1-2. Wanem samting nao mekem tufala king difren, and bae iumi ansarem wanem kwestin?

LO DISFALA study bae iumi storyim tufala king lo Bible. Wanfala rulim tenfala tribe blo Israel, and narawan rulim tufala tribe blo Judah. Tufala king hia laef lo difren taem, bat tufala evriwan bighed againstim Jehovah. Tufala worshipim olketa laea god, killim dae samfala pipol, and mekem olketa Israelite for sin. Bat wanem nao mekem tufala king hia difren? Wanfala gohed duim olketa nogud samting kasem taem hem dae, bat narawan repent lo olketa sin blo hem and Jehovah forgivim hem. Hu nao tufala king hia?

² Wanfala hem Ahab wea rulim Israel, and narawan hem Manasseh wea rulim Judah. Luk olsem tufala hia sorre lo wanem tufala duim, bat bae iumi faendaot sapos tufala evriwan repent. (Acts 17:30; Rome 3:23) Wanem nao bae showimaot sapos samwan hem repent? Iumi need for savve bikos sapos iumi sin iumi laekem Jehovah for forgivim iumi. For ansarem kwestin hia, bae iumi storyim tufala king and wanem iumi savve lanem from samting wea olketa duim. Then bae iumi storyim hao Jesus showimaot wanem man need for duim for repent.

3. Ahab hem wanem kaen king?

³ Ahab hem mek-seven king wea rulim tenfala tribe blo Israel. Hem maritim Jezebel dota blo king blo Sidon. Datwan mekem pipol blo Israel for rich, bat hem mekem olketa for sin againstim Jehovah tu. Jezebel worshipim Baal, wanfala nogud religion wea garem olketa jury lo olketa ples blo olketa for worship and olketa savve sakrifaesim  olketa pikinini, and hem talem Ahab for mekem olketa Israelite for worshipim Baal tu. Jezebel trae for killim dae evri profet blo Jehovah. (Fas Kings 18:13) Lo tingting blo Jehovah, Ahab hem “wos moa winim evri king wea i rul fastaem long hem.” (Fas Kings 16:30) Jehovah lukim evri nogud samting wea Ahab and Jezebel duim. Dastawe hem sendem profet Elijah, for warnim olketa Israelite for stop worshipim Baal. Ahab and Jezebel nating followim olketa warning hia.

4. Wanem nao Elijah sei bae happen lo Ahab, and wanem nao Ahab duim bihaen lo datwan?

⁴ Gogo Jehovah disaed for duim samting. Hem sendem Elijah for talem Ahab and Jezebel from olketa no change bae Jehovah finisim famili laen blo tufala. Toktok blo Elijah mekem Ahab seke, and datwan mekem datfala praod man for sorre lo wanem hem duim.​—Fas Kings 21:19-29.

5-6. Wanem nao showimaot Ahab hem no repent?

⁵ Nomata lo datfala taem Ahab sei hem sorre, wanem hem duim bihaen datwan showimaot hem no repent. Hem no trae for stopem olketa Israelite for worshipim Baal, and hem no encouragem olketa for worshipim Jehovah. Ahab duim olketa nara samting tu wea showimaot hem no repent.

⁶ Wanfala taem Ahab askem King Jehoshaphat blo Judah for joinim hem for faetem olketa lo Syria. King Jehoshaphat hem wanfala gud king wea trustim Jehovah, so hem sei tufala shud askem profet blo Jehovah, Micaiah, wanem for duim firstaem. Bat Ahab no laek for duim datwan, and hem sei: “Mi les long hem bikos hemi no save talem eni gudfala samting long mi.” Nomata olsem tufala go story lo Micaiah and olsem Ahab tingim, Micaiah sei nogud samting bae kasem Ahab! Disfala nogud man Ahab shud repent and askem Jehovah for forgivim hem, bat hem talem security for putim Micaiah lo prison. (Fas Kings 22:7-9, 23, 27) Nomata olsem, nogud samting wea Micaiah talem hem kamap tru. Ahab hem dae lo datfala faet witim olketa blo Syria.​—Fas Kings 22:34-38.

7. Wanem nao Jehovah talem abaotem Ahab bihaen hem dae?

⁷ Bihaen faet hia, Jehovah showimaot hao hem ting lo Ahab. Jehovah sendem Jehu for tok strong lo Jehoshaphat bikos hem sapotim Ahab. Jehu sei: “Waswe, hemi stret fo yu go helpem ravis man, fo laekem datfala man hu hemi les long [Jehovah]?” (Mektu Kronikols 19:1, 2) So tingim diswan: Sapos Ahab hem repent, bae hard for Jehu sei hem wanfala rabis man wea les lo Jehovah. Nomata Ahab sorre lo wanem hem duim, hem nating showimaot hem repent.

8. Wanem nao iumi savve lanem from samting wea Ahab duim?

⁸ Wanem nao iumi savve lanem from Ahab? Taem Ahab herem Elijah sei Jehovah bae finisim famili laen blo hem, hem barava sorre, and datwan hem stret. Nomata olsem, olketa samting wea hem duim bihaen showimaot hem no repent. Man wea repent mas duim moa samting winim for sei sorre lo sin wea hem duim. Distaem bae iumi storyim wanem Manasseh duim wea showimaot hem repent.

9. Manasseh hem wanem kaen king?

⁹ Manasseh kamap king blo Judah samting olsem tu handred year bihaen Ahab.  Hem duim staka nogud samting winim Ahab! Bible sei: “Hemi duim plande samting wea hemi barava nogud tumas long ae blong [Jehovah].” (Mektu Kronikols 33:1-9) Manasseh wakem olketa altar for olketa laea god, and hem wakem idol for pipol worshipim and putim insaed lo temple blo Jehovah! Hem duim magic and devildevil samting tu. Hem “kilim dae plande pipol tumas, nomata olketa no duim eni rong samting.” And worse go moa, “hem bonem san blong hem seleva long faea fo mekem sakrifaes go long olketa god.”​—Mektu Kings 21:6, 7, 10, 11, 16.

10. Wanem nao Jehovah duim for stretem Manasseh, and wanem nao Manasseh duim?

¹⁰ Olsem Ahab, Manasseh no laek followim advaes blo olketa profet blo Jehovah. Gogo, Jehovah “mekem olketa komanda blong ami blong Asiria fo kam faetem [Judah]. Olketa kasholem Manase . . . Olketa taemapem hem long bras sen, an olketa tekem hem go long Babilon.” Taem Manasseh prisoner lo Babylon, luk olsem hem barava ting raonem nogud samting hem duim. Bible sei Manasseh “mekem tingting blong hem fo hambol long [Jehovah].” And hem duim olketa nara samting tu. Hem “[gohed] prea an askem God fo kaen lo hem.” So iumi lukim Manasseh disaed for changem wei blo hem, hem laek kam bak lo Jehovah, and hem gohed for prea.​—Mektu Kronikols 33:10-13.

11. Olsem Mektu Kronikols 33:15, 16 talem, wanem nao showimaot Manasseh hem repent?

¹¹ Gogo Jehovah ansarem olketa prea blo Manasseh. Jehovah savve Manasseh hem changem wei blo hem from wanem hem talem lo prea blo hem. So Jehovah forgivim Manasseh, and mekem Manasseh kamap king moa. Manasseh duim staka samting wea showimaot hem repent. Hem no olsem Ahab. Hem changem wei blo hem, hem distroem olketa altar, and hem encouragem pipol for worshipim Jehovah. (Readim Mektu Kronikols 33:15, 16.) Datwan showimaot Manasseh no fraet and garem faith bikos for staka year hem nogud example for famili blo hem, olketa bigman blo hem, and olketa pipol. Nomata hem olo, hem trae for stretem olketa nogud samting wea hem duim. And luk olsem hem encouragem granson blo hem Josiah for worshipim Jehovah, bikos gogo Josiah kamap wanfala gud king.​—Mektu Kings 22:1, 2.

12. Wanem nao iumi savve lanem from example blo Manasseh?

¹² Wanem nao iumi savve lanem from example blo Manasseh? Hem sorre lo wanem hem duim, bat hem duim olketa nara samting tu. Hem prea lo Jehovah  for showim mercy lo hem, and hem changem nogud wei blo hem. Hem stretem olketa problem wea hem kosim, hem worshipim Jehovah moa, and hem encouragem olketa narawan for duim sem samting tu. Example blo Manasseh showimaot hope hem stap for olketa wea duim bigfala sin, bikos Jehovah God hem ‘gud tumas an hem gohed fo fogivim olketa sin.’ (Sams 86:5) So iumi lanem olketa wea repent savve kasem forgiveness.

13. Storyim tokpiksa wea helpem iumi for minim wanem man mas duim for repent.

¹³ Manasseh sorre lo wanem hem duim, bat hem duim olketa nara samting tu. Datwan hem helpem iumi for luksavve lo wanem man mas duim for repent. Tingim disfala tokpiksa: Iu laek peim wanfala cake, bat man for salem cake givim iu wanfala egg nomoa. Waswe, bae iu hapi lo datwan? Nomoa! Hao sapos hem sei iu needim datfala egg for wakem cake? Hem tru, bat iu savve egg hem wanfala nomoa lo olketa samting wea iu needim for cake. Olsem tu, Jehovah laekem man wea sin for repent, bat for sei sorre hem olsem datfala egg bikos hem wanfala nomoa lo olketa samting wea man need for duim for repent. Hem need for duim olketa nara samting tu, olsem wanfala young man wea Jesus storyim.

14. Hao nao datfala young man showimaot hem sorre lo wanem hem duim?

¹⁴ Lo Luke 15:11-32, story blo Jesus abaotem datfala prodigal son teachim iumi staka samting. Jesus story abaotem wanfala young man wea bighed againstim dadi blo hem. Hem muv go lo “wanfala farawe kantri,” and lo there hem duim enikaen rabis samting. Bat taem hem kasem hard taem, hem barava ting raonem wanem hem duim. Hem luksavve hem duim karangge samting and hem shud go bak lo dadi blo hem. Olsem Jesus talem, datfala young man “kasem bak gudfala tingting” and hem disaed for go and askem dadi blo hem for forgivim hem. Hem important for datfala young man luksavve hem sin againstim dadi, bat hem need for duim olketa nara samting tu!

15. Wanem nao datfala young man duim wea showimaot hem repent?

¹⁵ Datfala young man duim olketa samting wea showimaot hem repent. Hem wakabaot for staka day for kasem hom. Then hem go lo dadi blo hem and sei: “Mi sin againstim God and iu. Mi no fit for iu kolem mi son bilong iu distaem.” (Luke 15:21) Wanem hem talem showimaot hem laek for fren bak witim Jehovah. Hem luksavve tu wanem hem duim  mekem dadi blo hem for sorre tumas. And hem laek waka hard for dadi olsem wanfala wakaman blo hem, for showimaot hem sorre lo wanem hem duim lo dadi! (Luke 15:19) Disfala story blo Jesus garem olketa principle for helpem olketa elder taem olketa trae for faendaot sapos brata or sista wea duim bigfala sin hem repent.

16. Why nao hem no isi for olketa elder luksavve sapos samwan hem barava repent?

¹⁶ Hem no isi for olketa elder luksavve sapos samwan wea duim bigfala sin hem barava repent. Why nao olsem? Olketa elder no savve wanem insaed lo heart blo hem, so olketa needim pruv wea showimaot sapos hem repent. From hem duim bigfala sin wea nogud tumas, datwan maet mekem hem hard for olketa elder sure sapos hem barava repent.

17. (a) Storyim example wea showimaot man wea repent need for duim moa samting winim wei for sei sorre. (b) Olsem 2 Corinth 7:11 storyim, wanem nao man wea repent bae duim?

¹⁷ Tingim disfala example: Wanfala brata wea marit duim adultery for staka year. Hem no go askem eniwan lo kongregeson for helpem hem, and hem haedem datfala sin from waef blo hem, olketa fren, and olketa elder. Gogo, olketa elder faendaot hem duim adultery. Taem olketa elder story witim hem, hem sei hem tru, and hem barava sorre lo wanem hem duim. Bat waswe, datwan showimaot hem repent? Luk olsem datfala brata need for duim samting tu wea showimaot hem repent bikos hem no durong wantaem nomoa, bat hem gohed duim datwan for staka year. And tu, hem no go talem olketa elder hem sin, bat olketa narawan nao go storyim lo olketa elder. So olketa elder need for lukim pruv disfala brata barava laek changem olketa nogud wei blo hem and duim samting wea showimaot datwan. (Readim 2 Corinth 7:11.) Maet hem tek longtaem for hem mekem olketa change hia. So maet olketa elder disfellowshipim hem firstaem.​—1 Cor. 5:11-13; 6:9, 10.

18. Wanem nao savve showimaot man wea disfellowship hem repent, and sapos olsem wanem bae happen bihaen?

¹⁸ Man wea disfellowship savve showimaot hem repent taem hem kam lo olketa meeting and followim kaonsel blo olketa elder for prea and studyim Bible evritaem. And tu, bae hem stap klia lo olketa samting wea savve testim hem for sin moa. Sapos hem waka hard for duim samting wea mekem Jehovah hapi, hem savve sure gogo Jehovah bae forgivim hem and olketa elder bae letem hem for  reinstate. Hem gud for olketa elder tingim each judicial case hem difren, and olketa mas duim best for balance lo hao olketa judgem man.

19. Hao nao man showimaot hem repent? (Esikiel 33:14-16)

¹⁹ Lo disfala study, iumi lanem nomata man hem sei hem sorre from hem duim sin, hem need for duim moa samting for showimaot hem repent. Hem mas barava laek changem olketa nogud wei blo hem, and duim samting wea showimaot datwan. Hem mas stop for duim datfala sin and followim olketa standard blo Jehovah. (Readim Esikiel 33:14-16.) Main samting nao, hem mas laek for fren bak witim Jehovah.

20-21. Hao nao iumi savve helpem fren wea duim bigfala sin?

²⁰ Jesus storyim wanfala reason hem kam lo earth hem for “talem pipol wea sin nao for repent.” (Luke 5:32) Iumi tu laek helpem olketa wea sin for repent. Sapos iumi faendaot wanfala fren blo iumi hem duim bigfala sin, wanem nao iumi shud duim?

²¹ Maet fren blo iumi no laekem iumi for talem olketa elder abaotem sin blo hem. Bat Jehovah lukim evri samting, so iumi hard for haedem datfala sin. (Provebs 5:21, 22; 28:13) Talem fren blo iumi olketa elder laek for helpem hem. Sapos hem sei hem no laek go story witim olketa elder, iumi nao shud talem olketa. Datwan showimaot iumi laek for helpem fren blo iumi, bikos sapos hem no kasem help gogo bae hem no fren witim Jehovah nao!

22. Wanem nao bae iumi storyim lo next study?

²² Hao sapos olketa elder disaed for disfellowshipim samwan from hem duim bigfala sin for longtaem finis? Waswe, diswan showimaot olketa elder no showim mercy lo hem? Lo next study bae iumi storyim hao Jehovah showimaot mercy taem hem disciplinem man wea duim sin and hao iumi savve followim example blo hem.