1, 2. (a) Wanem nao savve happen taem man no kontrolem hemseleva? (b) Why nao hem important for iumi story abaotem wei for kontrolem seleva?

WEI for kontrolem seleva hem wanfala fasin wea Jehovah God laekem iumi for garem. (Gal. 5:22, 23) Jehovah hem perfect so hem savve tumas for kontrolem hemseleva, bat iumi no savve duim olsem bikos iumi no perfect. Staka problem kamap distaem bikos pipol no savve kontrolem olketa seleva. Taem man no kontrolem hemseleva, hem no savve kwiktaem duim olketa important samting, no savve skul gud, or duim gud waka bilong hem. Hem savve mekem man for talem olketa nogud toktok, drunk, raf, divorce, garem kaon, addict long samfala samting, stap long prison, sorre, kasem sik wea kamaot from wei for duim sex, and for babule nating.—Ps. 34:11-14.

² Pipol wea no savve kontrolem seleva savve kosim problem for olketa seleva and olketa narawan. Long bifor, pipol savve trae for kontrolem olketa seleva, bat distaem wei for no kontrolem seleva hem kamap big tumas. Iumi no sapraes taem iumi lukim diswan bikos Bible talem finis wei wea pipol no kontrolem olketa seleva hem wanfala saen wea showimaot iumi stap long “olketa last day.”—2 Tim. 3:1-3.

3. Why nao iumi mas kontrolem iumiseleva?

³ Why nao iumi mas kontrolem iumiseleva? Tingim tufala important reason hia. First wan, pipol wea savve hao for kontrolem  tingting and feeling bilong olketa no garem staka big problem. Olketa stap gud witim olketa narawan, no kros kwiktaem, no wari tumas, or sorre. Mek-tu reason, iumi bae gohed fren gud witim God sapos iumi kontrolem feeling for duim nogud samting and stand strong taem iumi kasem test. Hem nao samting wea Adam and Eve no duim. (Gen. 3:6) And olsem Adam and Eve, staka pipol distaem kasem staka nogud samting bikos olketa no kontrolem seleva.

4. Wanem nao savve helpem man wea stragol for kontrolem hemseleva?

⁴ Jehovah savve iumi no perfect, and hard for iumi barava kontrolem iumiseleva. Bat hem laek helpem iumi for kontrolem feeling wea iumi garem for laek duim nogud samting. (1 Ki. 8:46-50) Jehovah hem wanfala fren wea lovem iumi and hem laek for helpem eniwan wea stragol for kontrolem tingting and feeling bilong hem. Long disfala study, iumi bae lane from nambawan example bilong Jehovah for kontrolem seleva. And tu, olketa gud and nogud example wea Bible storyim, and wanem iumi savve duim for helpem iumi for kontrolem iumiseleva.

5, 6. Wanem nambawan example nao Jehovah showimaot long wei for kontrolem seleva?

⁵ Jehovah hem savve tumas hao for kontrolem hemseleva bikos hem perfect. (Deut. 32:4) Bat iumi no perfect. Dastawe iumi need for lukluk gud long example bilong hem mekem iumi tu savve kamap gud long wei for kontrolem iumiseleva. Datwan bae helpem iumi for duim stret samting taem iumi feel nogud long eni samting. So wanem nao samfala example wea showimaot Jehovah hem kontrolem hemseleva?

⁶ Tingim samting wea Jehovah duim taem Satan bighed and againstim hem long Eden. Luk olsem samting wea Satan talem hem mekem olketa faithful angel long heven feel nogud tumas and kros long hem. Maet iu tu feel olsem taem iu tingim evri wei for safa wea kamaot from samting wea Satan duim. Bat Jehovah no kwiktaem finisim hem. Samting wea Jehovah duim hem barava fitim. Jehovah no kros kwiktaem and hem deal witim Satan long wei wea followim justice bilong Hem. (Ex. 34:6; Job 2:2-6) Why nao hem duim datwan? Jehovah givim taem bikos hem no laekem eniwan for dae bat “hem laekem evriwan for garem chance for repent.”—2 Pet. 3:9.

7. Wanem nao iumi savve lanem from example bilong Jehovah?

⁷ Example bilong Jehovah helpem iumi for luksavve iumi need for tingting gud firstaem bifor iumi talem samting and for no kwiktaem duim samting. So taem iu need for mekem eni important disison, no kwiktaem for disaed bat ting raonem gud firstaem. Prea long Jehovah for givim iu wisdom mekem iu savve talem and duim samting wea stret. (Ps. 141:3) Taem iumi kros or feel nogud, hem isi tumas for no kontrolem iumiseleva. Dastawe staka sorre bihaen bikos olketa no tingting gud bifor olketa talem or duim samting!—Prov. 14:29; 15:28; 19:2.

8. (a) Wea nao iumi savve faendem example bilong olketa wea kontrolem olketa seleva? (b) Wanem nao helpem Joseph for no foldaon long test wea hem kasem? (Lukim piksa long start bilong study.)

⁸ Bible storyim staka example wea showimaot hem important for garem wei for kontrolem seleva. Wanfala example hem Joseph, son bilong Jacob. Hem kasem test taem hem waka long haos bilong Potiphar, wea hem bigman bilong olketa security bilong Pharaoh. Waef bilong Potiphar lukim Joseph hem “strong and luk naes,” so staka taem hem trae for switim hem. Bat Joseph rejectim datwan. Wanem nao helpem  Joseph for no foldaon long datfala test? Luk olsem hem bin ting raonem finis nogud samting wea bae happen sapos hem letem datfala woman for switim hem. So taem datfala woman pullim kaleko bilong hem, hem ranawe from hem nao. Hem sei: “Hem hard tumas for mi duim disfala barava nogud samting and sin againstim God!”—Gen. 39:6, 9; readim Proverbs 1:10.

9. Wanem nao iu savve duim for redyim iuseleva for winim olketa test?

⁹ Wanem nao iumi lanem from example bilong Joseph? Sapos iumi kasem test for brekem law bilong God, iumi need for rejectim datwan. Bifor man kamap wanfala Jehovah’s Witness, maet hem no isi for kontrolem wei for kaikai, drink tumas, smoke, iusim drug, durong, or olketa nara samting olsem. Nomata bihaen hem baptaes finis, samfala taem maet hem garem feeling for laek duim moa olketa samting hia. Sapos iu feel olsem, hem gud for ting raonem firstaem hao datwan bae affectim wei wea iu fren witim Jehovah. Trae for luksavve long olketa samting wea bae testim iu and disaedem wanem iu savve duim for no foldaon long datwan. (Ps. 26:4, 5; Prov. 22:3) Sapos enitaem iu feisim eni test olsem, askem Jehovah for givim iu wisdom and for helpem iu kontrolem iuseleva.

10, 11. (a) Wanem nao staka young wan feisim long skul? (b) Wanem nao savve helpem olketa young wan for rejectim olketa samting wea Jehovah no laekem?

¹⁰ Samting wea kasem Joseph, hem happen tu long staka young wan distaem. Tingim samting wea kasem Kim. Staka taem olketa classmate bilong hem olketa tok abaotem wei wea olketa duim sex long weekend. Bat Kim no duim eni samting olsem, so hem no join insaed story bilong olketa. Hem sei samfala taem hem feel olsem ‘pipol les long hem and hem stap seleva’ and olketa nara young wan sei hem krangge bikos hem no garem eni boyfren. Bat Kim hem garem gudfala tingting. Hem savve feeling for laek duim sex savve strong tumas taem man hem young. (2 Tim. 2:22) Olketa skulfren savve askem hem, why hem no sleep witim eni man. Datwan givim hem chance for explainim why hem disaed for no duim sex. Iumi tinghae long olketa young wan bilong iumi wea disaed strong for rejectim wei wea olketa narawan switim olketa for durong, and Jehovah tu barava tinghae long olketa!

¹¹ Bible storyim example bilong olketa wea no rejectim wei for durong. And tu, Bible helpem iumi for luksavve long olketa nogud samting wea savve kamaot taem iumi no kontrolem iumiseleva. Sapos iu feisim semkaen samting wea kasem Kim, ting raonem story bilong krangge young man wea Proverbs chapter 7 storyim. Tingim tu example bilong Amnon and nogud samting wea kamaot from wanem hem duim. (2 Sam. 13:1, 2, 10-15, 28-32) Olketa dadi and mami savve helpem pikinini for garem gudfala tingting and wei for kontrolem seleva taem olketa storyim tugeta olketa example hia long famili worship.

12. (a) Hao nao Joseph kontrolem feeling bilong hem taem hem story long olketa brata bilong hem? (b) Long olketa wanem taem nao iumi mas kontrolem feeling bilong iumi?

¹² Joseph showimaot nara gudfala example long wei for kontrolem seleva. Diswan kamap taem olketa brata bilong hem kam long Egypt for baem kaikai. For savve long really tingting bilong olketa brata bilong hem, hem no kwiktaem talem hao hem nao Joseph. Gogo taem Joseph no savve holem bak feeling bilong hem, hem go from olketa, and krae long ples wea no eniwan savve lukim hem. (Gen. 43:30, 31) Sapos wanfala brata or sista duim samting wea mekem iu feel nogud, followim example bilong Joseph for kontrolem iuseleva for no talem or duim eni samting wea iu maet sorre long hem bihaen.  (Prov. 16:32; 17:27) Maet iu garem olketa relative wea disfellowship. Sapos olsem, iu need for kontrolem feeling for laek story witim olketa. Datwan hem no isi samting for duim. Bat hem bae isi for iumi kontrolem iumiseleva sapos iumi tingim hao samting wea iumi duim hem followim example bilong Jehovah and iumi obeyim olketa law bilong hem.

13. Wanem nao iumi savve lanem from example bilong King David?

¹³ Example bilong King David savve helpem iumi tu. Nomata David fit for kros long samting wea Saul and Shemei duim, hem kontrolem hemseleva and no duim eni samting long tufala. (1 Sam. 26:9-11; 2 Sam. 16:5-10) Bat samfala taem David no savve kontrolem hemseleva. Olsem taem wea hem durong witim Bath-sheba and taem wea hem kros from Nabal hem greedy. (1 Sam. 25:10-13; 2 Sam. 11:2-4) Iumi savve lanem samfala important samting from example bilong David. First samting, hem barava important for olketa overseer kontrolem olketa seleva mekem olketa no iusim paoa wea olketa garem long rongfala wei. Mek-tu samting, no eniwan shud tingse hem strong and hard for hem foldaon long eni test.—1 Cor. 10:12.

14. Storyim samting wea happen long wanfala brata, and why nao hem important for kontrolem iumiseleva taem samting olsem happen?

¹⁴ Wanem nao iu savve duim mekem iu gohed kontrolem iuseleva? Tingim samting wea happen long Luigi. Wanfala car bangam bihaen car bilong hem. Nomata draeva bilong datfala car hem rong, hem shoutim Luigi and laek for faet. Luigi prea long Jehovah for helpem hem for no kros and hem trae for story long datfala draeva. Bat datfala man hem gohed for shoutim hem. So Luigi raetem namba plate bilong datfala car for saed long insurance, then hem go from datfala man nao nomata hem gohed shout. Wanfala week bihaen Luigi hem duim return visit long wanfala woman and hem faendaot hasband bilong hem nao bangam car bilong hem! Datfala man hem feel shame and hem sei sorre for samting wea hem duim. So hem sei bae hem contactim insurance company wea Luigi joinim mekem olketa helpem hem for kwiktaem fixim car bilong hem. Datfala man willing for joinim olketa taem olketa storyim Bible and hem barava enjoyim samting wea hem lanem. Datwan mekem Luigi for luksavve gud samting hem kamaot from wei wea hem no kros taem datfala accident hem happen and sapos hem no kontrolem hemseleva, datwan bae barava affectim ministry bilong hem.—Readim 2 Corinth 6:3, 4.

15, 16. Hao nao wei for readim and studyim Bible savve helpem iu and olketa long famili for kontrolem seleva?

¹⁵ Wei for readim and ting raonem Bible evritaem savve helpem olketa Christian for garem wei for kontrolem seleva. Tingim samting wea God talem long Joshua: “Iu mas evritaem storyim disfala buk bilong Law, and iu mas readim and ting raonem evri day and evri naet, mekem iu savve followim gud evri samting wea hem talem. Sapos iu duim datwan, bae iu garem gudfala laef and bae iu duim samting wea wise.” (Josh. 1:8) Bat hao nao wei for readim and ting raonem Bible savve helpem iu for garem wei for kontrolem seleva?

¹⁶ Olsem iumi lanem finis, Bible garem staka example wea showimaot gud samting wea kamaot from wei for kontrolem seleva, and nogud samting wea kamaot sapos iumi no duim datwan. Jehovah putim olketa example hia insaed Bible for helpem iumi. (Rome 15:4) Sapos iumi readim and ting raonem olketa story hia, bae hem barava helpem iumi. Trae for luksavve hao iu and famili bilong iu savve followim olketa example hia. Askem  Jehovah for helpem iu for followim olketa advaes bilong hem. Sapos iu luksavve iu need for waka hard for garem wei for kontrolem iuseleva long samfala samting, ting raonem hao for iu kamap gud long datwan. Prea abaotem and waka hard for kontrolem iuseleva. (Jas. 1:5) Duim research long olketa pablikeson for samfala gud advaes wea savve helpem iu.

17. Hao nao olketa dadi and mami savve helpem pikinini for kontrolem hemseleva?

¹⁷ Hao nao iu savve helpem olketa pikinini bilong iu for garem wei for kontrolem seleva? Olketa dadi and mami savve pikinini no born kam witim wei for kontrolem seleva. So olketa need for teachim olketa pikinini for garem olketa gudfala wei taem olketa showimaot gudfala example. (Eph. 6:4) Sapos iu luksavve pikinini bilong iu no kontrolem hemseleva, tingim diswan, waswe, iuseleva showimaot gudfala example for hem? Iu showimaot gudfala example taem iu go preaching evritaem, attendim meeting, and duim famili worship. And sapos pikinini laekem samting wea hem no fit for kasem, dadi and mami shud no fraet for sei no long hem. Jehovah markem olketa spialaen for Adam and Eve. Olketa spialaen hia helpem tufala for respectim Jehovah. Olsem tu, taem dadi and mami trainim gud pikinini bilong olketa and showimaot gudfala example, datwan savve teachim pikinini for kontrolem hemseleva. Samfala important samting wea dadi and mami need for teachim long pikinini nao hem for lovem God and respectim olketa standard bilong hem.—Readim Proverbs 1:5, 7, 8.

18. Why nao iumi shud chusim gud olketa fren bilong iumi?

¹⁸ Nomata iu no wanfala dadi or mami, iu shud chusim gud olketa fren bilong iu. Sapos olketa fren bilong iu lovem Jehovah, olketa bae helpem iu for markem olketa gudfala goal and helpem iu for no duim samting wea bae spoelem iu. (Prov. 13:20) Gudfala example bilong olketa bae helpem iu for kontrolem iuseleva. And gudfala wei bilong iu bae encouragem olketa fren bilong iu tu. Taem iumi kontrolem iumiseleva, God bae hapi long iumi, bae iumi enjoyim laef, and bae iumi duim olketa gudfala samting for olketa wea iumi lovem.