1. Wanfala Christian wea baptaes mas gohed for duim wanem samting?

WASWE, iu baptaes finis? Sapos olsem, iu talemaot lo evriwan hao iu garem faith lo Jehovah and iu willing for servem Jehovah witim organization blo hem. * Bat, faith blo iu lo Jehovah mas gohed for grow. And iu need for gohed strongim wei wea iu trustim hao Jehovah iusim organization blo hem distaem.

2-3. Lo olketa wanem wei nao Jehovah leadim pipol blo hem distaem? Storyim olketa example.

² Distaem, wei wea Jehovah leadim organization blo hem, hem helpem iumi for savve lo wanem kaen man nao hem, wanem nao olketa plan blo hem, and wanem nao olketa standard blo hem. Iumi bae storyim thrifala wei blo Jehovah wea showaot lo organization blo hem.

³ First samting, “God hem no fevarem eniwan.” (Acts 10:34) Love nao muvim Jehovah for givim Son blo hem olsem wanfala ransom for evriwan. (1 Tim. 2:6; John 3:16) Jehovah iusim pipol blo hem for preachim gud nius lo evriwan wea laek for lisin, from datwan nao savve helpem staka pipol moa for kasem gud samting from datfala ransom. Mek-tu samting, Jehovah hem God wea organize and hem laekem peace. (1 Cor. 14:33, 40) So iumi shud expectim olketa wea worshipim hem for servem hem lo wei wea organize, and garem peace. Mek-thri samting, Jehovah hem “Nambawan Teacher.” (Isa. 30:20, 21, NW) Dastawe, goal blo organization hem for teachim nomoa wanem hem kam from Bible, lo kongregeson and lo ministry. Hao nao thrifala wei blo Jehovah hia hem showaot lo Christian kongregeson bifor? Hao nao pipol blo Jehovah showimaot  thrifala wei hia distaem? And hao nao holy spirit helpem iu for servem Jehovah witim organization blo hem distaem?

4. Olsem Acts 1:8 storyim, wanem nao Jesus komandim olketa follower blo hem for duim, and wanem help nao olketa bae kasem?

⁴ Lo first century. Message wea Jesus preachim hem givim hope lo evri man. (Luke 4:43) Hem komandim olketa follower blo hem for gohed duim waka wea hem startim and for preach go kasem “evri farawe ples long earth.” (Readim Acts 1:8.) Hem tru, olketa no savve duim waka hia lo strong blo olketa seleva. Olketa bae needim holy spirit for helpem olketa, wea datwan nao Jesus hem bin promisim.—John 14:26; Sekaraea 4:6.

5-6. Lo olketa wanem wei nao holy spirit helpem olketa follower blo Jesus?

⁵ Olketa follower blo Jesus kasem holy spirit lo Pentecost, 33 C.E. Witim help blo datfala spirit, olketa start for preach, and no longtaem nomoa staka acceptim datfala gud nius. (Acts 2:41; 4:4) Taem pipol start for persecutim olketa, olketa disaepol no fraet bat olketa askem God for helpem olketa. Olketa prea olsem: “Mekem olketa wakaman bilong iu no fraet for talemaot message bilong iu.” Olketa kasem holy spirit and “olketa nating fraet nao for talemaot message bilong God.”—Acts 4:18-20, 29, 31.

⁶ Olketa disaepol blo Jesus feisim olketa nara challenge tu. Olsem example, olketa no garem staka copy blo olketa Scripture. Olketa no garem olketa pablikeson wea explainim Bible olsem iumi distaem. And olketa disaepol mas preach lo olketa wea story lo staka didifren languis. Nomata olketa feisim olketa challenge hia, olketa faithful disaepol hia duim olketa samting wea luk olsem olketa no fit for duim. Insaed samting olsem 30 year nomoa, “evriwan long earth herem finis” disfala gud nius.—Col. 1:6, 23.

7. For winim 100 year wea go pas, hao nao olketa servant blo Jehovah savve lo wanem God laekem olketa for duim, and wanem nao olketa duim?

⁷ Lo taem blo iumi. Jehovah gohed for leadim and strongim pipol blo hem. Main wei wea hem leadim pipol blo hem nao hem thru lo Bible, wea holy spirit helpem olketa man for raetem. Lo Bible, iumi savve read abaotem ministry blo Jesus and komand blo hem for olketa follower blo hem for gohed lo waka wea hem bin startim. (Matt. 28:19, 20) Lo magasin blo July 1881, hem sei: “Jehovah no chusim or anointim mifala for pipol tinghae lo mifala and for hipimap olketa riches bat for spendem evri samting mifala garem, and for preachim disfala gud nius.” Lo 1919, disfala buklet To Whom the Work Is Entrusted, hem sei: “Disfala waka hem kamap moa big, bat hem waka blo Lord, and hem nao bae givim strong wea mifala needim for duim disfala waka.” Olsem olketa Christian lo bifor, olketa brata hia no fraet for givim olketa seleva for duim disfala waka, and olketa trustim dat holy spirit bae helpem olketa for preach lo evri kaen pipol. Iumi trustim hao holy spirit bae gohed for helpem iumi tu distaem.

8-9. Olketa wanem kaen wei for preach nao organization blo Jehovah duim for iumi savve kasem staka pipol moa lo preaching waka?

⁸ Organization blo Jehovah bin iusim olketa best tul for spredim disfala gud nius. Olketa tul hia nao hem olketa pablikeson wea olketa printim, datfala “Photo-Drama of Creation,” olketa phonograph, sound car, olketa radio broadcast, and no longtaem go nomoa hem iusim technology. And tu, organization blo God transleitim information lo staka languis winim enitaem bifor! Why nao olsem? Mekem pipol savve herem disfala gud nius lo languis blo olketa seleva. Jehovah no fevarem eniwan,  hem talem finis hao disfala gud nius bae olketa talemaot lo “pipol bilong evri kantri, tribe, and languis.” (Rev. 14:6, 7) Hem laekem evri kaen pipol for herem disfala Kingdom message.

⁹ Waswe lo olketa pipol wea hard for iumi kasem olketa, maet from olketa stap lo olketa apartment wea garem olketa security-gard or wea lok evritaem? For iumi savve kasem olketa kaen pipol olsem, organization blo Jehovah start for iusim olketa difren kaen wei for duim pablik witnessing. Olsem example lo 2001, Governing Body appruvim lo France for olketa iusim trolley and olketa nara wei for showim olketa literature blo iumi and gogo olketa nara ples tu duim datwan. Gud samting kamaot from datwan. Lo 2011 lo United States, wanfala niu program hem start lo wanfala busy part lo New York City. Insaed lo firstfala year nomoa, 102,129 buk and 68,911 magasin nao olketa givimaot. And 4,701 olketa ask for studyim Bible! Diswan showimaot holy spirit nao sapotim disfala waka. So Governing Body hem appruvim for olketa duim trolley witnessing evriwea lo world.

10. Wanem nao iumi savve duim for kamap gud lo ministry blo iumi?

¹⁰ Wanem iu savve duim. Lo olketa Christian meeting, Jehovah trainim iumi hao for preach, so iumi laek for mekius lo wanem iumi lanem. Preach evritaem witim field service grup blo iu, olketa brata and sista lo grup blo iu savve helpem iu for kamap gud lo wei for preach and teach, and iu savve kasem encouragement from gud example blo olketa. Gohed for preach nomata iu kasem olketa challenge. Olsem theme scripture hem remindim iumi, iumi fit for duim wanem God hem laekem no bikos lo paoa blo iumiseleva bat bikos lo holy spirit. (Sekaraea 4:6) Samting wea iumi sure lo hem nao, God bae givim iumi strong wea iumi needim bikos iumi duim waka blo hem.

11. Hao nao governing body waka tugeta for organizem pipol blo God lo first century?

¹¹ Lo first century. Governing body lo Jerusalem waka tugeta for mekem pipol blo God organize and garem peace midolwan lo olketa.  (Acts 2:42). Olsem example, taem wanfala problem hem kamap saed lo wei for circumcise lo 49 C.E., anda lo direction blo holy spirit, governing body story raonem datwan. Sapos kongregeson gohed divaed bikos lo datfala problem, preaching waka bae no gohed gud. Nomata olketa hia Jew, olketa aposol and olketa elder hia no letem culture blo olketa Jew or olketa wea mekhae lo hem for affectim disison blo olketa, bat olketa luk insaed toktok blo God and olketa depend lo holy spirit for gaedem olketa. (Acts 15:1, 2, 5-20, 28) From datwan, Jehovah blessim disison blo olketa, so peace and wei for organize hem kamap, and preaching waka hem barava muv ahed.—Acts 15:30, 31; 16:4, 5.

12. Wanem nao showimaot wei for organize and for garem peace hem stap insaed organization blo Jehovah distaem?

¹² Lo taem blo iumi. Organization blo Jehovah waka hard for organize and for keepim peace stap midolwan pipol blo Jehovah. Lo wanfala article lo 1895, Zion’s Watch Tower and Herald of Christ’s Presence lo November 15 hem garem wanfala title “Decently and in Order,” wea kam from 1 Corinth 14:40. Datfala article hem sei: “Olketa aposol raetem staka samting lo olketa Christian bifor abaotem wei for organize . . . Hem barava important for followim bikos ‘samting wea olketa raetem bifor hem for teachim iumi.’” (Rome 15:4) Tru nao, sem wei for organize and for garem peace lo bifor hem showaot lo organization blo Jehovah distaem tu. Olsem example: Sapos iu bae attendim wanfala Wastaoa Study lo nara kongregeson or maet lo nara kantri. Iu savve finis hao bae olketa conductim study and which article for studyim. Semtaem nomoa, bae iu feel olsem iu lo kongregeson blo iu nomoa! Spirit blo God nomoa savve mekem wei for wan mind olsem for kamap.—Sefenaea 3:9.

13. Taem iumi ting raonem James 3:17, wanem kwestin nao iumi shud askem lo iumiseleva?

¹³ Wanem iu savve duim. Jehovah laekem pipol blo hem for “keepim nao wei for wan mind wea holy spirit helpem olketa for garem.” (Eph. 4:1-3) So askem iuseleva: ‘Waswe, mi keepim wan mind and peace insaed kongregeson? Waswe, mi obeyim olketa wea  lead? Waswe, olketa narawan depend lo mi, especially sapos mi garem responsibility insaed kongregeson? Waswe, mi followim taem, savve help, and mi willing for duim samting for narawan? (Readim James 3:17.) Sapos iu luksavve iu need for kamap gud lo eni samting, prea for holy spirit. Sapos iu letem holy spirit for changem wei blo iu and wanem iu duim, olketa brata and sista bae barava lovem iu and bae olketa tinghae lo iu.

14. Olsem Colossae 1:9, 10 storyim, hao nao Jehovah teachim pipol blo hem lo first century?

¹⁴ Lo first century. Samting wea Jehovah hapi tumas for duim hem for teachim pipol blo hem. (Sams 32:8) Hem laekem olketa for savve lo hem, lovem hem, and for stap for olowe olsem olketa pikinini blo hem wea hem lovem. Evri samting hia bae no isi sapos olketa no kasem training from Jehovah. (John 17:3) Jehovah iusim olketa first Christian kongregeson for teachim pipol blo hem. (Readim Colossae 1:9, 10.) Holy spirit wea Jesus bin promisim hem helpem olketa disaepol for duim staka nambawan samting. (John 14:16) Holy spirit helpem olketa disaepol for minim toktok blo God, and hem helpem olketa for rememberim moa evri samting wea Jesus talem and duim, wea bihaen olketa raetem insaed lo olketa Gospel. Disfala savve hem strongim faith blo olketa Christian hia, and love blo olketa for God, Son blo hem, and for each other.

15. Lo olketa wanem wei nao iu lukim promis blo Jehovah lo Aesaea 2:2, 3 hem fulfill?

¹⁵ Lo taem blo iumi. Jehovah profesi abaotem hao lo olketa last day, pipol lo evri kantri bae go ap lo maunten blo Jehovah and bae hem teachim olketa abaotem olketa wei blo hem. (Readim Aesaea 2:2, 3.) Iumi lukim klia disfala profesi hem fulfill. Tru worship hem kamap big and winim olketa false worship. And iumi kasem staka spiritual kaikai  wea Jehovah provaedem! (Aesaea 25:6) Thru lo “datfala wakaman wea faithful and wise,” Jehovah provaedem staka information. Olsem example, olketa article wea iumi readim, olketa tok, olketa video and olketa cartoon movie. (Matt. 24:45) Iumi feel olsem datfala fren blo Job Elihu, wea sei: ‘God hem wanfala nambawan tisa, winim evri narafala tisa.’—Job 36:22.

16. Wanem nao iu need for duim for grow lo spiritual wei?

¹⁶ Wanem iu savve duim. Spirit blo God savve helpem iu for followim wanem iu readim and studyim lo Bible. Prea olsem datfala man wea raetem Psalm: “Lod [Jehovah], plis yu tisim mi olketa samting wea yu laekem mi fo duim, mekem mi save obeim trutoktok blong yu. Ya, plis yu mekem mi fo barava wanmaen nomoa fo tinghae long yu.” (Sams 86:11) So gohed for mekius lo olketa spiritual kaikai wea Jehovah provaedem thru lo Bible and organization blo hem. Bat, goal blo iu hem no just for kasem savve nomoa. Iu laekem truth for kasem heart blo iu and followim lo laef blo iu. Spirit blo Jehovah savve helpem iu for duim datwan. And tu, iu laek for encouragem olketa brata and sista blo iu. (Heb. 10:24, 25) Why? Bikos olketa hia spiritual famili blo iu. Prea lo Jehovah for helpem iu for givim koment lo meeting wea kam from heart and for duim best blo iu lo eni assignment iu kasem lo meeting. Lo olketa wei hia iu showimaot lo Jehovah and Son blo hem dat iu lovem olketa “sheepsheep” blo hem wea spesol tumas.—John 21:15-17.

17. Lo olketa wanem wei nao iu savve showimaot iu faithful for sapotim organization blo hem?

¹⁷ Klosap nao only organization wea spirit blo God leadim nomoa bae stap lo earth. So gohed faithful for waka witim organization blo hem. Followim wei blo God for no fevarem pipol taem iu preachim disfala gud nius lo evriwan wea iu meetim. Followim example blo hem for organize and for garem peace taem iu keepim wei for wan mind insaed lo kongregeson. And lisin lo Nambawan Teacher blo iu taem iu mekius lo evri spiritual kaikai wea hem provaedem. Then taem world blo Satan hem gogo for finis, iu bae nating fraet. Bat, iu bae gohed strong witim olketa wea faithful for servem Jehovah insaed organization blo hem.