1. No long taem bifor aposol Peter dae, wat nao Jehovah iusim hem for duim?

 APOSOL Peter faithful for worshipim Jehovah for staka year. Hem preach witim Jesus, hem first wan for preach lo olketa niu territory, and hem wanfala member blo governing body. Peter savve hao klosap nao bae hem dae. Nomata olsem, Jehovah givim hem staka waka for duim. Lo samting olsem 62-64 C.E., Jehovah iusim hem for raetem tufala leta wea hem nao Bible buk 1 Peter and 2 Peter. Hem hope dat olketa leta hia bae helpem olketa Christian bihaen hem dae.​—2 Pet. 1:12-15.

2. Why nao leta wea Peter raetem hem barava fitim datfala taem?

² Holy spirit helpem Peter for raetem tufala leta hia lo taem wea olketa brata and sista ‘safa long enikaen hard taem.’ (1 Pet. 1:6) Olketa wicked man tekem kam olketa false teaching and rabis wei insaed Christian kongregeson. (2 Pet. 2:1, 2, 14) Klosap nao, olketa Christian wea stap lo Jerusalem bae feisim “taem wea evri samting bae finis,” wea minim army blo Rome bae distroem datfala city and system blo olketa Jew lo datfala taem bae finis. (1 Pet. 4:7) For sure, leta blo Peter helpem olketa Christian for savve lo wat for duim for  deal witim hard taem wea kasem olketa and redyim olketa for hard taem wea bae kamap. b

3. Why nao iumi shud studyim gud tufala leta wea Peter raetem?

³ Nomata Peter raetem tufala leta hia for olketa Christian lo first century, Jehovah includim tufala leta hia for kamap part lo Bible. And iumi kasem gud samting from olketa leta hia. (Rome 15:4) Iumi tu stap lo world wea pipol duim olketa samting wea no klin, so iumi savve feisim olketa challenge wea mekem hem hard for worshipim Jehovah. And klosap nao bae iumi experience wanfala big trabol wea winim trabol wea finisim system blo olketa Jew bifor. So iumi bae storyim samfala important reminder from tufala leta blo Peter. Olketa reminder hia bae helpem iumi for gohed tingim evritaem day blo Jehovah, helpem iumi winim wei for fraetem man, and helpem iumi for mas barava lovem narawan. Olketa reminder hia savve helpem tu olketa elder for lukaftarem gud olketa brata and sista lo kongregeson.

4. Olsem 2 Peter 3:3, 4 storyim, wat nao savve mekem faith blo iumi for no stedy?

⁴ Iumi stap witim olketa pipol wea no garem faith lo olketa Bible profesi. Maet pipol tok spoelem iumi bikos for long taem finis iumi preach abaotem end, bat hem no kam yet. Samfala sei end bae hard for kam. (Readim 2 Peter 3:3, 4.) If iumi herem kaen koment olsem lo ministry, from wanfala workmate, or famili member, maet datwan savve mekem faith blo iumi for no stedy. Bat Peter storyim wat savve helpem iumi.

5. Wat nao bae helpem iumi for patient for weitim end blo disfala system? (2 Peter 3:8, 9)

⁵ Samfala maet tingse Jehovah delay for finisim disfala wicked system. Olketa toktok blo Peter savve helpem iumi for garem stretfala tingting abaotem day blo Jehovah. Hem remindim iumi, dat hao Jehovah ting lo taem hem barava difren from iumi. (Readim 2 Peter 3:8, 9.) Wanday blo Jehovah, hem wan thousand year blo iumi. Jehovah hem patient, hem no laekem eniwan for dae. Bikos taem day blo Jehovah kam, disfala system bae end. So iumi garem spesol privilege for iusim lelebet taem wea stap for preach lo pipol evriwea lo world.

6. Wat nao iumi savve duim for “tingim evritaem datfala day” blo Jehovah? (2 Peter 3:11, 12)

⁶ Peter encouragem iumi for “tingim evritaem datfala day” blo Jehovah. (Readim 2 Peter 3:11, 12.) Wat nao iumi savve duim? Each day, hem gud for iumi trae ting abaotem olketa blessing lo niu world. Imaginim dat iu brithim fresh air, kaikaim healthy kaikai, welkamim bak olketa loved wan wea resurrect, and for teachim pipol wea dae long taem go finis abaotem olketa Bible profesi wea fulfill. For ting raonem olketa samting hia savve helpem iumi for weit patient for datfala taem, and helpem iumi for sure hao end hem barava klosap. From iumi ‘savve long olketa samting’ wea bae happen lo future, olketa false teacher bae no ‘leadim iumi go rong.’​—2 Pet. 3:17.

7. Hao nao wei for fraetem man savve affectim iumi?

⁷ From iumi savve day blo Jehovah hem klosap, iumi laek duim best blo iumi for storyim gud nius lo narawan. Bat samfala taem, maet iumi hol bak for preach. Why? Maet hem bikos iumi fraetem man. Hem nao samting wea happen lo Peter. Lo naet wea  olketa arrestim Jesus, Peter fraet for sei hem wanfala disaepol blo Jesus and hem denyim Jesus thrifala taem. (Matt. 26:69-75) Bat gogo Peter ovakamim wei for fraetem man and hem raet olsem: “Iufala mas no fraetem samting wea olketa narawan fraetem and no wari.” (1 Pet. 3:14) Toktok blo Peter helpem iumi for luksavve hao iumi savve winim wei for fraetem man.

8. Wat nao savve helpem iumi for winim wei for fraetem man? (1 Peter 3:15)

⁸ Wat nao savve helpem iumi for winim wei for fraetem man? Peter sei: “Mas acceptim long heart bilong iufala Christ hem Lord bilong iufala.” (Readim 1 Peter 3:15.) So hem gud for tingim position and paoa wea Lord and King blo iumi Christ Jesus garem. If iu fraet taem iu garem chance for preach lo samwan, tingim King blo iumi. Imaginim hem rul lo heven distaem and staka million angel stap witim hem. Tingim, hem garem “paoa . . . ovarem evri samting long heven and earth” and hem bae ‘stap witim iumi go kasem taem wea world hem finis.’ (Matt. 28:18-20) Peter encouragem iumi for “mas redi evritaem” for defendim faith blo iumi. Waswe, iu laek for witness lo waka ples, lo skul, or for traem olketa difren wei for duim ministry? Ting abaotem taem wea maet bae iu fit for duim, and preparem wat for storyim. Prea for Jehovah strongim iu, and trustim hao hem bae helpem iu for winim wei for fraetem man.​—Acts 4:29.

9. Wat taem nao Peter fail for showimaot love? (Lukim tu piksa.)

⁹ Peter need for gohed lanem hao for showimaot love lo olketa narawan. Hem stap taem Jesus sei: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei.” (John 13:34) Nomata olsem, taem Peter kasem pressure, hem stop for kaikai witim olketa Gentile brata and sista blo hem. Aposol Paul sei wat Peter duim hem hypocrite. (Gal. 2:11-14) Peter acceptim datfala kaonsel and lane from datwan. Lo tufala leta wea hem raetem, hem strongim hao iumi shud no garem love for olketa brata and sista nomoa, bat for showimaot datfala love.

10. Wat nao hem minim for “showimaot love for olketa brata”? Explainim. (1 Peter 1:22)

¹⁰ Peter sei iumi shud “showimaot love for olketa brata” and sista lo kongregeson, and ‘datfala love mas tru wan.’ (Readim 1 Peter 1:22.) From iumi “obeyim olketa tru teaching” iumi savve garem kaen love olsem. Wanfala lo olketa tru teaching hia tu, hem hao “God hem no favorim eniwan.” (Acts 10:34, 35) If iumi lovem nomoa samfala lo kongregeson, iumi no obeyim yet komand blo Jesus abaotem wei for showimaot love. Hem tru, maet iumi fren klos witim samfala lo kongregeson, olsem Jesus tu. (John 13:23; 20:2) Bat Peter remindim iumi dat iumi shud waka hard for “showimaot love” for olketa brata and sista bikos iumi evriwan wanfala famili.—1 Pet. 2:17.

11. Wat nao hem minim for ‘barava lovem iumi evriwan from heart’?

¹¹ Peter encouragem iumi for ‘barava lovem iumi evriwan from heart.’ Lo disfala context, for “barava” lovem, hem minim for lovem samwan nomata hem no isi for iumi showimaot love lo hem. For example, hao if wanfala brata duim samting wea mekem iumi feel nogud? Hem normal for iumi laek pei bak winim for showimaot love. Bat, Peter lanem from Jesus hao God no hapi lo wei for pei bak. (John 18:10, 11) Lo leta blo Peter, hem sei: “No changem bak nogud samting wea narawan duim long iufala or tok spoelem man wea tok spoelem iufala. Bat iufala mas tok kaen long hem.” (1 Pet. 3:9) Taem iumi barava lovem narawan, iumi bae kaen and tingim olketa nomata olketa mekem iumi feel nogud.

12. (a) Wat nao nara samting wea love helpem iumi for duim? (b) Wat nao iu shud duim olsem iu lukim lo disfala video Waka Hard for Keepim Wan Mind?

¹² Lo first leta blo Peter, hem iusim tu disfala toktok “barava lovem.” Kaen love olsem savve helpem iumi for “evritaem willing for forgivim narawan,” and no samfala taem nomoa. (1 Pet. 4:8) Maet Peter tingim bak leson abaotem forgiveness wea hem lanem from Jesus samfala year bifor. Datfala taem, Peter tingse hem barava kaen taem hem sei bae hem forgivim brata blo hem “sevenfala taem.” Bat Jesus teachim Peter and iumi tu, dat iumi shud forgive go kasem “seventi-seven taem,” wea minim forgiveness hem no garem eni limit. (Matt. 18:21, 22) If hem no isi for iu followim datfala kaonsel, no discourage! Iumi evriwan wea worshipim Jehovah no perfect, samfala taem hem no isi for forgivim narawan. Important samting for iu duim distaem, hem for traem best for forgive and mek peace witim brata blo iu. c

13. Why nao hem no isi for olketa elder lukaftarem olketa brata and sista?

¹³ For sure, Peter no forgetim wat Jesus talem bihaen hem resurrect, Jesus sei:  “Lukaftarem olketa smol sheepsheep bilong mi.” (John 21:16) If iu elder, iu savve datfala instruction hem for iu tu. Hem tru, hem lelebet challenging for olketa elder garem taem for duim disfala important assignment. Bikos olketa mas first, mek sure olketa provaedem material need blo famili, tingim feeling blo olketa, and helpem famili fren witim Jehovah. Olketa elder lead tu lo preaching waka, preparem part for olketa meeting, assembly, and olketa convention. Samfala help tu lo Hospital Liaison Komiti or kasem assignment for waka lo Local Design/Construction Department. Tru nao, olketa elder barava busy!

14. Wat nao savve encouragem olketa elder for lukaftarem olketa sheepsheep? (1 Peter 5:1-4)

¹⁴ Peter encouragem olketa elder for: “Lukaftarem olketa sheepsheep bilong God.” (Readim 1 Peter 5:1-4.) If iu elder, mifala savve iu lovem olketa brata and sista and willing for lukaftarem olketa. Bat samfala taem, maet iu feel olsem iu barava busy or taed, and hard for iu duim datfala assignment. Wat nao iu savve duim? Storyim evri wari blo iu lo Jehovah. Peter sei: “Sapos eniwan duim waka for helpem narawan, hem mas depend long paoa wea kam from God.” (1 Pet. 4:11) Olketa brata and sista maet feisim olketa problem wea hem hard for solvem distaem. Bat tingim datfala “nambawan man for lukaftarem olketa sheepsheep,” Jesus Christ, hem savve givim help wea olketa needim winim iu. Hem savve duim datwan distaem and lo niu world. Bat wat Jehovah laekem olketa elder for duim, hem for lovem olketa brata and sista, lukaftarem, and “showimaot gudfala example for olketa sheepsheep.”

15. Wat nao wanfala elder duim for shepherdim olketa sheepsheep blo God? (Lukim tu piksa.)

¹⁵ William wanfala long taem elder, luksavve why hem important for duim shepherding. Taem COVID-19 pandemic start, hem and olketa nara elder markem wanfala important goal, hem nao for trae contactim each wan lo grup blo olketa evri week. Hem explainim why olketa duim datwan, hem sei: “Staka brata and sista stap lo haos seleva, and hem isi for olketa kwiktaem garem negative tingting.” Taem wanfala brata or sista garem problem, William lisin gud lo olketa mekem hem savve wat nao olketa wari abaotem and needim. Then hem trae for faendem samfala pablikeson  or video from website blo iumi for encouragem olketa. Hem sei: “Hem important tumas for duim shepherding distaem winim enitaem. Olsem iumi waka hard for helpem pipol lane abaotem Jehovah, iumi need tu for duim best for shepherdim olketa sheepsheep blo Jehovah, and helpem olketa for gohed stap lo truth.”

16. Hao nao iumi savve applyim olketa leson wea iumi lanem from tufala leta blo Peter?

¹⁶ Iumi storyim samfala leson nomoa from tufala leta blo Peter. Maet iu luksavve lo samfala samting wea iu laek for impruv lo hem. For example, hao, iu laek for evritaem ting raonem olketa blessing wea bae iu kasem lo niu world? Hao, iu markem goal for witness lo waka ples, skul, or traem olketa difren wei for duim ministry? Waswe, iu lukim wat iu savve duim for showimaot iu barava lovem olketa brata and sista? Olketa elder, hao, iu disaed strong and barava willing for lukaftarem olketa sheepsheep blo God? Hem gud for honest lo iumiseleva and lukim wat iumi need for impruv lo hem, bat no discourage. “Lord [Jesus] hem kaen tumas” and hem bae helpem iu for impruv. (1 Pet. 2:3) Peter sei: “God . . . bae finisim training bilong iufala mekem iufala barava strong. Hem nao chusim iufala bikos iufala wan mind witim Christ, mekem iufala kasem glory bilong hem wea no savve finis.”​—1 Pet. 5:10.

17. Wanem reward nao iumi bae kasem if iumi no givap and gohed letem Jehovah for trainim iumi?

¹⁷ Firstaem Peter feel olsem hem no gud inaf for Son blo God stap witim hem. (Luke 5:8) Bat witim loving sapot blo Jehovah and Jesus, Peter gohed faithful for followim Christ. Gogo Peter kasem privilege “for go insaed long datfala Kingdom wea no savve finis and wea hem bilong Lord bilong iumi, Jesus Christ, wea hem nao sevem iumi.” (2 Pet. 1:11) Datwan hem nambawan blessing! If iu no givap olsem Peter and letem Jehovah for trainim iu, iu bae kasem reward for laef olowe. Iu bae ‘sure faith bilong iu bae sevem laef bilong iu.’​—1 Pet. 1:9.