumi lanem from toktok blo Jesus for kongregeson lo Laodicea?

⁶ Klosap end blo first century C.E., olketa lo kongregeson lo Laodicea tok praod and  sei: “Mi rich and garem staka samting and mi no needim eni samting.” Bat hao Jehovah and Jesus luk lo olketa hia, ‘olketa no hapi, olketa poor, olketa blind, and olketa naked.’ Jesus kaonselem olketa, no from olketa rich bat bikos love wea olketa garem for riches hem spoelem wei wea olketa fren witim Jehovah. (Rev. 3:14-17) Sapos iumi luksavve datfala feeling for laekem riches hem start for grow insaed heart blo iumi, iumi mas kwiktaem for stretem datwan. (1 Tim. 6:7, 8) Sapos nomoa, heart blo iumi bae divaed, and Jehovah bae no acceptim worship blo iumi. Hem laekem iumi for worshipim hem nomoa. (Diutronomi 4:24) Hao nao gogo iumi maet lusim balance tingting wea iumi garem abaotem selen?

7-9. Wanem nao iumi lanem from experience blo wanfala elder wea nem blo hem David?

⁷ Tingim example blo David wea stap lo United States, hem wanfala elder wea waka hard. Hemseleva storyim hao hem man wea willing tumas for waka for datfala company. Company wea hem waka promotim hem and pipol luk lo hem olsem wanfala lo olketa best man lo kantri wea savve gud lo datkaen waka. David sei: “Lo datfala taem, mi tingse olketa samting hia hem pruv wea showimaot Jehovah blessim mi.” Waswe, hem really blessing from Jehovah?

⁸ David isisi lukim samfala saen wea showimaot waka blo hem start for spoelem wei wea hem fren witim Jehovah. Hem sei: “Nomata lo taem blo meeting and lo ministry, mi gohed for tingim nomoa olketa problem lo waka ples, mi kasem staka selen, bat mi just stress go moa. And datwan hem affectim marit blo mi.”

⁹ David luksavve hem need for lukluk lo wanem nao shud first samting lo laef blo hem. Hem sei: “Mi disaed for changem wanem mi  duim.” David laek for organizem moa schedule blo hem lo waka, and hem talem datfala plan lo boss blo hem. Samting wea kamaot from datwan, olketa finisim hem from waka. Wanem nao David duim? Hem sei: “Lo next day, mi apply for auxiliary pioneer evri month.” David and waef blo hem start for duim klining waka for sapotim tufala. No longtaem bihaen, hem start for regular pioneer, and gogo waef blo hem tu joinim hem lo pioneer waka. Waka wea datfala couple chus for duim, hem kaen waka wea staka pipol ting daonem, bat tufala no wari lo wanem kaen waka nao tufala duim. Nomata selen wea tufala kasem hem barava smol winim wanem tufala bin kasem bifor, evri month tufala kasem wanem tufala needim for peim evri expenses blo tufala. Olketa putim Jehovah first lo laef blo tufala, and tufala experiencem wei wea Jehovah lukaftarem olketa wea putim Kingdom hem first samting lo laef blo olketa.—Matt. 6:31-33.

10. Lo wanem wei nao iumi savve protectim heart blo iumi?

¹⁰ Nomata sapos iumi garem staka selen or lelebet selen nomoa, iumi need for protectim heart blo iumi. Lo wanem wei? For no mekem grow disfala wei for lovem selen. And no letem waka for selen kamap important winim wei wea iu servem Jehovah. Hao nao bae iu savve sapos diswan hem kasem iu? Askem iuseleva olketa kwestin hia: ‘Waswe, mi gohed for tingting abaotem waka blo mi lo taem blo meeting or lo ministry? Waswe, mi gohed for wari sapos lo future mi bae garem inaf selen? Waswe, selen and olketa material samting kosim problem for mi and marit partner blo mi? Waswe, mi willing for duim eni waka wea pipol ting daonem, mekem mi savve garem moa taem for servem Jehovah?’ (1 Tim. 6:9-12) Taem iumi ting raonem olketa kwestin hia, iumi mas tingim hao Jehovah lovem iumi and hem promisim diswan lo olketa wea worshipim hem: “Bae mi nating lusim iu.” Dastawe, aposol Paul raet olsem: “Iufala mas no laekem tumas selen.”—Heb. 13:5, 6.

11. Hao nao entertainment savve affectim samwan?

¹¹ Jehovah laekem iumi for enjoyim laef, and wanfala wei for duim datwan hem thru lo entertainment. Dastawe, Bible sei “nambawan samting wea yumi save duim nao, hemi olsem, yumi kaikai an dring nomoa, an gohed fo hapi long olketa samting wea yumi garem.” (Eklesiastes 2:24) Nomata olsem, staka entertainment blo world savve spoelem iumi. Hem  mekem olketa standard blo pipol saed lo fasin hem gogo daon, and hem encouragem pipol for acceptim and lovem olketa samting wea Bible againstim.

12. Olsem 1 Corinth 10:21, 22 storyim, why nao iumi shud careful taem iumi chusim entertainment?

¹² Iumi laek for worshipim Jehovah nomoa, so iumi no savve kaikai lo “tebol bilong Jehovah” and “kaikai long tebol bilong olketa demon tu.” (Readim 1 Corinth 10:21, 22.) For kaikai tugeta witim samwan hem showimaot iumi fren witim hem. Sapos iumi chusim entertainment wea mekhae lo raf fasin, spiritism, wei for durong, or olketa nara samting wea body laekem and wei for laekem olketa nogud samting, datwan hem olsem iumi kaikai tugeta lo kaikai wea olketa enemy blo God nao preparem. From datwan, iumi no spoelem iumiseleva nomoa, bat iumi spoelem tu wei wea iumi fren witim Jehovah.

13-14. Olsem James 1:14, 15 storyim, why nao iumi mas ting raonem wanem iumi putim lo mind blo iumi? Storyim example.

¹³ Lo wanem wei nao entertainment hem olsem kaikai? Taem iumi kaikai, iumi savve chusim wanem for putim lo mouth. Bat taem iumi swallowim datfala kaikai, semtaem nomoa body duim waka blo hem and gogo olketa gud samting insaed lo datfala kaikai bae helpem body blo iumi. Wanfala gud kaikai savve mekem iumi healthy, nogud kaikai bae mekem iumi for no healthy. Iumi bae no stretawe luksavve hao datfala kaikai affectim iumi, bat gogo bae iumi luksavve lo datwan bihaen.

¹⁴ Lo sem wei, taem iumi chusim entertainment, iumi savve chusim wanem nao iumi putim lo mind blo iumi. Bihaen datwan, mind hem duim waka blo hem and datwan hem affectim tingting and feeling blo iumi. Gudfala entertainment bae helpem iumi, nogud entertainment savve spoelem iumi. (Readim James 1:14, 15.) Olketa nogud samting wea kamaot from nogud entertainment hem bae no showaot stretawe, bat gogo bae hem showaot. Dastawe, Bible hem warnim iumi olsem: “No laea long iufala seleva: Hard tumas for man mekful long God. Eni samting wea hem plantim, datwan nao bae hem harvestim. Man wea duim nogud samting wea body laekem bae hem kasem nogud samting from datwan.” (Gal. 6:7, 8) Hem barava important for iumi rejectim evri entertainment wea mekhae lo olketa samting wea Jehovah heitim!—Sams 97:10.

15. Wanem present nao Jehovah provaedem for iumi enjoyim?

¹⁵ Staka brata and sista enjoyim wei for watchim JW Broadcasting^®, wea hem Internet television station blo iumi. Wanfala sista wea nem blo Marilyn sei: “JW Broadcasting helpem mi for gohed hapi and mi no need for chusim which part nao for watchim. Taem mi lonely and feel wikdaon, mi luk for wanfala tok wea savve encouragem mi, or Morning Worship program for watchim. Datwan mekem mi for kam moa klos lo Jehovah and organization blo hem. JW Broadcasting hem barava changem laef blo mi.” Waswe, iu kasem gud samting from datfala present wea kam from Jehovah? Witim olketa niu program each month, JW Broadcasting hem garem tu olketa audio and video program and olketa song wea savve encouragem iumi wea iumi savve lukluk and lisin lo hem enitaem nomoa.

16-17. Why nao iumi mas careful for kontrolem haomas taem iumi spendem lo entertainment, and hao nao iumi savve duim datwan?

¹⁶ Iumi mas careful lo wanem iumi chusim olsem entertainment, and tu iumi mas careful lo haomas taem iumi spendem lo datwan. Sapos iumi no careful, bae iumi spendem staka taem lo olketa entertainment winim for iumi duim samting for Jehovah. Samfala faendem  hem no isi for kontrolem haomas taem olketa spendem lo entertainment. Abigail, wanfala sista wea 18 year sei: “For watchim TV hem helpem mi for relax bihaen wanfala busy day. Bat sapos mi no careful, bae mi spendem staka hour front lo screen.” Wanfala young brata wea nem blo hem Samuel, hem sei: “Mi savve watchim olketa short video lo Internet, bat mi faendaot mi spendem staka hour lo datwan. Mi start for watchim wanfala nomoa bat mi no luksavve, thri or fofala hour hem go pas finis nao.”

¹⁷ Hao nao iu savve kontrolem haomas taem iu spendem lo entertainment? First samting hem for faendemaot haomas taem iu barava spendem lo datwan. Hao sapos iu keepim record for wanfala week? Raetem lo wanfala kalenda haomas hour nao iu spendem for watchim TV, lukluk lo Internet, and pleim olketa game lo mobile. Sapos iu tingse iu spendem staka taem tumas lo datwan, trae for mekem wanfala schedule. Markem taem for duim olketa important samting firstaem, and then iu just markem taem for entertainment. Next samting, askem Jehovah for helpem iu for followim datfala schedule. Lo wei olsem, iu bae garem taem and strong wea iu needim for duim study seleva, famili worship, olketa meeting and for servem Jehovah lo wei for duim ministry. And tu, maet iu bae no feel guilty tumas abaotem taem wea iu spendem lo entertainment.

18-19. Hao nao iumi savve showimaot iumi worshipim Jehovah nomoa?

¹⁸ Bihaen aposol Peter raet abaotem end blo disfala world blo Satan, and datfala niu world wea bae kam. Hem sei: “Olketa brata wea mi lovem, from iufala weitim olketa samting hia, traem best bilong iufala for mekem God hem lukim iufala stap klin, no garem eni rabis wei, and iufala fren gud witim hem.” (2 Pet. 3:14) Taem iumi obeyim datfala kaonsel and duim best blo iumi for gohed garem gudfala wei and iumi stap klin lo spiritual wei, iumi showimaot iumi worshipim Jehovah nomoa.

¹⁹ Satan and world blo hem bae gohed trae for changem wei wea iumi putim Jehovah first lo laef blo iumi. (Luke 4:13) Bat nomata wanem kaen challenge nao iumi feisim, iumi bae no letem eniwan or eni nara samting for spoelem wei wea iumi worshipim Jehovah nomoa. Iumi disaed strong for givim lo Jehovah samting wea hem nomoa fit for kasem, wea hem nao wei wea iumi worshipim hem nomoa!