LONG samting olsem 1935, dadi and mami bilong mi, James and Jessie Sinclair, muv go long Bronx, wanfala area long New York City. Wanfala niu fren bilong tufala hem Willie Sneddon, and thrifala evriwan kam from Scotland. Tu-thri minute bihaen olketa meetim each other, olketa start for story abaotem famili bilong olketa. Datwan happen tu-thri year bifor mi born.

Mami bilong mi storyim long Willie hao bifor World War I, dadi and big brata bilong hem draon long North Sea taem fishing boat bilong tufala bangam wanfala bomb wea float insaed sea. Willie sei, “Dadi bilong iu hem go long hell!” Mami seke tumas for herem datwan, bat datfala toktok nao first samting wea helpem hem for lanem truth bikos Willie hem wanfala Jehovah’s Witness.

Toktok wea Willie talem barava mekem mami bilong mi feel nogud bikos hem savve dadi bilong hem gudfala man. Bat Willie sei, “Waswe sapos mi talem iu Jesus tu go long hell?” Datwan mekem mami bilong mi for tingim bak prea wea hem lanem long church wea storyim hao Jesus tu go long hell and laef bak bihaen thrifala day. So hem start for ting raonem ‘Sapos hell hem ples wea nogud pipol bone long fire, why nao Jesus tu go long there?’ Datwan nao mekem mami bilong mi start for interest long truth. Hem start for attendim olketa meeting long Bronx Kongregeson and hem baptaes long 1940.

Long datfala taem, olketa dadi and mami no kasem staka encouragement for studyim Bible witim pikinini bilong olketa. Taem mi smol pikinini, dadi savve lukaftarem mi taem mami go long olketa meeting and preaching waka long olketa weekend. Samfala year bihaen, mitufala dadi start for attendim meeting witim mami. Mami barava strong for duim preaching waka and conductim staka Bible study witim pipol wea interest. Wantaem hem invaetem evri Bible study bilong hem wea stap klosap for study tugeta olsem wanfala grup. Taem skul holiday, mi savve go witim hem long preaching waka. Datwan helpem mi for lanem staka samting long Bible and hao for teachim olketa narawan abaotem Bible.

Taem mi smol, mi no barava ting serious abaotem truth. Bat taem mi samting olsem 12 year, mi kamap anbaptaes pablisa, and  start long datfala taem mi evritaem duim preaching waka. Taem mi 16 year, mi dedicate and baptaes long July 24, 1954, long wanfala convention long Toronto, long Canada.

Samfala brata long kongregeson bilong mifala bin stap long Bethel bifor and samfala olketa gohed for waka long Bethel. Example bilong olketa barava affectim mi. Mi barava interest long wei wea olketa storyim and explainim truth insaed long Bible. Olketa teacher bilong mi encouragem mi for go long university, bat goal bilong mi hem for waka long Bethel. So long datfala convention long Toronto, mi givim application bilong mi for Bethel. Then long 1955, mi givim moa nara application taem mi attendim convention wea kamap long Yankee Stadium, New York City. No longtaem bihaen, taem mi 17 year, mi kasem invitation for waka long Brooklyn Bethel long September 19, 1955. Long mek-tu day bilong mi long Bethel, mi start for waka long Bindery wea stap long 117 Adams Street. No longtaem bihaen, mi waka long wanfala machine wea savve putim tugeta 32 page long olketa sekson bilong olketa buk, then hem redi for nara machine somapem.

Bihaen samting olsem wanfala month wea mi waka long Bindery, olketa sendem mi for waka long Magazine Department, bikos mi savve hao for type. Long datfala taem, sapos man laek for kasem Wastaoa and Awake! magasin, olketa brata and sista savve typem address bilong olketa long olketa smol pis metal wea olketa bae iusim for printim nem bilong olketa wea laekem magasin. Samfala month bihaen, mi waka long Shipping Department. Department overseer bilong mi, Klaus Jensen, askem mi sapos mi willing for go witim draeva wea savve tekem literature go long wharf for sendem go long olketa difren kantri. And tu, mitufala savve tekem  olketa bag magasin for go long post office for sendem go long olketa kongregeson wea stap evriwea long United States. Brata Jensen sei olketa waka olsem bae mekem body bilong mi for kamap strong. Hevi bilong mi hem samting olsem 57 kilogram nomoa and mi thin tumas. So taem mitufala karem olketa literature long wharf and long post office, datwan barava strongim body bilong mi. Tru nao, wanem Brata Jensen talem hem barava helpem mi!

Magazine Department tu savve sendem olketa magasin wea olketa kongregeson orderim. Mi start for luksavve long staka languis wea olketa printim long Brooklyn and sendem long difren part long world. No enitaem mi savve abaotem staka languis olsem, bat mi hapi for lukim staka thousand magasin hem go long olketa farawe ples. Long datfala taem mi no savve bae mi garem privilege long future for kasem olketa ples hia.

Long 1961, mi kasem assignment for waka long Treasury Office, and Grant Suiter nao overseer long datfala department. Bihaen samfala year, Nathan Knorr, wea hem nao leadim disfala waka wea gohed raonem world, hem talem mi for go lukim hem long office bilong hem. Hem storyim wanfala brata long office bilong hem bae attendim Kingdom Ministry Skul for wanfala month, and bihaen bae hem waka long Service Department. So olketa assignim mi for changem datfala brata and brata wea mi bae waka witim hem Don Adams. Don nao datfala brata wea mi givim Bethel application long hem long datfala convention long 1955. Tufala nara brata, Robert Wallen and Charles Molohan tu waka witim mitufala long sem department. Mifala waka tugeta for winim 50 year. Mi hapi for waka tugeta witim olketa faithful spiritual brata hia!—Ps. 133:1.

Start long 1970, mi kasem assignment for  duim zone visit wea samting olsem tu or thrifala week insaed wanfala year bae mi go for visitim olketa branch office bilong Watch Tower Society. Disfala waka hem for visitim olketa Bethel famili and olketa missionary evriwea long world for encouragem olketa, and for chekim olketa record long branch office. Mi hapi for meetim samfala wea graduate from olketa first class bilong Gilead Skul and wea gohed faithful long assignment bilong olketa long nara kantri! Hem wanfala privilege and mi hapi tumas for visitim winim 90-fala kantri.

Evriwan long Bethel famili long Brooklyn kasem assignment for joinim olketa kongregeson wea stap long New York City. Olketa assignim mi for joinim wanfala kongregeson long Bronx. Gogo, datfala kongregeson kamap big, so olketa divaedem. Datfala first kongregeson olketa kolem long Upper Bronx Kongregeson, wea hem nao mi joinim.

Long samting olsem 1965, wanfala Witness famili from Latvia wea kasem truth taem olketa stap long south Bronx, olketa muv kam long kongregeson bilong mifala. Livija, firstborn gele bilong olketa hem regular pioneer bihaen hem finisim hae skul. Bihaen samfala month, hem muv go long Massachusetts, ples wea needim samfala pablisa moa. Mi start for raet long hem abaotem olketa nius long kongregeson bilong mifala and hem savve storyim kam tu olketa gud samting wea happen long ministry long Boston.

Samfala year bihaen, olketa appointim Livija for kamap spesol pioneer. From hem laek for duim moa samting long waka bilong Jehovah, hem apply for waka long Bethel, and olketa invaetem hem for kam waka long Bethel long 1971. Taem mi herem datwan, mi tingse hem wanfala saen from Jehovah! Long October 27, 1973, mitufala marit and hapi from Brata Knorr nao givim wedding tok bilong mitufala. Proverbs 18:22 sei: “Man wea faendem gudfala waef hem faendem gudfala samting, and Jehovah hem hapi long hem.” Hem bigfala blessing for mi and Livija for waka tugeta long Bethel for winim 40-fala year. And mitufala gohed for sapotim nara kongregeson long datfala sem area long Bronx.

Mi barava enjoyim wei for waka witim Brata Knorr. Hem barava waka hard for sapotim truth and tinghae tumas long olketa missionary evriwea long world. Staka long olketa missionary hia stap long olketa kantri wea no eni Witness long hem. Long 1976, mi sorre tumas for lukim Brata Knorr safa from hem kasem cancer. Wantaem, taem hem no savve getap from bed, hem askem mi for readim samfala information wea olketa redi for printim. Hem talem mi for kolem kam Frederick Franz mekem hem tu savve herehere long datfala reading. Bihaen, mi just savve hao eye bilong Brata Franz hem start for nogud so Brata Knorr bin spendem staka taem for readim kaen information olsem long hem.

Brata Knorr dae long 1977, bat olketa wea lovem and savve gud long hem kasem comfort bikos olketa savve hem faithful for  finisim waka wea hem duim long earth. (Rev. 2:10) Bihaen, Brata Franz nao leadim disfala waka wea gohed raonem world.

Long datfala taem, mi duim waka olsem secretary for Milton Henschel wea waka witim Brata Knorr for staka year. Brata Henschel talem mi hao main waka bilong mi long Bethel hem for helpem Brata Franz long evri samting wea hem needim. Evritaem mi savve readim long hem olketa information wea olketa redi for printim. Brata Franz hem garem gudfala memory and hem savve tumas for lisin gud long olketa information wea mi readim. Mi barava hapi for helpem hem long datwan go kasem taem hem finisim waka wea hem duim long earth long December 1992!

Mi feel olsem 61 year wea mi waka long Bethel hem go pas kwiktaem tumas. Dadi and mami bilong mi faithful long Jehovah gogo tufala dae, and mi luk forward for welkamim tufala long niu world. (John 5:28, 29) No eni samting hem winim nambawan privilege wea mi garem for waka tugeta witim olketa faithful man and woman for sapotim pipol bilong God evriwea long world. Mitufala Livija barava bilivim hao taem mitufala gohed for duim full-taem service, ‘Jehovah nao mekem mitufala hapi and hem sef ples bilong mitufala.’—Neh. 8:10.

Waka bilong Jehovah no depend long eni man, and disfala waka for talemaot Kingdom bae hem gohed for kasem staka difren ples. Long olketa year hia, mi barava hapi and tinghae for waka witim olketa brata and sista wea strong and faithful for worshipim Jehovah. Staka long olketa anointed wan wea mi waka witim olketa, olketa no stap nao long earth. Bat mi tinghae long wei wea mi fren witim olketa faithful spiritual man olsem taem mifala duim waka bilong Jehovah.