Waswe, Bible Stopem Olketa Bigman Bilong Church for No Marit?
SAMFALA religion long world, olsem Catholic, Anglican, Buddhist, and olketa nara church sei olketa bigman long church mas no marit (celibacy). Bat samfala tingse why iumi herem staka story abaotem olketa bigman long church duim sex witim olketa pikinini and olketa man, hem from olketa no marit.
So datwan mekem iumi laek for savve sapos Bible hem sei olketa bigman long church mas no marit. Long disfala article iumi bae storyim hao disfala idea hem start and wanem nao tingting bilong God abaotem datwan.
WANEM TAEM NAO DATWAN HEM START?
Datfala Encyclopædia Britannica storyim celibacy hem minim “man wea waka for church bae no marit and no duim sex.” Long 2006, taem Pope Benedict XVI hem story long olketa bigman bilong Catholic church, hem sei wei wea olketa bigman bilong Catholic no marit hem “start kam long taem bilong olketa Aposol.”
Bible no sei datwan hem kastom bilong olketa Christian long first century. And Aposol Paul, wea stap long datfala taem, hem warnim olketa Christian abaotem samfala man wea bae talem “olketa laea toktok wea pipol sei hem kam from God” and “olketa bae stopem pipol for no marit.”—1 Timothy 4:1-3.
Bat start long mek-tu century samfala Christian religion long Europe sei olketa bigman long church bilong olketa mas no marit. Datfala buk Celibacy and Religious Traditions sei diswan “join witim wei wea olketa long Rome encouragem pipol wea stap anda long rul bilong olketa for no duim sex.”
Nomata long mek-thri century and kamap, olketa bigman and olketa komiti bilong olketa church gohed for sei olketa bigman long church mas no
marit. Olketa tingse man wea duim waka bilong Lord shud no duim sex bikos datwan hem no klin. Nomata olsem, datfala Encyclopædia Britannica sei “kam kasem mek-10 century staka priest and samfala bishop olketa garem waef.”Long tufala meeting wea olketa komiti bilong Catholic Church holem long Rome long 1123 and 1139, olketa disaedem evri priest and evri bigman bilong church mas no marit, and datwan no change kam kasem distaem. Datwan for mekem church no lusim staka selen bikos olketa hia bae no garem pikinini for kasem wanem church givim for olketa bigman hia.
WANEM BIBLE TALEM ABAOTEM DATWAN
Bible storyim tingting bilong Jehovah abaotem diswan. Olsem example, Jesus storyim samfala wea gohed for stap singol olsem hem, “mekem olketa savve duim moa samting for Kingdom bilong God.” (Matthew 19:12) Aposol Paul tu hem story abaotem samfala Christian wea stap singol olsem hem mekem olketa “savve sharem gud nius witim nara pipol.”—1 Corinth 7:37, 38; 9:23.
Nomata olsem, Jesus and Paul no komandim olketa wea singol for no marit. Jesus sei olketa wea God mekem olketa fit bae stap singol, so no evriwan bae stap singol. Taem Paul story abaotem “olketa wea no marit,” hem sei hem storyim tingting bilong hem nomoa ‘bikos Lord no givim hem eni law abaotem olketa wea no marit.’—Matthew 19:11; 1 Corinth 7:25.
Nara samting, Bible sei aposol Peter and staka nara Christian wea duim ministry long first century, olketa marit. (Matthew 8:14; Mark 1:29-31; 1 Corinth 9:5) And from wei for durong hem kamap big long datfala taem, aposol Paul sei sapos wanfala elder hem marit hem mas “garem wanfala waef nomoa” and ‘olketa pikinini bilong hem mas obeyim hem.’—1 Timothy 3:2, 4.
Nomata olketa hia duim ministry, olketa no tingse hem rong for sleep witim marit partner bilong olketa, bikos Bible sei “hasband mas givim long waef wanem waef hem fit for kasem” and olketa wea marit “mas no stopem [hasband or waef] for sleep witim hem.” (1 Corinth 7:3-5) So hem klia, God no stopem olketa wea bigman long church for no marit.
MEKEM OLKETA SAVVE SHAREM GUD NIUS WITIM NARA PIPOL
Sapos God no stopem olketa wea duim ministry for marit, why nao Jesus and Paul sei hem gud for man savve stap singol? Bikos taem man hem singol hem savve spendem moa taem for sharem gud nius witim olketa nara pipol. Taem man no marit hem savve tingim nomoa waka bilong hem bikos bae hem no warim wanem marit partner needim olsem olketa wea marit.—1 Corinth 7:32-35.
Olsem example, David, wea stap long Mexico City, disaed for lusim waka bilong hem wea pei bilong hem big for go long Costa Rica for teachim Bible long pipol wea stap long vilij. From David hem singol, waswe, datwan helpem hem taem hem go long there? Hem sei: “Ia! Hem no isi for getius long difren living and niu culture, bat from mi no need for warim narawan, datwan mekem hem isi lelebet.”
Claudia tu hem singol, and hem savve go stap long olketa difren ples for duim preaching waka. Hem sei: “Mi hapi tumas for duim disfala waka. Mi luksavve God barava lukaftarem mi gud, and datwan strongim faith bilong mi and mekem mi fren gud witim hem.”
“Nomata iu marit or iu singol, iu bae hapi sapos iu duim best bilong iu for Jehovah God.”—Claudia
Nomata man hem singol hem savve enjoyim laef. Claudia sei moa: “Nomata iu marit or iu singol, iu bae hapi sapos iu duim best bilong iu for Jehovah God.”—Psalm 119:1, 2.