1. Wat nao best disison wea eniwan savve mekem?

STAKA taem disison wea parents mekem bae affectim pikinini for longfala taem. Sapos parents mekem nogud disison, datwan bae kosim problem for pikinini blo olketa. Bat sapos olketa mekem wise disison, datwan bae givim best chance for pikinini blo olketa garem gudfala laef. Bat, olketa pikinini tu mas mekem gudfala disison. Best disison wea olketa savve mekem hem nao for servem Jehovah, Dadi blo iumi wea lovem iumi.—Sams 73:28.

2. Wanem gud disison nao Jesus and parents blo hem mekem?

² Parents blo Jesus laekem evri pikinini blo tufala for servem Jehovah, and disison wea olketa mekem hem showimaot datwan nao main goal lo laef blo olketa. (Luke 2:40, 41, 52) Jesus tu hem mekem gudfala disison wea datwan helpem hem for fulfillim waka blo hem insaed lo plan blo Jehovah. (Matt. 4:1-10) Taem Jesus growap, hem kaen, faithful and hem no fraet, wea datwan hem kaen pikinini wea eni parents wea lovem Jehovah bae praod abaotem and hapi lo hem.

3. Olketa wanem kwestin nao bae iumi ansarem lo disfala article?

³ Lo disfala article, bae iumi ansarem olketa kwestin hia: Wanem gudfala disison nao Jehovah mekem abaotem Jesus? Wanem nao olketa Christian parents savve lanem from disison wea parents blo Jesus lo earth tufala mekem? And wanem nao olketa young Christian savve lanem from disison wea Jesus mekem?

4. Wanem important disison nao Jehovah mekem abaotem Son blo hem?

⁴ Jehovah chusim best parents for Jesus. (Matt. 1:18-23;  Luke 1:26-38) Toktok wea Mary talem wea kam from heart wea olketa raetem lo Bible hem showimaot hem barava lovem Jehovah and Bible. (Luke 1:46-55) And wei wea Joseph obeyim direction blo Jehovah hem showimaot hem lovem God and laek for mekem hem hapi.—Matt. 1:24.

5-6. Wanem nao Jehovah letem Son blo hem for experiencem?

⁵ Tingim, Jehovah no chusim wanfala rich famili for kamap parents blo Jesus. Sakrifaes wea Joseph and Mary offerim bihaen Jesus born hem showimaot tufala poor. (Luke 2:24) Maet Joseph garem wanfala smol haos for hem waka olsem wanfala carpenter, klosap lo haos blo hem lo Nazareth. Masbi olketa no garem staka samting or selen tu, especially taem wea famili hem start for kamap big and for provaed for samting olsem sevenfala pikinini.—Matt. 13:55, 56.

⁶ Jehovah protectim Jesus from samfala danger bat Hem no protectim Son blo Hem from evri challenge wea hem feisim. (Matt. 2:13-15) Olsem example, Jesus mas deal witim olketa relative wea no biliv lo hem. Tingim hao Jesus mas barava feel nogud taem hem lukim wei wea olketa famili member blo hem no acceptim hem olsem Messiah lo firstaem. (Mark 3:21; John 7:5) Luk olsem, Jesus mas deal witim dae blo Joseph, dadi blo hem wea adoptim hem. Maet Jesus mas lukaftarem famili bisnis blo olketa bikos hem nao firstborn. (Mark 6:3) Taem hem growap, Jesus mas lane for lukaftarem famili blo hem. Masbi hem mas waka hard for sapotim olketa. So hem minim gud datfala feeling for taed lo end blo wanfala day.

7. (a) Olketa wanem kwestin nao savve helpem olketa marit couple for lukaftarem olketa pikinini blo olketa? (b) Hao nao Provebs 2:1-6 savve helpem parents for trainim pikinini?

⁷ Sapos iu wanfala marit couple and iu laek for garem pikinini, askem iuseleva: ‘Waswe, mi wanfala wea hambol, and garem spiritual tingting wea Jehovah savve chusim mi for lukaftarem wanfala niu laef wea spesol?’ (Sams 127:3, 4) Sapos iu wanfala parents, askem iuseleva: ‘Waswe, mi teachim pikinini blo mi for luksavve hao wei for waka hard hem important?’ (Eklesiastes 3:12, 13) ‘Waswe, mi traem best for helpem pikinini blo mi for luksavve lo olketa danger wea savve spoelem hem, wea hem maet feisim lo world blo Satan?’  (Provebs 22:3) Hem hard for iu protectim pikinini blo iu from evri challenge wea hem maet feisim. Datwan hem no isi. Bat iu savve redyim olketa for olketa problem wea olketa savve feisim lo laef, taem iu teachim olketa lo kaenfala wei lo hao olketa savve depend lo Bible for advaes. (Readim Provebs 2:1-6.) Olsem example, sapos wanfala relative hem stop for worshipim Jehovah, helpem pikinini blo iu for luksavve why hem important for gohed faithful lo Jehovah. (Sams 31:23) Or sapos samwan wea iu lovem hem dae, showim lo olketa pikinini blo iu hao for iusim Bible for deal witim wei for sorre and for garem peace.—2 Cor. 1:3, 4; 2 Tim. 3:16.

8. Olsem Diutronomi 6:6, 7 storyim, wanem nao Joseph and Mary mas duim?

⁸ Parents blo Jesus lo earth helpem hem for kamap samwan wea Jehovah hapi lo hem taem hem growap. Tufala followim direction wea Jehovah givim lo olketa parents. (Readim Diutronomi 6:6, 7.) Joseph and Mary garem bigfala love for Jehovah, and main samting lo laef blo tufala hem for encouragem pikinini blo tufala for mekem grow datfala sem kaen love.

9. Wanem important disison nao Joseph and Mary mekem?

⁹ Joseph and Mary chus for garem wanfala gud spiritual schedule olsem wanfala famili. For sure evri week olketa savve go attendim olketa meeting lo sinagog lo Nazareth, and evri year olketa savve go for Pasova lo Jerusalem. (Luke 2:41; 4:16) Olketa iusim olketa taem hia wea famili savve go tugeta lo Jerusalem for teachim Jesus and olketa brata and sista blo hem abaotem history blo pipol blo Jehovah, luk olsem olketa savve go visitim tu olketa ples wea Bible storyim. Taem famili start for kamap big, datwan maet hem no isi for Joseph and Mary for keepim gudfala spiritual schedule blo olketa. Bat olketa kasem gud samting from datwan! From wei wea olketa putim Jehovah olsem first samting lo laef blo olketa, famili blo olketa gohed gud lo spiritual wei.

10. Wanem leson nao Christian parents savve lanem from Joseph and Mary?

¹⁰ Wanem nao parents wea lovem Jehovah savve lanem from Joseph and Mary? Samting wea barava important, hem for teachim  pikinini blo iu thru lo toktok and wanem iu duim wea showimaot iu barava lovem Jehovah. Best present wea iu savve givim lo pikinini hem for helpem hem for lovem Jehovah. And wanfala leson wea barava important wea iu savve teachim olketa hem hao for garem gudfala spiritual schedule for study, prea, meeting and for share lo ministry. (1 Tim. 6:6) Hem tru, iu savve givim material samting lo olketa pikinini blo iu wea olketa needim. (1 Tim. 5:8) Bat tingim, wei wea pikinini blo iu hem fren klos witim Jehovah, and no olketa material samting nao bae helpem olketa for sev lo end blo disfala nogud world blo Satan and for go insaed niu world blo God. *—Esikiel 7:19; 1 Tim. 4:8.

11. (a) Hao nao advaes lo 1 Timothy 6:17-19 bae helpem parents for mekem olketa gudfala disison taem olketa helpem pikinini? (b) Olketa wanem goal nao maet famili blo iu ting raonem, and wanem blessing nao savve kamaot from datwan? (Lukim box “ Olketa Wanem Goal Nao Iu Laek for Markem?”)

¹¹ Hem barava gud for lukim staka Christian parents mekem gudfala disison wea helpem famili blo olketa for fren witim Jehovah! Olketa evritaem worshipim Jehovah tugeta. Olketa attendim olketa Christian meeting and convention. And olketa share tugeta lo field ministry. Samfala famili savve go preach lo olketa territory wea olketa no duim staka taem. Samfala maet arrange for go visit lo Bethel or sapotim olketa theocratic construction project. Olketa famili wea chus for duim olketa samting olsem mas sakrifaesim selen blo olketa seleva for datwan, and samfala taem olketa savve feisim tu olketa challenge. Bat gud samting wea kamaot from datwan nao olketa rich lo spiritual wei. (Readim 1 Timothy 6:17-19.) Staka taem, olketa pikinini wea growap lo olketa famili olsem savve gohed for garem olketa gudfala wei hia wea olketa lanem and olketa no regret! *—Provebs 10:22.

12. Taem Jesus growap, wanem nao hem mas duim?

¹² Dadi blo Jesus lo heven hem evritaem mekem olketa gudfala disison, and parents blo Jesus lo earth tu mekem olketa wise disison. Nomata olsem, taem Jesus growap, hem mas mekem olketa disison for hemseleva. (Gal. 6:5) Olsem iumi evriwan, Jesus garem freedom for chus. Hem savve chus for duim samting wea hemseleva laekem, bat hem chus for gohed fren gud witim Jehovah. (John 8:29) Hao nao maet example blo hem savve helpem olketa young wan distaem?

13. Wanem important disison nao Jesus mekem taem hem young yet?

¹³ Taem Jesus young, hem chus for obeyim wanem parents blo hem talem. Jesus no enitaem rejectim advaes blo tufala and hem no garem disfala tingting dat savve blo hem  winim tufala. Bat “hem gohed for obeyim tufala.” (Luke 2:51) For sure, Jesus duim gud responsibility blo hem olsem firstborn lo famili. Hem waka hard for lane from dadi blo hem Joseph for duim waka olsem carpenter mekem hem savve help for sapotim famili blo hem.

14. Hao nao iumi savve Jesus hem wanfala gudfala student blo Bible?

¹⁴ Luk olsem parents blo Jesus storyim lo hem datfala spesol wei wea hem born and samting wea olketa messenger blo God talem abaotem hem. (Luke 2:8-19, 25-38) Jesus hem no just satisfae nomoa witim wanem tufala talem, bat hemseleva tu gohed studyim olketa Scripture for savve lo datwan. Hao nao iumi savve Jesus hem wanfala gudfala student blo Bible? Bikos taem hem smol boy yet, olketa teacher lo Jerusalem “barava sapraes long hao hem ansarem olketa kwestin and long bigfala savve wea hem garem.” (Luke 2:46, 47) And taem hem 12 year, Jesus hem savve finis hao Jehovah nao Dadi blo hem.—Luke 2:42, 43, 49.

15. Hao nao Jesus showim hem chus for duim wanem Jehovah laekem?

¹⁵ Taem Jesus savve abaotem waka wea hem bae duim insaed lo plan blo Jehovah, hem chus for acceptim datfala assignment blo hem. (John 6:38) Hem savve hao staka bae heitim hem and masbi wei for ting raonem datwan maet mekem hem feel sorre. Nomata olsem, hem chus for obeyim Jehovah. Taem Jesus hem baptaes lo 29 C.E., main samting lo laef blo hem nao for duim wanem Jehovah laekem. (Heb. 10:5-7) Nomata taem hem dae lo post, Jesus gohed for duim wanem Dadi blo hem laekem.—John 19:30.

16. Wanem nao wanfala leson wea olketa pikinini savve lanem from Jesus?

¹⁶ Obeyim parents blo iu. Olsem Joseph and Mary, parents blo iu olketa no perfect tu. Nomata olsem, parents blo iu kasem assignment from Jehovah for protectim, trainim, and gaedem iu. Sapos iu tinghae lo advaes blo olketa and respectim paoa wea olketa garem, ‘iu bae garem gudfala laef.’—Eph. 6:1-4.

17. Olsem Josua 24:15 storyim, wanem disison nao olketa young wan mas mekem for olketa seleva?

¹⁷ Iu mas disaedem hu nao bae iu servem. Iu mas pruvim lo iuseleva hu nao Jehovah, wat nao insaed lo olketa plan blo hem, and hao iu savve duim wanem hem laekem lo laef blo iu.  (Rome 12:2) Then iu bae fit for mekem datfala disison wea barava important lo laef blo iu wea hem nao for servem Jehovah. (Readim Josua 24:15; Eklesiastes 12:1) Sapos iu garem wanfala schedule for Bible reading and study seleva, love blo iu for Jehovah bae gohed for grow and faith blo iu bae kamap moa strong.

18. Wanem disison nao olketa young wan mas mekem, and wanem nao savve kamaot from datwan?

¹⁸ Chusim wanem Jehovah laekem olsem first samting lo laef blo iu. World blo Satan hem promisim hao sapos iu iusim savve wea iu garem for duim samting for iuseleva, iu bae hapi. Bat iumi savve hao olketa wea goal blo olketa hem for aftarem material samting, olketa kasem “staka problem wea barava spoelem olketa.” (1 Tim. 6:9, 10) Bat lo narasaed, sapos iu lisin lo Jehovah and chusim wanem hem laekem olsem first samting lo laef blo iu, bae iu garem gudfala laef and bae iu duim samting wea wise.—Josua 1:8.

19. Wanem nao olketa parents mas tingim?

¹⁹ Parents, duim best blo iu for helpem famili blo iu for servem Jehovah. Depend lo hem and hem bae helpem iu for mekem olketa disison. (Provebs 3:5, 6) Tingim hao wanem iu duim nao bae muvim pikinini blo iu for obey winim wanem iu talem nomoa. So mekem olketa disison wea bae helpem pikinini blo iu for duim samting wea Jehovah bae hapi lo hem.

20. Wanem blessing nao olketa young wan bae kasem sapos olketa chus for servem Jehovah?

²⁰ Olketa young wan, parents blo iu savve helpem iu for mekem olketa wise disison lo laef. Iuseleva nao mas disaed for duim samting wea bae mekem Jehovah for hapi lo iu. So followim example blo Jesus and chus for servem Dadi blo iu lo heven wea lovem iu. Sapos iu duim olsem, iu bae garem laef wea busy lo gud samting, wea garem mining, and bae iu hapi distaem. (1 Tim. 4:16) And lo future, bae iu enjoyim go moa wanfala laef wea gud tumas!