1. Why nao iumi barava bilivim toktok bilong God hem garem paoa? (Lukim piksa long start bilong study.)

PIPOL bilong Jehovah barava bilivim toktok bilong God “hem laef and hem garem paoa.” (Heb. 4:12) Iumiseleva lukim hao Bible garem paoa for changem laef bilong iumi and olketa narawan. Long bifor, samfala brata and sista savve steal, iusim drug, or durong. Samfala olketa bin rich and garem bignem, bat olketa no hapi and satisfae. (Eccl. 2:3-11) Bat plande pipol wea feel iusles and no garem hope, distaem Bible helpem olketa for garem hope and followim road for laef olowe. Maet iu hapi for readim and lane abaotem experience bilong olketa brata and sista insaed Wastaoa wea garem title, “Bible Changem Laef Bilong Pipol.” And nomata bihaen man kamap wanfala Witness, hem mas gohed for kasem help from Bible for strongim wei wea hem fren gud witim Jehovah.

2. Hao nao toktok bilong God wea garem paoa hem changem laef bilong olketa long first century?

² Taem iumi lukim pipol change taem olketa lanem truth long Bible, iumi no sapraes long datwan. Olketa brata and sista bilong iumi long first century wea garem hope for laef long heven, olketa tu changem laef bilong olketa. (Readim 1 Corinth 6:9-11.)  Taem Paul story abaotem olketa wea duim samting wea mekem olketa no fit for kasem Kingdom bilong God, hem sei: “Hem nao wei bilong samfala long iufala bifor.” Toktok bilong God and holy spirit bilong hem helpem pipol hia for change. Nomata olsem, samfala wea kamap Christian finis olketa duim bigfala sin and datwan affectim wei wea olketa fren witim Jehovah. Wanfala example wea Bible storyim hem wanfala anointed brata wea olketa mas disfellowshipim hem. Bihaen hem changem wei bilong hem, olketa letem hem for kam bak long kongregeson. (1 Cor. 5:1-5; 2 Cor. 2:5-8) Taem iumi lukim hao toktok bilong God hem garem paoa for helpem olketa brata and sista for changem staka samting long laef bilong olketa, datwan barava encouragem iumi.

3. Wanem nao bae iumi storyim long disfala study?

³ Toktok bilong God insaed Bible hem garem bigfala paoa. From Jehovah givim Bible long iumi, iumi laek for mek sure iumi iusim gud datwan. (2 Tim. 2:15) Long disfala study bae iumi lanem wanem iumi savve duim for letem paoa wea Bible garem for helpem iumi (1) long laef bilong iumiseleva, (2) long ministry, and (3) taem iumi teach long platform. And hem bae helpem iumi for showimaot love and tinghae long Dadi bilong iumi long heven, wea teachim iumi for kasem gud samting.—Isa. 48:17.

4. (a) Wanem nao iumi savve duim for letem toktok bilong God changem laef bilong iumi? (b) Wanem taem nao iu savve markem for duim Bible reading?

⁴ For letem toktok bilong God changem laef bilong iumi, iumi need for readim evriday. (Josh. 1:8) Iumi evriwan savve busy, bat iumi shud no letem eni samting for stopem iumi for readim Bible, nomata sapos iumi garem olketa nara responsibility tu. (Readim Ephesus 5:15, 16.) Maet iumi markem taem for readim Bible long morning, enitaem long day, or long naet. Iumi laek garem sem tingting olsem man wea raetem psalm, wea sei: “Mi laekem tumas law bilong iu! Hem nao samting wea mi ting raonem long full day.”—Ps. 119:97.

5, 6. (a) Why nao iumi need for ting raonem wanem iumi readim? (b) Wanem nao bae helpem iumi for duim datwan? (c) Hao nao wei wea iu readim and ting raonem Bible hem helpem iu?

⁵ Hem no inaf for just readim Bible, bat hem important for ting raonem gud wanem iumi readim. (Ps. 1:1-3) Taem iumi duim olsem, bae iumi savve followim wisdom wea stap insaed long Bible. So nomata sapos iumi readim toktok bilong God long tablet, mobile, or Bible, iumi laekem toktok bilong God for kasem heart bilong iumi and changem laef bilong iumi.

⁶ Wanem nao iumi savve duim for ting raonem wanem iumi readim long Bible?  Bihaen iumi readim samfala scripture long Bible iumi shud stop lelebet and tingim olketa kwestin hia: ‘Wanem nao diswan teachim mi abaotem Jehovah? Wanem nao mi duim finis for followim diswan long laef bilong mi? Wanem moa mi need for changem long laef bilong mi?’ Taem iumi ting raonem toktok bilong God and prea abaotem samting wea iumi readim, bae iumi barava laek for followim datwan. Taem iumi duim olsem, bae iumi lukim hao paoa wea Bible garem hem changem laef bilong iumi.—2 Cor. 10:4, 5.

7. Hao nao iumi savve iusim gud Bible long ministry?

⁷ Hem important for evritaem iusim gud Bible taem iumi preach and teach. Wanfala brata sei, “Sapos iu partner witim Jehovah long preaching waka, waswe, bae iuseleva nomoa story long haosholder or bae iu letem hem tu for story?” Taem iumi readim Bible long samwan, datwan showimaot iumi letem Jehovah for story long hem. Taem iumi chusim wanfala scripture wea fitim, datwan garem bigfala paoa winim wanem iumiseleva talem. (1 Thess. 2:13) Taem iu long ministry, waswe, iu traem best for readim Bible long evriwan wea iu meetim?

8. Why nao hem no inaf for just readim olketa scripture taem iumi preach?

⁸ Hem no inaf for just readim Bible long pipol wea iumi meetim long ministry. Why nao olsem? Bikos staka pipol no minim samting wea Bible storyim. Diswan hem happen long taem bilong iumi and long first century tu. (Rome 10:2) Iumi shud no tingse haosholder minim finis scripture wea iumi readim. For helpem hem minim samting wea iumi readim, iumi need for repeatim olketa main toktok insaed scripture, and then explainim long hem. Taem iumi duim olsem, toktok bilong God bae kasem heart bilong pipol.—Readim Luke 24:32.

9. Bifor iumi readim scripture, wanem nao iumi savve talem for helpem pipol for tinghae long Bible? Storyim example.

 ⁹ Toktok wea iumi talem bifor iumi readim wanfala scripture savve helpem haosholder for tinghae long Bible tu. Tingim samfala example. Maet iumi savve sei, “Lukim samting wea God talem abaotem diswan.” Or sapos iumi story long samwan wea hem no wanfala Christian, iumi savve sei, “Lukim samting wea olketa Holy Raeting talem.” Sapos iumi meetim samwan wea no interest long religion, iumi savve sei, “Waswe, enitaem iu herem disfala wise toktok wea olketa iusim bifor?” Sapos iumi tingim wei wea evriwan kam from difren ples and olketa garem difren biliv, bae iumi savve startim story long wei for mekem olketa interest.—1 Cor. 9:22, 23.

10. (a) Storyim experience bilong wanfala brata. (b) Storyim eni experience bilong iu wea showimaot Bible garem bigfala paoa taem iu iusim long ministry.

¹⁰ Staka brata and sista faendem taem olketa iusim Bible long ministry, datwan savve barava affectim pipol. Tingim example bilong wanfala brata wea savve visitim wanfala olo man wea bin readim olketa magasin bilong iumi for staka year. Wantaem, datfala brata disaed for readim wanfala scripture winim wei for givim nomoa niu Wastaoa magasin. Hem readim 2 Corinth 1:3, 4 wea sei: “Hem Dadi wea kaen and sorre long iumi, and hem God wea givim iumi comfort wea iumi needim. Nomata long eni hard taem wea iumi kasem, hem comfortim iumi.” Olketa toktok hia kasem heart bilong datfala olo man and hem askem brata hia for readim moa datfala scripture. Then datfala olo man hem sei, hem and waef bilong hem barava needim comfort. Datfala scripture mekem hem laek for savve moa samting abaotem Bible. Tru nao, Bible garem bigfala paoa taem iumi iusim long ministry!—Acts 19:20.

11. Wanem nao responsibility bilong olketa brata wea olketa savve teach long platform?

¹¹ Iumi savve enjoyim tumas wei for attendim olketa meeting, assembly, and convention. Main reason for iumi attend hem for worshipim Jehovah. And tu, iumi savve kasem gud samting from wanem iumi lanem long there. Olketa brata wea garem privilege for teach long platform garem bigfala responsibility. (Jas. 3:1) Evritaem olketa mas mek sure samting wea olketa teachim mas kam from Bible. Sapos iu kasem disfala privilege, hao nao iu savve iusim paoa wea Bible garem for kasem heart bilong olketa wea lisin long iu?

12. Hao nao brata wea givim tok savve mek sure olketa scripture hem main samting insaed tok?

¹² Olketa Scripture nao main samting insaed long eni tok. (John 7:16) So iu shud mek sure olketa experience, tokpiksa, or hao iu givim tok no mekem audience for forgetim olketa scripture wea iu storyim. And tu, iu mas tingim hao wei for iusim Bible for teach hem difren from wei for just readim scripture. Sapos iu iusim staka scripture tumas, staka pipol bae no savve rememberim olketa. So chusim gud olketa scripture wea iu laek for iusim. Then bihaen iu readim, explainim gud, iusim eni tokpiksa or example, and helpem olketa for luksavve hao for followim datwan long laef bilong olketa. (Neh. 8:8) Sapos tok wea iu bae givim hem kam from wanfala aotlaen, mek sure iu studyim gud datwan and olketa scripture wea stap insaed. Trae for minim hao information insaed aotlaen hem join witim olketa scripture. Then iusim olketa scripture hia for teachim olketa main point long datfala aotlaen. (Samfala idea for duim  diswan hem stap long disfala buk Kasem Gud Samting From Theocratic Ministry Skul Education long study 21 go kasem 23.) And samting wea barava important hem for askem Jehovah for helpem iu for explainim gud olketa important information insaed long Bible.—Readim Ezra 7:10; Proverbs 3:13, 14.

13. (a) Hao nao wanfala scripture wea wanfala sista herem long meeting kasem heart bilong hem? (b) Hao nao scripture wea iu herem long meeting hem affectim iu?

¹³ Bible barava helpem wanfala sista long Australia taem hem attendim olketa meeting. Taem hem pikinini yet, samfala nogud samting happen long hem. Gogo hem lanem truth and hem dedicatem laef bilong hem long Jehovah. Nomata olsem, hem no sure sapos Jehovah lovem hem. Then long wanfala meeting, hem herem wanfala scripture wea barava kasem heart bilong hem. Wei wea hem ting raonem and duim samfala research abaotem datwan helpem hem for faendem samfala nara scripture moa. Gogo hem luksavve hao Jehovah barava lovem hem. * Waswe, enitaem iu herem wanfala scripture long meeting, assembly, or convention wea hem kasem heart bilong iu?—Neh. 8:12.

14. Hao nao iumi savve showimaot iumi lovem and tinghae long toktok bilong Jehovah?

¹⁴ Iumi barava tinghae long wei wea Jehovah givim iumi Bible. Hem givim iumi datwan bikos hem lovem iumi, and tu, hem keepim promis bilong hem hao toktok bilong hem bae stap for olowe. (1 Pet. 1:24, 25) So iumi laek for mek sure iumi readim Bible evritaem, followim wanem iumi readim, and iusim datwan for helpem olketa narawan. Taem iumi duim olsem, iumi showimaot iumi barava lovem and tinghae long disfala nambawan buk wea Jehovah God givim for iumi.