1-2. Hao nao Eklesiastes 11:6 hem join witim waka for preachim gud nius blo Kingdom?

LO SAMFALA kantri, pipol barava willing for herem gud nius. Olketa savve sei hem samting wea olketa bin weit for hem! Lo olketa nara kantri, pipol no interest lo God or Bible. Waswe lo ples wea iu stap, wanem nao tingting blo pipol? Nomata wanem kaen tingting nao pipol garem, Jehovah expectim iumi for gohed for preach go kasem taem Jehovah sei disfala waka hem finis.

² Lo taem wea Jehovah markem, disfala preaching waka bae hem finis and end bae kam. (Matt. 24:14, 36) Bat go kasem datfala taem, hao nao iumi savve obeyim disfala toktok for waka go kasem evening or [for no letem hand blo iu for rest]? *—Readim Eklesiastes 11:6.

3. Wanem nao bae iumi storyim lo disfala study?

³ Lo study bifor diswan, iumi lane abaotem fofala samting wea iumi need for duim for kamap gudfala fisherman for kasem pipol. (Matt. 4:19) Lo disfala study, bae iumi storyim thrifala samting wea iumi savve duim wea savve strongim disison blo iumi for gohed preach, nomata wanem nao happen. Iumi bae lanem why hem important for (1) gohed for duim preaching waka olsem main samting lo laef blo iumi, (2) mas patient, and (3) gohed garem strong faith.

4. Why nao iumi need for putim waka wea Jehovah givim for iumi olsem main samting lo laef blo iumi?

⁴ Jesus storyim wei blo pipol and wanem bae happen lo olketa last day and hem savve hao olketa samting hia bae disturbim wei  wea olketa disaepol blo hem putim preaching waka olsem main samting lo laef blo olketa. Hem talem olketa for “gohed for lukaot.” (Matt. 24:42) Distaem tu, staka samting savve disturbim iumi wea olsem tu olketa samting wea disturbim pipol lo taem blo Noah, wea mekem olketa no laek for herem warning wea Noah talem. (Matt. 24:37-39; 2 Pet. 2:5) Dastawe, iumi laek putim waka wea Jehovah givim for iumi olsem main samting lo laef blo iumi.

5. Olsem Acts 1:6-8 storyim, hao big nao bae disfala preaching waka hem gohed?

⁵ Distaem, iumi mas barava putim disfala preaching waka olsem main samting. Jesus sei disfala waka bae hem kamap moa big and bae hem gohed bihaen hem dae. (John 14:12) Bihaen Jesus dae, samfala lo olketa disaepol blo hem go bak lo fishing bisnis blo olketa. Bihaen Jesus resurrect, hem duim wanfala mirakol for samfala lo olketa disaepol blo hem for kasem staka fish. And hem iusim datfala taem for strongim hao disfala assignment blo olketa for kamap fisherman for kasem pipol hem moa important winim eni nara waka. (John 21:15-17) Bifor Jesus go ap lo heven, hem talem olketa disaepol blo hem hao disfala preaching waka wea hem startim hem mas kasem olketa farawe ples lo earth. (Readim Acts 1:6-8.) Staka year bihaen, Jesus givim wanfala vision lo aposol John wea showimaot olketa samting wea bae happen “long day bilong Lord.” * Wanfala lo olketa spesol samting wea John lukim anda lo direction blo wanfala angel hem disfala, “gud nius wea bae stap for olowe” bae olketa talemaot lo “evri kantri, tribe, and languis.” (Rev. 1:10; 14:6) So distaem, Jehovah hem laekem iumi for mas duim preaching waka go kasem taem wea hem bae finis.

6. Hao nao iumi savve putim preaching waka olsem main samting?

⁶ Iumi savve putim preaching waka olsem  main samting sapos iumi ting raonem olketa samting wea Jehovah duim for helpem iumi. Olsem example, hem provaedem staka spiritual kaikai thru lo olketa pablikeson wea olketa printim, and olketa electronic pablikeson, olketa audio and video recording and broadcast lo Internet. Tingim diswan, lo website blo iumi, olketa information hem stap lo winim 1,000 languis! (Matt. 24:45-47) Lo wanfala world wea divaed saed lo politik, religion, and saed lo selen, winim eit million servant blo God olketa wan mind evriwea lo world olsem wanfala famili. Olsem example, lo Friday, April 19, 2019, olketa Witness raonem full world olketa wan mind for storyim text blo datfala day. Lo datfala evening, 20,919,041 olketa hipap for Memorial blo dae blo Jesus. Taem iumi tingim privilege blo iumi for lukim and part lo datfala nambawan waka, datwan bae muvim iumi for putim Kingdom waka olsem main samting.

7. Hao nao example blo Jesus savve helpem iumi for gohed strong?

⁷ Narafala wei wea iumi savve putim preaching waka olsem first samting hem taem iumi followim example blo Jesus. Hem no letem eni samting for disturbim wei wea hem witness abaotem truth. (John 18:37) Hem no letem Satan for switim hem taem hem laek givim hem “evri kantri long world and olketa nambawan samting wea olketa garem,” and hem no letem olketa narawan switim hem for mekem hem kamap king. (Matt. 4:8, 9; John 6:15) Hem no letem wei for laekem olketa material samting for mekem hem go difren, and hem no letem wei wea olketa againstim hem for stopem hem. (Luke 9:58; John 8:59) Taem iumi feisim olketa samting wea testim faith blo iumi, iumi savve gohed strong sapos iumi tingim kaonsel blo aposol Paul. Hem talem olketa Christian for followim example blo Jesus mekem olketa savve gohed and “no taed and wikdaon”!—Heb. 12:3.

8. Wanem nao wei for patient, and why nao hem barava important distaem?

⁸ Patient hem minim for weit for wanfala situation hem change. Iumi maet laekem wanfala nogud samting wea happen for finis or iumi laekem wanfala gud samting for mas happen, iumi need for patient. Profet Habakkuk barava laekem olketa nogud samting lo Judah for finis. (Habakkuk 1:2) Olketa disaepol blo Jesus hope for Kingdom hem “start lo datfala taem” and mekem olketa free from rul blo olketa lo Rome. (Luke 19:11) Iumi barava laekem Kingdom blo God for kam for aotem evri nogud samting and startim wanfala niu world wea garem olketa raeteous pipol. (2 Pet. 3:13) Bat iumi need for patient and weit for taem wea Jehovah hem markem. Bae iumi storyim samfala wei wea Jehovah hem teachim iumi for patient.

9. Olketa wanem example nao showimaot Jehovah hem patient?

⁹ Jehovah nao showim perfect example blo wei for patient. Hem givim taem for Noah buildim ark and for “preach abaotem samting wea raeteous.” (2 Pet. 2:5; 1 Pet. 3:20) Jehovah lisin lo Abraham taem hem askem staka kwestin abaotem taem wea hem bae distroem tufala taon blo Sodom and Gomorrah. (Jenesis 18:20-33) For staka handred year, Jehovah patient tumas witim nation blo Israel wea no faithful. (Nehemaea 9:30, 31) Distaem tu iumi lukim Jehovah hem patient taem hem givim taem for “evriwan for garem chance for repent.” (2 Pet. 3:9; John 6:44; 1 Tim. 2:3, 4) Example blo Jehovah givim gudfala reason for patient taem iumi preach and teach. Hem teachim iumi tu for patient taem hem storyim wanfala tokpiksa lo Bible.

10. Olsem iumi readim lo James 5:7, 8, wat nao iumi lanem abaotem wanfala farmer?

 ¹⁰ Readim James 5:7, 8. Example blo wanfala farmer wea growim olketa plant hem teachim iumi hao for patient. Hem tru, samfala plant savve grow kwiktaem. Bat, staka plant, especially olketa wea savve garem frut, olketa savve tek taem for hem savve redi. Season for plantim kaikai lo Israel hem tekem samting olsem sixfala month. Farmer bae plantim olketa seed lo first rain autumn season and harvestim lo last rain spring season. (Mark 4:28) Hem wise for iumi followim wei blo farmer for patient. Bat datwan maet hem no isi.

11. Hao nao wei for patient savve helpem iumi lo ministry?

¹¹ Iumi olketa man wea no perfect laek for lukim gud samting from hard waka blo iumi kwiktaem. Bat, sapos iumi laekem garden blo iumi for garem frut, iumi mas lukaftarem gud. Iumi mas houm, plantim, aotem olketa grass, and watarem. Waka for mek disaepol hem needim hard waka tu. Hem tek taem for iumi helpem olketa Bible Study blo iumi for aotem wei blo olketa wea olsem olketa rabis grass, wea hem nao wei for ting daonem narawan and no garem love. Wei for patient bae helpem iumi for no discourage taem iumi kasem olketa hard samting. Nomata iumi kasem olketa gud samting, iumi mas still gohed for patient. Iumi no savve forcem Bible student for grow lo faith. Samfala taem, nomata olketa disaepol blo Jesus tu slow for minim samting wea hem teachim olketa. (John 14:9) Iumi mas tingim dat iumi plantim and watarem, bat God nao mekem for grow.—1 Cor. 3:6.

12. Hao nao iumi savve showimaot iumi patient taem iumi preach lo olketa relative wea no Witness?

¹² Wanfala taem wea iumi maet faendem hem hard for iumi patient hem taem iumi preach lo olketa relative wea no Witness. Principle lo Eklesiastes 3:1, 7 savve helpem iumi. Hem sei: “Taem hem stap fo man stap kuaet, and taem  hemi stap fo tok.” Taem iumi showim gudfala wei iumi givim gudfala witness, and bae iumi evritaem lukaotem chance for story abaotem truth. (1 Pet. 3:1, 2) Taem iumi preach and teach, iumi mas patient witim evri pipol. Insaed diswan hem olketa famili member blo iumi tu.

13-14. Wanem nao samfala example blo wei for patient wea iumi savve followim?

¹³ Iumi savve lanem wei for patient from example blo olketa faithful wan lo Bible and distaem. Habakkuk laekem for evri nogud samting for finis, bat hem patient and hem sei: “Bae mi gohed fo lukluk olsem sekiuriti.” (Habakkuk 2:1) Paul sei samting wea hem laekem tumas hem for “finisim” ministry blo hem. Nomata olsem, hem patient for “talemaot long evriwan datfala gud nius.”—Acts 20:24.

¹⁴ Tingim example blo wanfala marit couple wea graduate from Gilead and kasem assignment for serve lo wanfala kantri wea no garem staka Witness and staka pipol olketa no Christian. Tu-thri nomoa interest for studyim Bible. Bat, olketa classmate blo tufala lo Gilead wea serve lo nara kantri storyim olketa naes experience abaotem olketa Bible study blo olketa wea muv ahed. Nomata territory blo olketa staka no interest, disfala couple gohed for patient lo ministry blo olketa. Bihaen eitfala year wea luk olsem staka pipol no lisin lo datfala territory, olketa kasem gud samting from ministry blo olketa, wanfala Bible study blo tufala hem baptaes. Wanem nao iumi savve lanem from example blo olketa lo bifor and distaem wea semsem? Olketa faithful wan hia no wikdaon or letem hand blo olketa for rest, and Jehovah hem rewardim olketa for wei wea olketa patient. Iumi tu laek for “followim example blo olketa wea kasem samting wea God promisim bikos olketa garem faith and olketa patient.”—Heb. 6:10-12.

15. Wanem nao wanfala wei wea faith savve strongim disison blo iumi for preach?

¹⁵ Iumi garem faith lo disfala message wea iumi preach abaotem, iumi barava willing tumas for sharem diswan witim evri pipol wea iumi meetim. Iumi trustim olketa promis blo God wea stap insaed Bible. (Sams 119:42; Aesaea 40:8) Iumi lukim tu hao olketa Bible profesi hem fulfill distaem. Iumi lukim hao olketa pipol changem laef blo olketa taem olketa start for followim olketa samting wea Bible talem. Disfala pruv hem strongim wei wea iumi savve dat disfala gud nius abaotem Kingdom hem message wea important for evriwan herem.

16. For fitim wanem Sams 46:1-3 storyim, hao nao faith lo Jehovah and Jesus hem strongim disison blo iumi for preach?

¹⁶ Iumi tu garem faith lo Jehovah, wea hem nao givim kam disfala message wea iumi preach abaotem, and iumi garem faith lo datwan wea hem putim olsem King blo datfala Kingdom, Jesus. (John 14:1) Nomata wanem situation nao iumi feisim, Jehovah bae evritaem strongim iumi and hem sef ples blo iumi. (Readim Sams 46:1-3.) And tu, iumi barava trustim hao Jesus hem gohed for leadim disfala preaching waka from heven, and hem iusim paoa and responsibility wea Jehovah givim hem for duim diswan.—Matt. 28:18-20.

17. Storyim wanfala example abaotem why nao iumi mas gohed for preach.

¹⁷ Faith savve strongim hao iumi savve trustim dat Jehovah bae blessim waka wea iumi duim, and samfala taem hem happen lo wei wea iumi no expectim. (Eklesiastes 11:6) Olsem example, evriday staka thousand pipol wakabaot go pas lo olketa tebol and trolley wea garem olketa literature blo iumi. Waswe, disfala wei for preach hem waka gud? Barava nao! Insaed November 2014 Kingdom Ministry Bilong Iumi, hem story abaotem wanfala young  university student wea laek for raetem story abaotem olketa Jehovah’s Witness. Hem no savve faendem wea nao wanfala Kingdom Hall hem stap, bat hem lukim wanfala tebol wea garem literature blo iumi lo campus blo olketa lo university, and hem faendem nao olketa information wea hem needim for raetem story blo hem. Gogo hem kamap wanfala baptaes Witness wea distaem hem serve olsem wanfala regular pioneer. Kaen experience olsem hem mekem iumi laek for preach bikos diswan showimaot hao staka pipol stap yet wea need for savve and herem disfala Kingdom message.

18. Why nao iumi sure dat disfala Kingdom preaching waka bae finis olsem hao Jehovah laekem?

¹⁸ Iumi barava sure waka for preachim Kingdom bae finis lo barava taem and hem bae no delay. Tingim wanem happen lo taem blo Noah. Jehovah showimaot hem man wea barava followim taem. Samting olsem 120 year bifor flood happen, Jehovah talem taem wea Flood bae start. Staka year bihaen, Jehovah talem Noah for buildim ark. Noah waka hard for samting olsem 40 or 50 year bifor flood hem start. Nomata staka pipol no interest, Noah gohed for talem warning message go kasem taem Jehovah sei for tekem olketa animal for go insaed lo ark. Then, lo barava taem wea Jehovah markem, “hemi satem doa.”—Jenesis 6:3; 7:1, 2, 16.

19. Wanem nao iumi savve luk forward lo hem sapos iumi no letem hand blo iumi for rest?

¹⁹ Klosap nao Jehovah bae finisim preaching waka, bae “hemi satem doa” lo olketa nogud samting lo system blo Satan and bae startim datfala raeteous niu world. Go kasem datfala taem, iumi laek followim example blo Noah, Habakkuk, and olketa narawan wea no letem hand blo olketa for rest. Iumi laek for putim preaching waka olsem main samting lo laef blo iumi, iumi mas patient, gohed garem strong faith lo Jehovah and olketa promis blo hem.