1. Hao nao 2 Corinth 3:1-3 helpem iumi for tinghae lo disfala privilege wea iumi garem for conductim wanfala Bible study for hem muv ahed for baptaes? (Lukim piksa lo kava.)

HAO nao iu feel taem iu lukim wanfala Bible study from territory blo kongregeson blo iu hem baptaes? For sure iu bae hapi tumas. (Matt. 28:19) And sapos iu nao study witim datfala niu disaepol, iu bae barava hapi taem iu lukim hem baptaes! (1 Thess. 2:19, 20) Olketa niu wan wea baptaes olketa olsem ‘leta for pruvim mifala fit’ no just for olketa wea bin study witim hem nomoa, bat for full kongregeson tu.—Readim 2 Corinth 3:1-3.

2. (a) Wanem important kwestin nao iumi need for ting raonem, and why nao olsem? (b) Wanem nao wanfala Bible study? (Lukim footnote.)

² Hem barava gud for lukim hao lo fofala year wea go pas, samting olsem 10,000,000 Bible study * nao iumi reportim evri month lo evriwea lo world. And lo fofala year hia tu, samting olsem 280,000 nao baptaes each year, olketa kamap Jehovah’s Witness and kamap niufala disaepol blo Jesus Christ. Hao nao iumi savve helpem staka million Bible student hia for baptaes? From Jehovah hem patient and givim taem and chance for pipol kamap disaepol blo Christ, iumi laek duim best blo iumi for helpem olketa for muv ahed for baptaes taem chance hem still stap yet. Lelebet taem nomoa hem stap!—1 Cor. 7:29a; 1 Pet. 4:7.

3. Wanem nao bae iumi storyim lo disfala article abaotem wei for conductim olketa Bible study?

 ³ From disfala waka for helpem pipol for kamap disaepol hem barava important, olketa branch office laek for faendaot hao for iumi savve helpem olketa Bible student for muv ahed for baptaes. Lo disfala article and lo article wea bae kamap bihaen, iumi bae lukim wanem iumi savve lanem from olketa pioneer, missionary, and circuit overseer wea garem experience. * (Provebs 11:14; 15:22) Olketa explainim wanem olketa Bible teacher and student blo olketa savve duim for mekem Bible study hem gohed gudfala. Lo disfala article, iumi bae storyim faevfala samting wea evri student need for duim mekem olketa savve muv ahed gud and baptaes.

4. Wanem nao iumi shud luksavve lo hem abaotem wei for conductim study lo front door?

⁴ Staka lo olketa brata and sista blo iumi conductim olketa Bible study lo front door blo haosholder nomoa. Nomata olsem, diswan hem gudfala wei for start mekem grow interest blo olketa lo Bible, olketa kaen story olsem hem savve short nomoa and maet iumi no duim evri week. For mekem grow datfala interest, samfala maet askem datfala haosholder for contact blo hem and then maet ringim or textim hem for story lelebet abaotem Bible. Olketa maet duim datwan for samfala month. Bat hem no lead go lo wanfala Bible study wea muv ahed. Waswe, wanfala student savve muv ahed gud for dedicate and baptaes sapos hem nomoa hao hem studyim Bible? Maet nomoa.

5. Olsem Luke 14:27-33 storyim, wanem nao Jesus talem wea savve helpem iumi lo disfala waka for helpem pipol for kamap disaepol?

⁵ Lo wanfala taem Jesus iusim wanfala tokpiksa taem hem storyim wanem man mas duim sapos hem laek for kamap wanfala disaepol blo hem. Hem story abaotem wanfala man wea laek for wakem wanfala haos and wanfala king wea laek for faetem nara army. Jesus sei datfala man wea laek for build hem mas “ting raonem firstaem haomas selen nao hem needim” mekem hem savve finisim datfala taoa and datfala king hem mas “story firstaem witim olketa bigman blo hem” and ting raonem sapos army blo hem savve fit for win sapos olketa go faet. (Readim Luke 14:27-33.) Olsem tu, Jesus hem savve dat for samwan laek kamap disaepol blo hem, hem mas ting raonem firstaem wanem nao hem need for duim for followim hem. From datwan iumi laek for encouragem olketa wea laek  for kamap disaepol for study witim iumi evri week. Hao nao iumi savve duim datwan?

6. Wanem nao iumi maet trae for duim for garem study wea muv ahed?

⁶ Iumi start for mekem story for lelebet long winim bifor, nomata iumi story lo front door nomoa. Maet iumi savve storyim nara point moa from Bible lo each taem wea iumi visit. Taem haosholder hem getius lo wei wea iumi story longtaem, then iumi savve askem hem for eni ples for iumi maet sidaon tugeta and gohed story. Ansa blo haosholder bae hem showimaot sapos hem laek for studyim Bible. Gogo, for helpem hem lane kwiktaem, iumi maet askem student sapos hem willing for iumi savve study tufala taem insaed lo wanfala week. Bat nara samting moa hem need for duim winim wei for study for wan or tufala taem evri week.

7. Hao nao teacher savve redi gud for each taem wea iu conductim study?

⁷ Olsem wanfala teacher, iu need for prepare gud for each taem wea iu bae conductim study. Iu savve start witim wei for readim firstaem datfala information and lukluk lo olketa scripture. Trae for kasem main point. Ting raonem title blo datfala leson, olketa subheding, olketa study kwestin, olketa scripture for readim, olketa piksa, and eni video wea help for explainim datfala subject. Then taem iu ting abaotem student blo iu, ting raonem hao iu bae givim datfala information lo hem, lo wei wea bae klia and simpol mekem student blo iu savve minim and followim datwan.—Nehemaea 8:8; Provebs 15:28a.

8. Wanem nao toktok blo Paul lo Colossae 1:9, 10 teachim iumi abaotem wei for prea for olketa Bible study blo iumi?

⁸ Olsem part lo wei wea iu prepare, iu need for prea lo Jehovah abaotem student blo iu and olketa need blo hem. Askem Jehovah for helpem iu for teachim Bible lo wei wea bae kasem heart blo hem. (Readim Colossae 1:9, 10.) Trae for ting raonem eni samting wea student faendem hem hard for minim or acceptim. Iumi mas tingim hao goal blo iumi hem for helpem Bible student for muv ahed for baptaes.

9. Hao nao teacher savve helpem student blo hem for prepare for study? Explainim.

⁹ Iumi hope wei wea iumi duim Bible study evritaem bae helpem student for tinghae lo wanem Jehovah and Jesus bin duim and hem bae laek for lanem samfala samting moa.  (Matt. 5:3, 6) For kasem gud samting from study, datfala student need for ting raonem gud wanem hem lanem. For duim datwan, hem gud for explainim lo hem hao important nao wei for hem prepare for each study, hem savve duim datwan lo wei for readim firstaem datfala leson and ting raonem hao nao datfala information savve fitim hem. Wanem nao teacher savve duim for help? Hem gud for prepare witim hem lo wanfala leson and showim hem hao for duim datwan. * Explainim lo hem hao for faendem stret ansa for olketa study kwestin and showim hem hao for markem olketa main word or toktok wea savve helpem hem for tingim bak ansa. Then askem hem for givim ansa lo toktok blo hemseleva. Taem iu duim datwan, bae iu luksavve sapos hem minim datfala information. Bat nara samting moa iu savve encouragem Bible student blo iu for duim.

10. Why nao hem important for readim Bible evriday, and wanem nao hem need for duim for kasem gud samting from Bible reading?

¹⁰ Winim wei for just study evri week witim teacher blo hem nomoa, datfala student bae kasem gud samting sapos hem duim samting seleva tu. Hem need for story witim Jehovah. Lo wanem wei? Taem hem lisin and story witim Jehovah. Hem savve lisin lo God taem hem readim Bible evri day. (Josua 1:8; Sams 1:1-3) Showim lo hem hao for iusim “Bible Reading Schedule” wea stap lo jw.org. * And helpem hem for kasem gud samting from Bible reading, encouragem hem for ting raonem wanem hem lanem abaotem Jehovah, and hao for hem followim wanem hem lanem lo laef blo hem.—Acts 17:11; Jas. 1:25.

11. Hao nao wanfala Bible student savve lane for prea from heart and why nao hem important for hem prea lo Jehovah evritaem?

¹¹ Encouragem Bible student blo iu for story lo Jehovah thru lo prea evriday. Talem prea wea kam from heart taem iu startim study and taem iu finisim study. Iu savve prea for hem and prea witim hem. Taem hem lisin lo prea blo iu, bae hem lane for prea from heart blo hem lo Jehovah and for prea thru lo nem blo Jesus. (Matt. 6:9; John 15:16) Tingim wei for readim Bible evriday (lisin lo Jehovah) and wei for prea (story lo Jehovah) bae helpem student for kam moa klos lo God! (Jas. 4:8) Sapos hem duim olketa samting hia, datwan bae helpem student blo iu for kasem olketa  nara samting wea savve helpem hem for dedicate and baptaes.

12. Hao nao wanfala teacher savve helpem student blo hem for mekem grow wei wea hem lovem Jehovah?

¹² Iumi laekem samting wea Bible student lanem shud kasem mind blo hem and heart blo hem tu. Why nao olsem? Samting wea hem kasem heart blo man nao savve muvim man for duim samting. Jesus teach lo wei wea kasem mind blo pipol. Bat wanem hem teachim hem kasem heart blo pipol tu, dastawe olketa followim hem. (Luke 24:15, 27, 32) Student blo iu need for lukim Jehovah olsem wanfala real man, samwan wea hem savve fren gud witim, and hem savve ting lo hem olsem wanfala Dadi, God and Fren blo hem. (Sams 25:4, 5) Lo taem blo study helpem student for luksavve lo olketa nambawan wei blo God. (Eksodas 34:5, 6; 1 Pet. 5:6, 7) Nomata wanem topic nao iutufala storyim, main samting hem for helpem student for lukim wanem kaen Man nao Jehovah. Helpem student for tinghae lo olketa nambawan wei blo Jehovah, olsem love, kaen and wei wea hem tingim iumi. Jesus sei “disfala law nao first wan and no eni nara law hem important winim hem” hem nao for iu mas “lovem God blo Jehovah.” (Matt. 22:37, 38) Trae for helpem student blo iu for lovem Jehovah.

13. Storyim wanfala example lo hao for helpem wanfala Bible student for lane abaotem olketa wei blo Jehovah?

¹³ Taem iu story witim Bible student blo iu, storyim why iu barava lovem Jehovah. Diswan maet helpem hem for luksavve hemseleva tu need for mekem grow wei wea hem fren gud witim Jehovah. (Sams 73:28) Olsem example, waswe, eni toktok insaed pablikeson or insaed eni scripture hem showimaot olketa wei blo Jehovah olsem love, wisdom, justice and paoa wea hem tasim heart blo iu? Storyim datwan lo Bible student blo iu, and letem hem savve hao diswan nao hem wanfala lo olketa reason why iu lovem Dadi blo iumi lo heven. Olketa Bible student need for duim nara samting moa mekem olketa savve muv ahed for baptaes.

14. Olsem Hebrew 10:24, 25 talem, hao nao olketa meeting savve helpem wanfala Bible student for hem savve muv ahed?

¹⁴ Iumi evriwan laekem Bible student blo iumi for muv ahed and baptaes. Wanfala important wei for help hem for encouragem olketa for attendim olketa kongregeson meeting. Olketa teacher wea garem experience sei  student wea attendim meeting stretawe olketa savve kwiktaem for muv ahed. (Sams 111:1) Samfala teacher explainim lo student hao olketa savve kasem haf lo Bible education blo olketa lo study and nara haf from olketa meeting. Readim Hebrew 10:24, 25 witim student blo iu, and storyim lo hem gud samting wea hem savve kasem sapos hem attendim olketa meeting. Pleim datfala video Wanem Nao Mifala Duim Long Kingdom Hall? * Helpem Bible student blo iu for markem wei for attendim olketa meeting evri week olsem important samting lo laef blo hem.

15. Wanem nao iumi savve duim for encouragem wanfala Bible student for attendim olketa meeting evritaem?

¹⁵ Wanem nao iu savve duim sapos Bible student blo iu hem no attendim eni meeting yet or samfala taem nomoa hem attend? Hapi for storyim lo hem eni samting wea iu lanem from wanfala meeting wea just finis. Datwan bae barava muvim hem winim wei for just invaetem hem for attendim meeting. Givim hem Wastaoa or Laef and Ministry Meeting Buk wea iumi studyim. Showim hem wanem iumi bae storyim lo nextfala meeting, and askem hem wanem part nao hem interest lo hem. Wanem Bible student blo iu bae experiencem lo first meeting bae hem barava winim eni hipap blo nara religion. (1 Cor. 14:24, 25) Hem savve meetim olketa narawan wea hem savve followim gud example blo olketa, and wea bae helpem hem for muv ahed for baptaes.

16. Wat nao iumi need for duim taem iumi conductim Bible study wea savve lead go baptaes, and wanem nao bae iumi lanem lo next study?

¹⁶ Hao nao iumi savve helpem wanfala Bible study wea savve lead go for hem savve baptaes? Iumi savve helpem each Bible study for tinghae lo study taem iumi encouragem hem for study evri week and prepare for each study. And tu, iumi laek for encouragem hem for story lo Jehovah evriday and for mekem grow wei wea hemseleva fren witim Jehovah. Iumi laek encouragem student for attendim olketa kongregeson meeting. (Lukim box, “ Wanem Olketa Student Need for Duim for Olketa Muv Ahed for Baptaes.”) Bat, olsem next article bae storyim, olketa Bible teacher savve duim faevfala samting moa wea savve helpem olketa Bible student for muv ahed for baptaes.