Disfala interesting verse hem read olsem: “Yu no sapraes sapos yu lukim olketa bikman i gohed fo mekful long olketa pua pipol, an stopem olketa fo no kasem raet blong olketa, an no jajem olketa long stretfala wei. Olketa bikman ya i no tinghevi long olketa pua pipol bikos olketa stap nomoa andanit long paoa blong narafala bikman moa hu i bos long olketa. Olketa narafala bikman ya tu i duim semsamting, bikos olketa tu i stap andanit long paoa blong olketa bos [“wea moa hae winim olketa,” NW].”—Eklesiastes 5:8.

Lo tingting blo olketa man, diswan hem storyim olketa man wea garem paoa insaed lo gavman. Bat sapos iumi tingting gud abaotem datwan, hem storyim wanfala tru samting abaotem Jehovah tu, wea datwan shud comfortim and strongim iumi.

Eklesiastes 5:8 hem storyim bigman wea mekful lo pipol wea poor and stopem olketa for kasem wanem olketa shud kasem. Datfala ruler shud tingim samwan wea lukaftarem hem, hem hae winim hem or garem moa paoa winim hem lo gavman. And samfala moa hae winim olketa. Sorre samting nao, lo gavman blo man pipol safa bikos lo corruption blo olketa ruler hia.

Nomata luk olsem iumi no wei nao, iumi hapi bikos Jehovah hem lukim evri bigman blo gavman blo olketa man. Iumi savve prea lo God and putim evri wari blo iumi lo hem. (Sams 55:22; Phil. 4:6, 7) Iumi savve dat “[Jehovah] hemi gohed fo lukluk long evri ples long disfala wol, an hemi save strongim olketa pipol hu i tinghevi fo obeim hem.”—Mektu Kronikols 16:9.

So Eklesiastes 5:8 hem helpem iumi for lukim real samting wea happen insaed lo gavman blo man wea evritaem samwan mas garem moa paoa winim narawan. Samting wea barava important nao disfala verse helpem iumi for lukim tru samting abaotem Jehovah wea hem nao hae winim evriwan, hem garem bigfala paoa. Distaem hem iusim Son blo hem Jesus Christ for rul lo Kingdom. Hem Olmaeti, hem lukim evri samting, hem no saedem eniwan and hem duim stret samting evritaem, and Son blo hem tu duim sem samting.