1. Wanem invitation nao Jesus talem lo fofala fisherman, and wanem nao olketa duim?

DISAEPOL Peter, Andrew, James, and John garem fishing bisnis. Tingim, masbi olketa barava sapraes taem olketa herem invitation blo Jesus wea sei: “Kam followim mi. Mi bae teachim iufala hao for fishing for kasem pipol.” * Wanem nao olketa duim? Bible sei: “Semtaem nomoa, tufala lusim olketa net hia and followim hem nao.” (Matt. 4:18-22) Datfala disison bae changem full laef blo olketa. Winim wei for olketa kasem fish, olketa bae “fishing for kasem pipol.” (Luke 5:10) Distaem, Jesus talem sem invitation lo olketa wea honest and wea lovem truth. (Matt. 28:19, 20) Waswe, iu acceptim finis invitation blo Jesus for kamap fisherman for kasem pipol?

2. Why nao iumi shud tingting gud firstaem bifor iumi disaed for kamap fisherman for kasem pipol, and wanem nao bae helpem iumi for duim datwan?

² Maet iu gohed gud lo Bible study, and iu start for ting raonem sapos iu bae kamap wanfala pablisa blo gud nius. Sapos iu hol bak for acceptim invitation blo Jesus, no feel discourage. Wei wea iu hol bak hem showimaot iu luksavve dat disfala disison hem barava important. Hem tru, Bible sei Peter and olketa fren blo hem semtaem nomoa lusim olketa net blo olketa for fishing. Bat Peter and brata blo hem no seke nomoa mekem disfala disison. Olketa bin savve and acceptim Jesus olsem Messiah, winim sixfala month bifor. (John 1:35-42) Lo sem wei tu, iu lanem finis staka samting abaotem Jehovah and Jesus, and iu laek for gohed gud lo spiritual wei. Bat iu shud ting raonem gud  firstaem bifor iu mekem disfala disison. Wanem nao helpem Peter, Andrew, and olketa narawan for mekem disison blo olketa?

3. Olketa wanem fasin nao bae strongim feeling blo iu for acceptim invitation blo Jesus?

³ Olketa first disaepol blo Jesus garem strong feeling for laek preach, olketa garem savve, no fraet, and savve disciplinem olketa seleva. Olketa wei hia barava helpem olketa for kamap gudfala fisherman for kasem pipol. Lo disfala study, bae iumi storyim olketa wei hia wea bae helpem iu for kamap wanfala disaepol blo Christ wea duim gud lo disfala waka for preach and teach.

4. Wanem nao muvim Peter for kamap wanfala fisherman?

⁴ For sapotim famili blo hem, Peter hem wanfala fisherman, and datwan hem no just bikos hem waka blo hem nomoa, bat, luk olsem Peter lovem wei for fishing. (John 21:3, 9-15) And tu, hem lovem wei for kamap fisherman for kasem pipol. Witim help blo Jehovah, Peter hem barava duim gud datfala waka.—Acts 2:14, 41.

5. Olsem Luke 5:8-11 storyim, why nao Peter fraet, and wanem nao savve helpem iumi for winim kaen feeling olsem?

⁵ Iumi preach bikos iumi lovem Jehovah, datwan nao main reason why iumi duim disfala waka. Love blo iumi for Jehovah savve helpem iumi for winim eni feeling for tingse iumi no fit. Taem Jesus invaetem Peter for kamap wanfala fisherman for kasem pipol, hem sei: “Iu no fraet.” (Readim Luke 5:8-11.) Peter no fraet lo wanem nao maet happen sapos hem kamap wanfala disaepol. Bat, hem sapraes lo datfala mirakol blo Jesus wea mekem olketa for kasem staka fish, and Peter feel  olsem hem no fit for waka witim Jesus. Iu tu maet feel dat staka samting tumas nao insaed lo wei for kamap disaepol blo Christ. Sapos olsem, strongim love wea iu garem for Jehovah, Jesus, and for olketa neiba blo iu, and datwan nao bae muvim iu for acceptim invitation blo Jesus for kamap wanfala fisherman for kasem pipol.—Matt. 22:37, 39; John 14:15.

6. Wanem nao olketa nara reason wea muvim iumi for preach?

⁶ Tingim samfala reason moa wea muvim iumi for laek preach. Iumi laek obeyim komand blo Jesus wea sei: “Go and teachim pipol . . . for kamap disaepol.” (Matt. 28:19, 20) And tu, iumi preach from pipol olketa olsem sheepsheep wea “garekil and stap olobaot” and olketa barava need for lanem truth abaotem Kingdom. (Matt. 9:36) Jehovah laekem for evri difren kaen man for sev and for garem stretfala savve abaotem olketa tru teaching.—1 Tim. 2:4.

7. Hao nao Rome 10:13-15 showimaot dat preaching waka hem important?

⁷ Taem iumi ting abaotem gud samting wea preaching waka blo iumi savve duim. Datwan hem muvim iumi for laek duim disfala waka for sevem laef blo pipol. Disfala waka hem no olsem wanfala fisherman wea kasem fish for kaikaim or salem, bat iumi kasem pipol for sevem laef blo olketa.—Readim Rome 10:13-15; 1 Tim. 4:16.

8-9. Wanem nao wanfala fisherman mas savve lo hem, and why?

⁸ Lo taem blo Jesus, wanfala Israelite fisherman hem mas savve wat kaen fish nao hem laek for kasem. (Levitikas 11:9-12) And tu, hem mas savve wea for go for kasem kaen fish olsem. Olketa fish bae stap lo ples wea fitim olketa and wea staka kaikai blo olketa hem stap. And hem important tu for savve wanem taem for go fishing. Wanfala missionary wea stap lo wanfala Pacific island hem lanem wat taem nao best taem for kasem fish. Wanfala brata lo there invaetem hem for tufala go fishing. Datfala missionary sei lo hem: “Bae mi meetim iu lo naen klok tumoro morning.” Datfala brata sei olsem lo hem: “Iu savve, iumi bae no followim taem wea fitim iumi, bat bae iumi followim taem wea fit for iumi kasem fish.”

⁹ Lo sem wei tu, olketa fisherman for kasem pipol lo first century olketa savve go lo olketa ples wea bae olketa meetim pipol, and olketa savve go lo taem wea hem bae isi for kasem olketa. Olsem example, olketa follower blo Jesus olketa preach lo temple and lo sinagog, from haos tu haos, and lo olketa market. (Acts 5:42; 17:17; 18:4) Iumi tu need for savve lo wei blo pipol wea stap lo territory blo iumi. Iumi need for change fitim olketa and preach lo ples and taem wea bae hem isi for kasem staka pipol.—1 Cor. 9:19-23.

10. Organization blo Jehovah hem provaedem wanem kaen tul for iumi?

¹⁰ Wanfala fisherman hem need for garem raet tul and hem mas savve hao for iusim. Iumi tu need for garem evri stretfala tul for waka blo iumi. And iumi mas savve hao for iusim. Jesus talem kliafala instruction for olketa disaepol blo hem lo hao for fishing for kasem pipol. Hem talem olketa wanem for tekem, wea for preach, and wanem for talem. (Matt. 10:5-7; Luke 10:1-11) Distaem tu, organization blo Jehovah hem provaedem wanfala Teaching Toolbox wea hem garem olketa tul wea iumi needim for duim gud waka blo iumi. * And iumi kasem training tu lo hao for iusim olketa tul hia. Datfala training savve  helpem iumi for no fraet and for savve gud hao for duim waka blo iumi.—2 Tim. 2:15.

11. Why nao olketa wea fishing for kasem pipol shud no fraet?

¹¹ Olketa fisherman need for no fraet. Samfala taem olketa feisim samfala samting wea olketa no expectim lo sea. Staka taem olketa waka lo naet, and lo olketa taem wea seke nomoa sea hem raf. Olketa wea fishing for kasem pipol need for no fraet tu. Taem iumi start for preach and iumi sei iumi Jehovah’s Witness, iumi bae feisim tu olketa raf sea wea hem nao maet famili againstim iumi, olketa fren maet mekfani lo iumi, and pipol maet no laek herem message blo iumi. Bat iumi shud no sapraes, bikos Jesus warnim iumi hao olketa wea followim hem bae pipol againstim olketa.—Matt. 10:16.

12. Olsem Joshua 1:7-9 storyim, wanem nao savve helpem iumi for lane for no fraet?

¹² Hao nao iu savve lane for no fraet? First, iu mas barava sure Jesus gohed for leadim disfala waka from heven. (John 16:33; Rev. 14:14-16) Then, strongim faith blo iu lo olketa promis blo Jehovah dat hem bae kea for iu. (Matt. 6:32-34) Taem faith blo iu kamap moa strong, bae iu no fraet. Peter and olketa fren blo hem showimaot olketa garem bigfala faith taem olketa lusim fishing bisnis blo olketa for followim Jesus. Olsem tu, iu garem bigfala faith, taem iu talem olketa fren and olketa famili member hao iu start for  studyim Bible witim olketa Jehovah’s Witness and for attendim olketa meeting! Masbi iu mekem olketa bigfala change lo wei blo iu and wanem iu duim mekem iu savve followim olketa raeteous standard blo Jehovah. For duim datwan, iumi needim tu faith and wei for no fraet. Taem iu gohed lane for no fraet, iu bae barava sure dat “eniples wea yu go long hem, Jehovah, God blong yu bae stap wetem yu.”—Readim Joshua 1:7-9.

13. Hao nao wei for ting raonem olketa samting wea Jehovah bin duim and wei for prea savve helpem iu for lane for no fraet?

¹³ Wanem moa savve helpem iu for lane for no fraet? Prea lo Jehovah for helpem iu for no fraet. (Acts 4:29, 31) Jehovah bae ansarem olketa prea blo iu and no lusim iu. Hem bae evritaem sapotim iu. And tu, iu savve ting raonem wanem Jehovah bin duim for sevem olketa narawan bifor. Iu savve tingim tu hao Jehovah helpem iu for winim olketa challenge and strongim iu for mekem olketa change lo laef blo iu. For sure, Jehovah wea leadim pipol blo hem go thru lo Red Sea savve helpem iu for kamap wanfala disaepol blo Christ. (Eksodas 14:13) Iu savve garem tu sem kaen faith olsem man wea raetem Psalm wea sei: “[Jehovah] hemi stap wetem mi, nao bae mi no save fraet. No eniwan nao save duim eni nogud samting long mi?”—Sams 118:6.

14. Wanem nao iu lanem from experience blo Masae and Tomoyo?

¹⁴ Narafala wei wea iumi savve lane for no fraet hem taem iumi savve hao Jehovah helpem pipol wea lo firstaem olketa savve fraet tumas, gogo olketa lane for no fraet. Tingim experience blo wanfala sista wea nem blo hem Masae. Hem savve shame tumas and hem no savve hao for talemaot faith blo hem lo olketa narawan. Taem hem ting for story lo olketa stranger, hem olsem wanfala hae wall nao stopem hem. So hem traem best blo hem for mas strongim love blo hem for God and for olketa narawan. Hem tingim hao taem wea iumi stap distaem hem short tumas and iumi mas preachim disfala gud nius, so hem prea lo Jehovah for helpem hem for laek duim datwan. Masae winim wei for fraet and gogo hem serve olsem wanfala regular pioneer tu. Jehovah savve helpem tu olketa niu pablisa for “no fraet.” Tingim experience blo wanfala sista wea nem blo hem Tomoyo. Taem hem start for preach from haos tu haos, firstfala haosholder wea hem meetim hem singaot lo hem olsem: “Mi no laekem olketa Jehovah’s Witness!” and hem satem door. Tomoyo no fraet and talem lo partner blo hem: “Iu herem datwan? Mi no talem yet eniting bat hem luksavve nao dat mi wanfala Jehovah’s Witness. Mi barava hapi!” Distaem Tomoyo hem wanfala regular pioneer.

15. Wanem nao wei for disciplinem iumiseleva, and why nao datwan hem important for olketa Christian?

¹⁵ For duim gud waka olsem wanfala fisherman, man need for garem wei for disciplinem hemseleva. Wei for disciplinem seleva hem minim “wei for forcem iumiseleva for duim samting wea iumi need for duim.” Olketa wea ranem fishing bisnis mas disciplinem olketa seleva for wekap early morning and for gohed waka go kasem taem waka hem finis. And for duim datfala waka nomata sapos weather hem nogud. Iumi tu need for disciplinem iumiseleva sapos iumi laek for gohed strong and finisim waka blo iumi.—Matt. 10:22.

16. Hao nao iumi savve garem wei for disciplinem seleva?

¹⁶ Wei for disciplinem seleva hem no samting wea iumi born witim. Bat normal wei blo iumi hem for duim nomoa samting wea hem isi for duim. Wei for disciplinem seleva hem  minim iumi need for kontrolem seleva. Dastawe, iumi need for trainim iumiseleva for duim olketa samting wea maet hem hard for iumi duim. Jehovah hem givim iumi help thru lo holy spirit blo hem.—Gal. 5:22, 23.

17. Olsem 1 Corinth 9:25-27 storyim, hao nao aposol Paul storyim wei wea hem mas waka hard for disciplinem hemseleva?

¹⁷ Aposol Paul hem man wea disciplinem hemseleva. Bat hem sei tu hem mas “whipim” body blo hem for duim stret samting. (Readim 1 Corinth 9:25-27.) Hem encouragem olketa narawan for disciplinem olketa seleva and for duim olketa samting lo wei wea “stret and no olobaot.” (1 Cor. 14:40) Iumi mas disciplinem iumiseleva tu for mekem iumi garem wanfala gud spiritual schedule wea insaed diswan hem for share evritaem lo disfala waka for fishing for kasem pipol.—Acts 2:46.

18. Wat nao bae mekem Jehovah ting lo iumi olsem iumi duim gud waka blo iumi?

¹⁸ Wanfala fisherman bae ting lo hemseleva olsem hem duim gud waka blo hem taem hem kasem staka fish. Bat waka blo iumi hem no depend lo haomas pipol nao iumi helpem for kam insaed lo organization blo God. (Luke 8:11-15) Jehovah bae ting lo iumi olsem iumi duim gud waka blo iumi taem iumi no givap for preachim gud nius and teachim olketa narawan. Why nao olsem? Bikos iumi obeyim hem and Son blo hem.—Mark 13:10; Acts 5:28, 29.

19-20. Wat nao spesol reason wea iumi garem for iumi mas preach distaem?

¹⁹ Lo samfala kantri, olketa savve letem for duim fishing insaed lo samfala month nomoa. So olketa fisherman wea stap lo olketa ples olsem, olketa barava busy and hariap for fishing lo taem wea season hia hem gogo for finis. Iumi olketa fisherman for kasem pipol, iumi garem tu reason for mas preach distaem. End blo disfala system hem kakam klosap tumas! Lelebet taem nomoa hem stap for iumi duim disfala waka for sevem laef blo pipol. Iumi no laek for delay or feel olsem iumi savve weit go kasem wanfala taem wea fitim then iumi savve duim disfala important waka.—Eklesiastes 11:4.

²⁰ Distaem nao iumi savve strongim feeling for laek preach, lane for savve gud lo Bible, lane for no fraet, and lane for disciplinem seleva. Iu savve joinim winim eit million pipol wea fishing for kasem pipol, and iu bae kasem hapi wea kam from Jehovah. (Nehemaea 8:10) Disaed strong for barava share insaed disfala waka go kasem taem hem finis. Lo nextfala article bae iumi storyim thrifala wei wea iumi savve strongim disison blo iumi for gohed for duim disfala preaching waka abaotem Kingdom olsem olketa fisherman for kasem pipol.