Tingim and Kaen Long Narawan Olsem Jehovah
“Olketa pipol wea i gohed fo tingim olketa pua pipol, olketa ya nao i hapi.”—SAMS 41:1.
1. Hao nao pipol bilong God showimaot love long each other?
PIPOL bilong God olketa insaed wanfala spiritual famili wea lovem each other. (1 John 4:16, 21) Olketa showimaot love no long olketa big samting wea olketa duim nomoa, bat long olketa smol samting tu, olsem for talem kaenfala toktok and duim gud samting for narawan. Taem iumi kaen and tingim narawan, iumi ‘olketa pikinini bilong God wea hem lovem and iumi followim wei bilong hem.’—Eph. 5:1.
2. Hao nao Jesus followim example bilong Dadi bilong hem for showimaot love?
2 Jesus barava followim example bilong Dadi bilong hem. Dastawe hem sei: “Kam long mi, iufala wea waka hard and wea karem hevi samting, mekem mi savve strongim iufala. . . . Mi no savve raf and mi hambol.” (Matt. 11:28, 29) Taem iumi followim example bilong Christ for “tingim olketa pua pipol,” Dadi bilong iumi long heven bae hapi and iumi tu bae barava hapi. (Sams 41:1) Long disfala study, bae iumi storyim hao iumi savve showimaot iumi tingim olketa insaed famili, kongregeson, and long ministry.
TINGIM AND KAEN LONG OLKETA INSAED FAMILI
3. Hao nao hasband savve minim and tingim feeling bilong waef bilong hem? (Lukim piksa long start bilong study.)
3 Olketa hasband shud showim example long hao for kaen and tingim olketa narawan insaed famili. (Eph. 5:25; 6:4) Olsem example, Bible encouragem olketa for tingim and ‘minim gud waef bilong olketa.’ (1 Pet. 3:7) Sapos man minim narawan, bae hem kaen long hem. Olsem example, wanfala hasband wea minim gud waef bilong hem luksavve nomata God wakem waef for barava fitim hem, hem savve tufala no semsem long staka wei and hem no tingse hem gud winim waef bilong hem. (Jenesis 2:18) Hem showimaot hem tingim feeling bilong waef bilong hem and hem respectim hem. Wanfala waef long Canada sei olsem abaotem hasband bilong hem: “Hem nating tok daonem feeling bilong mi or sei, ‘Iu shud no feel olsem nomoa.’ And tu, hem willing for lisin taem mi story. Taem hem helpem mi for stretem tingting bilong mi, hem duim long kaenfala wei.”
4. Hao nao hasband showimaot hem tingim feeling bilong waef taem hem story or deal witim olketa nara woman?
4 Hasband wea kea for waef bilong hem bae tingim feeling bilong waef taem hem story or deal witim olketa nara woman. Hem bae no talem or duim eni samting wea showimaot hem interest long olketa woman long wei wea no stret, and hem no duim datwan tu taem hem iusim social media or Internet. (Job 31:1) Bat hem gohed faithful long waef bilong hem, no bikos hem lovem waef nomoa, bat bikos hem lovem God and heitim olketa nogud samting.—Readim Sams 19:14; 97:10.
5. Hao nao waef savve showimaot hem kaen and tingim hasband bilong hem?
5 Taem wanfala hasband followim example bilong Jesus Christ wea hem hed bilong hem, datwan bae helpem waef for mekem grow wei for “barava respectim” hem. (Eph. 5:22-25, 33) From hem respectim hasband bilong hem, datwan bae muvim hem for kaen and tingim hasband, maet long taem wea hasband busy long olketa waka insaed kongregeson or taem hem deal witim olketa problem. Wanfala hasband long Britain sei: “Samfala taem waef bilong mi luksavve samting wea mi duim showimaot mi tingting tumas abaotem wanfala samting. Then hem savve followim principle long Provebs 20:5. Diswan minim samfala taem hem mas weit for raet taem for ‘faendemaot’ tingting bilong mi sapos hem samting wea mi fit for storyim witim hem.”
6. Hao nao iumi evriwan savve encouragem pikinini for kaen and tingim narawan, and wanem gud samting nao bae hem kasem?
6 Parents showim gud example for pikinini bilong olketa taem olketa showimaot olketa kaen and tingim each other. Olketa parents nao main wan wea garem responsibility for teachim pikinini for kaen and tingim olketa narawan. Olsem example, parents savve teachim pikinini for no ranran insaed Kingdom Hall. And long taem bilong olketa hapitaem, parents maet talem pikinini bilong olketa for letem olketa olo for tekem kaikai firstaem. Nomata olsem, evriwan long kongregeson savve sapotim olketa parents. Olsem example, taem wanfala pikinini duim wanfala gud samting olsem for openem door for iumi, iumi shud praisem hem. Wei for duim olsem bae mekem datfala pikinini for hapi, and bae hem luksavve “man wea givim samting hem barava hapi winim man wea kasem samting.”—Acts 20:35.
“TINGIM NARAWAN” INSAED KONGREGESON
7. Hao nao Jesus showimaot hem kaen and tingim feeling bilong man wea earpas, and wanem nao iumi lanem from example bilong hem?
7 Taem Jesus stap long Decapolis, pipol “tekem kam long hem wanfala man wea earpas and wea no savve toktok gud.” (Mark 7:31-35) Winim wei for Jesus healim hem long ples wea staka pipol stap, “hem tekem hem from olketa pipol hia” and healim hem. Why nao hem duim olsem? Bikos luk olsem datfala man wea earpas hem fraet taem staka pipol stap, so Jesus healim hem long ples wea no eniwan stap. Hem tru, iumi no savve duim mirakol for healim man. Bat iumi shud showimaot iumi tingim feeling and need bilong olketa brata and sista bilong iumi. Aposol Paul sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting.” (Heb. 10:24) Jesus minim feeling bilong datfala man wea earpas and hem showimaot hem kaen long hem. Datwan hem nambawan example for iumi!
8, 9. Hao nao iumi savve showimaot iumi kaen and tingim olketa wea olo and sik? (Storyim example.)
8 Tingim and kaen long olketa wea olo and olketa wea garem sik. Main important samting long kongregeson hem nao for showimaot love, and no wei for duim samting followim taem nomoa. (John 13:34, 35) Datfala love bae muvim iumi for willing for helpem olketa wea olo and disable for attendim olketa meeting and for preachim gud nius. Iumi duim olsem nomata olketa no fit for duim staka samting. (Matt. 13:23) Michael, wea hem iusim wheelchair, hem barava tinghae long help wea hem kasem from famili bilong hem and olketa brata and sista long field service grup bilong hem. Hem sei: “From olketa helpem mi, mi savve attendim meeting staka taem and for duim ministry. Mi barava laek for duim pablik witnessing.”
9 Staka Bethel garem olketa faithful brata and sista wea olo or wea sik. Olketa overseer long Bethel wea lukaftarem olketa hia barava kaen and tingim feeling bilong olketa taem olketa mekem arrangement for olketa duim leta and telephone witnessing. Bill, wea 86 year, raet long pipol wea stap long olketa isolate ples, hem sei: “Mifala barava tinghae long privilege for duim leta witnessing.” Nancy, wea klosap 90 year, hem sei: “Mi no ting long wei for raetem leta olsem wei for putim leta long envelope nomoa, bat hem wanfala wei for preach. Pipol need for savve long truth!” Ethel, wea born long 1921, hem sei: “Pain hem part long laef bilong mi nao. Samfala taem nomata for mi werem kaleko, hem no isi.” Nomata olsem, hem barava enjoyim telephone witnessing and hem garem samfala naes return visit. Barbara, wea 85 year, hem sei: “From mi sik, hem no isi for evritaem duim preaching waka. Bat telephone witnessing helpem mi for preach long olketa narawan. Mi barava thankiu long Jehovah!” No kasem wan year, wanfala grup bilong olketa faithful olo brata and sista hia spendem 1,228 hour long ministry, raetem 6,265 leta, duim 2,000 phone kol, and offerim 6,315 pablikeson! Tru nao, diswan mekem Jehovah barava hapi!—Provebs 27:11.
10. Hao nao iumi savve helpem olketa brata and sista for kasem gud samting from olketa meeting?
10 Showimaot iumi kaen and tingim olketa narawan long olketa meeting. Wei for kaen and tingim olketa brata and sista savve helpem olketa for kasem gud samting from olketa meeting. Hao nao iumi savve duim datwan? Wanfala wei hem for arrive early long meeting mekem iumi no disturbim eniwan. Samfala taem samting wea iumi no expectim hem happen wea mekem iumi arrive leit. Bat sapos hem wei bilong iumi for kam leit, iumi shud tingim hao datwan affectim olketa brata and sista and iumi need for change mekem iumi showimaot iumi tingim olketa. Hem important for tingim Jehovah and Son bilong hem nao invaetem iumi. (Matt. 18:20) Iumi showimaot iumi respectim tufala taem iumi kam early long meeting!
11. Why nao olketa wea garem part long meeting shud followim kaonsel long 1 Corinth 14:40?
11 Sapos iumi kaen and tingim olketa brata and sista, iumi bae followim wanem Bible talem for “duim evri samting long wei wea hem stret and wea no olobaot.” (1 Cor. 14:40) Olketa brata wea garem part long meeting obeyim datfala kaonsel taem olketa followim taem. Wei wea olketa duim datwan hem showimaot olketa no just tingim nomoa brata wea bae givim tok bihaen, bat olketa tingim tu evriwan long kongregeson. Samfala brata and sista maet need for travel farawe for kasem haos. Olketa narawan maet depend long pablik transport. And samfala, maet marit partner no insaed truth and olketa weitim olketa for kam bak kwiktaem.
12. Why nao iumi mas ‘barava kaen and lovem’ olketa elder wea waka hard? (Lukim box “ Tingim and Respectim Olketa wea Leadim Iumi.”)
12 Iumi need for respectim and lovem olketa elder wea waka hard insaed kongregeson and long ministry. (Readim 1 Thessalonica 5:12, 13.) For sure iu barava tinghae long waka wea olketa elder duim for iu. So iu savve duim samting wea showimaot iu willing for obeyim and sapotim olketa bikos olketa ‘lukaftarem iumi and mas givim ansa for hao olketa duim diswan.’—Heb. 13:7, 17.
MAS KAEN AND TINGIM PIPOL LONG MINISTRY
13. Wanem nao iumi lanem from wei wea Jesus treatim pipol?
13 Isaiah profesi olsem abaotem Jesus: “Bae hemi kaen tumas olsem man hu hemi no brekem eni longfala gras nomata hemi bin ben lelebet. An bae hemi no bloum dae eni lam wea hemi no laet gudfala.” (Aesaea 42:3) From Jesus lovem pipol, hem sorre long olketa. Hem minim feeling bilong pipol wea no strong and wikdaon olsem longfala grass wea bend and lamp wea klosap for dae. Dastawe, hem kaen, tingim, and patient witim pipol. Nomata olketa pikinini tu laek for kam long hem. (Mark 10:14) Hem tru, iumi no savve minim and teachim pipol olsem Jesus! Bat iumi tu savve kaen and tingim pipol long territory. Iumi savve duim datwan taem iumi tingim wei wea iumi story long olketa, wanem taem for visitim olketa, and hao long iumi bae story witim olketa.
14. Why nao iumi shud tingim hao iumi story witim pipol?
14 Hao nao iumi shud story witim pipol? Distaem staka million pipol “garekil and stap olobaot” bikos long wei wea olketa bisnis, bigman long gavman, and bigman long religion no tingim and ravem olketa. (Matt. 9:36) From datwan, staka pipol no trustim eniwan and no garem hope. Dastawe hem important for iusim naesfala toktok and story long kaenfala wei. Tru nao, staka pipol acceptim message wea iumi talemaot no bikos long savve bilong iumi abaotem Bible, or wei wea iumi savve explainim gud nomoa, bat bikos long wei wea iumi respectim and barava interest long olketa.
15. Wanem nao samfala wei wea iumi savve kaen and tingim pipol wea iumi preach long olketa?
15 Staka wei stap wea iumi savve showimaot iumi kaen and tingim pipol wea iumi preach long olketa. Olsem example, wanfala naes wei for teachim man hem for askem olketa kwestin. Bat, iumi shud askem kwestin long kaenfala wei and wei wea showimaot respect. Wanfala pioneer wea serve long territory wea wei bilong pipol hem for shame and no talemaot tingting bilong olketa, hem lane for no askem kwestin long wei wea maet mekem olketa feel nogud. Insaed diswan hem olketa kwestin wea maet pipol no savve long ansa bilong hem or maet isi for olketa ansarem rong. Olsem example, hem no ask olsem, ‘Waswe, iu savve long nem bilong God?’ or ‘Iu savve wanem nao Kingdom bilong God?’ Bat hem ask olsem, “Mi lanem long Bible, God hem garem nem. Waswe, mi savve showim long iu?” Hem tru, iumi no needim olketa rul bikos culture and wei bilong pipol hem no semsem. Bat, iumi shud evritaem kaen, tingim, and respectim olketa. Diswan minim iumi need for savve gud long pipol long territory bilong iumi.
16, 17. Hao nao iumi savve showimaot iumi tingim olketa wea iumi preach long olketa taem (a) iumi go long haos bilong olketa? (b) iumi markem hao long iumi story witim olketa?
16 Wanem taem nao iumi shud visitim pipol long territory? Taem iumi preach long haos tu haos, pipol no expectim iumi bikos olketa no invaetem iumi. Dastawe hem important for iumi go long taem wea maet pipol willing for story! (Matt. 7:12) Olsem example, long olketa weekend, waswe pipol long territory bilong iu savve wekap leit long morning? Sapos olsem, maet iu savve duim firstaem street witnessing, pablik witnessing, or olketa return visit bilong iu.
17 Hao long nao iumi shud story witim pipol? Staka pipol barava busy, so maet hem gud for iumi story for lelebet taem nomoa, winim wei for stap longtaem long haos bilong pipol. (1 Cor. 9:20-23) Taem pipol lukim iumi luksavve olketa busy, maet olketa bae willing for story taem iumi kam bak narataem. Tru nao, iumi shud showimaot olketa wei bilong holy spirit bilong God taem iumi duim ministry. Taem iumi duim olsem, iumi “waka tugeta witim God.” Jehovah maet iusim iumi for helpem samwan for lane abaotem truth.—1 Cor. 3:6, 7, 9.
18. Taem iumi kaen and tingim olketa narawan, olketa wanem blessing nao bae iumi kasem?
18 So traem best for kaen and tingim narawan insaed famili, kongregeson, and long ministry. Taem iumi duim olsem, iumi bae kasem staka blessing distaem and long future. Sams 41:1, 2 sei: “Olketa pipol wea i gohed fo tingim olketa pua pipol, olketa ya nao i hapi, bikos [Jehovah] bae hemi helpem olketa taem trabol hemi kasem olketa. . . . An bae . . . olketa hapi long lan blong olketa.”
