1. Wanem taem nao maet hem hard for servem Jehovah?

WANEM taem nao maet iu ting hem hard for servem Jehovah, hem taem wea evri samting hem hard or lo taem wea hem gud? Taem iumi feisim olketa hard taem, evritaem iumi depend lo Jehovah. Bat wanem nao iumi duim taem wea laef blo iumi hem gud? Maet iumi forgetim wei for servem Jehovah? Hem nao samting wea Jehovah warnim olketa Israelite abaotem.—Diutronomi 6:10-12.

2. Wanem example nao King Asa showimaot?

² King Asa hem nambawan example blo man wea iusim gud tingting bikos hem barava depend lo Jehovah. Hem servem Jehovah no lo olketa nogud taem nomoa, bat lo olketa gud taem tu. From taem hem young hem ‘barava tinghevi lo Jehovah.’ (Fas Kings 15:14.) Wanfala wei wea hem showim hem lovem Jehovah hem taem wea hem aotem olketa false worship from Judah. Bible sei “Hemi tekemaot evri olta blong olketa hiden pipol, an hemi aotem olketa tambuples, an hemi brekemdaon olketa barava tolfala tambu ston.” (Mektu Kronikols 14:3, 5) Hem aotem tu Maacah, granmami blo hem from position blo hem lo kingdom. Why nao olsem? Bikos hem mekhae lo wei for worshipim idol.—Fas Kings 15:11-13.

3. Wanem nao bae iumi storyim lo disfala article?

³ Asa hem no just aotem nomoa false worship. Hem mekhae tu lo tru worship, taem hem helpem kingdom blo Judah for kam bak lo Jehovah. Jehovah blessim Asa and olketa Israelite  witim wanfala taem blo peace. * For tenfala year taem Asa hem rul, Kingdom blo Judah hem garem peace. (Mektu Kronikols 14:1, 4, 6) Lo disfala article, bae iumi storyim hao nao Asa iusim datfala taem blo peace. Then bae iumi storyim example blo olketa first century Christian wea olsem Asa, wea iusim gud lo taem blo peace wea olketa garem. Then bae iumi ansarem tu disfala kwestin: Sapos iu stap lo ples wea iu garem freedom for worship, hao nao iu savve iusim gud datfala taem blo peace?

4. Olsem Mektu Kronikols 14:2, 6, 7 storyim, hao nao Asa iusim gud taem blo peace?

⁴ Readim Mektu Kronikols 14:2, 6, 7. Asa talem olketa pipol hao Jehovah nao hem givim peace for olketa. Asa hem no ting dat disfala taem blo peace hem taem for relax. Bat, hem duim bigfala waka for start buildim olketa taon, olketa wall, olketa taoa, and olketa gate. Hem talem olketa pipol lo Judah for mekius lo land blo olketa. Wanem nao Asa minim? Hem minim olketa pipol still free for muv raon insaed land wea God givim olketa, and olketa bae savve build from no eni enemy stap for againstim olketa. So hem encouragem olketa pipol for iusim gud datfala taem blo peace.

5. Why nao Asa hem strongim army blo hem?

⁵ Asa hem iusim tu datfala taem blo peace for strongim army blo hem. (Mektu Kronikols 14:8) Waswe, diswan minim hem nating trustim Jehovah? Nomoa. Asa hem savve datwan hem responsibility blo hem olsem king for redyim olketa pipol for olketa trabol wea maet kamap lo future. Asa savve tu dat disfala taem blo peace wea Judah hem kasem hem bae no stap for olowe, and hem nao wanem hem happen.

6. Wanem nao olketa first century Christian duim lo taem olketa garem peace?

⁶ Nomata olketa first century Christian kasem persecution, olketa enjoyim taem blo peace tu. Hao nao olketa disaepol iusim gud disfala chance? Olketa faithful man and woman hia preachim gud nius and no givap. Acts hem sei “olketa obeyim Jehovah.” Olketa gohed for preachim gud nius and from datwan, namba blo olketa hem kamap staka. Jehovah blessim hard waka blo olketa for preach lo taem wea olketa garem peace.—Acts 9:26-31.

7-8. Wanem nao Paul and olketa narawan duim taem olketa garem chance for preach? Explainim.

⁷ Olketa disaepol lo first century iusim evri chance wea olketa garem for preachim gud nius. Olsem example, taem aposol Paul luksavve staka waka stap for hem duim lo Ephesus, hem iusim gud datfala taem for preach and for mek disaepol lo datfala taon.—1 Cor. 16:8, 9.

⁸ Nara chance wea Paul and olketa nara Christian garem hem taem olketa aposol and olketa elder lo Jerusalem stretem problem saed lo wei for circumcise lo 49 C.E. (Acts 15:23-29) Bihaen olketa talem disison lo olketa kongregeson, olketa disaepol waka hard for talem “gud nius abaotem message blo Jehovah.” (Acts 15:30-35) Wanem gud samting nao kamaot from datwan? Bible sei “faith bilong olketa long olketa kongregeson hem gohed for kamap strong, and evriday plande pipol moa olketa biliv.”—Acts 16:4, 5.

9. Wanem nao situation lo staka kantri distaem, and wanem nao iumi savve askem lo iumiseleva?

⁹ Lo staka kantri distaem, iumi free for preach. Waswe, iu stap lo wanfala kantri wea olketa garem freedom for worship? Sapos olsem, askem iuseleva, ‘Hao nao mi iusim datfala freedom?’ Insaed lo olketa last day distaem, staka nambawan samting gohed for happen, organization blo Jehovah hem leadim disfala preaching and teaching campaign evriwea lo world wea hem winim eni nara taem lo history. (Mark 13:10) Staka waka stap for olketa pipol blo Jehovah.

10. Wanem nao 2 Timothy 4:2 encouragem iumi for duim?

¹⁰ Hao nao iu savve iusim gud disfala taem blo peace? (Readim 2 Timothy 4:2.) Hem gud for iuseleva savve lukluk lo situation blo iu, and ting raonem sapos iu or eni narawan lo famili savve duim moa samting lo preaching waka, maet for kamap wanfala pioneer. Distaem hem no taem for hipimap olketa riches and olketa material samting, olketa samting hia bae hard for iumi tekem go thru lo bigfala trabol.—Provebs 11:4; Matt. 6:31-33; 1 John 2:15-17.

11. Wanem nao samfala duim mekem olketa savve sharem gud nius lo staka pipol?

¹¹ Staka pablisa lanem wanfala niu languis mekem olketa savve iusim datwan for preach and teach. Organization blo God sapotim olketa thru lo wei wea olketa gohed wakem olketa Bible pablikeson lo staka difren languis. Olsem example lo 2010, olketa pablikeson blo iumi hem stap lo samting olsem 500 languis. Distaem datfala namba hem go ap kasem winim 1,000 languis!

12. Wanem gud samting nao pipol bae kasem taem olketa herem Kingdom message lo languis blo olketa? Storyim wanfala example.

¹² Taem pipol herem truth lo languis blo olketa, hao nao datwan affectim olketa? Tingim experience blo wanfala sista wea kasem gud samting from wanfala regional convention lo Memphis, Tennessee, U.S.A. Datfala convention hem kamap lo Kinyarwanda languis. Datfala languis hem blo pipol lo Rwanda, Congo (Kinshasa), and Uganda. Bihaen lo datfala  convention, datfala sista wea story lo Kinyarwanda languis hem sei: “From taem wea mi muv kam lo United States 17 year go finis, distaem hem firstaem for mi minim gud wanfala spiritual program.” So hem klia hao taem disfala sista herem disfala program lo languis blo hem, diswan barava kasem heart blo hem. Sapos hem fitim iu, waswe, iu savve lanem wanfala languis for helpem samfala lo territory blo iu? Maet diswan hem barava gud bikos maet samfala lo territory blo kongregeson blo iu olketa savve story lo narafala languis. Bae iu hapi tumas sapos iu traem best for duim diswan.

13. Hao nao olketa brata blo iumi lo Russia olketa iusim taem blo peace?

¹³ No evri brata and sista blo iumi garem freedom for preach. Samfala taem olketa gavman mekem olketa law wea barava mekem hem hard for iumi duim ministry blo iumi. Olsem example, tingim olketa brata and sista blo iumi lo Russia. Olketa kasem persecution for staka year, bat then lo March 1991 olketa garem freedom for worship. Lo datfala taem, namba blo olketa pablisa hem kasem 16,000 lo Russia. Twenti-fala year bihaen, datfala namba hem grow kasem winim 160,000 pablisa! Diswan hem showimaot hao olketa brata blo iumi olketa barava wise taem olketa iusim chance wea olketa garem for free for preach. Datfala taem blo Peace hem no gohed for longfala taem. Nomata situation hem change, datwan hem no katem daon wei wea olketa strong for gohed worshipim Jehovah. And olketa iusim evri chance wea olketa garem for servem Jehovah.

14-15. Hao nao Jehovah iusim paoa blo hem for helpem Asa?

¹⁴ Lo taem blo Asa, gogo datfala taem blo peace hem finis. Wanfala big army blo wan million soldia kam from Ethiopia. Komanda blo  olketa, Zerah, hem trustim hao hem and army blo hem savve winim Judah. Bat, King Asa no trustim namba blo olketa soldia bat hem trustim God blo hem Jehovah. Hem prea olsem: “Lod [Jehovah], God blong mifala, mifala trastem yu nomoa. Olketa soldia ya i barava plande tumas, bat mifala kam long disfala ples fo faetem olketa long nem blong yu.”—Mektu Kronikols 14:11.

¹⁵ Nomata namba blo army blo Ethiopia hem klosap dabol lo namba blo olketa soldia blo Judah, Asa hem luksavve Jehovah garem paoa for sevem pipol blo Hem and hem nao samting wea Jehovah duim. Jehovah helpem pipol blo hem and army blo Ethiopia hem lus.—Mektu Kronikols 14:8-13.

16. Hao nao iumi savve taem blo peace bae no stap for olowe?

¹⁶ Nomata iumi no barava savve lo wanem nao bae happen lo each wan lo iumi lo future, iumi savve hao taem blo peace wea pipol blo God enjoyim hem for lelebet taem nomoa. Tingim, Jesus talem finis hao insaed lo olketa last day “evri kantri bae olketa heitim” olketa disaepol blo hem. (Matt. 24:9) Aposol Paul tu hem talem hao “pipol bae spoelem tu eniwan wea laek for faithful long God and followim Christ.” (2 Tim. 3:12) Satan hem “kros fogud,” and iumi bae laea lo iumiseleva sapos iumi sei hem bae no kros lo iumi.—Rev. 12:12.

17. Lo wanem wei nao faith blo iumi maet kasem test?

¹⁷ Klosap nao lo future, faith blo iumi evriwan bae kasem test, world bae kasem ‘bigfala trabol wea hem winim eni trabol wea happen start kam long taem world hem start, kam kasem distaem.’ (Matt. 24:21) Lo datfala taem, olketa famili member maet againstim iumi and gavman maet banim waka blo iumi. (Matt. 10:35, 36) Waswe, bae iumi olsem Asa, wea trustim Jehovah for helpem and protectim hem?

18. Olsem Hebrew 10:38, 39 talem, wanem nao bae helpem iumi for redi for taem wea iumi no garem peace?

¹⁸ Jehovah hem bin helpem iumi lo spiritual wei for redi for wanem bae happen lo future. Thru lo “wakaman wea faithful and wise” hem provaedem staka spiritual ‘kaikai lo barava taem’ for helpem iumi for gohed faithful lo worship blo iumi. (Matt. 24:45) Bat iumi tu mas duim part blo iumi and gohed for  strongim faith blo iumi lo Jehovah.—Readim Hebrew 10:38, 39.

19-20. From wanem iumi lanem lo Fas Kronikols 28:9, olketa wanem kwestin nao iumi shud askem iumiseleva, and why nao iumi shud askem olketa kwestin hia?

¹⁹ Iumi tu laek for olsem King Asa wea lukaotem Jehovah.” (Mektu Kronikols 14:4; 15:1, 2) Iumi start for lukaotem Jehovah taem iumi savve lo hem and baptaes. Iumi iusim evri chance for strongim love blo iumi for Jehovah. For lukim sapos iumi gohed for duim olketa samting hia, iumi maet askem, ‘Waswe, mi evritaem attendim olketa kongregeson meeting?’ Taem iumi attendim olketa meeting wea organization blo Jehovah provaedem, iumi kasem olketa spiritual samting for strongim iumi and iumi kasem encouragement from olketa brata and sista. (Matt. 11:28) Iumi maet askem iumiseleva olsem: ‘Waswe, mi garem gudfala wei for study seleva?’ Sapos iu stap witim famili blo iu, waswe, iu markem taem evri week for duim famili worship? Or sapos iu stap seleva, waswe, iu markem taem for famili worship olsem sapos iu part lo wanfala famili? And, waswe, iu share evribit lo waka for preach and teachim pipol for kamap disaepol?

²⁰ Why nao iumi shud askem iumiseleva olketa kwestin hia? Bible sei Jehovah hem lukluk lo tingting and wat nao insaed lo heart blo iumi, so iumi shud duim sem samting tu. (Readim Fas Kronikols 28:9.) Sapos iumi luksavve iumi need for mekem samfala change lo olketa goal blo iumi, wei blo iumi or tingting blo iumi, hem gud for askem Jehovah for helpem iumi for mekem olketa change hia. Distaem nao hem taem for redyim iumiseleva for olketa test wea bae kamap lo future. Iumi shud no letem eni samting stopem iumi for iusim gud taem blo peace wea iumi garem!