‘No Fraet and Gohed Duim Waka’
“No fraet, gohed strong, and duim waka. No fraet, from Jehovah . . . hem stap witim iu.”—1 CHRON. 28:20.
SONG: 60, 29
1, 2. (a) Wanem important assignment nao Solomon kasem? (b) Why nao maet David tingse Solomon no fit for duim datfala waka?
SOLOMON kasem wanfala spesol assignment from Jehovah for buildim temple long Jerusalem, wea hem wanfala barava important construction project long history bilong iumi! Datfala temple mas “barava big and luk naes winim eni nara building” and pipol evriwea bae savve abaotem datwan. And samting wea barava important nao, diswan hem “haos bilong trufala God, Jehovah.”—1 Chron. 22:1, 5, 9-11.
2 King David trustim Jehovah bae sapotim Solomon. Bat Solomon hem “young nomoa and no garem bigfala savve.” Waswe, bae hem no fraet and willing for acceptim assignment for buildim datfala temple? Waswe, wei wea hem young and no garem bigfala savve bae stopem hem for duim datwan? For buildim datfala temple, Solomon mas no fraet and gohed duim waka hia.
3. Wanem nao samfala samting wea Solomon lanem abaotem wei for no fraet from dadi bilong hem?
3 Solomon maet lanem staka samting abaotem wei for no fraet from dadi bilong hem, David. Olsem example, taem David young, 1 Sam. 17:34, 35) And tu, hem no fraet taem hem faetem Goliath, datfala maeti soldia wea evriwan fraetem. David iusim nomoa wanfala smooth ston and hem trustim Jehovah, and hem killim dae Goliath.—1 Sam. 17:45, 49, 50.
hem faetem olketa wild animal wea kam for attakim olketa sheepsheep bilong dadi bilong hem. (4. Why nao Solomon mas no fraet?
4 From David garem wei for no fraet, hem barava fitim for hem encouragem Solomon for no fraet and buildim datfala temple. (Readim 1 Chronicles 28:20.) Sapos Solomon hem fraet, datwan maet mekem hem hol bak and no duim nao datfala waka.
5. Why nao iumi needim wei for no fraet?
5 Olsem Solomon, iumi tu needim help bilong Jehovah for no fraet and gohed duim waka wea hem givim iumi. So bae iumi lane abaotem example bilong samfala bifor wea showimaot wei for no fraet. Then bae iumi storyim hao iumi savve showimaot wei for no fraet and gohed duim waka bilong iumi.
EXAMPLE BILONG OLKETA WEA NO FRAET
6. Wanem nao iu laekem abaotem wei wea Joseph hem no fraet?
6 Joseph showimaot wei for no fraet taem waef bilong Potiphar switim hem for durong. Masbi hem savve laef bilong hem stap long danger sapos hem rejectim datfala woman. Bat winim wei for duim wanem woman hia laekem, hem no fraet and kwiktaem rejectim hem.—Gen. 39:10, 12.
7. Storyim samting wea Rahab duim wea showimaot hem no fraet. (Lukim piksa long start bilong study.)
7 Rahab tu showimaot wei for no fraet. Taem olketa spae bilong Israel kam long haos bilong hem long Jericho, maet hem isi for hem fraet and no laek helpem olketa. Bat bikos hem trustim Jehovah, hem no fraet and hem haedem tufala man hia and helpem tufala for ranawe. (Josh. 2:4, 5, 9, 12-16) Rahab hem bilivim Jehovah nao tru God, and hem trustim hao God bae givim datfala land long olketa Israelite. Hem no letem wei for fraetem king bilong Jericho and army bilong hem, or olketa narawan for mekem hem hol bak for duim samting. Rahab no fraet and hem duim samting for sevem hem and famili bilong hem.—Josh. 6:22, 23.
8. Hao nao example bilong Jesus helpem olketa aposol for no fraet?
8 Olketa faithful aposol bilong Jesus tu showimaot gudfala example long wei for no fraet. Olketa followim example bilong Jesus for no fraet. (Matt. 8:28-32; John 2:13-17; 18:3-5) Taem olketa Sadducee trae for stopem olketa for no teach abaotem Jesus, olketa no letem datwan for stopem olketa.—Acts 5:17, 18, 27-29.
9. Olsem 2 Timothy 1:7 storyim, hu nao savve helpem iumi for no fraet?
9 Joseph, Rahab, Jesus, and olketa aposol disaed strong for duim stret samting. Olketa showimaot wei for no fraet bikos olketa depend long Jehovah and no long olketa seleva. Samfala taem iumi barava needim wei for no fraet. Long taem olsem, iumi tu mas depend long Jehovah and no long iumiseleva. (Readim 2 Timothy 1:7.) Iumi bae storyim hao iumi needim wei for no fraet insaed long famili and long kongregeson.
OLKETA TAEM WEA IU MAS NO FRAET
10. Why nao olketa young wan shud no fraet?
10 Staka taem olketa young wan mas showimaot olketa no fraet for worshipim Jehovah. Olketa savve lane from example bilong Solomon wea showimaot hem no fraet and mekem olketa wise disison for buildim datfala temple go kasem taem hem finis. Nomata parents shud helpem olketa young wan for mekem disison, samfala taem olketa young wan mas disaedem seleva samfala important samting. (Prov. 27:11) Olketa mas no fraet for mekem olketa wise disison abaotem hu nao bae olketa fren witim, olketa hapitaem wea olketa chusim, hao for olketa garem gudfala wei, and wanem taem bae olketa baptaes. Olketa mas no fraet bikos samting wea olketa disaedem hem againstim Satan, wea tok spoelem God.
11, 12. (a) Wanem nao Moses duim wea showimaot hem no fraet? (b) Hao nao olketa young wan savve followim example bilong Moses?
11 Wanfala important samting wea olketa young wan need for duim hem nao for markem olketa goal. Long samfala kantri, pipol laekem olketa young wan for mas kasem hae education and for duim waka wea garem big pei. And tu, long olketa kantri wea laef hem hard, olketa young wan maet tingse olketa mas waka hard for faendem selen for helpem famili bilong olketa. Sapos samting olsem kasem iu, tingim example bilong Moses. Dota bilong Pharaoh adoptim hem, so maet hem fit for kamap rich or garem bignem. Masbi olketa long famili bilong Pharaoh, olketa teacher, and olketa man for givim advaes laekem hem for kasem olketa goal hia. Bat Moses no fraet and hem chus for worshipim Jehovah. Bihaen hem lusim Egypt, hem gohed for no fraet and depend long Jehovah. (Heb. 11:24-26) From datwan, Jehovah blessim hem and iumi sure hem bae kasem staka blessing long future.
12 Taem olketa young wan no fraet for markem olketa spiritual goal, and mekem Kingdom hem first samting long laef bilong olketa, Jehovah bae blessim olketa. Hem bae helpem olketa for lukaftarem famili bilong olketa. Long first century, datfala young man Timothy markem olketa spiritual goal, iu tu savve duim datwan. *—Readim Philippi 2:19-22.
Waswe iu disaed for no fraet taem iu deal witim olketa samting wea happen long laef? (Paragraf 13-17 storyim diswan)
13. Hao nao wei for no fraet helpem wanfala young sista for kasem goal bilong hem?
13 Wanfala sista long Alabama, U.S.A., no fraet for markem olketa spiritual goal. Hem sei: “Taem mi young mi savve shame. Mi faendem hem hard for story long pipol long Kingdom Hall, and for story long pipol long ministry hem barava hard go moa.” From dadi and mami and olketa long kongregeson helpem hem, gogo hem kasem goal bilong hem for regular pioneer. Hem sei: “World bilong Satan mekhae long hae education, bignem, selen, and wei for garem staka material samting.” Hem luksavve olketa samting hia hem no isi for man kasem and taem man aftarem datwan hem mekem man stress and wari. Hem sei: “Wei for duim wanem Jehovah laekem hem mekem mi barava hapi and satisfae.”
14. Wanem taem nao olketa dadi and mami mas no fraet?
14 Olketa dadi and mami tu mas no fraet. Olsem example, boss maet askem iu for waka ovataem long olketa day wea iu markem finis for famili worship, preaching, and olketa meeting. So iu mas no fraet mekem iu savve talem long boss iu bae no duim datwan, and diswan bae showimaot gudfala example for olketa pikinini bilong iu. Or maet samfala parents long kongregeson letem pikinini bilong olketa for duim samting wea iu no letem pikinini bilong iu for duim. Sapos olketa hia askem iu why nao iu no letem datwan, waswe, bae iu no fraet and explainim reason bilong iu long wei wea showimaot respect?
15. Hao nao Psalm 37:25 and Hebrew 13:5 savve helpem olketa dadi and mami?
15 Iumi mas no fraet mekem iumi helpem olketa pikinini bilong iumi for markem and kasem olketa spiritual goal. Olsem example, samfala parents maet hol bak for encouragem pikinini bilong olketa for pioneer, for go stap long ples wea needim pablisa, for waka long Bethel, or for waka long olketa construction project. Maet olketa wari nogud pikinini bilong olketa no fit for lukaftarem olketa taem olketa olo. Nomata olsem, parents wea wise no fraet and garem faith hao Jehovah bae Psalm 37:25; Hebrew 13:5.) Dadi and mami wea no fraet and depend long Jehovah bae helpem pikinini bilong olketa for duim sem samting tu.—1 Sam. 1:27, 28; 2 Tim. 3:14, 15.
keepim olketa promis bilong hem. (Readim16. Hao nao samfala parents helpem pikinini for markem olketa spiritual goal, and wanem gud samting nao olketa pikinini kasem?
16 Wanfala hasband and waef long United States helpem pikinini bilong tufala for markem olketa spiritual goal. Hasband hia sei: “Bifor olketa pikinini bilong mitufala savve hao for wakabaot and toktok, mitufala savve story long olketa abaotem hapi wea mitufala kasem from mitufala pioneer and duim olketa waka long kongregeson. Distaem, olketa tu garem markem olketa goal olsem.” Hem sei tu, from olketa pikinini hia markem and kasem olketa spiritual goal datwan helpem olketa for winim olketa test wea olketa kasem from world bilong Satan and olketa gohed for worshipim Jehovah. Wanfala brata wea garem tufala pikinini sei: “Staka parents iusim staka taem and samting wea olketa garem for helpem pikinini bilong olketa for kasem olketa goal saed long sports, music, and for garem hae education. Bat really mitufala luksavve hem gud for iusim taem and strong bilong mitufala for helpem olketa pikinini garem olketa goal wea bae mekem olketa for fren gud witim Jehovah. Mitufala barava hapi for lukim olketa pikinini kasem olketa spiritual goal hia and for waka tugeta witim olketa.” Iumi savve sure Jehovah hem hapi tumas long parents wea helpem pikinini bilong olketa for markem and kasem olketa spiritual goal.
NO FRAET TAEM IU DUIM WAKA LONG KONGREGESON
17. Why nao iumi mas no fraet taem iumi duim waka long kongregeson? Storyim example.
17 Iumi mas no fraet tu taem iumi duim waka long kongregeson. Olsem example, olketa elder needim wei for no fraet taem olketa deal witim olketa judicial case or taem olketa helpem olketa brata and sista long hospital wea laef bilong olketa stap long danger from olketa sik big. Samfala elder visitim olketa wea stap long prison wea interest for study and for conductim meeting witim olketa. Wanem nao samfala samting wea olketa singol sista savve duim? Olketa sista garem
staka chance for duim moa samting long ministry taem olketa pioneer, muv go long ples wea needim pablisa, waka long construction, and go long Skul for Olketa Kingdom Evangelizer. Samfala kasem invitation for attendim Gilead Skul tu.18. Hao nao olketa mature sista savve showimaot wei for no fraet?
18 Iumi lovem olketa mature sista bilong iumi, and iumi hapi olketa stap witim iumi long kongregeson! Nomata olketa olo no savve duim staka samting long waka bilong Jehovah, olketa still savve showimaot wei for no fraet and gohed duim waka. (Readim Titus 2:3-5.) Olsem example, wanfala mature sista mas no fraet sapos olketa elder askem hem for story witim wanfala young sista abaotem kaleko wea showimaot respect. Hem bae no tok strong long datfala young sista abaotem kaleko wea hem werem, bat hem savve helpem hem for luksavve kaleko wea hem werem maet mekem olketa narawan stambol. (1 Tim. 2:9, 10) Taem olketa mature sista showim love long wei olsem, datwan bae strongim kongregeson.
19. (a) Hao nao olketa brata wea baptaes finis savve showimaot olketa no fraet? (b) Hao nao Philippi 2:13 and 4:13 savve helpem olketa brata for no fraet?
19 Olketa brata wea baptaes finis tu needim wei for no fraet and gohed duim waka. Taem olketa willing for waka olsem ministerial servant and elder, full kongregeson bae kasem gud samting from datwan. (1 Tim. 3:1) Bat samfala maet hol bak for duim datwan. Maet wanfala brata duim mistek bifor, and datwan mekem hem tingse hem no fit for kamap wanfala ministerial servant or elder. Or maet wanfala brata tingse hem no garem bigfala savve for duim datfala waka. Sapos iu garem kaen tingting olsem, Jehovah savve helpem iu for no fraet. (Readim Philippi 2:13; 4:13.) Tingim example bilong Moses. Hem tu tingse hem no fit for duim waka wea Jehovah talem hem for duim. (Ex. 3:11) Bat Jehovah helpem hem for no fraet and for duim datfala waka. Brata wea baptaes finis tu bae no fraet sapos hem prea long Jehovah for helpem hem and for readim Bible evriday. And tu, wei for ting raonem olketa example bilong samfala long Bible wea garem wei for no fraet savve helpem hem. Hem savve hambol and askem olketa elder for trainim hem and willing for helpem kongregeson for duim eni samting wea olketa needim. Mifala encouragem evri brata wea baptaes finis for no fraet and waka hard for helpem kongregeson!
“JEHOVAH . . . STAP WITIM IU”
20, 21. (a) Wanem nao David talem long Solomon? (b) Wanem nao iumi savve sure long hem?
20 King David talem Solomon Jehovah bae stap witim hem go kasem taem hem finis for buildim datfala temple. (1 Chron. 28:20) Solomon ting raonem toktok wea dadi bilong hem talem and hem no letem wei wea hem young and no garem big savve stopem hem for duim datfala waka. Bat hem showimaot wei for no fraet and gohed waka, and Jehovah helpem hem for finisim datfala temple insaed seven and haf year.
21 Jehovah helpem Solomon, and hem savve helpem iumi tu for no fraet and duim olketa waka bilong iumi insaed famili and long kongregeson. (Isa. 41:10, 13) Sapos iumi no fraet taem iumi gohed for duim wanem Jehovah laekem, iumi sure hem bae blessim iumi distaem and long future tu. So iumi mas ‘no fraet and gohed duim waka.’
^ par. 12 Iu bae faendem samfala idea for markem olketa spiritual goal long Wastaoa bilong July 15, 2004, wea garem title “Iusim Olketa Spiritual Goal for Givim Glory Long Creator Bilong Iu.”