EVRIWEA long world, olketa elder tinghae long privilege wea olketa garem for duim olketa assignment bilong olketa. Datwan hem wanfala blessing for iumi evriwan! Bat no longtaem go nomoa wanfala change kamap. Olketa olo elder kasem instruction for givim samfala big responsibility wea olketa garem for olketa young elder. Long wanem wei?

Datfala niu arrangement hem for olketa circuit overseer and olketa instructor bilong olketa theocratic skul for finis from datfala waka taem olketa kasem 70 year. And tu, olketa elder wea 80 year bae givim samfala assignment wea olketa garem for olketa elder wea young winim olketa, olsem waka for coordinator bilong Branch Komiti or chairman bilong olketa elder. Wanem nao olketa olo elder hia duim taem disfala change kamap? Olketa gohed faithful long Jehovah and organization bilong hem!

Ken serve olsem coordinator bilong Branch Komiti for klosap 49 year, and hem sei: “Mi barava agree witim datfala disison, bikos long sem morning wea mi herem disison hia, mi bin prea long Jehovah and talem hem wanfala brata wea young winim mi nao fit for duim disfala waka olsem chairman.” Staka faithful olo elder wea stap long olketa nara ples long world garem sem tingting olsem Ken. Nomata olsem, from olketa laekem tumas for duim disfala waka for helpem olketa brata and sista,  samfala feel sorre lelebet taem olketa just herem datwan.

Esperandio hem chairman bilong olketa elder long kongregeson bifor, and hem sei: “Firstaem mi sorre lelebet.” Bat hem sei tu, “Mi luksavve from mi sik, mi needim taem for rest.” Esperandio gohed faithful long Jehovah and gohed olsem wanfala blessing long kongregeson bilong hem.

Hao nao tingting bilong olketa wea duim waka olsem traveling overseer for longtaem, bat distaem assignment bilong olketa change? Allan, wea serve olsem traveling overseer for 38 year, hem sei, “Taem mi herem datwan mi seke tumas.” Nomata olsem, hem luksavve gud samting savve kamaot from wei for trainim olketa young wan for duim disfala waka, and hem still gohed for faithful distaem.

Russell, wea serve olsem traveling overseer and instructor bilong olketa theocratic skul for 40 year, hem sei firstaem wea hem and waef herem datwan, tufala feel sorre. Hem sei: “Mitufala tinghae tumas long privilege wea mitufala garem and mitufala feel olsem mitufala strong yet for duim datfala waka.” Russell and waef bilong hem iusim training and savve wea tufala garem for helpem olketa nara pablisa long kongregeson, and datwan mekem olketa pablisa barava hapi.

Sapos iu no experiencem kaen feeling olsem olketa hia, wanfala story wea stap long Mektu Samuel maet helpem iu for minim feeling bilong olketa.

Tingim taem Absalom, son bilong King David, hem againstim dadi bilong hem. David ranawe from Jerusalem for go long Mahanaim, wea hem stap long east saed long Jordan River. Taem olketa stap long there, David and olketa wea stap witim hem needim samfala samting. Waswe, iu tingim samting wea happen?

Thrifala man wea stap long datfala ples tekem kam olketa bed for sleep, samfala kaikai, and olketa nara samting wea olketa needim. Barzillai hem wanfala long olketa man hia. (Mektu Samuel 17:27-29) Bihaen Absalom no win for againstim David, David fit for go bak long Jerusalem. So Barzillai go witim hem kasem Jordan. David askem hem for go stap witim hem long Jerusalem. David sei sapos hem go witim hem, bae hem lukaftarem hem nomata Barzillai “hemi barava ris fogud” and hem no needim datwan. (Mektu Samuel 19:31-33) Luk olsem, David laekem wei bilong Barzillai and laek herem olketa gud advaes bilong hem. Hem bigfala privilege for Barzillai go stap and waka long haos bilong king!

From Barzillai garem wei for luksavve and hem hambol, hem talem hao hem 80 year finis. Then hem sei: “Waswe, mi fit for luksavve long wanem hem gud and wanem hem nogud?” (2 Sam. 19:35, NW) Wanem nao hem minim? Barzillai savve long staka samting from hem laef longtaem. And tu, hem fit for givim gud advaes, olsem samfala olo long taem bilong King Rehoboam duim. (Fas Kings 12:6, 7; Sams 92:12-14; Provebs 16:31) So luk olsem samting wea Barzillai storyim hem minim hem olo and hem no strong for duim staka samting.  Olsem hem talem, from hem olo datwan affectim wei wea hem herehere and teistim kaikai. (Eklesiastes 12:4, 5) So Barzillai talem David for tekem Chimham, wea hem wanfala young man, for go stap witim hem long Jerusalem. Luk olsem Chimham hem son bilong Barzillai.—Mektu Samuel 19:36-40.

Datfala change wea kamap abaotem age bilong olketa brata wea garem olketa responsibility hem showimaot organization garem sem tingting olsem Barzillai. Bat organization bilong Jehovah no just tingim wanfala olo brata nomoa and wanem hem fit for duim or savve bilong hem. Olketa need for tingim wanem nao best samting for evri faithful elder evriwea long world.

Olketa hambol olo Christian brata hia luksavve organization bilong Jehovah bae strong for grow, sapos olketa young brata nao duim olketa responsibility wea olketa olo brata duim for longtaem finis. Staka taem olketa olo brata nao trainim olketa young brata, olsem Barzillai maet trainim son bilong hem and aposol Paul trainim Timothy. (1 Cor. 4:17; Phil. 2:20-22) Olketa young brata wea kasem training finis showimaot olketa “olsem present” wea fit “for strongim nao datfala body bilong Christ.”—Eph. 4:8-12; comparem Nambas 11:16, 17, 29.

Staka pipol bilong Jehovah wea mas givim samfala responsibility bilong olketa long narawan, garem olketa chance for duim olketa nara waka long organization bilong Jehovah.

Marco, wea duim traveling waka for 19 year, hem sei: “Laef bilong mi distaem mekem mi fit for helpem olketa hasband wea no insaed truth, bat wea waef bilong olketa stap long kongregeson bilong mifala.”

Geraldo duim traveling waka bifor for 28 year, hem sei: “Olketa niu goal bilong mitufala hem for helpem olketa wea inactive and for conductim staka Bible study.” Hem sei kasem distaem, hem and waef bilong hem conductim 15 Bible study and staka wea inactive start for attendim olketa meeting.

Allan, wea iumi storyim finis, hem sei: “Distaem mitufala garem chance for duim moa samting long preaching waka. Mitufala enjoyim tumas for duim pablik witnessing, bisnis territory, and for witness long olketa neiba bilong mifala, and tufala long olketa kam attendim meeting long Kingdom Hall.”

Sapos iu wanfala faithful brata wea savve gud long waka bilong iu and iu change assignment, iu savve duim wanfala nara spesol waka. Iu savve duim samting for sapotim waka bilong Jehovah taem iu iusim savve bilong iu for trainim olketa young brata long kongregeson. Russell, wea iumi storyim finis, hem sei: “Jehovah gohed trainim and iusim olketa nambawan young brata wea garem savve for duim waka. Olketa brata and sista kasem gud samting from wei wea olketa strong for teach and lukaftarem olketa!”—Lukim box “ Helpem Olketa Young Brata for Duim Moa Samting.”

Sapos iu just finis from olketa responsibility wea iu bin duim bifor, gohed for hapi. Gudfala waka wea iu bin duim helpem staka pipol finis and nomata distaem iu savve gohed for helpem pipol. Olketa brata and sista barava lovem and tinghae long iu and bae olketa gohed for duim datwan.

Bat samting wea moa important, hem wei wea Jehovah nao barava tinghae and lovem iu. Hem bae no ‘forgetim waka wea iu duim and love wea iu showimaot for nem bilong hem taem iu helpem olketa holy wan and gohed for duim datwan.’ (Heb. 6:10) Datfala verse helpem iumi luksavve Jehovah tinghae long wanem iumi gohed for duim distaem and no just olketa samting iumi duim bifor. Iu barava spesol long Jehovah, so hard for hem forgetim wanem iu duim bifor and wanem iu gohed duim distaem for mekem hem hapi!

Hao sapos iu no wanfala olo brata wea  change assignment olsem iumi storyim finis? Disfala samting maet affectim iu tu. Long wanem wei?

Tingim, maet son bilong Barzillai savve story witim dadi bilong hem and showimaot hem tinghae long instruction and training wea hem kasem. Maet datfala son askem advaes or olketa idea from Barzillai. So sapos iu fren gud witim wanfala faithful olo brata wea change assignment, iu savve kasem gud samting from wei wea hem mature and garem staka experience. Askem advaes and olketa idea bilong hem. And lukluk long hao hem duim assignment bilong hem distaem, and wei wea hem faithful for iusim savve wea hem garem.

Nomata sapos iu wanfala olo brata wea change assignment or wanfala brata or sista wea kasem gud samting from experience bilong olketa, iu need for tingim hao Jehovah tinghae long faithful fasin bilong olketa wea worshipim hem for longtaem and wea gohed for duim datwan.