1. Olsem Malakae 3:16 storyim, wanem buk nao Jehovah raet insaed, and wat nao hem raetem insaed datfala buk?

 FOR staka thousand year Jehovah raetem nem blo olketa raeteous pipol blo hem insaed wanfala spesol buk, and first nem wea stap insaed nao hem datfala faithful witness, Abel. * (Luke 11:50, 51) Start lo datfala taem, Jehovah addim go olketa nem insaed datfala buk, and distaem hem garem staka million nem insaed. Bible kolem datfala buk, “buk fo rimembarem olketa,” “buk bilong laef,” and “scroll bilong laef.” Lo disfala article bae iusim ‘buk blo laef.’​—Readim Malakae 3:16; Rev. 3:5; 17:8.

2. Wat nao iumi mas duim for nem blo iumi stap insaed datfala buk blo laef?

² Nem blo evriwan wea worshipim Jehovah and wea tinghae lo nem blo hem nao insaed datfala spesol buk. Olketa hia garem chance for kasem laef olowe. Nem blo iumi tu fit for stap insaed datfala buk, sapos iumi fren gud witim Jehovah and garem faith lo ransom sakrifaes blo Son blo hem, Jesus Christ. (John 3:16, 36) Iumi evriwan laekem nem blo iumi for stap insaed datfala buk, nomata iumi garem hope for go lo heven or for stap lo earth.

3-4. (a) Sapos nem blo iumi stap insaed lo buk blo laef, waswe, datwan minim bae iumi kasem laef olowe? Explainim. (b) Wat nao bae iumi storyim lo disfala article and lo next article?

³ Waswe, diswan minim evriwan wea nem blo olketa stap insaed lo datfala buk bae kasem laef olowe? Ansa for datfala kwestin hem stap lo Eksodas 32:33, wea Jehovah sei lo Moses: “Olketa hu i bin duim disfala sin agensim mi, nem blong olketa nao bae mi tekemaot from disfala buk  blong mi.” So olketa nem wea stap insaed lo datfala buk, Jehovah savve tekem aot, or rabemaot. Hem olsem Jehovah raetem olketa nem hia witim pencil wea hem isi nomoa for aot. (Rev. 3:5) So iumi mas mek sure nem blo iumi no savve aot from datfala buk go kasem taem Jehovah disaed for hem stap olowe, olsem hem iusim baero for raetem.

⁴ Diswan maet mekem iumi garem samfala kwestin. For example, wat nao Bible talem abaotem olketa wea nem blo olketa stap insaed lo buk blo laef, and olketa wea nem blo olketa no stap insaed datfala buk? Wat taem nao olketa wea nem blo olketa insaed lo datfala buk bae kasem laef olowe? Hao nao olketa wea dae finis wea no garem chance for savve lo Jehovah? Waswe, nem blo olketa fit for stap insaed lo datfala buk? Iumi bae kasem ansa for olketa kwestin hia lo disfala article and lo next article.

NEM BLO HU NAO STAP LO BUK BLO LAEF?

5-6. (a) Olsem Philippi 4:3 storyim, hu nao samfala wea nem blo olketa stap insaed lo buk blo laef? (b) Wat taem nao bae nem blo olketa stap for olowe insaed lo buk blo laef?

⁵ Hu nao olketa wea nem blo olketa stap insaed lo datfala tokpiksa buk? For ansarem datfala kwestin, iumi bae storyim faevfala difren grup. Thrifala grup, nem blo olketa insaed lo buk hia, and tufala grup nomoa.

⁶ Firstfala grup hem olketa wea God chusim for rul witim Jesus lo heven. Waswe, nem blo olketa stap insaed lo buk blo laef distaem? Yes. Paul sei lo olketa wea “waka tugeta” witim hem lo Philippi, hao nem blo olketa anointed wan wea kasem invitation for rul witim Jesus lo heven hem insaed lo buk blo laef. (Readim Philippi 4:3.) Bat olketa mas gohed faithful, mekem nem blo olketa no aot from  datfala tokpiksa buk. Taem Jehovah disaedem hao olketa fit for kasem reward blo olketa lo heven, nem blo olketa bae stap lo datfala buk for olowe. Datwan savve happen bifor olketa dae or bifor bigfala trabol hem start.—Rev. 7:3.

7. Hao nao Revelation 7:16, 17 helpem iumi for luksavve lo taem wea nem blo olketa lo datfala big crowd bae stap for olowe insaed buk blo laef?

⁷ Mek-tu grup hem datfala big crowd. Waswe, nem blo olketa insaed lo buk blo laef? Yes. Taem olketa insaed niu world bihaen Armageddon, waswe, bae nem blo olketa stap yet lo datfala buk? Yes. (Rev. 7:14) Jesus sei olketa hia bae “kasem laef olowe.” (Matt 25:46) Bat olketa bae no stretawe kasem laef olowe. Hem olsem Jehovah raetem nem blo olketa lo pencil. Lo datfala Wan Thousand Year Rul, Jesus “bae leadim olketa go long olketa springwata wea savve mekem man laef.” Olketa wea obeyim Jesus and wea Jehovah sei olketa faithful, nem blo olketa bae stap for olowe lo buk blo laef.​—Readim Revelation 7:16, 17.

8. Hu nao nem blo olketa wea no stap lo buk blo laef, and wat nao bae happen lo olketa?

⁸ Mek-thri grup hem olketa goat wea bae finis lo Armageddon. Nem blo olketa no stap insaed buk blo laef. Jesus sei olketa “bae dae and no laef moa.” (Matt. 25:46) Paul storyim tu hao “Lord bilong iumi bae judgem olketa hia. Panis bilong olketa nao hem for olketa mas finis for olowe.” (2 Thess. 1:9; 2 Pet. 2:9) Start from bifor kam kasem distaem, olketa wea min for sin againstim holy spirit bae no kasem laef olowe, bat bae olketa finis for olowe. So olketa hia bae no resurrect. (Matt. 12:32; Mark 3:28, 29; Heb. 6:4-6) Distaem bae iumi storyim tufala grup wea bae laef bak lo earth.

OLKETA WEA BAE LAEF BAK

9. Hu nao Acts 24:15 sei bae laef bak lo earth, and wat nao mekem olketa difren?

⁹ Bible storyim hao “pipol wea raeteous” and “pipol wea no raeteous” bae laef bak and garem chance for laef olowe lo earth. (Readim Acts 24:15.) “Pipol wea raeteous” hem olketa wea faithful for worshipim Jehovah taem olketa laef. Bat “pipol wea no raeteous” hem olketa wea no worshipim Jehovah taem olketa laef, and staka lo olketa duim olketa barava nogud samting. From evriwan hia bae resurrect, hao, iumi savve sei nem blo olketa hem stap insaed buk blo laef? For kasem ansa for datfala kwestin, iumi bae storyim each grup.

10. Hao nao Jehovah ting lo olketa wea raeteous wea dae finis, and wanem responsibility nao bae olketa kasem taem olketa laef bak? (Lukim tu lo disfala magasin “Kwestin From Reader” abaotem olketa wea bae laef bak lo earth.)

¹⁰ Mek-foa grup hem “pipol wea raeteous.” Bifor olketa dae, Jehovah raetem nem blo olketa lo buk blo laef. Taem olketa dae, waswe, Jehovah aotem nem blo olketa from datfala buk? Nomoa, bikos lo tingting blo Jehovah, hem olsem olketa “laef nomoa.” Bible sei Jehovah “hem no God bilong olketa wea dae finis, bikos long tingting bilong hem, evriwan hia laef nomoa.” (Luke 20:38) Diswan minim taem olketa wea raeteous olketa laef bak lo earth, nem blo olketa bae still stap lo buk blo laef, bat hem olsem Jehovah raetem yet lo pencil. (Luke 14:14) Samfala lo olketa hia bae kasem responsibility for kamap “olketa prince lo earth.”​—Ps. 45:16, NWT.

11. Wat nao “pipol wea no raeteous” bae need for lanem mekem nem blo olketa stap insaed buk blo laef?

¹¹ Mek-faev grup hem “pipol wea no raeteous.”  Maet from olketa no savve lo olketa law blo Jehovah, olketa no followim olketa raeteous standard blo hem bifor olketa dae. So nem blo olketa no stap insaed lo datfala buk blo laef. Bat taem God resurrectim olketa, olketa bae garem chance for God raetem nem blo olketa insaed datfala buk. Olketa pipol hia wea “no raeteous” bae needim bigfala help. Taem olketa laef bifor, samfala duim olketa barava nogud samting. Olketa bae need for lane hao for followim olketa raeteous standard blo Jehovah. For duim datwan, Kingdom blo God bae organizem wanfala bigfala teaching waka wea no happen enitaem bifor.

12. (a) Hu nao bae teachim olketa wea no raeteous? (b) Wat nao bae happen lo olketa wea no acceptim wanem olketa lanem?

¹² Hu nao bae teachim olketa wea no raeteous? Datfala big crowd and olketa wea raeteous wea laef bak. Olketa wea no raeteous bae need for savve lo Jehovah mekem olketa fren gud witim hem and dedicatem laef blo olketa lo hem. Then Jehovah bae raetem nem blo olketa insaed lo buk blo laef. Jesus and olketa anointed wan bae lukluk gud for lukim sapos olketa hia acceptim wanem olketa lanem. (Rev. 20:4) Sapos samfala no laek duim datwan, nomata olketa kasem 100 years, bae olketa no savve stap lo niu world. (Isa. 65:20, NWT) Jehovah and Jesus savve lukim wat nao stap lo heart blo man, and tufala bae mek sure no eniwan bae spoelem laef lo niu world.​—Aesaea 11:9; 60:18; 65:25; John 2:25.

SAMFALA RESURRECT FOR KASEM LAEF AND OLKETA NARAWAN FOR KASEM JUDGMENT

13-14. (a) Lo bifor, hao nao iumi minim toktok blo Jesus lo John 5:29? (b) Distaem, hao nao iumi minim datfala toktok blo Jesus?

¹³ Jesus storyim tu olketa wea bae laef bak lo earth. For example, hem sei: “Taem bae kam wea evriwan wea stap  insaed long grev bae herem toktok bilong hem and laef bak. Olketa wea duim gud samting bae kasem laef olowe, bat olketa wea duim nogud samting bae kasem judgment.” (John 5:28, 29) Wat nao Jesus minim?

¹⁴ Lo bifor, iumi tingse Jesus storyim olketa samting wea olketa wea laef bak bae duim bihaen olketa resurrect. So iumi tingse samfala wea laef bak lo niu world bae duim gud samting, bat olketa narawan bae duim nogud samting. Bat Jesus no sei olketa wea bae laef bak bae duim gud samting or bae duim nogud samting. Hem storyim samting wea olketa duim finis, bifor olketa dae. Datwan hem mek sense, iaman? Lo niu world God bae no letem eniwan for duim nogud samting. So olketa wea no raeteous mas duim olketa nogud samting hia bifor olketa dae. So wat nao Jesus minim taem hem sei samfala wea laef bak bae “kasem laef olowe” and samfala bae “kasem judgment”?

15. Hu nao olketa wea bae garem chance for “kasem laef olowe” taem olketa resurrect?

¹⁵ Taem olketa wea raeteous wea duim gud samting olketa laef bak, olketa bae garem chance for “kasem laef olowe” bikos nem blo olketa hem stap finis insaed buk blo laef. So taem John 5:29 sei olketa wea “duim gud samting” bae laef bak, hem storyim sem samting wea Acts 24:15 storyim, taem hem sei “pipol wea raeteous” bae laef bak. Hao iumi minim diswan distaem hem join witim wanem Rome 6:7 storyim, wea sei: “Man wea dae, hem no guilty nao long olketa sin bilong hem.” So Jehovah hem forgivim eni sin wea olketa raeteous wan hia duim bifor olketa dae, and bae hem no forgetim tu olketa gud samting wea olketa duim bifor. (Heb. 6:10) Nomata olsem, olketa wea raeteous wea laef bak mas gohed faithful mekem nem blo olketa gohed for stap lo datfala buk blo laef.

16. Taem pipol wea no raeteous “kasem judgment,” wat nao datwan minim?

¹⁶ Wat nao bae happen lo olketa wea duim nogud samting bifor olketa dae? Nomata Jehovah forgivim sin blo olketa taem olketa dae, nem blo olketa no stap insaed buk blo laef bikos olketa no worshipim Jehovah taem olketa laef. So “olketa wea duim nogud samting” wea bae laef bak, olketa semsem olsem “pipol wea no raeteous” wea bae laef bak, wea Acts 24:15 storyim. Olketa hia bae “kasem judgment” * taem olketa resurrect. So diswan minim Jesus bae lukluk sapos olketa wea no raeteous bae willing for changem wei blo olketa or nomoa. (Luke 22:30) Bae hem tek taem for Jesus disaed sapos nem blo olketa bae fit for stap insaed lo datfala buk blo laef. Only sapos olketa changem wei blo olketa and dedicatem laef blo olketa lo Jehovah, then Jehovah bae raetem nem blo olketa lo buk blo laef.

17-18. Wat nao evriwan wea bae laef bak lo earth need for duim? Taem Revelation 20:12, 13 sei olketa bae kasem judgment followim “wanem olketa duim,” wat nao datwan minim?

¹⁷ Nomata olketa wea raeteous or no raeteous wea laef bak, evriwan need for obeyim olketa law wea insaed lo olketa niu scroll wea bae open lo datfala 1,000 year rul. Aposol John storyim wanem hem lukim lo vision. Hem sei: “Mi lukim  olketa wea dae finis, olketa bigman and olketa man nating. Olketa standap front long datfala throne and God openem olketa scroll. Bat hem openem nara scroll tu, wea hem nao scroll bilong laef. Olketa wea dae finis kasem judgment followim samting wea stap insaed long olketa scroll hia, fitim wanem olketa duim.”​—Rev. 20:12, 13.

¹⁸ Hao nao bae Jesus judgem olketa wea bae laef bak? Waswe, bae hem judgem olketa followim “wanem olketa duim” bifor olketa dae? Nomoa! Iumi storyim finis hao Jehovah hem forgivim sin blo olketa taem olketa dae. So hem no minim olketa kasem judgment followim “wanem olketa duim” bifor olketa dae. Bat Jesus bae judgem olketa lo “wanem olketa duim” followim training wea olketa kasem lo niu world. Nomata olketa faithful man olsem Noah, Samuel, David, and Daniel bae need for lane abaotem Jesus Christ and showimaot faith lo sakrifaes blo hem. Sapos olketa hia need for lanem staka samting, pipol wea no raeteous bae need for lanem staka samting moa!

19. Wat nao bae happen lo olketa wea no laek for followim training wea olketa kasem lo niu world?

¹⁹ Wat nao bae happen lo olketa wea no laek for followim training wea olketa kasem lo niu world? Revelation 20:15 sei: “Eniwan wea nem bilong hem no stap long datfala buk bilong laef, hem torowem hem long lake bilong fire.” Datwan minim bae olketa finis for olowe. So hem barava important for mek sure nem blo iumi no aot from datfala buk blo laef, bat stap insaed for olowe!

20. Wanem spesol waka nao bae gohed lo datfala Wan Thousand Year Rul blo Jesus? (Lukim piksa lo front page.)

²⁰ Iumi barava luk forward for datfala taem wea Jesus bae rul for 1,000 year! Lo datfala taem, wanfala bigfala teaching waka wea no happen enitaem bifor bae gohed lo earth. Bat lo datfala taem tu, Jesus bae disaed sapos nem blo olketa wea raeteous and wea no raeteous bae fit for stap lo datfala buk blo laef. (Aesaea 26:9; Acts 17:31) Hao nao bae disfala teaching waka gohed? Next article bae helpem iumi for savve lo datwan and for tinghae lo datfala spesol teaching waka.