1. Wanem nao maet iumi tingim abaotem man wea showimaot mercy?

TAEM iumi tingim man wea showimaot mercy maet iumi tingim hao hem kaen, showimaot love, feel sorre lo pipol, and willing for helpem narawan. Datwan mekem iumi tingim story blo Jesus abaotem Samaritan wea kaen. Nomata hem man from nara kantri, hem “sorre” lo wanfala Jew wea olketa man for steal killim hem nogud. “Hem barava sorre tumas” lo datfala Jew wea garekil, and hem duim samting for helpem man hia. (Luke 10:29-37) Datfala story helpem iumi for minim hao Jehovah showimaot mercy. Hem duim olsem lo staka difren wei bikos hem lovem iumi.

2. Wanem nao nara wei for showimaot mercy?

² Man savve showimaot mercy lo nara wei tu. Hem maet disaed for no panisim samwan wea fit for kasem panis. Jehovah showimaot mercy lo iumi lo wei olsem. Bible sei: “Hemi no save panisim yumi fitim olketa sin blong yumi.” (Sams 103:10) Bat samfala taem Jehovah mas panisim man wea duim sin.

3. Olketa wanem kwestin nao bae iumi storyim?

³ Lo disfala article bae iumi storyim thrifala kwestin: Why nao Jehovah showimaot mercy? Waswe, taem samwan disfellowship datwan showimaot mercy? And wanem nao savve helpem iumi for showimaot mercy? Bae iumi lukim hao Bible ansarem olketa kwestin hia.

4. Why nao Jehovah showimaot mercy?

⁴ Jehovah laek for showimaot mercy. Aposol Paul sei God hem showimaot “bigfala mercy.” Lo disfala scripture Paul  storyim hao God givim hope lo olketa anointed Christian wea no perfect for kasem laef lo heven, and datwan showimaot mercy. (Eph. 2:4-7) Jehovah showimaot mercy lo olketa narawan tu. David sei: “Oltaem hemi gud tumas long yumi evriwan, an hemi [showim mercy] long yumi an evrisamting wea hemi mekem.” (Sams 145:9) From Jehovah lovem pipol hem showimaot mercy taem gudfala reason stap for duim datwan.

5. Hao nao Jesus savve Jehovah showimaot mercy?

⁵ Jesus barava savve hao Jehovah laek for showimaot mercy from tufala stap tugeta lo heven for long taem bifor Jesus kam lo earth. (Provebs 8:30, 31) So Jesus lukim taem Dadi blo hem showim mercy lo olketa man wea no perfect. (Sams 78:37-42) Taem Jesus lo earth, hem savve storyim hao Dadi blo hem showimaot mercy.

6. Hao nao wanfala story blo Jesus helpem iumi for minim Jehovah laek for showimaot mercy?

⁶ Olsem iumi storyim lo article bifor diswan, Jesus story abaotem wanfala prodigal son for helpem iumi minim hao Jehovah barava laek for showimaot mercy. Datfala son lusim dadi and “hem spoelem selen bilong hem and evri samting dadi givim hem long enikaen rabis samting.” (Luke 15:13) Gogo hem sorre lo wanem hem duim, hem repent, and hem go bak lo hom. Wanem nao dadi duim taem hem lukim son blo hem? Jesus sei: “Taem [hem] lelebet farawe yet, dadi bilong hem lukim hem and barava sorre long hem. Hem ran go long hem, and hem holem and kissim hem.” Dadi no mek shame lo son blo hem, bat hem showimaot mercy and forgivim hem. Hem hapi tumas from son kam bak moa lo famili. Nomata son duim bigfala sin, from hem repent, dadi forgivim hem. Datfala dadi hem piksarem Jehovah. Jesus storyim hao Jehovah barava laek for showimaot mercy lo olketa wea repent and for forgivim olketa.​—Luke 15:17-24.

7. Hao nao wisdom blo Jehovah hem join witim mercy?

⁷ Jehovah showimaot mercy bikos lo wisdom blo hem. Bible sei datfala “wisdom from heven” mekem Jehovah for “showimaot mercy long narawan.” (Jas. 3:17) Jehovah savve hem gud for showimaot mercy lo pipol blo hem, olsem dadi  showimaot mercy lo olketa pikinini blo hem. (Sams 103:13; Aesaea 49:15) From Jehovah showimaot mercy lo pipol blo hem olketa garem hope for future, nomata olketa no perfect. From Jehovah hem wise hem showimaot mercy taem gudfala reason stap for duim datwan. Bat Jehovah luksavve tu, samfala taem hem no fitim for showimaot mercy. Hem bae no showimaot mercy lo man wea duim bigfala sin and no repent, bikos hem bae olsem Jehovah acceptim datfala sin.

8. Why nao samfala taem samwan lo kongregeson mas disfellowship?

⁸ Wanem nao iumi shud duim sapos wanfala brata or sista duim bigfala sin and no laek for repent? Bible sei iumi mas “no fren witim” pipol olsem. (1 Cor. 5:11) Dastawe olketa wea no repent bae disfellowship. Hem for protectim evriwan lo kongregeson, and hem for followim olketa standard blo Jehovah. Bat samfala maet tingse taem samwan disfellowship, God no showimaot mercy lo hem. Waswe, datwan hem tru? Bae iumi storyim.

9-10. Olsem Hebrew 12:5, 6 storyim, why nao iumi sei taem samwan disfellowship datwan showimaot mercy? Storyim tokpiksa.

⁹ Iumi savve sorre taem iumi herem announcement lo meeting wea sei wanfala brata or sista “no wanfala Jehovah’s Witness distaem.” Maet samfala kwestinim sapos hem shud disfellowship. So waswe, taem samwan disfellowship datwan showimaot mercy? Ia, taem olketa elder disfellowshipim samwan wea no repent, datwan hem wise and olketa showimaot love and mercy. (Provebs 13:24) Waswe, taem samwan disfellowship datwan savve helpem hem for laek repent? Yes. Staka wea reinstate sei datwan helpem olketa for luksavve olketa duim bigfala sin, and hem helpem olketa for laek change, repent, and kam bak lo Jehovah.​—Readim Hebrew 12:5, 6.

¹⁰ Tingim disfala tokpiksa. Wanfala shepherd lukim wanfala sheepsheep wea sik. Shepherd savve hem mas separatem sheepsheep hia from olketa nara sheepsheep mekem hem kamap gud moa. Bat olketa sheepsheep laek stap tugeta and sapos wanfala mas stap seleva hem savve krae tumas. Waswe, from shepherd separatem datfala sheepsheep datwan minim hem no kaen? Nomoa. Hem savve sapos hem letem sheepsheep wea sik for stap witim olketa narawan, olketa tu bae kasem datfala sik, so hem laek for protectim olketa.​—Lukim tu Levitikas 13:3, 4.

11. (a) Hao nao samwan wea disfellowship hem olsem sheepsheep wea sik? (b) Wanem nao savve helpem samwan wea disfellowship for fren bak witim Jehovah?

¹¹ Samwan wea disfellowship hem olsem datfala sheepsheep wea sik, bat hem sik lo spiritual wei. (Jas. 5:14) Taem samwan sik hem savve pasim sik lo narawan. Lo sem wei tu, man wea sin savve mekem olketa narawan for tingse hem olraet for duim nogud samting, so hem fitim for samwan wea duim sin and no repent for disfellowship. Disfala discipline showimaot Jehovah lovem olketa sheepsheep blo hem lo kongregeson, and maet hem helpem man wea duim sin for luksavve wanem hem duim no stret and for laek repent. Nomata hem disfellowship, maet hem savve attendim olketa meeting for kasem spiritual kaikai. And tu, hem savve kasem olketa pablikeson for hem readim and studyim, and hem savve lukim JW  Broadcasting^®. And taem olketa elder lukim hem start for change, olketa savve givim hem kaonsel and direction lo wanem moa hem savve duim mekem hem reinstate. *

12. Wanem nao olketa elder bae duim wea showimaot love and mercy taem samwan no repent?

¹² Hem important for iumi savve, taem samwan disfellowship datwan hem bikos hem no repent. Olketa elder ting raonem staka samting bifor olketa disaed for disfellowshipim samwan. Olketa elder savve Jehovah stretem samwan ‘fitim sin’ wea hem duim. (Jeremaea 30:11) Olketa elder lovem olketa brata and sista, and no laek for duim samting wea bae spoelem olketa lo spiritual wei. Bat sapos samwan duim bigfala sin and no repent, olketa elder showimaot love and mercy from olketa disfellowshipim hem.

13. Why nao olketa elder mas disfellowshipim wanfala brata lo Corinth?

¹³ Tingim hao aposol Paul deal witim wanfala brata lo Corinth wea durong witim waef blo dadi blo hem, and hem no repent from datfala barava nogud sin. Lo taem blo olketa Israelite Jehovah sei: “Sapos eniwan hemi durong wetem waef blong dadi blong hem, hemi mekem sem long dadi blong hem. So yufala mas kilim tufala dae.” (Levitikas 20:11) Bat lo taem blo Paul, hard for Paul sei for olketa killim dae datfala man, so hem talem olketa elder for disfellowshipim hem. Sin wea man hia duim hem affectim olketa narawan lo kongregeson, and samfala start for tingse wanem hem duim hem no bigfala sin!​—1 Cor. 5:1, 2, 13.

14. Hao nao Paul showimaot mercy lo datfala man lo Corinth wea disfellowship, and why nao Paul duim datwan? (2 Corinth 2:5-8, 11)

¹⁴ Gogo Paul faendaot datfala man hem repent. Nomata man hia duim samting wea mekem pipol for no tinghae lo kongregeson, Paul talem olketa elder for no strict tumas bat “mas willing for forgivim and comfortim hem.” Paul talem datwan bikos hem no laekem “man hia hem wikdaon from hem sorre tumas.” Paul sorre lo disfala man wea repent. Hem no laekem disfala man for givap and tingse hard for hem kam bak nao.​—Readim 2 Corinth 2:5-8, 11.

15. Hao nao olketa elder savve disaed sapos olketa bae disfellowshipim or showimaot mercy lo samwan?

 ¹⁵ Olsem Jehovah, olketa elder laek for showimaot mercy. Olketa bae disfellowshipim samwan sapos hem no repent, bat sapos gudfala reason stap for showimaot mercy bae olketa duim datwan. Bat olketa bae no showimaot mercy lo man wea no repent bikos datwan bae olsem olketa acceptim datfala sin. Waswe, olketa elder nomoa need for showimaot mercy lo narawan?

16. Hao nao Jehovah deal witim olketa wea no showimaot mercy lo narawan, olsem Provebs 21:13 storyim?

¹⁶ Evri Christian mas followim example blo Jehovah for showimaot mercy. Why nao olsem? Wanfala reason hem bikos Jehovah bae no lisin lo prea blo olketa wea no showimaot mercy. (Readim Provebs 21:13.) Iumi laekem Jehovah for lisin lo olketa prea blo iumi, so iumi laek lisin lo olketa brata and sista wea storyim hard taem wea olketa kasem. Hem gud for tingim disfala toktok lo Bible: “Man wea no showimaot mercy long narawan bae God no showimaot mercy long hem taem hem judgem hem.” (Jas. 2:13) Sapos iumi luksavve iumi needim Jehovah for showimaot mercy lo iumi, datwan bae helpem iumi for showimaot mercy lo narawan. Iumi especially laek for showimaot mercy lo samwan wea reinstate.

17. Hao nao King David showimaot mercy lo Saul?

¹⁷ Olketa example lo Bible savve helpem iumi for showimaot mercy. King David hem wanfala wea showimaot mercy. Saul, datfala king wea God anointim laek killim David dae, gogo David garem chance for killim dae Saul. Bat David showimaot mercy and no laek for pei bak.​—Fas Samuel 24:9-12, 18, 19.

18-19. Storyim tufala taem wea David no showimaot mercy.

¹⁸ Bat samfala taem David no showimaot mercy lo narawan. Olsem example, taem Nabal tok spoelem David and no laek givim kaikai lo olketa man blo David, David kros tumas and disaed for killim dae Nabal and evri man lo haos blo hem. Bat Abigail, datfala gud and patient waef blo Nabal, kwiktaem duim samting for stopem David.​—Fas Samuel 25:9-22, 32-35.

¹⁹ Nara example, hem taem profet Nathan talem David abaotem wanfala rich man wea stealim sheepsheep blo wanfala poor man. Datwan mekem David barava kros and hem sei: “Datfala risman wea hemi duim samting ya, hem fitim fo hemi dae.” (Mektu Samuel 12:1-6) David savve Law blo Moses sei man wea stealim wanfala sheepsheep mas changem lo nara fofala sheepsheep. (Eksodas 22:1) So for sei datfala man mas dae, datwan hem strongfala judgment! Nathan talem  datfala story for helpem David luksavve sin wea hem duim hem barava big winim sin blo man wea stealim animal. David no laek for showimaot mercy lo man wea stealim sheepsheep, bat Jehovah barava showimaot mercy lo David!​—Mektu Samuel 12:7-13.

20. Wanem nao iumi savve lanem from David?

²⁰ Taem David barava kros lo Nabal, hem judgem Nabal and sei hem and olketa man blo hem fit for dae. And taem David judgem man lo story blo Nathan, hem sei datfala man shud dae. Bat David hem kaenfala man, so why nao hem mekem strongfala judgment againstim man wea stealim wanfala sheepsheep? Lo datfala taem, David duim sin and hem garem guilty konsens. So datfala strong judgment showimaot hem wik lo spiritual saed. Jesus warnim olketa disaepol blo hem: “Iufala mas no judgem narawan mekem God no judgem iufala.” (Matt. 7:1, 2) So iumi tu mas careful for no judgem narawan, bat iumi mas showimaot “bigfala mercy” olsem Jehovah.

21-22. Wanem nao samfala wei for showimaot mercy lo olketa narawan?

²¹ Man wea showimaot mercy no sorre lo pipol nomoa, bat hem duim samting for helpem olketa. So iumi evriwan savve lukaotem chance for helpem olketa lo famili blo iumi, olketa brata and sista, and nara pipol tu. Staka wei stap for helpem narawan! Olsem example, iumi savve duim samting for comfortim olketa wea sorre, olsem for wakem kaikai for olketa, or nara samting olsem. Or iumi savve encouragem samwan wea reinstate. And nara wei for helpem pipol hem for storyim gud nius lo olketa wea iumi meetim. Datwan hem barava gudfala wei for showim mercy lo pipol.​—Job 29:12, 13; Rome 10:14, 15; Jas. 1:27.

²² Staka wei stap for showimaot mercy lo pipol so trae for luksavve lo wanem pipol needim. Taem iumi showimaot mercy lo pipol, datwan bae mekem Dadi blo iumi lo heven wea showimaot “bigfala mercy” for hapi tumas!