STUDY ARTICLE 40
“Protectim Gud Wanem Iu Kasem From God”
“Timothy, protectim gud wanem iu kasem from God.”—1 TIM. 6:20.
SONG 29 Showimaot Iumi Witness
WANEM IUMI BAE STORYIM *
1-2. Olsem 1 Timothy 6:20 talem, wanem nao Timothy kasem?
STAKA taem, iumi savve givim olketa samting wea iumi ownim wea garem hae price for narawan lukaftarem. Olsem example, iumi maet depositim selen blo iumi lo bank. And iumi expectim selen blo iumi for stap sef and bae hem no lus or bae no eniwan stealim. So iumi luksavve wat nao hem minim for trustim narawan for lukaftarem samting wea iumi ting lo hem olsem hem spesol.
2 Readim 1 Timothy 6:20. Aposol Paul remindim Timothy hao hem kasem samting wea barava spesol, wea hem nao stretfala savve abaotem plan blo God for olketa man. Jehovah trustim Timothy witim disfala privilege for “talemaot toktok blo God” and for “duim waka for talemaot gud nius.” (2 Tim. 4:2, 5) Paul encouragem Timothy for protectim gud wanem hem kasem from God. Olsem Timothy, iumi tu kasem olketa samting wea garem hae price for lukaftarem. Wanem nao olketa samting hia? And why nao iumi mas lukaftarem gud olketa samting hia wea garem hae price wea Jehovah givim lo iumi?
JEHOVAH TRUSTIM IUMI FOR PROTECTIM OLKETA TRUTH WEA SPESOL TUMAS
3-4. Wanem nao samfala reason why truth wea stap lo Bible hem spesol?
3 Jehovah kaen tumas for givim iumi stretfala savve abaotem olketa truth wea barava spesol, wea stap lo Bible. Olketa truth hia hem barava spesol bikos olketa teachim iumi hao for fren gud witim Jehovah and helpem iumi for savve wanem nao bae helpem iumi for barava hapi lo laef. Taem iumi acceptim olketa truth hia and followim, bae iumi free from wei for slave lo olketa false teaching and olketa nogud wei.—1 Cor. 6:9-11.
4 Nara reason why truth wea stap lo Bible hem spesol tumas hem bikos Jehovah showimaot diswan lo olketa wea hambol nomoa, and wea “laekem laef olowe.” (Acts 13:48) Olketa hia wea laekem laef olowe, olketa acceptim hao olketa teaching blo olketa truth hem kam thru lo datfala wakaman wea faithful and wise. (Matt. 11:25; 24:45) Iumi hard for lanem olketa tru samting hia seleva, and no eni samting hem spesol winim datwan.—Provebs 3:13, 15.
5. Wanem nao nara samting wea Jehovah trustim iumi for duim?
5 Jehovah trustim iumi tu witim disfala privilege for teachim truth abaotem hem and olketa plan blo hem lo olketa narawan. (Matt. 24:14) Disfala message wea iumi talemaot hem barava important bikos hem helpem pipol for kamap part lo famili blo Jehovah and givim chance lo olketa for kasem laef olowe. (1 Tim. 4:16) Nomata sapos iumi fit for duim staka samting or lelebet nomoa lo ministry, iumi gohed for sapotim disfala barava important waka wea gohed lo disfala taem. (1 Tim. 2:3, 4) Hem wanfala nambawan privilege for waka tugeta witim God!—1 Cor. 3:9.
HOL STRONG LO WANEM IU KASEM!
Timothy mas stand strong lo truth taem olketa narawan laek for mekem hem go difren (Paragraf 6 storyim diswan)
6. Wanem nao happen lo samfala wea no protectim truth wea olketa kasem?
6 Samfala lo taem blo Timothy olketa no tinghae lo privilege wea olketa garem for waka tugeta witim God. Demas hem lovem disfala world and hem lusim disfala privilege blo hem for gogo witim Paul. (2 Tim. 4:10) Luk olsem Phygelus and Hermogenes lusim ministry blo olketa bikos tufala fraet nogud tufala feisim semkaen persecution olsem Paul. (2 Tim. 1:15) Hymenaeus, Alexander, and Philetus kamap olketa apostate and lusim truth. (1 Tim. 1:19, 20; 2 Tim. 2:16-18) Luk olsem olketa pipol hia, lo bifor olketa strong lo spiritual saed bat gogo olketa lusim nao disfala wei for ting lo truth olsem spesol samting.
7. Olketa wanem teknik nao Satan iusim for againstim iumi?
7 Hao nao Satan trae for mekem iumi givap for hol strong lo spesol samting wea Jehovah trustim lo iumi? Lukim samfala teknik blo Satan. Hem iusim entertainment and media wea mekhae lo tingting and wei for duim samting wea hem savve datwan bae mekem iumi for lusim wei wea iumi hol strong lo truth. Hem iusim olketa wea iumi sem age or persecution for trae mekem iumi fraet mekem iumi stop for preach. And hem trae for mekem iumi lisin lo olketa idea blo olketa apostate mekem iumi lusim truth.—1 Tim. 6:20, 21.
8. Wanem nao iu lanem from experience blo wanfala brata wea nem blo hem Daniel?
8 Sapos iumi no careful, gogo bae iumi lusim wei wea iumi hol strong lo truth. Tingim experience blo Daniel, * wea lovem tumas olketa video game. Hem sei “Mi start for pleim olketa video game start taem mi ten years old nomoa. Lo firstaem, mi pleim olketa game wea olraet nomoa. Bat gogo mi start for pleim olketa game wea raf and wea join witim olketa demon.” Lo each day, hem savve pleim olketa video game for samting olsem 15 hour. Hem sei moa: “For tok stret, mi savve olketa kaen game olsem and taem wea mi spendem for plei hem mekem mi barava go farawe from Jehovah. Lo tingting blo mi, olketa principle wea stap lo Bible hem no for mi.” So sapos iumi no careful, olketa entertainment savve mekem iumi lusim wei wea iumi hol strong lo truth. Sapos datwan happen, bae hem mekem iumi for no protectim nao samting wea garem hae price wea Jehovah givim lo iumi.
HAO NAO IUMI SAVVE HOL STRONG LO TRUTH
9. Olsem 1 Timothy 1:18, 19 storyim, Paul comparem Timothy witim wanem samting?
9 Readim 1 Timothy 1:18, 19. Paul comparem Timothy witim wanfala soldia and hem encouragem hem for “gohed strong long nambawan faet.” Datfala faet hem no wanfala real faet bat hem wanfala spiritual faet. Lo wanem wei nao olketa Christian olketa olsem soldia lo wanfala faet? Olketa wanem kaen wei nao iumi need for garem for olsem olketa soldia blo Christ? Distaem bae iumi storyim faevfala leson wea iumi savve lanem from tokpiksa wea Paul storyim. Olketa leson hia savve helpem iumi for hol strong lo truth.
10. Wanem nao hem minim wei for lovem God, and why nao iumi needim datwan?
10 Mekem grow disfala wei for lovem God. Wanfala gud soldia bae faithful. Hem bae faet hard for protectim samwan hem lovem or wanfala samting wea spesol lo hem. Paul encouragem Timothy for mekem grow wei for lovem God, wea datwan minim for faithful lo God. (1 Tim. 4:7) Taem iumi mekem love blo iumi kamap moa big and wei wea iumi faithful lo God, datwan bae mekem iumi for barava laek for hol strong lo truth.—1 Tim. 4:8-10; 6:6.
Bihaen longfala day blo waka, iumi maet need for forcem iumiseleva for attendim wanfala meeting. Bat iumi bae kasem blessing taem iumi duim olsem! (Paragraf 11 storyim diswan)
11. Why nao iumi need for disciplinem iumiseleva?
11 Garem wei for disciplinem seleva. Wanfala soldia mas disciplinem hemseleva mekem hem savve gohed fit for duim waka blo hem. Timothy gohed fit lo spiritual wei for duim waka blo hem bikos hem followim advaes blo Paul for stap klia lo eni rong tingting and gohed garem olketa wei wea God laekem and for associate witim olketa nara brata and sista. (2 Tim. 2:22) Datwan minim hem mas disciplinem hemseleva. Iumi need for disciplinem iumiseleva mekem iumi savve winim disfala faet againstim wei for duim samting wea no stret. (Rome 7:21-25) And tu, iumi need for disciplinem iumiseleva for mekem iumi savve aotem olketa old wei and garem olketa niufala wei. (Eph. 4:22, 24) And taem iumi taet lo end blo day, iumi need for forcem iumiseleva for go meeting.—Heb. 10:24, 25.
12. Lo olketa wanem wei nao iumi savve kamap gud lo wei for iusim Bible?
12 Wanfala soldia need for practice hao for iusim weapon blo hem. For hem savve gud, hem need for practice evritaem. Olsem tu, iumi need for savve gud hao for iusim toktok blo God. (2 Tim. 2:15) Iumi savve lane abaotem samfala wei lo olketa meeting. Bat for iumi savve talem olketa narawan hao truth insaed lo Bible hem barava spesol, iumi need for garem gudfala schedule for duim study seleva. Iumi need for iusim toktok blo God for strongim faith blo iumi. Diswan minim iumi no just readim nomoa Bible, bat iumi need for ting raonem wanem iumi readim and duim research lo olketa pablikeson blo iumi mekem iumi savve lo stretfala mining blo olketa Scripture and hao for followim datwan. (1 Tim. 4:13-15) Then iumi savve fit for iusim Bible for teachim olketa narawan. And tu, diswan hem no minim for just readim nomoa wanfala verse lo Bible. Iumi laek for helpem olketa wea lisin for minim datfala verse, and savve hao for followim. Taem iumi garem schedule for duim study seleva, datwan bae helpem iumi for savve gud hao for iusim toktok blo God for teachim olketa narawan.—2 Tim. 3:16, 17.
13. Olsem Hebrew 5:14 storyim, why nao iumi mas garem fasin for luksavve?
13 Mas garem fasin for luksavve. Wanfala soldia mas fit for luksavve lo danger and trae for stap klia lo datwan. Iumi tu mas lane for luksavve lo olketa situation wea savve spoelem iumi, and then duim samting for no kasem datwan. (Provebs 22:3; readim Hebrew 5:14.) Olsem example, iumi need for wise taem iumi chusim wanem kaen hapitaem and entertainment. Staka taem olketa TV show and movie mekhae lo wei for durong. Olketa wei olsem God barava no laekem and datwan bae spoelem iumi. So iumi mas stap klia lo olketa entertainment wea savve spoelem love blo iumi for God.—Eph. 5:5, 6.
14. Hao nao fasin for luksavve hem helpem Daniel?
14 Daniel, wea iumi storyim finis hem luksavve lo problem wea kamaot from wei for pleim olketa raf video game and olketa video wea mekhae lo demon. Hem duim research lo Watchtower Library for helpem hem for deal witim datfala problem. Hao nao datwan affectim hem? Hem stop for pleim olketa game hia wea nogud. Hem finis for orderim olketa online game and stop for associate witim olketa wea pleim olketa game hia. Daniel sei: “Winim wei for spendem taem for pleim olketa video game, mi start for spendem taem for go aot or associate witim olketa fren lo kongregeson.” Distaem Daniel kamap pioneer and elder.
15. Why nao olketa story wea no tru hem danger tumas?
15 Olsem Timothy, iumi laek garem disfala wei for luksavve lo olketa danger blo false information wea olketa apostate savve spredim. (1 Tim. 4:1, 7; 2 Tim. 2:16) Olsem example, olketa maet laek spredim olketa story wea no tru abaotem olketa brata blo iumi, or for daotem organization blo Jehovah. Olketa kaen information hia wea no stret savve mekem faith blo iumi wikdaon. Iumi mas stap klia lo wei for bilivim olketa kaen story olsem. Why? Bikos olketa kaen story hia kam from “olketa man wea no garem stretfala tingting and wea no luksavve long samting wea tru.” Goal blo olketa hem for startim wei for “argue and raoa abaotem olketa word.” (1 Tim. 6:4, 5) Olketa laekem iumi for bilivim laea story blo olketa and olketa laekem iumi for no trustim olketa brata.
16. Olketa wanem samting wea savve disturbim iumi nao iumi mas stap klia lo hem?
16 No letem eni samting disturbim iumi. Olsem wanfala “gudfala soldia bilong Christ Jesus,” Timothy hem barava duim gud ministry blo hem and hem no letem wei for waka for selen or material samting for mekem hem go difren. (2 Tim. 2:3, 4) Olsem Timothy, iumi shud no letem wei for laekem tumas material samting for disturbim mind blo iumi. Olketa “riches wea savve switim man” hem savve mekem iumi lusim love blo iumi for Jehovah, for tinghae lo Bible, and feeling for laek talemaot gud nius lo olketa narawan. (Matt. 13:22) Iumi mas gohed garem laef wea simpol and iusim taem and strong blo iumi for mekem “Kingdom . . . mas first samting lo laef.”—Matt. 6:22-25, 33.
17-18. Wanem nao iumi savve duim for stap klia lo eni samting wea savve spoelem spiritual saed blo iumi?
17 Redi for duim samting kwiktaem. Wanfala soldia need for plan gud firstaem mekem hem savve wanem for duim. Jehovah trustim iumi so hem givim olketa samting for iumi lukaftarem, so iumi need for duim samting sapos iumi lukim danger. Wanem nao bae helpem iumi for kwiktaem duim samting? Iumi need for plan firstaem mekem iumi savve wanem for duim taem danger hem kamap.
18 Tingim disfala example, taem pipol go lo wanfala hipap, evritaem bifor program start olketa bae faendem ples for sidaon wea klosap lo door for go aot. Why nao olsem? Bikos olketa laekem ples wea isi for kwiktaem go aot taem wanfala emergency kamap. Lo sem wei tu, iumi redi firstaem and savve wanem for duim, sapos iumi lukluk lo Internet, or watchim wanfala movie or TV program then seke nomoa eni nogud piksa, raf fasin or information blo olketa apostate hem kamap. Sapos iumi redi for wanem maet happen, datwan bae mekem iumi kwiktaem for duim samting for no spoelem spiritual saed blo iumi, and iumi bae gohed for klin lo eye blo Jehovah.—Sams 101:3; 1 Tim. 4:12.
19. Olketa wanem blessing nao iumi bae kasem sapos iumi protectim datfala samting wea garem hae price wea Jehovah givim lo iumi?
19 Iumi mas protectim olketa samting wea garem hae price wea iumi kasem from Jehovah wea hem nao olketa truth lo Bible, and privilege wea iumi garem for teachim olketa narawan. Taem iumi duim datwan, iumi bae garem wanfala klin konsens, laef wea garem mining, and iumi hapi for helpem olketa narawan for savve lo Jehovah. Witim help blo hem, iumi bae fit for protectim datfala samting wea garem hae price wea hem trustim iumi for lukaftarem.—1 Tim. 6:12, 19.
SONG 127 Wei wea Mi Shud Garem
