1. Why nao staka pipol konfius abaotem religion?

STAKA religion sei olketa followim Christ and tingse olketa worshipim God lo stretfala wei. Dastawe pipol no sure sapos wanfala tru religion stap, or evri religion worshipim God lo stretfala wei. Waswe, iumi barava sure Olketa Jehovah’s Witness teachim truth from Bible, and olketa followim example blo Jesus lo hao for worshipim Jehovah? Bae iumi storyim olketa samting wea pruvim datwan hem tru, and mekem iumi sure iumi followim tru religion.

2. Wanem nao mekem Paul sure hem followim tru religion? (1 Thessalonica 1:5)

² Aposol Paul sure hem insaed truth. (Readim 1 Thessalonica 1:5.) Hem studyim olketa Scripture for pruvim lo hemseleva wanem hem bilivim hem tru. Hem sure “evri toktok insaed long olketa Holy Raeting hem kam from God.” (2 Tim. 3:16) Wanem nao hem lanem from hem studyim olketa Scripture? Hem lanem staka samting wea pruvim Jesus nao datfala Messiah, bat olketa bigman blo Jew religion no laek for bilivim datwan. Olketa bigman hia sei olketa teachim truth abaotem God lo pipol, bat then olketa duim olketa samting wea mekem God no hapi. (Titus 1:16) Paul no olsem olketa bigman hia wea chusim nomoa samfala samting lo olketa Scripture for followim. Paul teachim and followim “evri samting” wea stap lo olketa Scripture.​—Acts 20:27.

3. Waswe, iumi need for kasem ansa lo evri kwestin blo iumi mekem iumi sure iumi insaed truth? (Lukim tu box “ Hard for Iumi Savve lo Evri Samting Jehovah Tingim and Duim.”)

 ³ From iumi insaed truth, waswe, iumi savve ansarem evri kwestin wea pipol garem, nomata olketa kwestin wea Bible no talem klia ansa for datwan? Tingim example blo Paul. Hem encouragem olketa nara Christian for “mek sure long wanem hem tru,” bat hem sei hemseleva tu no minim samfala samting. (1 Thess. 5:21) Hem sei “iumi no garem evri savve” abaotem olketa Scripture, and “hem olsem iumi luk insaed wanfala mirror wea hem no klia tumas.” (1 Cor. 13:9, 12) Paul no minim samfala samting and iumi tu olsem. Bat Paul minim olketa main samting abaotem plan blo Jehovah, dastawe hem sure hem insaed truth!

4. Wanem nao bae helpem iumi for sure iumi insaed truth? Wanem nao bae iumi lanem abaotem olketa tru Christian?

⁴ Wanfala samting wea savve helpem iumi for sure iumi followim tru religion hem for comparem example blo Jesus lo hao hem worshipim Jehovah witim wanem Olketa Jehovah’s Witness duim distaem. Lo disfala study bae iumi storyim hao olketa tru Christian bae (1) no worshipim idol and no mekhae lo man, (2) mekhae lo nem blo Jehovah, (3) tinghae lo truth, and (4) barava lovem each other.

5. Wanem nao iumi lanem from Jesus abaotem hao for worshipim God lo stretfala wei?

⁵ From Jesus barava lovem Jehovah hem worshipim Jehovah nomoa, taem hem stap lo heven and lo earth tu. (Luke  4:8) Hem teachim olketa disaepol blo hem for duim sem samting. No enitaem Jesus and olketa disaepol blo hem worshipim olketa idol. From God hem wanfala Spirit, hard for man wakem samting wea semsem olsem hem! (Aesaea 46:5) Bat waswe, hem olraet for wakem image blo olketa saint and for prea lo olketa? Mek-tu lo Tenfala Komandment hem sei: “Yufala mas no mekem eni tambu kaving blong enisamting long heven, o long wol . . . Yufala mas no bendaon long eni tambu kaving olsem fo wosipim.” (Eksodas 20:4, 5) Olketa wea laek for mekem God hapi bae luksavve olketa shud no worshipim idol.

6. Wanem example nao Olketa Jehovah’s Witness followim distaem?

⁶ Olketa wea studyim history sei olketa Christian lo first century worshipim nomoa God, and no olketa idol. Olsem example, wanfala buk History of the Christian Church sei olketa Christian lo first century “bae les tumas” for garem olketa idol lo ples wea olketa worship. Olketa Jehovah’s Witness distaem followim example blo olketa Christian lo first century wea no worshipim idol. Iumi no prea lo olketa image blo olketa saint or olketa angel, and no prea lo Jesus. Iumi no salutim flag and no mekhae lo kantri blo iumi. Iumi disaed strong for obeyim toktok blo Jesus wea sei: ‘Iu mas worshipim [God bilong iu Jehovah] nomoa.’​—Matt. 4:10.

7. Wanem nao showimaot Olketa Jehovah’s Witness difren from olketa nara religion?

⁷ Samfala bigman lo church distaem mekhae lo seleva and pipol interest tumas for herem story blo olketa and tinghae tumas lo olketa hia. Staka joinim church blo olketa, baem buk blo olketa, and givim big donation for olketa. Samfala bilivim evri samting wea olketa storyim and tinghae lo olketa bigman hia, olsem Jesus nao kam preach lo olketa! Bat olketa wea worshipim Jehovah no mekhae lo olketa man. Iumi respectim olketa brata wea lead lo kongregeson, bat iumi followim wanem Jesus talem: “Iufala evriwan olketa brata.” (Matt. 23:8-10) Nomata samwan hem bigman blo religion or gavman, iumi no mekhae lo hem. And iumi no teksaed lo eni samting wea join witim politik or religion, olsem olketa nara religion duim.​—John 18:36.

8. Hao nao iumi savve Jehovah laekem iumi for mekhae lo nem blo hem?

⁸ Wanfala taem Jesus hem prea olsem: “Dadi, mekhae long nem bilong iu.” Jehovah ansarem datfala prea witim bigfala voice from skae, and hem sei bae hem mekhae lo nem blo hemseleva. (John 12:28) Lo ministry blo Jesus, hem evritaem mekhae lo nem blo Dadi blo hem lo pipol. (John 17:26) So hem wanfala privilege for iumi olketa Christian iusim nem blo God and storyim datwan lo pipol.

9. Hao nao olketa Christian lo first century showimaot olketa mekhae lo nem blo God?

⁹ Lo first century Jehovah start for chusim staka difren pipol for kam insaed Christian kongregeson. (Acts 15:14) Taem olketa Christian hia preach olketa hapi for storyim nem blo God, and olketa wea raetem olketa Bible buk iusim datfala nem lo olketa raeting blo olketa. Olketa hia barava mekhae lo nem blo God.​—Acts 2:14, 21.

10. Wanem nao Olketa Jehovah’s Witness duim wea showimaot olketa mekhae lo nem blo Jehovah?

 ¹⁰ Waswe, Olketa Jehovah’s Witness mekhae lo nem blo Jehovah? Tingim diswan. Staka bigman lo religion waka hard for mek sure pipol no savve God garem nem. Olketa aotem nem blo God from Bible wea olketa iusim, and samfala no iusim lo lotu blo olketa. * Olketa religion no mekhae lo nem blo God. Bat Olketa Jehovah’s Witness nao mekhae lo nem blo Jehovah! Iumi waka hard for witness abaotem Jehovah. (Aesaea 43:10-12) Iumi wakem winim 240 million copy blo New World Translation of the Holy Scriptures. Datfala Bible iusim nem blo Jehovah lo olketa scripture wea olketa nara transleita aotem from Bible blo olketa. And iumi wakem olketa Bible pablikeson lo winim 1,000 languis wea iusim nem blo Jehovah!

11. Hao nao olketa Christian lo first century showimaot olketa tinghae lo truth?

¹¹ Jesus tinghae lo truth abaotem God and olketa plan blo God. Evri samting wea Jesus duim showimaot datwan, and hem storyim datfala truth lo olketa narawan. (John 18:37) Olketa follower blo Jesus tu barava tinghae lo truth. (John 4:23, 24) Dastawe Peter sei olketa  Christian followim “olketa tru teaching.” (2 Pet. 2:2) From olketa Christian lo first century tinghae lo truth, olketa no followim olketa idea blo olketa nara religion, kastom blo olketa man, or olketa idea wea againstim truth. (Col. 2:8) Distaem tu iumi Olketa Jehovah’s Witness showimaot iumi “followim olketa tru teaching” bikos iumi bilivim and traem best for duim wanem Bible talem.​—3 John 3, 4.

12. Wanem nao Governing Body duim taem hem luksavve hao for explainim wanfala Bible teaching shud change, and why nao olsem?

¹² Olketa Jehovah’s Witness no sei olketa barava minim evri samting lo Bible. Olketa mekem samfala mistek lo hao olketa explainim Bible teaching or hao olketa organizem kongregeson. Iumi shud no sapraes lo datwan bikos Bible sei iumi bae gohed kasem moa savve wea tru abaotem God. (Col. 1:9, 10) Jehovah isisi helpem iumi for luksavve lo olketa tru samting, so iumi mas patient. (Provebs 4:18) Taem Governing Body luksavve hao olketa explainim wanfala Bible teaching shud change, olketa kwiktaem stretem datwan. Staka religion distaem changem wanem olketa teachim bikos olketa laek for mekem olketa follower for hapi and for pipol lo world tinghae lo olketa. Bat iumi changem wanem iumi teachim bikos iumi laek for mekem God hapi and worshipim hem lo stretfala wei olsem Jesus duim. (Jas. 4:4) Iumi no changem wanem iumi teachim followim tingting blo pipol lo world, bat hem from iumi luksavve lo stretfala mining blo datfala teaching. Iumi tinghae tumas lo truth!​—1 Thess. 2:3, 4.

13. Wanem nao main fasin wea olketa Christian shud showimaot, and hao nao Olketa Jehovah’s Witness showimaot datwan?

¹³ Pipol lukim olketa Christian lo first century showimaot olketa naesfala wei, bat main fasin wea olketa showimaot hem love. Jesus sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:34, 35) Distaem, Olketa Jehovah’s Witness evriwea lo world showimaot love lo each other and wan mind. Iumi olsem wanfala famili nomata iumi kam from difren kantri and garem difren culture. Iumi lukim olketa brata and sista showimaot love lo each other lo olketa meeting, assembly, and convention. From iumi lovem each other, iumi barava sure hao iumi worshipim God hem mekem hem hapi.

14. Olsem Colossae 3:12-14 talem, hao nao iumi savve showimaot iumi barava lovem narawan?

¹⁴ Bible sei iumi “mas barava lovem narawan.” (1 Pet. 4:8) Wanfala wei for showimaot iumi barava lovem each other hem for forgivim narawan and for no gohed tingim mistek blo narawan. Iumi laek for tingim and kaen lo evriwan insaed kongregeson, nomata olketa wea duim samting wea mekem iumi feel nogud. (Readim Colossae 3:12-14.) Taem iumi duim olsem, iumi showimaot iumi olketa trufala Christian.

15. Wanem nao olketa nara wei iumi followim example lo hao olketa Christian lo first century worshipim God?

¹⁵ Olketa Jehovah’s Witness followim example blo hao olketa Christian lo first century worshipim God lo olketa nara  wei tu. Olsem example, iumi followim sem arrangement olsem olketa Christian lo first century for garem olketa traveling overseer, elder, and ministerial servant. (Phil. 1:1; Titus 1:5) Iumi followim olketa sem standard wea olketa Christian lo first century followim tu. Olsem example, iumi respectim law blo Jehovah abaotem sex and marit, blood, and arrangement for aotem from kongregeson samwan wea sin and no repent.​—Acts 15:28, 29; 1 Cor. 5:11-13; 6:9, 10; Heb. 13:4.

16. Wanem nao iumi lanem from toktok lo Ephesus 4:4-6?

¹⁶ Jesus storyim hao nomata pipol sei olketa disaepol blo hem, staka lo olketa duim samting wea showimaot datwan no tru. (Matt. 7:21-23) And Bible talem tu hao lo olketa last day “hem bae luk olsem [pipol] worshipim God bat samting wea olketa duim showimaot olketa nating worshipim hem nomoa.” (2 Tim. 3:1, 5) Bible talemaot klia God garem wanfala wei nomoa for worshipim hem, wea datwan nao “wanfala faith.”​—Readim Ephesus 4:4-6.

17. Hu nao followim example blo Jesus for followim trufala religion distaem?

¹⁷ Hu nao followim trufala religion distaem? Iumi storyim finis hao Jesus and olketa Christian lo first century worshipim Jehovah, and iumi Olketa Jehovah Witness nao followim example blo olketa hia lo hao for worshipim Jehovah. Hem nambawan privilege for kamap pipol blo Jehovah and for savve lo truth abaotem hem and olketa plan blo hem! So iumi laek for gohed hol strong lo truth wea iumi followim.