STUDY ARTICLE 40
Teachim Pipol for ‘Followim Stretfala Wei blo God’
‘Olketa wea tisim narafala pipol fo falom stretfala wei blong God, bae saen fogud fo evritaem olowe olsem olketa sta long skae.’—DANIEL 12:3.
SONG 151 Hem Bae Singaot Long Olketa
ARTICLE BAE STORYIM *
1. Lo datfala Wan Thousand Year Rul blo Christ, wanem spesol samting nao bae happen?
LO DATFALA Wan Thousand Year Rul blo Christ bae hem barava spesol, taem God start for resurrectim olketa wea dae finis! Iumi evriwan luk forward for lukim moa olketa wea iumi lovem wea dae finis. Jehovah tu luk forward for datfala taem. (Job 14:15) Bae iumi evriwan hapi tumas for lukim olketa moa. Olsem iumi lanem finis lo last article, “pipol wea raeteous,” wea nem blo olketa insaed lo buk blo laef, bae garem chance for “kasem laef olowe” taem olketa resurrect. (Acts 24:15; John 5:29) Maet samfala wea iumi lovem wea dae finis bae laef bak lo start blo datfala resurrection. * Olketa narawan wea bae laef bak hem “pipol wea no raeteous,” wea hem olketa wea no worshipim Jehovah taem olketa laef. Olketa hia bae “kasem judgment” taem olketa laef bak.
2-3. (a) Olsem Aesaea 11:9, 10 storyim, wat nao olketa wea laef bak bae lanem? (b) Wat nao bae iumi storyim lo disfala article?
2 Evriwan wea laef bak lo earth bae need for lanem staka samting. (Aesaea 26:9; 61:11) So bigfala teaching waka wea no happen enitaem bifor mas kamap. (Readim Aesaea 11:9, 10.) Why nao olsem? Wanfala reason hem bikos olketa wea no raeteous wea laef bak bae need for lane abaotem Jesus Christ, datfala ransom, Kingdom blo God, why hem important for mekhae lo nem blo Jehovah, and why hem nomoa garem raet for rul. Nomata olketa wea raeteous bae need for up-to-date witim wanem Jehovah teachim lo olketa pipol blo hem abaotem plan blo hem for earth. Samfala lo olketa faithful wan hia dae longtaem bifor full Bible hem stap. Olketa wea raeteous and olketa wea no raeteous bae need for lanem staka samting.
3 Lo disfala article bae iumi ansarem olketa kwestin hia: Hao nao disfala bigfala teaching waka bae gohed? Hao nao disfala teaching waka bae helpem Jehovah for disaed sapos nem blo pipol bae stap olowe insaed lo buk blo laef or nomoa? Hem important for iumi savve lo ansa for olketa kwestin hia distaem. Lo disfala article bae iumi storyim samfala profesi lo buk blo Daniel and Revelation wea bae helpem iumi for barava minim gud wat nao bae happen lo olketa wea laef bak. Firstaem, bae iumi story raonem wat nao profesi lo Daniel 12:1, 2 sei bae happen.
“STAKA WEA SLEEP INSAED GRAON BAE WEKAP”
4-5. Wat nao Daniel 12:1 sei bae happen lo taem blo end?
4 Readim Daniel 12:1. Bible buk Daniel hem storyim olketa samting wea bae happen lo taem blo end. For example, Daniel 12:1 storyim hao Michael, wea hem Jesus Christ, hem “lukaftarem olketa pipol blong [God].” Datfala part blo profesi hem kamap tru start lo 1914 taem Jesus hem King lo Kingdom blo God lo heven.
5 Angel talem Daniel tu hao Jesus bae hem “kamap, [“standap,” NWT]” lo “taem blong trabol . . . wea hemi barava nogud tumas winim eni narafala taem bifoa.” Disfala “taem blong trabol” hem datfala “bigfala trabol” wea Matthew 24:21 storyim. So lo end blo bigfala trabol, Jesus bae standap, wea minim bae hem defendim pipol blo God lo Armageddon. Bible buk Revelation sei olketa hia hem datfala ‘big crowd wea no dae long datfala big trabol.’—Rev. 7:9, 14.
6. Wat nao bae happen taem datfala big crowd go insaed lo niu world? Explainim. (Lukim tu “Kwestin From Reader” insaed disfala magasin wea storyim olketa wea bae resurrect lo earth.)
6 Readim Daniel 12:2. * Wat nao bae happen taem datfala big crowd go insaed lo niu world? Disfala profesi sei staka pipol wea dae finis bae laef bak. Bifor mifala savve sei diswan hem minim wanfala spiritual or tokpiksa resurrection wea happen lo olketa last day. Bat distaem mifala luksavve profesi hia storyim olketa wea bae laef bak lo niu world. * Why nao iumi sei olsem? Datfala toktok “graon” wea stap lo Daniel 12:2 (NWT) hem stap tu lo Job 17:16 (NWT) and hem minim nomoa “Grev.” So diswan showimaot Daniel 12:2 (NWT) hem storyim olketa wea bae laef bak bihaen olketa last day hem finis and bihaen lo Armageddon.
7. (a) Wat nao Daniel 12:2 (NWT) minim taem hem sei samfala wea laef bak bae kasem “laef olowe”? (b) Why nao disfala resurrection hem “difren”?
7 Taem Daniel 12:2 (NWT) sei samfala wea laef bak bae kasem “laef olowe,” wat nao datwan minim? Hem minim olketa wea laef bak wea lane, or gohed for lane, and obeyim Jehovah and Jesus insaed lo datfala 1,000 year, gogo bae olketa kasem laef olowe. (John 17:3) Datwan hem “difren” kaen resurrection from olketa wea laef bak bifor. (Heb. 11:35) Why nao olsem? Bikos olketa wea laef bak bifor, gogo olketa dae moa.
8. Wat nao Daniel minim taem hem sei samfala wea laef bak bae kasem “shame and nogud samting for olowe”?
8 Bat no evriwan wea laef bak bae acceptim datfala teaching program blo Jehovah. Profesi lo Daniel storyim hao samfala wea bae laef bak bae kasem “shame and nogud samting for olowe.” From olketa bighed againstim God, nem blo olketa bae no stap insaed lo buk blo laef and olketa bae no kasem laef olowe. Olketa bae kasem “nogud samting for olowe,” wea minim bae olketa finis. So Daniel 12:2 (NWT) storyim hao judgment wea evriwan wea laef bak bae kasem, hem depend lo wanem olketa duim bihaen olketa laef bak lo niu world. * (Rev. 20:12) Samfala bae kasem laef olowe and olketa narawan bae finis.
TEACHIM ‘PIPOL FOR FOLLOWIM STRETFALA WEI BLO GOD’
9-10. (a) Wanem moa bae happen bihaen lo bigfala trabol, (b) Hu nao olketa wea “bae i saen fogud . . . olsem olketa sta long skae”?
9 Readim Daniel 12:3. Iumi interest for savve wanem moa bae happen bihaen datfala “taem blong trabol.” Daniel 12:2 storyim wanfala samting wea bae happen bihaen lo bigfala trabol, bat verse 3 storyim nara samting moa.
10 Verse 3 storyim samfala wea “bae i saen fogud . . . olsem olketa sta long skae.” Hu nao olketa hia? Toktok blo Jesus lo Matthew 13:43 helpem iumi for savve. Hem sei: “Long datfala taem nao olketa wea raeteous bae shaen braet tumas olsem sun insaed Kingdom bilong Dadi bilong olketa.” Lo hia Jesus storyim “olketa son bilong Kingdom,” wea hem nao olketa anointed brata blo hem wea bae rul witim hem lo Kingdom lo heven. (Matt. 13:38) So Daniel 12:3 mas storyim olketa anointed wan and waka wea olketa duim insaed lo datfala Wan Thousand Year Rul.
Datfala 144,000 bae waka witim Jesus Christ for directim datfala teaching program wea bae gohed insaed datfala 1,000 year (Lukim paragraf 11)
11-12. Wanem waka nao bae 144,000 duim insaed lo datfala 1,000 year?
11 Hao nao bae olketa anointed wan helpem ‘pipol for followim stretfala wei blo God’? Olketa bae waka witim Jesus Christ for directim datfala teaching program wea bae gohed lo earth insaed datfala 1,000 year. Datfala 144,000 bae kamap olketa king and priest. (Rev. 1:6; 5:10; 20:6) From datwan, olketa savve help for “healim pipol long evri kantri long world,” and gogo olketa pipol hia bae kamap perfect. (Rev. 22:1, 2; Esikiel 47:12) Olketa anointed wan bae hapi tumas for duim datwan!
12 Hu nao olketa “pipol” wea Daniel 12:3 storyim wea bae followim stretfala wei blo God? Hem olketa wea bae resurrect, datfala big crowd, and eni pikinini wea born insaed lo niu world. Lo end lo datfala 1,000 year, evriwan wea stap lo earth bae perfect. So wat taem nao bae nem blo olketa stap for olowe insaed lo buk blo laef?
DATFALA LAST TEST
13-14. Nomata evriwan wea stap lo earth bae perfect, wat nao bae olketa need for duim for kasem laef olowe?
13 Iumi need for tingim hao nomata samwan kamap perfect, datwan no minim bae hem mas kasem laef olowe. Tingim Adam and Eve. Tufala perfect, bat tufala need for obeyim Jehovah God mekem tufala kasem laef olowe. Sorre samting nao, tufala no obeyim hem.—Rome 5:12.
14 Lo end blo datfala 1,000 year, evriwan bae kamap perfect. Bat waswe, from olketa perfect, bae evriwan sapotim rul blo Jehovah for olowe? Or waswe, samfala bae olsem Adam and Eve, wea nomata tufala perfect tufala no faithful? Distaem bae iumi storyim ansa from Bible for olketa kwestin hia.
15-16. (a) Wat taem nao bae pipol garem chance for showimaot sapos olketa bae gohed faithful lo Jehovah? (b) Wat nao bae happen lo datfala last test?
15 Bible showimaot hao insaed lo datfala 1,000 year, Satan bae no garem paoa for duim eni samting. Bat lo end blo datfala 1,000 year, Satan bae trae for mekem evriwan wea perfect for no faithful lo Jehovah. Lo datfala last test, evriwan hia bae garem chance for showimaot sapos olketa barava sapotim rul blo God and tinghae lo nem blo hem. (Rev. 20:7-10) Wat olketa duim lo datfala taem bae mekem Jehovah for disaed sapos nem blo olketa bae stap for olowe lo buk blo laef or nomoa.
16 Bible storyim hao samfala pipol bae rejectim rul blo Jehovah olsem Adam and Eve. Wat nao bae happen lo olketa? Revelation 20:15 sei: “Eniwan wea nem bilong hem no stap long datfala buk bilong laef, hem torowem hem long lake bilong fire.” Datwan minim olketa bighed pipol hia bae finis for olowe. Nomata olsem, staka pipol bae gohed faithful lo Jehovah, and nem blo olketa bae stap for olowe lo buk blo laef.
INSAED LO OLKETA ‘LAST DAY’
17. Wat nao angel talem lo Daniel wea bae happen lo olketa last day? (Daniel 12:4, 8-10)
17 Hem barava gud for ting abaotem olketa samting wea bae happen lo future! Wanfala angel storyim lo Daniel samfala important samting wea bae happen lo olketa ‘last day.’ (Readim Daniel 12:4, 8-10; 2 Tim. 3:1-5) Datfala angel sei lo Daniel: “Bae plande pipol . . . save long olketa samting wea hemi gohed fo kamap.” Datfala profesi hem minim pipol blo God bae minim gud toktok blo hem lo Bible. Angel hia sei tu hao insaed lo olketa last day “pipol hu i nogud, bae i no save long olketa samting ya. Bae olketa gohed nomoa fo duim olketa ravis samting.”
18. Wat nao klosap for happen lo olketa nogud pipol?
18 Distaem maet hem luk olsem pipol wea duim olketa nogud samting no kasem panis from datwan. (Malakae 3:14, 15) Bat klosap nao Jesus bae judgem pipol wea wei blo olketa olsem goat and separatem olketa from pipol wea wei blo olketa olsem sheepsheep. (Matt. 25:31-33) Olketa nogud pipol hia bae dae lo Armageddon, and olketa bae no resurrect for laef lo niu world. Nem blo olketa bae no stap lo “buk fo rimembarem olketa” wea Malakae 3:16 storyim.
19. Wat nao iumi need for duim distaem, and why nao olsem? (Malakae 3:16-18)
19 Distaem iumi need for pruvim iumi bae gohed faithful lo Jehovah. (Readim Malakae 3:16-18.) Jehovah hem gohed for hipimap olketa “spesol pipol” blo hem. Iumi laek for wanfala lo olketa hia.
Iumi barava luk forward for taem wea Daniel, olketa wea iumi lovem, and staka narawan bae “laef bak moa”! (Lukim paragraf 20)
20. Wat nao last promis wea Jehovah talem lo Daniel, and why nao iumi luk forward for datfala promis for kamap tru?
20 Iumi stap lo barava interesting taem. Bat olketa nara samting moa hem klosap for happen. Klosap nao bae iumi lukim evri nogud pipol bae finis. Then gogo, bae iumi lukim promis blo Jehovah for Daniel “laef bak moa” bae kamap tru. (Daniel 12:13) Waswe, iu luk forward for taem wea Daniel and olketa wea iu lovem bae “laef bak moa”? Sapos olsem, gohed faithful lo Jehovah distaem, and iumi savve sure Jehovah bae keepim nem blo iumi lo buk blo laef for olowe.
SONG 80 “Luksavve Jehovah Hem Gud”
^ Disfala article bae storyim hao samfala samting iumi minim abaotem datfala bigfala teaching waka wea Daniel 12:2, 3 storyim, hem change distaem. Bae iumi storyim wat taem nao datfala teaching waka bae happen and hu nao bae insaed datfala waka. Bae iumi storyim tu hao datfala teaching program bae redyim olketa wea stap lo earth for datfala last test lo end blo Wan Thousand Year Rul blo Christ.
^ Maet datfala resurrection hem start witim olketa wea faithful taem olketa dae lo olketa last day. Then maet pipol wea dae bifor olketa hia bae laef bak followim olketa genereson. Sapos olsem, each genereson bae garem chance for welkamim bak pipol wea olketa savve lo olketa. Nomata wanem hem happen, Bible storyim hao olketa wea resurrect for go lo heven hem “followim order.” So iumi savve sure olketa wea resurrect lo earth bae olsem tu.—1 Cor. 14:33; 15:23.
^ Daniel 12:2, (NWT): “And staka wea sleep insaed graon bae wekap, samfala bae kasem laef olowe and olketa narawan bae kasem shame and nogud samting for olowe.”
^ Diswan hem changem wanem iumi sei bifor lo chapter 17 blo datfala buk Tingting Strong Long Profesi Bilong Daniel! and The Watchtower blo July 1, 1987, page 21-25.
^ Mining blo Daniel 12:2 hem difren from Acts 24:15 wea storyim “olketa wea no raeteous” and “olketa wea raeteous,” and John 5:29 wea storyim “olketa wea duim gud samting” and “olketa wea duim nogud samting,” bikos tufala scripture hia storyim samting wea olketa duim bifor olketa dae.
