1. Wanem nao olketa olo brata and sista mas luksavve lo hem?

OLKETA olo brata and sista maet sorre bikos olketa no savve duim staka samting for Jehovah olsem olketa duim bifor. Hem tru, olketa olo no garem strong olsem bifor, bat olketa savve iusim wisdom and experience wea olketa garem for helpem narawan for duim moa samting lo organization blo Jehovah. Wanfala olo elder sei, “From mi no savve duim staka samting olsem bifor, mi hapi olketa nara brata stap wea fit for duim datfala waka.”

2. Wanem nao bae iumi storyim lo disfala study?

² Lo last study iumi storyim hao iumi kasem gud samting taem iumi fren witim olketa wea olo. Lo disfala study, bae iumi story why hem gud for olketa wea olo for hambol, for tinghae lo narawan, and willing for givim samting. Taem olketa olo brata and sista garem olketa wei hia bae evriwan lo kongregeson kasem gud samting.

3. Olsem Philippi 2:3, 4 storyim, hao nao olketa wea olo shud ting lo narawan, and hao nao datwan savve helpem olketa?

³ Sapos olketa wea olo laek for helpem narawan lo kongregeson olketa mas hambol and ting lo narawan olsem hem winim olketa. (Readim Philippi 2:3, 4.) Sapos olsem, bae olketa luksavve samfala difren wei for duim waka wea followim olketa Bible principle hem stap, and hem waka gud tu. So bae olketa no tingse olketa narawan mas duim samting olsem hao olketa duim bifor. (Eklesiastes 7:10) Nomata olketa olo garem staka savve, olketa bae luksavve “world distaem hem gohed for change” and  maet olketa need for change and duim samting lo difren wei.​—1 Cor. 7:31.

4. Hao nao olketa circuit overseer savve followim gudfala example blo olketa Levite?

⁴ From olketa olo brata hambol, olketa luksavve olketa no savve duim staka samting olsem bifor. Olsem example, tingim olketa circuit overseer blo iumi. Taem olketa kasem 70 years, branch askem olketa for duim nara assignment. Maet hem no isi for olketa changem assignment bikos olketa barava enjoyim circuit waka, and olketa laekem tumas for gohed visitim olketa brata and sista lo olketa kongregeson. Nomata olsem, olketa luksavve hem gud for olketa nara brata wea young lo olketa for duim datfala waka. Olketa followim gudfala example blo olketa Levite lo Israel bifor, wea taem olketa kasem 50 years, olketa mas finis for duim assignment blo olketa lo tabernacle. Bat olketa Levite hia hapi for duim eni nara assignment wea olketa kasem, and for helpem olketa nara Levite wea waka lo tabernacle. (Nambas 8:25, 26) Nomata olketa wea finis from circuit waka no savve helpem staka kongregeson, olketa savve duim staka samting for helpem kongregeson wea olketa stap lo hem.

5. Wanem nao iumi savve lanem from example blo Dan and Katie?

⁵ Tingim example blo Dan, wea duim circuit waka for 23 years. Taem Dan  kasem 70 years, hem and Katie, waef blo hem, kasem assignment for spesol pioneer. Waswe, tufala enjoyim datfala assignment? Dan sei distaem hem barava busy winim bifor! Hem elder lo kongregeson, hem helpem olketa brata for kamap ministerial servant, and hem trainim olketa narawan for duim pablik witnessing and for preach lo olketa prisoner. Nomata iufala olo brata and sista insaed full-taem service or nomoa, iufala savve duim staka samting for helpem olketa narawan. Bat hem important for luksavve laef hem change taem man kamap olo, so markem olketa niu goal, and tingim wanem iufala fit for duim winim for sorre lo wanem iufala no savve duim.

6. Why nao hem gud for hambol? Storyim tokpiksa.

⁶ Man wea hambol bae luksavve maet hem no fit for duim samfala samting. (Provebs 11:2) Taem olketa wea olo duim nomoa wanem olketa fit for duim, datwan bae mekem olketa hapi. Iumi savve comparem olketa olo wea hambol witim man wea draevem car go ap lo wanfala hill. Draeva mas changem gear blo car mekem car fit for go ap lo hill. Taem draeva duim datwan, car bae hard for go fast bat bae hem garem paoa for go ap. Olsem tu, olketa olo maet need for katdaon lo samfala samting, mekem olketa garem strong for gohed lo waka blo Jehovah.​—Phil. 4:5.

7. Wanem nao Barzillai duim wea showimaot hem hambol?

⁷ Tingim Barzillai wea 80 years taem David askem hem for kamap bigman lo haos blo hem, bat Barzillai hambol and sei hem no fit for duim datfala waka. From Barzillai olo, hem luksavve hem gud for samwan wea young lo hem for helpem David, so hem ask sapos Chimham savve duim datfala waka. (Mektu Samuel 19:35-37) Olsem Barzillai, olketa olo brata hapi for givim chance lo narawan for duim waka.

8. Nomata King David laek for buildim temple, hao nao hem showimaot hem hambol?

⁸ Nara example blo man wea hambol hem King David. Hem barava laekem tumas for wakem temple blo Jehovah. Bat taem David savve Jehovah markem Solomon, son blo hem, for wakem temple, David acceptim disison blo Jehovah and duim staka samting for sapotim datfala waka. (Fas Kronikols 17:4; 22:5) Hem tru, Solomon hem young and no garem experience lo building waka, bat David no tingse hem nao shud wakem datfala temple. (Fas Kronikols 29:1) Nomata Solomon no garem experience, David luksavve Jehovah bae blessim datfala waka and Solomon fit for wakem datfala temple. Olsem David, nomata assignment blo olketa olo brata change, olketa savve gohed duim waka for Jehovah. And olketa olo luksavve taem olketa young wan duim waka wea olketa olo duim bifor, Jehovah bae blessim datwan.

9. Hao nao wanfala member blo Branch Komiti showimaot hem hambol?

⁹ Wanfala brata distaem wea hambol hem Shigeo. Lo 1976 hem kamap member blo Branch Komiti taem hem 30 years. Then lo 2004 hem kamap coordinator blo Branch Komiti. Gogo taem hem olo, hem luksavve hem no garem strong for duim gud datfala waka. Hem prea abaotem datwan and hem tingim bae hem gud sapos nara brata kamap coordinator blo Branch Komiti. Shigeo no coordinator  distaem, bat hem hapi for waka tugeta witim olketa nara member blo Branch Komiti. Olketa example blo Barzillai, King David, and Shigeo showimaot olketa olo brata wea hambol bae tinghae lo wanem olketa young brata fit for duim, and no warim wanem olketa young wan no savve lo hem yet. Bae olketa olo laek for waka tugeta witim olketa young brata, and bae no tingse olketa young wan trae for winim olketa.​—Provebs 20:29.

10. Hao nao olketa olo ting lo olketa wea young lo olketa?

¹⁰ Olketa wea olo tinghae lo olketa wea young lo olketa bikos olketa hia present from Jehovah. From olketa olo no strong nao, olketa luksavve hem gud for garem olketa young wan wea strong and willing for duim waka lo kongregeson.

11. Hao nao Rut 4:13-16 showimaot olketa olo wea acceptim help from olketa wea young bae kasem blessing?

¹¹ Naomi hem nambawan example lo Bible lo wanfala olo wea acceptim help from samwan wea young lo hem. Bihaen hasband blo Ruth hem dae, Naomi talem dota in-law blo hem for go bak lo famili blo hem. Bat Ruth hem sei hem barava laek for go witim Naomi lo Bethlehem, so Naomi sei for tufala go. (Rut 1:7, 8, 18) And hem wanfala blessing for tufala evriwan! (Readim Rut 4:13-16.) Olketa olo brata and sista wea hambol bae laek for followim example blo Naomi.

12. Hao nao Paul showimaot hem tinghae lo wanem olketa brata and sista duim for hem?

¹² Aposol Paul tinghae lo olketa narawan wea helpem hem. Olsem example, Paul thankiu lo olketa Christian lo Philippi taem olketa provaedem wanem  hem needim. (Phil. 4:16) Paul talem thankiu lo Timothy taem Timothy helpem hem lo ministry. (Phil. 2:19-22) And Paul thankiu lo God bikos olketa brata encouragem hem taem hem gogo lo Rome olsem prisoner. (Acts 28:15) Paul hem man for waka, and hem travel for staka thousand mile for preach and for strongim olketa kongregeson. Nomata olsem, hem acceptim help from olketa brata and sista.

13. Hao nao olketa wea olo savve showimaot olketa tinghae lo olketa narawan?

¹³ Olketa olo savve showimaot olketa tinghae lo olketa narawan lo kongregeson lo staka wei. Olsem example, sapos eniwan laek for helpem iu for go samwea, baem samting iu needim, or eni nara samting, hem gud for acceptim help blo olketa. Jehovah iusim olketa brata and sista for helpem iu. From iu spendem taem witim olketa hia, gogo bae iufala fren gud. Hem gud for showimaot interest lo spiritual saed blo olketa young wan and talem olketa iu hapi for lukim olketa laek duim moa samting lo kongregeson. And hem gud for storyim olketa experience wea iu kasem lo laef blo iu. Taem iu duim olsem, iu showimaot iu tinghae lo Jehovah from hem leadim olketa wea young for kam lo kongregeson.​—Col. 3:15; John 6:44; 1 Thess. 5:18.

14. Wanem nao David givim for sapotim waka blo Jehovah?

¹⁴ King David hem hambol, bat hem willing for givim samting for sapotim waka blo Jehovah. Taem Solomon wakem temple, David givim staka material samting for sapotim datfala waka. (Fas Kronikols 22:11-16; 29:3, 4) David duim datwan nomata hem savve pipol bae tinghae lo Solomon from hem nao wakem temple. Nomata olketa olo maet no fit for waka lo olketa construction project, olketa savve sapotim olketa project hia taem olketa givim contribution wea olketa fit for givim. Olketa savve storyim tu, staka gud experience wea olketa garem lo olketa young wan.

15. Wanem nao Paul duim wea helpem Timothy?

¹⁵ Tingim wanem Paul duim for helpem Timothy. Paul askem Timothy for joinim hem taem hem duim missionary waka, and trainim hem hao for duim gud preaching and teaching. (Acts 16:1-3) Training wea Timothy kasem from Paul helpem hem for barava duim gud ministry. (1 Cor. 4:17) Then Timothy trainim olketa narawan, olsem hao Paul trainim hem.

16. Why nao Shigeo trainim olketa narawan?

¹⁶ Olketa wea olo laek for trainim olketa wea young lo olketa. Olketa olo no tingse from olketa trainim narawan bae olketa no garem waka nao insaed kongregeson. Olsem example, Shigeo wea iumi storyim bifor trainim olketa narawan lo Branch Komiti wea young lo hem. Hem luksavve datfala training bae mekem olketa hia fit for barava helpem Kingdom waka gohed gud lo datfala kantri. And gogo, taem Shigeo no savve gohed duim waka blo coordinator, brata wea changem hem fit for duim datfala waka. Shigeo hem member lo Branch Komiti for winim 45 year and hem gohed for sharem experience blo hem witim olketa lo Komiti. Olketa olo olsem Shigeo barava helpem pipol blo Jehovah!

17. Olsem Luke 6:38 storyim, wanem nao olketa wea olo savve duim for helpem narawan?

 ¹⁷ Iufala olo brata and sista wea faithful showimaot klia hao best samting for samwan duim lo laef blo hem, hem for worshipim Jehovah. And iufala showimaot hem gud samting for lanem and followim olketa Bible principle. Iufala garem staka experience lo hao for duim olketa samting, bat iufala luksavve staka samting hem change distaem and maet iufala need for change tu. Nomata maet iu baptaes taem iu olo, iu savve helpem olketa narawan taem iu storyim hao from iu savve lo Jehovah distaem hem mekem iu barava hapi. Tingim, olketa narawan bae laek for herem olketa experience blo iufala. Sapos iufala sharem wanem iufala savve lo hem witim olketa narawan, Jehovah bae barava blessim iufala.​—Readim Luke 6:38.

18. Hao nao olketa wea olo and olketa wea young savve sapotim each other?

¹⁸ Hem barava gud for olketa wea olo and olketa wea young for fren gud tugeta bikos olketa savve sapotim each other. (Rome 1:12) Gud samting wea olketa olo garem hem wisdom and experience from olketa laef longtaem. Bat olketa young wan garem strong for duim waka. Taem olketa wea young and olketa wea olo fren and waka gud tugeta, datwan bae helpem full kongregeson and bae mekhae lo Jehovah.