1. Why nao samfala taem hem hard for iumi obey?

 WASWE, samfala taem iu faendem hem hard for obey? Datwan happen lo King David, so hem prea lo God: “Plis mekem mi wiling fo obeim yu.” (Sams 51:12, SIPB) David lovem Jehovah. Nomata olsem, samfala taem hem faendem hard for obey, and datwan savve happen lo iumi tu. Why nao iumi faendem hard for obey? First samting, iumi inheritim wei for disobey. Second samting, Satan gohed trae for mekem iumi bighed againstim Jehovah, olsem hem tu. (2 Cor. 11:3) Third samting, iumi stap lo world wea pipol garem bighed attitude, wea hem nao “tingting bilong pipol” wea garem “paoa ovarem olketa wea no obey.” (Eph. 2:2) So iumi mas waka hard for faet againstim wei wea iumi no perfect, Devil, and disfala world, mekem iumi obeyim Jehovah and olketa wea hem givim authority lo olketa.

2. Wat nao hem minim for “willing for obey”? (James 3:17)

² Readim James 3:17. James sei pipol wea wise olketa “willing for obey.” Datwan minim iumi shud redi and willing for obeyim olketa wea Jehovah givim authority lo olketa for lukaftarem iumi. Bat, Jehovah no expectim iumi for obeyim samwan wea askem iumi for duim samting wea againstim law blo Hem.—Acts 4:18-20.

3. Why nao hem important for iumi obeyim olketa wea Jehovah givim authority lo olketa?

³ Maet iumi faendem hem isi for obeyim Jehovah winim olketa  man. Tingim, Jehovah evritaem givim perfect direction. (Ps. 19:7) Bat olketa man wea garem authority no perfect. Nomata olsem, Jehovah givim authority lo olketa parents, olketa gavman official, and olketa elder. (Prov. 6:20; 1 Thess. 5:12; 1 Pet. 2:13, 14) Taem iumi obeyim olketa, really iumi obeyim Jehovah. Lo disfala article, bae iumi storyim hao iumi savve obeyim olketa wea Jehovah givim authority lo olketa, nomata samfala taem maet iumi faendem hard for acceptim and followim direction wea olketa givim.

4. Why nao staka pikinini no laek obeyim parents blo olketa?

⁴ Olketa young wan savve stap between olketa nara young wan wea “no obeyim dadi and mami.” (2 Tim. 3:1, 2) Why nao staka no laek obey? Samfala parents duim opposite samting from wat olketa talem lo pikinini. And pikinini feel hao datwan hem unfair. Olketa narawan tingse advaes blo parents hem aot-of-date, no practical, and strict tumas. Olketa young wan, hao samfala taem iu feel olsem tu? Staka faendem hard for followim disfala komand blo Jehovah: “Mas obeyim dadi and mami bilong iufala bikos diswan hem fitim wanem Lord hem laekem and hem stret.” (Eph. 6:1) Wat nao savve helpem iu for obey?

5. Olsem Luke 2:46-52 storyim, why nao Jesus hem best example lo wei for obeyim parents?

⁵ Jesus showimaot best example lo wei for obey and iu savve lane from hem. (1 Pet. 2:21-24) Hem perfect bat parents blo hem no perfect. Bat Jesus honorim tufala nomata tufala mekem mistek and no minim hem samfala taem. (Ex. 20:12) Tingim wat happen taem Jesus 12 years old. (Readim Luke 2:46-52.) Parents blo hem lusim hem lo Jerusalem. Joseph and Mary shud mek sure evri pikinini stap witim grup wea olketa travel go bak lo hom afta datfala festival. Gogo taem Joseph and Mary faendem Jesus lo Jerusalem, Mary blamem Jesus for problem wea hem kosim! Jesus fit for blamem tufala for datwan. Instead, hem kaen and showimaot respect taem hem story lo tufala. Bat Joseph and Mary “nating minim samting wea hem talem.” Nomata olsem, Jesus “gohed for obeyim tufala.”

6-7. Wat nao savve helpem olketa young wan for obeyim parents blo olketa?

⁶ Olketa young wan, hao iu faendem hem hard for obeyim dadi and mami taem olketa mekem mistek or no minim iu? Wat nao savve helpem iu? First samting, ting abaotem hao Jehovah feel. Bible sei taem iu obeyim parents, “diswan hem mekem Lord for barava hapi.” (Col. 3:20) Jehovah savve taem wea parents blo iu no minim iu, or taem tufala mekem rul wea hem no fair. Bat taem iu obeyim parents, iu mekem Jehovah hapi.

⁷ Second samting, ting abaotem hao parents blo iu feel. Taem iu obeyim parents, iu mekem tufala hapi and iu gainim trust blo tufala. (Prov. 23:22-25) Iu bae fren klos witim tufala tu. Brata Alexandre from Belgium sei: “Taem mi gohed obeyim wat parents blo mi talem, datwan mekem mifala klos and hapi.” b Third samting, ting abaotem hao wei for obey distaem bae helpem iu lo future. Paulo wea stap lo Brazil sei: “Taem mi obeyim parents blo mi, datwan helpem mi for obeyim Jehovah and olketa wea hem givim authority lo olketa.” Bible storyim gudfala  reason for obeyim parents. Hem sei: “Mekem iufala garem gudfala laef and stap for longfala taem long earth.”—Eph. 6:2, 3.

8. Why nao staka young wan chus for obeyim parents blo olketa?

⁸ Staka young wan lukim hao olketa kasem gud samting taem olketa obey. Luiza, wea hem from Brazil tu, firstaem hem no minim why parents no letem hem for garem mobile phone for samfala taem bat staka wea sem age witim hem garem mobile. Then gogo hem luksavve wat parents blo hem duim protectim hem. Distaem hem luksavve taem hem obeyim parents blo hem, hem shud no feel olsem tufala barava strict bikos advaes blo tufala hem wat hem really needim. Elizabeth, wanfala young sista from United States, still faendem hard for obeyim parents blo hem samfala taem. Hem sei: “Taem mi no minim gud why parents blo mi putim wanfala rul, mi savve tingim bak olketa taem wea rul wea olketa putim hem protectim mi.” Monica, wea stap lo Armenia sei hem evritaem kasem gud samting taem hem obeyim parents blo hem winim for disobey.

9. Hao nao tingting blo samfala pipol abaotem wei for obeyim law blo gavman?

⁹ Bible sei “olketa wea rul [or garem authority]” stand for olketa gavman. (Rome 13:1) Staka pipol agree hao hem gud for iumi garem olketa gavman, and olketa savve obeyim samfala law wea gavman putim. Bat olketa pipol hia maet no obeyim law wea olketa tingse hem ova tumas or no fair. For example, disfala law for peim tax. Lo wanfala survey lo wanfala kantri lo Europe, olketa faendem hao staka pipol sei man “garem raet for no peim tax if hem tingse datwan hem no fair.” Dastawe lo datfala kantri, olketa citizen peim only samting olsem 65 percent lo tax wea gavman askem.

10. Nomata iumi no laekem samfala law blo gavman, why nao iumi need for obeyim?

¹⁰ Bible storyim dat olketa gavman blo man kosim wei for safa, Satan nao kontrolem olketa, and klosap nao bae olketa distroe. (Ps. 110:5, 6; Eccl. 8:9; Luke 4:5, 6) Bible sei tu “man wea againstim olketa wea rul hem againstim samting wea God duim” or arrangement blo God. Jehovah expectim iumi for obeyim olketa gavman bikos hem letem olketa for rul distaem mekem olketa samting followim order. So iumi “mas givim samting wea olketa . . . fit for kasem,” insaed diswan hem for peim tax, respectim, and obeyim olketa. (Rome 13:1-7) Maet samfala taem iumi tingse wanfala law hem no fitim, no fair, or hem savve kostim staka selen for obeyim. Iumi obeyim olketa gavman bikos Jehovah nao talem iumi for duim datwan. Bat iumi bae no obey if wat olketa askem hem bae brekem law blo God.—Acts 5:29.

11-12. Olsem Luke 2:1-6 storyim, wat nao Joseph and Mary duim for obeyim wanfala law nomata hem no isi, and wat nao result? (Lukim tu piksa.)

 ¹¹ Iumi savve lane from example blo Joseph and Mary, wea willing for obeyim olketa wea garem authority nomata lo taem wea hem no isi. (Readim Luke 2:1-6.) Taem Mary babule for samting olsem naen month finis, hem and Joseph feisim wanfala hard situation from wanfala law wea gavman mekem. Augustus wea hem ruler blo Roman Empire mekem law for duim wanfala census. So Joseph and Mary mas travel go lo Bethlehem. Tufala mas travel for 150 kilometer ap and daon lo olketa maunten for kasem lo there. Datfala trip bae hem no isi, especially for Mary. Maet tufala wari abaotem wat maet happen if hem bornem baby taem tufala followim road. Tufala maet wari abaotem safety blo baby bikos hem nao datfala Messiah wea Jehovah promisim. Hao, datwan hem gud excuse for tufala no obeyim datfala law wea gavman mekem?

¹² Nomata Joseph and Mary garem gud reason for wari, datwan no stopem tufala for no obeyim datfala law. Jehovah blessim tufala bikos tufala obey. Mary arrive sef lo Bethlehem, hem bornem wanfala healthy baby, and wat hem duim help for fulfillim Bible profesi!—Mic. 5:2.

13. Taem iumi obey, hao nao maet datwan savve helpem olketa nara brata and sista?

¹³ Taem iumi obeyim olketa wea garem authority, iumiseleva kasem gud samting and olketa narawan tu. Hao nao olsem? Iumi savve avoidim panisment wea pipol wea disobeyim law olketa kasem. (Rome 13:4) Taem each wan lo iumi obeyim gavman, olketa bae luksavve Olketa Jehovah’s Witness olketa gud citizen. For example, staka year bifor lo Nigeria, olketa soldia go insaed wanfala Kingdom Hall during wanfala meeting, and lukaotem pipol wea joinim protest againstim wei for peim tax. Bat officer wea in charge lo olketa soldia talem olketa for lusim Kingdom Hall. Hem sei: “Olketa Jehovah’s Witness  evritaem peim tax.” So taem iu gohed obeyim law, iu help for keepim gudfala nem wea pipol blo Jehovah garem, wea maet wanday datwan bae protectim olketa nara brata and sista.—Matt. 5:16.

14. Wat nao helpem wanfala sista for “willing for obeyim” olketa wea garem authority?

¹⁴ Nomata olsem, maet hem no evritaem isi for obeyim olketa wea garem authority. Sista Joanna from United States sei: “Hem barava hard for mi obey from samfala lo famili blo mi safa bikos lo injustice wea olketa kasem from olketa authority.” Bat Joanna disaed strong for duim samting for changem tingting blo hem abaotem olketa. First samting, Joanna stop for readim olketa social media post wea savve mekem hem garem negative tingting abaotem olketa authority. (Prov. 20:3) Then, Joanna prea lo Jehovah for helpem hem for trustim Hem winim gavman blo man. (Ps. 9:9, 10) And tu, Joanna readim olketa article lo olketa pablikeson blo iumi abaotem wei for neutral. (John 17:16) Distaem Joanna sei from hem respectim and obeyim olketa wea garem authority, datwan helpem hem for hapi and garem peace.

15. Why nao maet hem no isi for obeyim direction wea kam from organization blo Jehovah?

¹⁵ Jehovah laekem iumi for mas obeyim “olketa wea lead” lo kongregeson. (Heb. 13:17) Nomata Leader blo iumi Jesus hem perfect, olketa wea hem iusim for leadim iumi no perfect. Maet hem no isi for obeyim olketa, especially if olketa askem iumi for duim samting wea iumi no laekem. Wantaem aposol Peter kasem instruction wea firstaem hem no laek obeyim. Taem Peter kasem instruction from angel for kaikaim olketa animal wea Law blo Moses sei hem no klin, Peter les for kaikaim, no wanfala taem nomoa bat thrifala taem! (Acts 10:9-16) Why nao olsem? Bikos datfala niu direction no mek sense lo Peter, and hem barava difren from wat hem bin duim lo full laef blo hem. If Peter faendem hard for obeyim direction from wanfala perfect angel, then iumi no sapraes if samfala taem maet iumi faendem hard for obeyim direction from olketa man wea no perfect!

16. Wat nao aposol Paul duim nomata hem kasem direction wea maet hem tingse hem no mek sense? (Acts 21:23, 24, 26)

¹⁶ Aposol Paul “willing for obey” nomata taem hem kasem direction wea hem tingse hem no mek sense. For example, olketa Jew Christian herem story abaotem Paul wea no garem pruv. Olketa herem hao hem preachim samting wea “no followim Law bilong Moses” and hem no respectim datfala Law. (Acts 21:21) So olketa elder lo Jerusalem talem Paul for tekem fofala man go lo temple, and duim samting followim law for kamap klin for showim hem followim Law. Bat hem savve olketa Christian no stap anda lo Law, and hem no duim eniting rong. Nomata olsem, hem kwiktaem for obey. Bible sei: “Long next day, Paul hem go witim olketa man hia and olketa duim samting followim law for kamap klin.” (Readim Acts 21:23, 24, 26.) From Paul obey, datwan help for keepim wan mind.—Rome 14:19, 21.

17. Wat nao iu lanem from experience blo Stephanie?

¹⁷ Sista Stephanie faendem hard for acceptim wanfala disison wea kam from branch office. Hem and hasband hapi tumas for serve lo wanfala foreign languis grup. Then branch office disaed for datfala grup hem dissolve, and tufala kasem assignment for serve moa lo wanfala kongregeson wea iusim languis blo  tufala. Stephanie sei: “Mi barava no hapi. Mi no agree hao kongregeson wea iusim languis blo mifala hem garem big need.” Nomata olsem, hem disaed for sapotim datfala niu direction. Stephanie sei: “Gogo mi luksavve wise disison nao branch office mekem. Mitufala kamap spiritual parents blo samfala lo kongregeson wea no garem famili insaed truth. Mi study witim wanfala sista wea hem active bak lo truth. And distaem mi garem staka taem for duim personal study.” Hem sei tu: “Mi garem klin konsens bikos mi savve mi duim best blo mi for obey.”

18. Wanem gud samting nao iumi savve kasem taem iumi obey?

¹⁸ Iumi savve lane for obey. “Olketa samting wea [Jesus] safa long hem teachim hem for obey,” no from hem stap gud. (Heb. 5:8) Olsem Jesus, staka taem iumi savve lane for obey taem iumi kasem olketa challenging situation. For example, taem COVID-19 pandemic start, iumi kasem direction for stop for attendim meeting lo Kingdom Hall and for no preach from haos tu haos. Hao, iu faendem hem hard for obey lo datfala taem? Nomata olsem, from iu obey datwan protectim iu, helpem iu for wan mind witim olketa brata and sista, and iu mekem Jehovah hapi. From iumi lanem for obey, datwan helpem iumi evriwan distaem for barava redi for obeyim eni instruction lo taem blo big trabol. For obeyim olketa instruction lo datfala taem bae sevem laef blo iumi!—Job 36:11.

19. Why nao iu laek for obey?

¹⁹ Iumi lanem hao wei for obey hem mekem iumi kasem staka blessing. Bat main samting wea mekem iumi for obeyim Jehovah hem bikos iumi lovem hem and laek for mekem hem hapi. (1 John 5:3) Iumi no savve changem bak evri gud samting wea Jehovah duim for iumi. (Ps. 116:12) Bat iumi savve obeyim Jehovah and olketa wea garem authority. If iumi obey, iumi showim iumi wise. And taem iumi wise, iumi mekem Jehovah hapi.—Prov. 27:11.