1-2. Why nao iumi shud interest lo story blo Samson?

 WAT nao iu tingim taem iu herem datfala nem Samson? Iu maet tingim hao hem man wea strong tumas. And datwan hem tru. Bat Samson hem mekem wanfala bad disison wea mekem hem for kasem staka nogud samting. Nomata olsem, Jehovah focus lo olketa samting wea Samson duim wea showimaot hem faithful lo hem. And hem includim olketa record abaotem faithful fasin blo Samson insaed lo Bible for helpem iumi.

² Jehovah iusim Samson for duim samfala sapraesing samting for helpem pipol blo hem, Israel wea hem chusim. Staka handred year bihaen Samson dae, Jehovah iusim aposol Paul for includim nem blo Samson lo list blo olketa man wea garem strong faith. (Heb. 11:32-34) Example blo Samson savve encouragem iumi. Hem trustim Jehovah nomata lo olketa challenging situation. Lo disfala article, bae iumi storyim samfala leson wea iumi savve lanem from Samson and hao example blo hem savve encouragem iumi.

3. Wanem assignment nao Samson kasem?

³ Taem Samson hem born, olketa Philistine rul ovarem nation blo Israel and barava spoelem olketa. (Judg. 13:1) Olketa Israelite safa tumas bikos olketa lo Philistine barava treatim olketa nogud. Jehovah chusim Samson for “sevem olketa blo Israel from hand blo olketa Philistine.” (Judg. 13:5) Bat  datwan hem no isi! For Samson duim disfala challenging assignment, hem need for depend lo Jehovah.

4. Hao nao Jehovah helpem Samson for free from olketa Philistine? (Judges 15:​14-16)

⁴ Tingim wanfala example wea showim hao Samson trustim Jehovah, and depend lo hem for helpem hem. Wantaem army blo Philistine kam for holem Samson lo Lehi, wea luk olsem datwan hem lo Judah. Olketa man lo Judah fraet, so olketa disaed for tekem Samson and givim lo enemy. Own pipol blo Samson taengem Samson lo tufala niu rope and givim hem lo olketa Philistine. (Judg. 15:9-13) Bat “spirit blo Jehovah mekem [Samson] strong,” and hem brekem datfala rope. “Then hem lukim jawbone blo wanfala man donkey,” and iusim datwan for killim dae 1,000 Philistine man!​—Readim Judges 15:14-16.

5. Hao nao Samson showimaot hem trustim Jehovah taem hem iusim jawbone wanfala donkey?

⁵ Why nao Samson iusim jawbone blo wanfala donkey? No enitaem pipol iusim kaen weapon olsem for faet! Masbi Samson luksavve nomata wanem weapon hem iusim, Jehovah nao bae helpem hem for win. Tru nao, disfala faithful man iusim eniting wea available for duim will blo Jehovah. So from Samson trustim Jehovah, hem killim dae evri man hia.

6. Taem iumi duim eni assignment wea iumi kasem from Jehovah, wat iumi savve lanem from Samson?

⁶ Jehovah savve givim iumi strong tu for duim eni assignment wea hem givim, nomata luk olsem datwan hem no isi. And God savve helpem iumi lo wei wea maet mekem iumi sapraes. Trustim Jehovah wea givim paoa lo Samson, hem bae helpem iu for duim will blo hem, if iu depend lo Hem for helpem iu.​—Prov. 16:3.

7. Wanem example nao showimaot hem important for iumi prea lo Jehovah for direction?

⁷ Staka brata and sista wea waka lo olketa theocratic construction project showim olketa trustim Jehovah. Lo bifor, olketa brata savve designim and wakem staka niu Kingdom Hall and olketa nara building. Bat gogo,  from staka pipol kam insaed organization blo Jehovah, organization need for mekem samfala adjustment. Olketa brata wea lead prea lo Jehovah for direction and traem olketa niu idea, olsem for peim olketa building and renovatim. Robert wea waka lo staka building project blo iumi evriwea lo world lo olketa year wea go pas sei: “Firstaem hem no isi for samfala brata followim disfala niu idea. Hem sei tu, diswan hem barava difren from wat mifala bin duim insaed staka year wea go pas. Bat olketa brata willing for followim olketa idea hia, and hem barava klia hao Jehovah blessim olketa adjustment hia.” Diswan hem wanfala example nomoa lo hao Jehovah leadim pipol blo hem for duim will blo hem. So evritaem hem gud for tingim diswan, ‘Waswe, mi prea lo Jehovah for direction blo hem and willing for mekem samfala change lo service blo mi for hem?’

8. Lo taem wea Samson thirsty tumas, wat nao hem duim?

⁸ Iu maet rememberim olketa nara sapraesing samting wea Samson duim. Hem killim wanfala lion and bihaen hem killim dae 30-fala Philistine man lo Ashkelon. (Judg. 14:​5, 6, 19) Samson luksavve hem hard for duim olketa samting olsem, if Jehovah no helpem hem. Datwan showaot lo wanfala taem wea hem thirsty tumas bihaen hem killim dae 1,000 Philistine. Wat nao hem duim? Hem no go faendem wata seleva for drinkim bat hem askem Jehovah for helpem hem.

9. Wat nao Jehovah duim taem Samson prea for help? (Judges 15:19 and footnote)

⁹ Taem Samson singaot lo Jehovah for help, Jehovah duim mirakol for creatim wanfala wata source. Taem Samson drinkim datfala wata, hem “kasem bak strong blo hem and hem feel gud.” (Readim Judges 15:19 and footnote.) Luk olsem datfala niu wata source hem still stap staka year bihaen, taem profet Samuel raetem Bible buk Judges. Datfala wata maet remindim olketa Israelite hao if olketa faithful servant blo Jehovah depend lo hem taem olketa needim help, hem bae helpem olketa.

10. Wat nao iumi savve duim for kasem help from Jehovah? (Lukim tu piksa.)

¹⁰ Iumi tu need for depend lo Jehovah for help nomata wanem talent or ability iumi garem, or nomata iumi duim staka samting finis lo service blo Jehovah. Iumi shud hambol and acceptim hao iumi savve duim samting wea Jehovah askem only if iumi depend lo hem. Samson kasem strong taem hem drinkim wata wea Jehovah provaedem. Olsem Samson, iumi tu savve strong lo spiritual wei taem iumi mekius lo evri samting wea Jehovah provaedem.​—Matt. 11:28.

11. Hao nao iumi savve depend lo Jehovah for help? Storyim example.

¹¹ Tingim example blo Aleksey, wanfala brata blo iumi lo Russia wea kasem big persecution. Wat nao helpem hem for gohed strong nomata hem kasem datfala hard taem? Hem and waef garem gud spiritual schedule. Hem sei: “Mi trae for up-tu-date witim spiritual schedule blo mi for duim personal study and Bible reading evriday. Evri morning, mi and waef savve discussim text tugeta and prea lo Jehovah.” Wat nao iumi savve lanem? Winim wei for depend lo iumiseleva, iumi shud depend lo Jehovah. Hao nao iumi savve duim datwan? Iumi strongim faith blo iumi taem iumi garem gud schedule for studyim Bible, prea, attendim olketa meeting, and duim preaching waka. Then, Jehovah bae  givim help wea iumi needim for gohed servem hem. Olsem hem strongim Samson, Hem bae strongim iumi tu.

12. Wat nao bad disison wea Samson mekem, and hao nao datwan difren from nara tufala first situation?

¹² Samson no perfect tu olsem iumi, so samfala taem hem mekem olketa bad disison. Wanfala disison wea Samson mekem leadim hem for kasem nogud samting, bikos hem forgetim assignment wea God givim hem. No longtaem bihaen Samson kamap judge, hem “laekem tumas wanfala gele wea stap lo Valley blo Sorek wea nem blo hem Delilah.” (Judg. 16:4) Bifor datwan, Samson engage witim wanfala gele lo Philistine, bat Jehovah nao givim direction lo Samson for duim datwan bikos Jehovah “lukaotem chance for againstim olketa Philistine.” Then bihaen moa, Samson go stay lo haos blo wanfala jury woman lo taon blo Gaza lo Philistine. Lo datfala taem, God givim paoa lo Samson for karem olketa door lo gate blo datfala taon, wea mekem datfala taon for no sef. (Judg. 14:​1-4; 16:​1-3) Bat case blo Delilah hem difren, bikos luk olsem hem wanfala Israelite gele.

13. Wat nao Delilah duim wea mekem Samson for kasem nogud samting?

¹³ Delilah acceptim big amount lo selen from olketa blo Philistine for givim Samson lo enemy. Waswe, Samson lovem Delilah tumas dastawe hem no luksavve wat Delilah plan for duim? Nomata wat nao reason, Delilah gohed putim pressure lo Samson for talem wat nao mekem hem strong tumas, and gogo Samson talem hem nao. Sorre samting, bad disison wea Samson mekem leadim hem for lusim strong blo hem and hem no kasem  help from Jehovah for lelebet taem.​—Judg. 16:16-20.

14. Wat nao olketa nogud samting wea Samson kasem from hem trustim Delilah?

¹⁴ Samson kasem olketa barava nogud samting bikos hem trustim Delilah and no trustim Jehovah. Olketa Philistine kasholem hem and aotem tufala eye blo hem. Olketa prisonim hem lo Gaza, taon wea bifor hem aotem gate blo hem. Pipol lo there mekem hem slave for smasem grain. Then olketa mek shame lo Samson lo taem blo wanfala celebration blo olketa Philistine. Lo datfala taem, olketa offerim sakrifaes lo false god blo olketa, Dagon, bikos olketa sei hem nao helpem olketa for kasholem Samson. Olketa tekem kam Samson from prison lo datfala party for hem “duim samfala samting for [olketa] laf lo hem,” and for mekfani lo hem.—Judg. 16:​21-25.

15. Wat nao Samson duim wea showim hem trustim moa Jehovah? (Judges 16:​28-30) (Lukim piksa lo front page.)

¹⁵ Samson mekem wanfala serious mistek, bat hem no givap. Hem lukaotem chance for faet againstim olketa Philistine, wea hem nao wat Jehovah laekem hem for duim. (Readim Judges 16:​28-30.) Samson begim Jehovah: “Letem mi pei bak lo olketa Philistine.” Tru God ansarem prea blo Samson and givim moa spesol paoa lo Samson. From datwan, Samson killim dae staka Philistine lo datfala party winim eni nara taem.

16. Wat nao iumi savve lanem from Samson?

¹⁶ Nomata Samson kasem olketa barava nogud samting from mistek blo hem, datwan no stopem hem for duim will blo Jehovah. Nomata if iumi mekem mistek and kasem kaonsel or lusim wanfala privilege, iumi mas no givap. Tingim hao Jehovah redi for forgivim iumi. (Ps. 103:8-10) Nomata iumi mekem mistek, Jehovah savve givim strong lo iumi for duim will blo hem, olsem hem duim for Samson.

17-18. Hao nao example blo Michael encouragem iu? (Lukim tu piksa)

¹⁷ Tingim example blo Michael, wanfala young brata. Hem busy lo service blo Jehovah, hem ministerial servant, and regular pioneer. Bat hem duim wanfala mistek wea mekem hem for lusim olketa privilege blo hem lo kongregeson. Hem sei: “Mi barava busy lo service blo mi for Jehovah. Then seknomoa, mi feel olsem mi no savve duim eniting  for Jehovah nao. Mi no tingim dat Jehovah bae lusim mi, bat mi no sure if gogo bae mi fren gud moa witim Jehovah olsem bifor or kasem moa olketa privilege lo kongregeson.”

¹⁸ Gud samting nao, Michael no givap. Hem sei: “Mi focus lo frenship mi witim Jehovah taem mi prea evritaem, study, and ting raonem wat mi studyim.” Gogo, Michael kasem bak olketa privilege lo kongregeson. Distaem hem wanfala elder and regular pioneer. Hem sei: “Sapot and encouragement wea mi kasem, especially from olketa elder, helpem mi for luksavve Jehovah still lovem mi. Distaem mi savve duim moa waka insaed kongregeson witim klin konsens. Wanem mi experiencem helpem mi for luksavve Jehovah bae forgivim eniwan wea barava repent.” Iumi savve sure Jehovah bae iusim iumi and blessim iumi tu nomata iumi mekem mistek, bat iumi waka hard for stretem and gohed for trustim hem.​—Ps. 86:5; Prov. 28:13.

19. Hao nao example blo Samson strongim iu?

¹⁹ Lo disfala article, iumi storyim samfala interesting samting wea happen lo laef blo Samson. Hem no perfect, bat hem no givap for duim will blo Jehovah nomata hem mekem bad disison for maritim Delilah. Jehovah forgivim Samson and iusim hem moa for duim wat hem laekem. And Jehovah ting lo Samson olsem man wea garem strong faith, and includim nem blo hem insaed lo list blo olketa faithful servant blo hem wea stap lo Hebrew chapter 11. Iumi hapi tumas for savve dat iumi worshipim Dadi blo iumi lo heven wea laekem tumas for givim strong lo iumi, especially taem iumi feisim olketa challenge! So iumi tu shud begim Jehovah olsem Samson, wea sei: “Plis tingim mi and strongim mi.”​—Judg. 16:28.