1. Wanem nao olketa sista duim for sapotim organization and olketa wanem challenge nao staka sista feisim? (Lukim piksa lo kava.)

IUMI hapi for garem staka sista wea waka hard lo kongregeson! Olsem example, olketa savve tekpart lo olketa meeting and lo ministry. Samfala help for lukaftarem olketa Kingdom Hall, and olketa showimaot olketa kea lo olketa narawan lo kongregeson. Nomata olsem, olketa feisim olketa challenge tu. Samfala mas lukaftarem olketa olo parents. Olketa narawan mas deal witim olketa famili member wea againstim olketa. And samfala sista olketa singol parents wea waka hard for provaed for pikinini blo olketa tu.

2. Why nao iumi need for sapotim olketa sista?

² Why nao iumi shud sapotim olketa sista? Bikos pipol lo world no evritaem treatim olketa woman witim respect wea olketa shud kasem. And tu, Bible encouragem iumi for sapotim olketa. Olsem example, aposol Paul talem olketa lo kongregeson lo Rome for welkamim Phoebe and “helpem hem long eni samting wea hem needim.” (Rome 16:1, 2) Paul hem wanfala Pharisee bifor, luk olsem culture wea hem kam from olketa savve ting daonem olketa woman. Bat, taem hem kamap wanfala Christian hem followim example blo Jesus and respectim olketa woman and kaen lo olketa.—1 Cor. 11:1.

3. Hao nao Jesus treatim olketa woman, and hao nao hem ting lo olketa woman wea duim will blo God?

³ Jesus treatim evri woman witim respect. (John 4:27) Hem no ting lo olketa woman olsem hao olketa leader blo Jew religion ting lo olketa. Wanfala buk wea storyim Bible sei: “No enitaem Jesus tok daonem or no respectim olketa woman.” Bat, Jesus tinghae lo olketa woman wea duim will blo Dadi blo hem. And tu, hem ting lo olketa olsem olketa sista blo hem, hem storyim olketa and samfala man tu olsem part lo spiritual famili blo hem.—Matt. 12:50.

4. Wat nao bae iumi storyim lo disfala article?

 ⁴ Jesus evritaem redi for helpem olketa spiritual sista blo hem. Hem tinghae and defendim olketa. Iumi bae storyim hao iumi savve followim example blo Jesus lo wei for showimaot iumi tingim olketa sista.

5. Why nao samfala sista faendem hem hard for kasem gudfala association?

⁵ Iumi evriwan, olketa brata and sista needim wei for associate witim olketa narawan. Bat, samfala taem olketa sista faendem diswan hem hard. Why? Tingim koment blo samfala. Wanfala sista wea nem blo hem Jordan, * hem sei: “Bikos mi singol, staka taem mi feel olsem mi no sure lo wanem nao waka blo mi lo kongregeson, and mi no feel olsem mi part lo datfala kongregeson.” Kristen, wanfala pioneer wea muv go lo nara kongregeson for mekem ministry blo hem kamap moa big hem sei: “Taem iu muv lo nara kongregeson, maet iu savve feel lonely.” Samfala brata tu savve feel olsem. Samfala wea kam from olketa famili wea no evriwan olketa Jehovah’s Witness savve feel olsem olketa no part lo real famili blo olketa and lo semtaem olketa no feel olsem olketa part lo spiritual famili blo olketa tu. Olketa wea stap lo haos evritaem maet from olketa lukaftarem olketa famili member wea sik, olketa maet feel lonely tu. Annette hem sei: “Samfala taem mi no fit for acceptim olketa invitation blo olketa brata and sista bikos mi nao main wan wea lukaftarem mami blo mi.”

6. Hao nao Jesus helpem Martha and Mary, olsem Luke 10:38-42 storyim?

⁶ Jesus spendem taem witim olketa spiritual sista blo hem, hem wanfala gudfala fren for olketa. Tingim wei wea hem fren gud witim Mary and Martha, wea luk olsem tufala evriwan singol. (Readim Luke 10:38-42.) Lukim toktok blo Jesus and samting wea hem duim, hem mekem olketa no feel fraet. Mary no hol bak for go sidaon saed lo leg blo Jesus wea hem ples blo wanfala disaepol. * And taem Martha lukim Mary no helpem hem, hem feel free for go talem tingting blo hem lo Jesus. Lo datfala taem Jesus hem helpem tufala hia for lanem olketa important leson. And hem showimaot tu hao hem tingim olketa woman hia and brata blo tufala, Lazarus, taem hem visitim olketa lo olketa nara taem. (John 12:1-3) Dastawe, taem Lazarus hem barava sik big, Mary and Martha savve olketa savve askem Jesus for help.—John 11:3, 5.

7. Wanem nao wanfala wei wea iumi savve encouragem olketa sista?

⁷ For samfala sista, olketa meeting nao hem main taem wea olketa savve spendem witim olketa brata and sista. So iumi laek for iusim datfala chance for mekem olketa feel welkam, story witim olketa, and showimaot iumi tingim olketa. Jordan, wea iumi storyim finis hem sei: “Taem olketa narawan sei thankiu for olketa koment blo mi datwan encouragem mi, and samfala arrange for waka witim mi lo ministry, or olketa showimaot olketa tingim mi lo olketa narafala wei.” Hem gud for iumi showimaot lo olketa sista blo iumi hao olketa important lo iumi. Kia hem sei: “Sapos mi misstim wanfala meeting, mi savve bae mi kasem wanfala text message for chek sapos mi olraet. Datwan helpem mi for savve olketa brata and sista tingim mi.”

8. Hao nao iumi savve followim example blo Jesus?

⁸ Olsem wanem Jesus duim, iumi tu savve spendem taem witim olketa sista. Maet  iumi savve invaetem olketa for kaikai or for hapitaem. Taem iumi duim olsem, iumi laekem story blo iumi for encouragem olketa narawan. (Rome 1:11, 12) Olketa elder tu laek for garem sem tingting olsem Jesus. Jesus savve wei for singol hem no isi for olketa narawan, bat hem showimaot klia hao wei for hapi for olowe hem no depend lo wei for marit or for garem pikinini. (Luke 11:27, 28) Bat wei for kasem hapi for olowe hem kam from wei wea man hem putim service blo Jehovah first lo laef blo hem.—Matt. 19:12.

9. Wanem nao olketa elder savve duim for helpem olketa sista?

⁹ Hem barava important for olketa elder treatim olketa Christian woman olsem spiritual sista and mami blo olketa. (1 Tim. 5:1, 2) Hem gud for olketa elder story witim olketa sista bifor and bihaen olketa meeting. Kristen hem sei: “Wanfala elder luksavve mi barava busy and hem story lo mi for savve wanem nao schedule blo mi, mi barava tinghae lo wei wea hem tingim mi.” Taem olketa elder evritaem markem taem for story witim olketa sista, datwan showimaot olketa tingim olketa sista. * Annette, wea iumi storyim abaotem finis, hem storyim hao hem gud samting for  story witim olketa elder. Hem sei: “Taem mi duim datwan, mi savve gud lo olketa, and olketa tu savve gud lo mi. Then, taem mi kasem wanfala hard taem, mi feel free for askem help from olketa.”

10. Wanem nao savve helpem olketa sista blo iumi for hapi?

¹⁰ Iumi evriwan, olketa man and woman, iumi hapi taem olketa narawan luksavve lo wanem iumi duim, and olketa talem hao olketa tinghae lo waka wea iumi duim. Bat lo narasaed, sapos olketa no tinghae lo waka blo iumi and wanem iumi duim, iumi savve feel discourage. Wanfala singol pioneer wea nem blo hem Abigail, hem sei: “Samfala taem hem feel olsem olketa no tingim hem.” Hem sei: “Pipol savve ting lo mi olsem mi sista blo man olsem or mi dota blo man olsem. Bat samfala taem mi feel olsem olketa no savve gud lo mi nomoa.” Tingim koment blo wanfala sista wea nem blo hem Pam, taem hem singol hem missionary for staka year, gogo hem mas go bak lo hom for lukaftarem parents blo hem. Distaem Pam hem winim 70 year, and hem gohed pioneer. Hem sei: “Samting wea helpem mi nao hem taem olketa narawan talem hao olketa tinghae lo wanem mi duim.”

11. Hao nao Jesus showimaot hem tinghae lo olketa woman wea waka witim hem lo ministry blo hem?

¹¹ Jesus tinghae lo help wea hem kasem from olketa faithful woman wea waka tugeta witim hem and helpem hem. (Luke 8:1-3) Hem no just letem olketa for kasem datfala privilege bat hem storyim tu olketa deep spiritual truth lo olketa. Olsem example, hem talem olketa hao bae hem dae and resurrect. (Luke 24:5-8) Olsem hao hem redyim olketa aposol, hem redyim olketa woman hia for olketa hard taem wea bae kamap. (Mark 9:30-32; 10:32-34) Nomata olketa aposol ranawe taem olketa arrestim Jesus, samfala lo olketa woman hia wea sapotim hem olketa stap witim hem taem hem dae lo post.—Matt. 26:56; Mark 15:40, 41.

12. Wanem waka nao Jesus trustim olketa woman for duim?

¹² Jesus trustim olketa woman witim important waka. Olsem example, olketa faithful woman nao olketa first wan for lukim Jesus taem hem resurrect. And hem askem olketa for go talem olketa aposol dat hem laef bak from dae. (Matt. 28:5, 9, 10) And lo Pentecost 33 C.E., olketa woman tu maet stap taem God pourimaot holy spirit. Sapos olsem, olketa sista hia wea kasem anointing, olketa tu fit for story lo olketa didifren languis. And for talem olketa narawan abaotem “olketa nambawan samting wea God hem duim.”—Acts 1:14; 2:2-4, 11.

13. Wanem nao olketa Christian woman distaem duim, and hao nao iumi savve showimaot iumi tinghae lo wanem olketa duim?

¹³ Olketa sista fit for kasem praise for evri waka wea olketa duim lo service blo Jehovah. Samfala lo olketa waka hia hem for duim construction and maintenance lo olketa building, sapotim olketa difren languis grup, and for volunteer lo olketa Bethel. Olketa help lo olketa disaster relief waka, help for transleitim olketa pablikeson blo iumi, and olketa serve olsem olketa pioneer and missionary. Olsem olketa brata tu, olketa sista attendim pioneer skul, Skul for Olketa Kingdom Evangelizer and Gilead Skul. And tu, olketa waef helpem olketa hasband blo olketa wea garem olketa big responsibility lo kongregeson and lo organization. Olketa brata hia wea olsem “present” from Jehovah bae no fit for duim olketa responsibility hia sapos waef hem no sapotim olketa. (Eph. 4:8) Waswe, iu tingim samfala wei wea iu savve sapotim olketa sista hia lo waka blo olketa?

14. Olsem Sams 68:11 storyim, wanem nao olketa wise elder savve duim?

 ¹⁴ Olketa elder wea wise luksavve olketa sista olsem bigfala army wea willing for talemaot gud nius and staka taem olketa savve gud hao for preach. (Readim Sams 68:11.) So olketa elder savve lane from experience blo olketa. Abigail, wea iumi storyim finis hem sei, hem tinghae lo wei wea olketa brata savve ask sapos hem savve lo samfala gudfala wei for story lo olketa pipol lo territory. Hem sei: “Datwan helpem mi for luksavve hao Jehovah hem garem ples for mi insaed organization blo hem.” And tu, olketa elder luksavve hao olketa faithful mature sista, olketa savve gud lo hao for helpem olketa young sista for deal witim olketa challenge wea olketa feisim. (Titus 2:3-5) Tru nao iumi barava fit for tinghae lo olketa faithful sista blo iumi!

15. Wanem taem nao olketa sista maet needim samwan for story or defendim olketa?

¹⁵ Samfala taem, olketa sista needim samwan for helpem olketa taem olketa feisim samfala kaen challenge. (Aesaea 1:17) Olsem example, wanfala sista wea widow or wea divorce maet needim samwan for story for hem or helpem hem for duim samfala waka wea hasband blo hem savve duim for hem bifor. Wanfala olo sista maet needim help for samwan story for hem saed lo medical. Or wanfala pioneer sista wea waka lo wanfala theocratic project maet needim samwan for defendim hem taem olketa narawan maet kwestinim wei wea hem no duim moa samting lo ministry olsem olketa nara pioneer. Wanem moa iumi savve duim for helpem olketa sista blo iumi? Bae iumi storyim moa example blo Jesus.

16. Hao nao Jesus defendim Mary olsem Mark 14:3-9 storyim?

¹⁶ Jesus hem kwiktaem for sapotim olketa spiritual sista blo hem taem pipol no minim gud olketa. Olsem example, hem defendim Mary taem Martha no hapi lo hem. (Luke 10:38-42) And Jesus defendim Mary mek-tu taem moa, taem olketa narawan tok againstim Mary and sei hem mekem wanfala nogud disison. (Readim Mark 14:3-9.) Jesus savve lo reason why Mary duim datwan and praisem hem, taem hem sei: “Gudfala samting nao hem duim for mi. . . . Hem duim nomoa wanem hem fit for duim.” Jesus profesi tu abaotem disfala gud samting wea Mary duim bae evriwan herem “long evri ples long world wea olketa preachim datfala gud nius.” And hem nao disfala article duim distaem. Hem barava interesting hao Jesus joinim wei wea Mary hem kaen witim preaching waka wea kasem evriwea lo world! Olketa toktok blo Jesus mas comfortim Mary nomata olketa narawan no minim hem gud!

17. Storyim wanfala example lo taem wea iumi maet need for defendim wanfala sista.

¹⁷ Waswe, iu defendim olketa spiritual sista blo iu lo taem wea olketa needim? Tingim disfala example, samfala pablisa lukim wanfala sista wea hasband blo hem no Witness savve arrive leit lo olketa meeting and afta meeting hem go bak kwiktaem. Olketa lukim dat hem no savve tekem kam olketa pikinini blo hem evritaem. So olketa story abaotem hem and sei, why nao hem no demandim hasband blo hem for letem olketa pikinini for kam lo meeting. Tru samting nao, sista blo iumi hem duim wanem hem fit for duim. Hem no kontrolem evri samting lo schedule blo hem. No hemseleva nao bae mekem disison abaotem olketa pikinini. Taem olsem, wanem nao iu savve duim? Sapos iu praisem datfala sista and talem lo olketa narawan olketa gud samting wea hem duim, iu bae stopem wei wea olketa tok spoelem hem.

18. Wanem nao olketa nara wei wea iumi savve helpem olketa sista blo iumi?

¹⁸ Iumi showim iumi tingim olketa sista blo iumi taem iumi duim samting for helpem  olketa. (1 John 3:18) Annette, wanfala sista wea lukaftarem mami blo hem wea sik, hem sei: “Samfala brata and sista kam for lukaftarem mami blo mi lelebet taem, or olketa savve tekem kam kaikai. Diswan mekem mi luksavve olketa lovem mi and mi part lo kongregeson.” Jordan tu kasem help. Wanfala brata givim hem samfala idea lo hao for keepim car blo hem. Hem sei: “Hem gud for savve hao olketa brata and sista tingim safety blo mi.”

19. Wanem moa samfala wei wea olketa elder savve helpem olketa sista?

¹⁹ Olketa elder tu traem best for luksavve lo need blo olketa sista. Olketa elder luksavve Jehovah laekem olketa for treatim gud olketa sista. (Jas. 1:27) So olketa elder followim example blo Jesus for garem fasin for luksavve, taem olketa no just mekem olketa rul bat olketa kaen and minim olketa sista. (Matt. 15:22-28) Taem olketa elder waka hard for helpem olketa sista, datwan mekem olketa sista luksavve Jehovah and organization blo hem tingim olketa. Taem grup overseer blo Kia herem dat hem bae muv lo nara haos, hem kwiktaem arrangem help. Kia hem sei: “Datwan hem aotem stress blo mi. And toktok wea elder talem and help wea olketa givim, hem showimaot mi important lo kongregeson and mi no stap seleva taem problem hem kamap.” 

20-21. Hao nao iumi savve showimaot iumi tinghae lo evri sista blo iumi?

²⁰ Lo evri kongregeson blo iumi distaem, iumi savve lukim hao staka sista showimaot nambawan example lo wei for waka hard, and olketa fit for kasem sapot blo iumi. Olsem iumi savve lanem from example blo Jesus, iumi savve helpem olketa taem iumi spendem taem witim olketa and savve gud lo olketa. Iumi savve showimaot iumi tinghae lo wanem olketa duim lo waka blo God. And iumi savve defendim olketa tu lo taem wea olketa needim.

²¹ Lo end lo leta blo aposol Paul for olketa lo Rome, hem storyim naenfala Christian woman. (Rome 16:1, 3, 6, 12, 13, 15) Masbi olketa woman hia kasem encouragement taem olketa herem hem sei hello and praisem olketa. Lo sem wei tu, iumi laek for sapotim evri sista blo iumi wea stap lo kongregeson. Taem iumi duim olsem, iumi showimaot iumi barava tinghae lo olketa olsem olketa part lo spiritual famili blo iumi.