1. Hao nao iumi feel taem samwan iumi lovem hem disfellowship?

WASWE, samwan wea iumi lovem hem disfellowship? Datwan savve mekem iumi sorre tumas! Wanfala sista wea nem blo hem Hilda sei: “Taem hasband blo mi dae bihaen mifala marit for 41 year, datwan hem barava hard samting for deal witim. * Bat taem son blo mi disfellowship and lusim waef and olketa pikinini blo hem, datwan tumas nao!”

2-3. Olsem Sams 78:40, 41 storyim, hao nao Jehovah feel taem samwan againstim hem?

² Masbi Jehovah barava sorre tumas taem staka angel lo famili blo hem againstim hem! (Jude 6) And masbi Jehovah feel sorre tumas tu taem olketa Israelite wea hem lovem, olketa bighed againstim hem. (Readim Sams 78:40, 41.) So taem samwan wea iumi lovem hem disfellowship, iumi sure Dadi blo iumi sorre tu lo datwan. Hem minim gud feeling blo iumi, and bae hem mek sure iumi kasem help and encouragement wea iumi needim.

³ Lo disfala study, bae iumi storyim hao iumi savve kasem help blo Jehovah taem famili member hem disfellowship. Bae iumi storyim tu hao iumi savve helpem olketa lo kongregeson wea samwan lo famili hem disfellowship. Bat firstaem, bae iumi storyim why iumi shud no blamem iumiseleva taem famili member disfellowship.

4. Hao nao staka parents feel taem son or dota hem disfellowship?

⁴ Staka parents wea son or dota blo olketa hem disfellowship blamem olketa seleva and tingse olketa no duim inaf samting for helpem pikinini stap lo truth. Luke, wanfala brata wea son blo hem disfellowship sei: “Mi blamem  miseleva, mi no savve sleep gud lo naet, and samfala taem mi savve krae from mi sorre tumas.” Elizabeth, wea son blo hem tu disfellowship sei: “Mi tingse mi nogud mami and masbi mi no teachim hem gud for lovem Jehovah.”

5. Sapos samwan disaed for no worshipim Jehovah, hem rong blo hu?

⁵ Iumi mas remember Jehovah letem each wan for chus sapos hem bae worshipim God. Samfala young wan wea parents no showimaot gud example disaed for worshipim Jehovah and gohed faithful. Bat samfala young wan wea parents waka hard for teachim olketa for lovem Jehovah disaed for no duim datwan. So man seleva nao bae disaed sapos hem worshipim Jehovah. (Josua 24:15) Dastawe parents shud no blamem olketa seleva sapos pikinini disaed for no worshipim Jehovah!

6. Taem dadi or mami disfellowship, hao nao datwan savve affectim olketa pikinini?

⁶ Maet mami or dadi wea lusim truth hem lusim famili tu. (Sams 27:10) Diswan savve affectim olketa pikinini wea lovem tumas mami or dadi wea lusim olketa. Esther, wea dadi blo hem disfellowship, hem sei: “Mi savve krae taem mi tingim hao dadi blo mi hem no wikdaon nomoa, bat hem barava disaed for no worshipim Jehovah. Mi lovem dadi blo mi, so bihaen dadi disfellowship mi gohed for warim hem. Datwan mekem mi stress tumas.”

7. Hao nao Jehovah feel abaotem olketa young wan wea dadi or mami disfellowship?

⁷ Olketa young wan, sapos dadi or mami disfellowship, hem barava sorre samting! Jehovah minim sorre feeling blo iufala. From iufala gohed faithful, datwan mekem Jehovah for lovem and tinghae lo iufala, and olketa brata and sista tu tinghae lo iufala. Tingim tu, sapos dadi or mami disaed for lusim Jehovah, hem no rong blo iufala. Olsem iumi storyim finis, Jehovah letem each wan for chus sapos hem bae worshipim God. So hem “waka bilong [parents]” for disaed seleva, and “no waka bilong [pikinini].”​—Gal. 6:5.

8. Wanem nao iumi savve duim taem iumi weitim samwan wea iumi lovem for kam bak lo Jehovah? (Lukim tu box “ Kam Bak lo Jehovah.”)

⁸ Taem samwan wea iumi lovem hem disfellowship, hem normal samting for hope hem bae kam bak lo Jehovah. Bat taem iumi weitim hem for kam bak, iumi mas mek sure iumi no wikdaon lo spiritual wei. Taem iumi strongim faith blo iumi, bae hem gudfala example for olketa narawan lo famili, and maet for wan wea disfellowship tu. And tu, datwan savve helpem iumi for deal witim feeling for sorre. Distaem bae iumi storyim samfala wei for strongim faith blo iumi.

9. Wanem nao iumi savve duim for strongim faith blo iumi? (Lukim tu box “ Samfala Scripture for Comfortim Iumi Sapos Samwan Iumi Lovem Disfellowship.”)

⁹ Gohed duim olketa spiritual samting. Hem important for gohed strongim faith  blo iumi and olketa narawan lo famili. Hao nao iumi savve duim datwan? Evriday iumi shud readim Bible and ting raonem wanem iumi readim, and mas evritaem attendim olketa meeting. Joanna, wea dadi blo hem and sista blo hem tu disfellowship, hem sei: “Samting wea helpem mi for no sorre tumas hem for readim olketa story lo Bible abaotem Abigail, Esther, Job, Joseph, and Jesus. Example blo olketa encouragem mi and helpem mi for no laek givap. Toktok insaed lo olketa original song tu encouragem mi.”

10. Wanem nao Sams 32:6-8 sei hem gud for iumi duim taem iumi sorre?

¹⁰ Storyim olketa hevi blo iumi lo Jehovah. Taem iumi sorre, gohed prea lo Jehovah. Askem hem for helpem iumi for garem “gudfala tingting” abaotem wanem hem happen lo famili member blo iumi. (Readim Sams 32:6-8.) Maet hem no isi for storyim feeling blo iumi lo Jehovah, bat hem barava minim iumi, lovem iumi, and laekem iumi for story lo hem.​—Eksodas 34:6; Sams 62:7, 8.

11. Olsem Hebrew 12:11 storyim, why nao iumi savve trustim arrangement blo Jehovah for disfellowshipim man wea no repent? (Lukim tu box “ Arrangement for Disfellowship Showimaot Jehovah Lovem Iumi.”)

¹¹ Sapotim disison blo olketa elder. Hem arrangement blo Jehovah for disfellowshipim olketa wea no repent. Datwan showimaot love blo Jehovah for iumi and man wea disfellowship. (Readim Hebrew 12:11.) Maet samfala lo kongregeson storyim lo iumi hao olketa no agree witim disison blo olketa elder for disfellowshipim samwan, bat olketa no storyim hao maet datfala man duim samting wea mekem hem fit for disfellowship. Hard for iumi savve lo full story. So hem wise for  trustim disison blo olketa elder bikos olketa disaed followim olketa Bible principle and Jehovah markem olketa elder for duim disfala waka.​—Mektu Kronikols 19:6.

12. Wanem gud samting nao samfala kasem bikos olketa followim arrangement blo Jehovah for no story lo man wea disfellowship?

¹² Taem iumi sapotim disison blo olketa elder for disfellowshipim samwan wea iumi lovem, maet datwan helpem hem for kam bak lo Jehovah. Elizabeth wea iumi storyim finis sei: “Hem barava hard samting for no associate witim son blo mifala. Bat bihaen hem reinstate, hem sei hem stret for olketa elder disfellowshipim hem. Hem storyim tu hao hem lanem staka gud samting. Diswan helpem mi tu for luksavve discipline blo Jehovah hem helpem man.” Mark, hasband blo Elizabeth sei tu: “Wantaem son blo mi storyim hao hem laek kam bak lo Jehovah bikos mitufala followim direction blo Jehovah. Mi barava hapi Jehovah helpem mifala for obeyim hem.”

13. Wanem nao savve helpem iumi for no sorre tumas?

¹³ Story lo olketa fren wea minim iumi. Hem gud for spendem taem witim olketa brata and sista wea savve encouragem iumi for no lus hope. (Provebs 12:25; 17:17) Joanna, wea iumi storyim finis sei: “Mi feel olsem no eniwan minim mi. Gogo, taem mi story witim olketa gudfala fren blo mi, datwan helpem mi.” Bat hao sapos samwan lo kongregeson talem samting wea mekem iumi barava feel nogud?

14. Why nao iumi shud forgivim olketa wea mekem iumi feel nogud?

¹⁴ Patient witim olketa brata and sista. From iumi no perfect, maet samfala talem samting wea olketa no min for talem wea mekem iumi feel nogud. (Jas. 3:2) Lo taem olsem, hem gud for tingim toktok blo aposol Paul wea sei: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem.” (Col. 3:13) Wanfala sista wea relative blo hem disfellowship sei: “Jehovah helpem mi for forgivim olketa brata and sista wea tingse olketa talem samting for encouragem mi, bat wanem olketa talem mekem mi feel nogud.” Hao nao kongregeson savve helpem famili blo samwan wea disfellowship?

15. Hao nao iumi savve helpem famili blo samwan wea just disfellowship?

¹⁵ Tok kaen lo famili blo samwan wea disfellowship. Olsem example, Miriam wanfala sista wea brata blo hem just disfellowship sei hem hol bak for go lo olketa meeting from hem warim tingting blo olketa brata and sista. Miriam sei: “Mi tingse olketa brata and sista bae no laek story witim mi. Bat olketa sei olketa sorre lo samting wea happen and no tok againstim brata blo mi. Story blo  olketa helpem mi for no sorre tumas.” Nara sista sei: “Bihaen son blo mitufala disfellowship, olketa brata and sista kam for comfortim mifala. Samfala no storyim eni samting, bat olketa krae witim mi or raetem leta for encouragem mi. Datwan barava strongim mi!”

16. Hao nao iumi savve gohed helpem and comfortim famili blo samwan wea disfellowship?

¹⁶ Gohed helpem and comfortim famili blo samwan wea disfellowship. Iumi need for encouragem and showimaot love lo olketa. (Heb. 10:24, 25) Samfala taem olketa hia tingse samfala lo kongregeson no laek story witim olketa, and datwan mekem olketa feel olsem olketa tu disfellowship. Iumi mas no duim datwan! Olketa young wan wea dadi or mami disfellowship barava needim encouragement. Maria, wea hasband blo hem disfellowship and lusim famili sei: “Samfala brata and sista kam lo haos for kukim kaikai and helpem mi for study witim olketa pikinini blo mi. Olketa sorre and krae witim mi and story for mi taem narawan talem laea samting abaotem mi. Olketa barava encouragem mi!”​—Rome 12:13, 15.

17. Wanem nao olketa elder savve duim for comfortim olketa wea feel sorre?

¹⁷ Olketa elder savve duim samting for strongim famili blo samwan wea disfellowship. Olketa elder garem waka for comfortim olketa hia. (1 Thess. 5:14) Bifor and bihaen lo meeting, elder savve go story witim olketa. Elder savve go lo haos blo olketa for prea witim olketa, and waka witim wanfala lo preaching waka, or askem olketa for joinim famili worship. Olketa elder need for lukaftarem, showimaot love, and tingim olketa sheepsheep blo Jehovah wea feel sorre.​—1 Thess. 2:7, 8.

18. Olsem 2 Peter 3:9 storyim, wanem nao God laekem olketa wea disfellowship for duim?

¹⁸ Jehovah “no laekem eniwan for dae bat hem laekem evriwan for garem chance for repent.” (Readim 2 Peter  3:9.) Nomata man duim bigfala sin, laef blo hem important lo God. Tingim hao Jehovah givim Son blo hem for kamap ransom sakrifaes for iumi olketa man wea sin. Jehovah iusim olketa elder for trae helpem olketa wea disfellowship for kam bak lo hem. And hem hope olketa bae laek for duim datwan, olsem wanem prodigal son lo tokpiksa blo Jesus hem duim. (Luke 15:11-32) Gogo staka wea disfellowship kam bak lo Dadi blo olketa Jehovah and olketa brata and sista hapi tumas. Elizabeth wea iumi storyim finis sei hem hapi tumas taem son blo hem reinstate. Taem Elizabeth ting go bak hem sei, “Mi barava tinghae lo olketa wea encouragem mifala for no lus hope.”

19. Why nao iumi savve gohed trustim Jehovah?

¹⁹ Iumi evritaem trustim Jehovah bikos arrangement for disfellowship savve helpem iumi. Hem Dadi wea kaen lo iumi, tingim iumi, and barava lovem iumi bikos iumi lovem hem and worshipim hem. Jehovah evritaem helpem iumi nomata iumi sorre from samwan lo famili disfellowship. (Heb. 13:5, 6) Mark, wea iumi storyim finis sei: “Jehovah evritaem helpem iumi taem iumi sorre tumas.” Jehovah bae gohed givim iumi “strong wea winim strong bilong man.” (2 Cor. 4:7) So iumi laek gohed faithful and no lus hope nomata samwan lo famili disfellowship.