1. Olketa man and woman wea faithful garem wanem privilege?

INSAED famili blo Jehovah hem Jesus, wea hem “firstborn long evri samting wea God wakem,” and staka angel tu. (Col. 1:15; Sams 103:20) Taem Jesus lo earth, hem showimaot olketa man and woman wea faithful tu savve insaed datfala famili and olketa fit for kolem Jehovah, Dadi blo olketa. Jesus talem olketa disaepol blo hem Jehovah hem “Dadi bilong mi wea hem Dadi bilong iufala tu.” (John 20:17) Taem iumi dedicate lo Jehovah and baptaes, iumi joinim wanfala big spiritual famili blo olketa brata and sista.​—Mark 10:29, 30.

2. Wanem nao bae iumi storyim lo disfala study?

² Samfala brata and sista faendem hem hard for ting lo Jehovah olsem Dadi blo olketa. And samfala faendem hem hard for showimaot love lo olketa brata and sista lo kongregeson. Lo disfala study, bae iumi storyim hao Jesus helpem iumi for ting lo Jehovah hem Dadi blo iumi and for barava lovem Jehovah. And bae iumi storyim hao for followim example blo Jehovah for lovem olketa brata and sista.

3. Why nao Jesus teachim iumi for kolem Jehovah “Dadi”?

³ Jehovah hem Dadi wea lovem iumi. Jesus lovem Dadi blo hem, and hem no fraet for storyim feeling blo hem lo Jehovah. Jesus laekem iumi for garem semkaen feeling olsem hem abaotem Jehovah. Dastawe Jesus teachim olketa disaepol blo hem for kolem Jehovah “Dadi” taem olketa prea. (Matt. 6:9) Jesus no talem olketa for  kolem Jehovah “Olmaeti,” “Creator,” or “King for olowe,” nomata olketa title hia barava fitim Jehovah. (Gen. 49:25, NW; Isa. 40:28, NW; 1 Tim. 1:17) Bat Jesus laekem for iumi tingim hao Jehovah hem “Dadi” blo iumi.

4. Hao nao iumi savve Jehovah laek for fren gud witim iumi?

⁴ Maet iumi faendem hem hard for ting lo Jehovah hem Dadi blo iumi. Datwan savve olsem sapos dadi blo iumi no kaen lo iumi, bae hem hard for iumi minim dadi wea lovem pikinini. Bat Jehovah hem wanfala gud dadi. Hem barava interest lo iumi and hem laek for fren gud witim iumi. Dastawe Bible sei: “Fren gud witim God and bae hem fren gud witim iufala.” (Jas. 4:8) Jehovah lovem iumi, and hem sei hem bae barava lukaftarem iumi olsem wanfala gud dadi.

5. Olsem Luke 10:22 storyim, hao nao Jesus hem gudfala example for fren gud witim Jehovah?

⁵ Jesus hem gudfala example lo hao for fren gud witim Jehovah. Jesus barava savve gud lo Jehovah and hem followim gudfala example blo Hem. Dastawe Jesus sei: “Man wea lukim mi hem lukim Dadi tu.” (John 14:9) Jesus hem olsem wanfala big brata wea showim example lo hao for respectim and obeyim Dadi, and hao for duim wanem Jehovah laekem. And taem Jesus lo earth, hem showimaot olketa gudfala wei blo Jehovah. (Readim Luke 10:22.) Bae iumi storyim samfala example abaotem datwan.

6. Hao nao Jehovah showimaot hem laek lisin lo olketa prea blo Jesus?

⁶ Jehovah lisin lo olketa prea blo iumi. Tingim hao Jehovah barava lisin lo olketa prea blo firstborn Son blo hem, Jesus, taem hem stap lo earth. (Luke 5:16) Jehovah lisin lo prea blo Jesus abaotem olketa important samting, olsem for disaedem hu nao bae kamap 12-fala aposol. (Luke 6:12, 13) Jehovah herem tu prea wea Jesus talem bifor Judas givim Jesus lo olketa enemy. Jesus prea lo Dadi blo hem abaotem hao hem wari abaotem hard  samting wea bae hem kasem. From Jehovah herem prea blo Jesus, hem sendem wanfala angel for strongim hem.​—Luke 22:41-44.

7. From iumi savve Jehovah ansarem olketa prea blo iumi, wanem nao iumi laek for duim?

⁷ Distaem tu Jehovah lisin lo olketa prea blo pipol blo hem, and hem ansarem lo best wei and lo barava taem. (Sams 116:1, 2) Wanfala sista lo India experiencem datwan. Hem savve gohed warim staka samting, so hem barava prea lo Jehovah abaotem datwan. Hem sei: “Datfala May 2019 JW Broadcasting^® wea story abaotem hao for deal witim olketa wari barava helpem mi. Mi luksavve datwan hem ansa lo prea blo mi.”

8. Hao nao Jehovah showimaot hem lovem Jesus?

⁸ Jehovah lovem and lukaftarem iumi olsem hem lovem and lukaftarem Jesus taem hem stap lo earth. (John 5:20) Jehovah encouragem Jesus taem hem sorre, hem helpem Jesus for gohed faithful, and hem mek sure Jesus garem wanem hem needim. And tu, Jehovah no hol bak for talem Jesus hem lovem and hapi lo hem. (Matt. 3:16, 17) Jesus savve Dadi blo hem bae lukaftarem hem and bae no lusim hem.​—John 8:16.

9. Hao nao iumi savve Jehovah lovem iumi?

⁹ Jehovah showimaot hem lovem iumi tu. Olsem example, Jehovah leadim iumi kam lo hem and givim iumi wanfala spiritual famili wea encouragem iumi taem iumi sorre. (John 6:44) Jehovah givim iumi staka spiritual kaikai tu for helpem iumi gohed faithful lo hem. And hem mek sure iumi garem wanem iumi needim. (Matt. 6:31, 32) Taem iumi tingim olketa samting wea Jehovah duim for iumi, datwan mekem iumi for barava lovem hem.

10. Hao nao Jehovah ting lo olketa brata and sista, and wanem nao iumi lanem from datwan?

¹⁰ Jehovah lovem evri brata and sista. Bat maet iumi faendem hem hard for showimaot love lo samfala brata and sista hia. Maet datwan bikos hem culture or wei blo olketa hem difren from iumi. Or maet olketa duim samting wea mekem iumi feel nogud. Bat iumi savve duim samting for mekem kongregeson for gohed stap gud. Iumi savve followim example blo Jehovah and showimaot love lo evri brata and sista. (Eph. 5:1, 2; 1 John 4:19) Bae iumi storyim wanem iumi savve lanem from example blo Jehovah.

11. Hao nao Jesus followim example blo Jehovah for “barava kaen tumas”?

¹¹ Jehovah hem “barava kaen tumas.” (Luke 1:78) Man wea kaen hem feel sorre taem hem lukim samwan kasem hard samting, and hem duim samting for helpem and comfortim hem. Jesus followim example blo Jehovah for kaen lo pipol. (John 5:19) Wantaem hem lukim pipol wea “stap olobaot olsem olketa sheepsheep wea no garem eni man for lukaftarem olketa” and hem “barava sorre tumas long olketa.” (Matt. 9:36) Hem no just sorre lo olketa nomoa, bat hem duim samting for helpem olketa. Hem healim olketa wea sik, and strongim olketa wea sorre and wikdaon.​—Matt. 11:28-30; 14:14.

12. Storyim example lo hao for helpem olketa brata and sista.

¹² Taem iumi savve lo hard samting wea olketa brata and sista feisim, bae iumi luksavve hao for helpem olketa. Olsem example, maet iumi faendaot wanfala sista garem health problem. Hem no laek  askem narawan for helpem hem, bat bae hem hapi sapos samwan duim samting for helpem hem. So hem gud for tingim sapos hem needim help for lukaftarem famili, olsem maet iumi savve kukim kaikai or klinim haos blo hem samfala taem. Or maet iumi faendaot wanfala brata no garem waka nao for selen. Maet iumi savve givim famili lelebet selen. Iumi savve givim stret or duim lo wei wea olketa no savve hu nao givim.

13-14. Hao nao iumi savve followim example blo Jehovah and provaedem wanem narawan needim?

¹³ Jehovah provaedem wanem iumi needim. (Matt. 5:45) Iumi laek for duim samting for helpem olketa brata and sista nomata olketa no askem iumi, olsem Jehovah duim for iumi evriwan. Olsem example, nomata iumi no askem Jehovah, hem mekem sun kamap evriday. And hot from sun mekem iumi evriwan kasem gud samting, nomata olketa wea no raeteous tu. From Jehovah provaedem evri samting wea iumi needim, datwan showimaot hem lovem iumi. Iumi tinghae lo Jehovah from hem kaen and lukaftarem iumi!

¹⁴ Staka brata and sista followim example blo Jehovah and provaedem wanem narawan needim. Olsem example lo 2013, wanfala big cyclone spoelem staka ples lo Philippines. Datfala cyclone spoelem haos and olketa nara samting blo staka brata and sista. Bat olketa brata and sista from olketa nara ples kwiktaem duim samting for helpem olketa. Staka givim selen and staka help saed lo construction, gogo olketa wakem bak samting olsem 750 haos insaed lo wanfala year! Nara example hem lo taem wea coronavirus gohed, olketa brata and sista barava helpem each other. Taem iumi kwiktaem duim samting for helpem olketa brata and sista, iumi showimaot iumi lovem olketa.

15-16. Olsem Luke 6:36 talem, wanem nao iumi savve duim for followim example blo Jehovah?

¹⁵ Jehovah showimaot mercy lo iumi. (Readim Luke 6:36.) Evriday Jehovah forgivim iumi for olketa sin blo iumi.  (Sams 103:10-14) Jesus showimaot mercy and forgivim olketa follower blo hem bikos olketa no perfect and savve duim mistek. And hem willing for dae for iumi mekem iumi kasem forgiveness for olketa sin. (1 John 2:1, 2) Iumi barava tinghae lo Jehovah and Jesus from tufala showimaot mercy lo iumi.

¹⁶ Iumi savve strongim love wea iumi garem for olketa brata and sista taem iumi showimaot mercy and “forgivim” olketa. (Eph. 4:32) Maet samfala taem hem no isi, so iumi need for waka hard for duim datwan. Wanfala Wastaoa article wea garem title “Iumi Mas Evritaem Willing for Forgivim Narawan” barava helpem wanfala sista. * Datfala sista sei: “Article hia helpem mi for minim hao taem mi forgivim narawan datwan bae mekem mi kasem gud samting. Article explainim hao taem iumi forgivim narawan, datwan no minim iumi no feel nogud or iumi tingse wanem hem duim hem olraet nomoa. Bat hem minim iumi no gohed kros lo hem, and bae iumi garem peace.” Taem iumi forgivim olketa brata and sista, iumi showimaot iumi lovem olketa and iumi followim example blo Dadi blo iumi Jehovah.

17. Olsem Matthew 5:16 talem, hao nao iumi savve mekhae lo Jehovah?

¹⁷ Iumi hapi for garem olketa brata and sista evriwea lo world wea lovem each other. And iumi laekem staka pipol moa for joinim iumi for worshipim Jehovah. Dastawe, iumi no laek for duim eni samting wea mekem pipol for ting daonem Dadi blo iumi lo heven or pipol blo hem. Iumi laek for duim olketa samting wea mekem pipol interest for lane abaotem Jehovah.​—Readim Matthew 5:16.

18. Wanem nao savve helpem iumi for no fraet for preach?

¹⁸ From iumi obeyim Jehovah and duim preaching waka, maet samfala tok spoelem iumi or persecutim iumi. Wanem nao  iumi savve duim sapos datwan mekem iumi fraet for story? Iumi sure Jehovah and Jesus laek for helpem iumi. Jesus talem olketa disaepol blo hem for no wari abaotem wanem for talem. Why nao olsem? Jesus sei: “Bae iufala savve wanem for talem long datfala taem. Diswan hem bikos taem iufala story, spirit bilong Dadi bilong iufala nao bae mekem iufala savve long wanem for talem.”​—Matt. 10:19, 20.

19. Storyim example blo Robert wea no fraet for storyim biliv blo hem.

¹⁹ Tingim example blo Brata Robert wea stap lo South Africa. Taem hem wanfala Bible study and no garem big savve, hem mas go lo kot for explainim why hem no joinim army. Robert no fraet for talem judge hem disaed for no teksaed lo war from hem lovem olketa Christian brata and sista blo hem. Robert tinghae lo spiritual famili blo hem! Seknomoa judge hem sei, “Hu nao olketa brata blo iu?” Robert seke lo kwestin hia, bat semtaem nomoa hem tingim Matthew 12:50, text blo datfala day, wea sei: “Brata, sista, and mami bilong mi nao hem eniwan wea duim wanem Dadi bilong mi long heven laekem.” Nomata Robert hem wanfala Bible study, holy spirit helpem hem for ansarem kwestin hia and olketa nara hard kwestin. Masbi Jehovah barava hapi lo Robert! Jehovah bae hapi lo iumi tu, sapos iumi askem hem for helpem iumi for no fraet for preach nomata iumi feisim eni hard samting.

20. Wanem nao iumi barava laek for duim? (John 17:11, 15)

²⁰ Iumi hapi tumas for stap insaed spiritual famili blo iumi. Jehovah barava lukaftarem iumi olsem wanfala gud dadi, and iumi garem olketa brata and sista wea lovem iumi. Iumi laek for gohed tinghae lo datwan. Satan and olketa wea followim hem laekem iumi for tingse Jehovah no lovem iumi and trae for mekem iumi no stap gud witim olketa brata and sista. Bat Jesus prea and askem Dadi for lukaftarem iumi and mekem iumi gohed for wan mind. (Readim John 17:11, 15.) And iumi lukim Jehovah duim datwan. Iumi laek for olsem Jesus wea barava sure Jehovah lovem and sapotim hem. And iumi barava laek for gohed strongim love blo iumi for spiritual famili blo iumi.