Olketa verse wea stap raonem datfala scripture helpem iumi for luksavve Paul hem storyim message bilong God abaotem plan bilong hem wea stap insaed long Bible.

Long olketa pablikeson bilong iumi staka taem iumi storyim Hebrew 4:12 for showimaot Bible hem garem paoa for changem laef bilong man, and datwan hem no rong. Bat hem gud for iumi savve long wanem nao Paul story abaotem taem hem raetem toktok long Hebrew 4:12. Long disfala scripture hem encouragem olketa Hebrew Christian for duim olketa samting wea sapotim olketa plan bilong God. Olketa Holy Raeting nao storyim olketa plan hia. Paul storyim example bilong olketa Israelite wea God mekem olketa kamap free from Egypt. Olketa garem hope for go insaed long Promis Land wea “garem staka milk and honey,” and wea olketa bae stap long peace.—Ex. 3:8; Deut. 12:9, 10.

Datwan nao hem plan bilong God for olketa Israelite. Bat olketa no obeyim Jehovah and no garem faith, so staka long olketa dae bifor olketa kasem Promis Land. (Num. 14:30; Josh. 14:6-10) Nomata olsem, Paul sei datfala “promis bilong God for pipol bilong hem rest long day bilong hem for rest hem stap yet.” (Heb. 3:16-19; 4:1) Datfala “promis” wea Paul storyim long hia hem part long plan bilong God. Olsem olketa Hebrew Christian, iumi tu savve read abaotem datfala plan bilong God and duim samting for sapotim datwan. Taem Paul raetem diswan hem talem samfala toktok long Genesis 2:2 and Psalm 95:11, wea diswan showimaot disfala promis hem kam from olketa Holy Raeting.

Iumi hapi tumas “promis bilong God for pipol bilong hem rest long day bilong hem for rest hem stap yet.” Iumi bilivim wanem Bible talem long hia, and iumi duim samting for rest long day bilong God for rest. Diswan no minim iumi followim Law bilong Moses or duim nomoa olketa gudfala samting mekem Jehovah hapi long iumi. Bat iumi duim samting for sapotim plan bilong God bikos iumi garem faith long hem. Staka thousand pipol evriwea long world studyim Bible and lane abaotem plan bilong God. Diswan mekem staka long olketa for changem laef bilong olketa, showimaot olketa garem faith long God, and olketa baptaes. Datwan pruvim “toktok bilong God hem laef and hem garem paoa.” Samting wea God talem long Bible abaotem plan bilong hem affectim full laef bilong iumi, and bae hem gohed for duim olsem.