DOREEN seke fogud taem doctor sei hasband bilong hem, Wesley, wea 54 year nomoa, hem kasem barava nogud cancer long brain bilong hem. * Doctor sei hem garem tu-thri month nomoa for laef. Doreen sei: “Mi no savve bilivim wanem doctor talem. Mi seke tumas and for samfala week mi no savve tingting stret. Mi hard for bilivim diswan hem happen long mifala. Hem samting wea mi barava no expectim.”

Samting wea kasem Doreen hem kasem olketa narawan tu. Eniwan savve seknomoa kasem barava nogud sik. Taem datwan happen, staka willing for lukaftarem famili member wea sik big fogud and klosap for dae. Bat, hem barava no isi for lukaftarem sikman. Wanem nao olketa long famili savve duim for comfortim and lukaftarem famili member wea sik big? Hao nao olketa long famili savve deal witim olketa difren feeling wea olketa garem taem olketa lukaftarem famili member wea sik? Wanem nao savve happen long sikman taem hem klosap for dae? Firstaem, bae iumi storyim samfala hard samting wea iumi savve feisim distaem, taem iumi lukaftarem samwan wea sik big.

Medical science hem barava helpem pipol distaem saed long health. Insaed samting olsem wan handred year wea go pas, nomata pipol long olketa rich kantri tu no savve laef longtaem. Man savve dae from eni smol sik or accident. Hem no isi for tekem sikman long hospital, so famili nao lukaftarem hem and hem savve dae long haos nomoa.

Olketa kaen sik wea savve killim man dae kwiktaem long bifor, distaem olketa doctor iusim olketa niu treatment for helpem man for gohed laef. Nomata olsem, olketa treatment hia no savve finisim datfala sik, and sikman no savve lukaftarem hemseleva tu. Hem barava no isi for lukaftarem olketa sikman olsem.

Bikos long olketa samting hia, man wea sik big fogud hem go stap long hospital. Staka pipol distaem  no savve wanem hem happen long man wea klosap for dae, and tu-thri nomoa lukim taem man hem dae. From olketa no savve wanem bae happen, maet datwan mekem olketa no savve hao for lukaftarem famili member wea sik. Wanem nao savve helpem olketa hia?

Olsem example bilong Doreen showimaot, staka pipol seke and sorre fogud taem doctor talem wanfala long famili garem nogud sik and bae hem dae. Datwan savve mekem iumi barava wari, fraet, and sorre. Bat wanem nao savve helpem iumi redi for samting wea bae happen? Wanfala man wea faithful long God hem prea olsem: “Teachim mifala for iusim gud olketa day bilong mifala mekem mifala garem heart wea wise.” (Psalm 90:12) Prea strong long Jehovah God mekem hem ‘teachim iu for iusim gud’ lelebet taem wea iu garem witim famili member hia long wisefala wei.

For duim diswan iumi mas plan gud. Sapos famili member wea sik savve story yet and hem willing for duim datwan, maet hem gud for askem hem hu nao hem laekem for mekem olketa disison for hem taem hem no savve toktok. Maet iufala savve storyim tugeta sapos hem laekem doctor for keepim hem gohed laef, tekem hem long hospital, or sapos hem no laek for acceptim samfala treatment. Diswan bae no mekem olketa long famili feel nogud or feel guilty taem olketa mas mekem disison for hem taem hem no fit for disaed seleva. Taem evriwan story tugeta firstaem, datwan bae mekem famili fit for lukaftarem gud datfala sikman. Bible sei: “Taem pipol no story gud tugeta hem hard for olketa mekem gudfala plan.”—Proverbs 15:22.

Main waka bilong samwan wea lukaftarem sikman hem for comfortim hem. Man wea gogo for dae hem need for herem iumi lovem and tingim hem. Hao nao iumi savve duim diswan? Readim samfala buk and singim samfala song wea hem bae enjoyim. Staka kasem comfort taem samwan long famili holem hand bilong olketa and story kaen long olketa.

Hem gud for talem nem bilong eniwan wea visit kam long hem. Wanfala report hem sei: “Long faevfala sense wea iumi garem, last wan wea no waka nao hem for herehere. Nomata luk olsem [sikman] hem sleep, hem still savve herem samting so no talem eni samting wea bae iu no talem long hem taem hem wekap.”

Sapos hem fitim, prea witim hem. Bible storyim  wantaem aposol Paul and olketa wea travel witim hem, olketa wari tumas and no sure sapos olketa bae laef or nomoa. Wanem nao olketa duim? Paul sei long olketa fren bilong hem: “Iufala tu savve helpem mifala sapos iufala prea for mifala.” (2 Corinth 1:8-11) Wei for prea strong long taem wea man wari or garem bigfala sik hem savve barava comfortim man.

Taem iumi savve wanfala long famili bae hem dae, datwan hem mekem iumi feel sorre tumas. Dae hem no plan bilong God for iumi olketa man. Dastawe hem hard for iumi acceptim datwan. (Rome 5:12) Bible sei dae hem wanfala “enemy.” (1 Corinth 15:26) So hem normal samting for iumi no acceptim wanfala long famili bae hem dae.

Nomata olsem, wei for ting raonem wanem bae happen savve helpem olketa long famili for no fraet tumas and for deal witim samting wea happen. Samfala samting wea maet happen hem stap long box, “ Taem Man Klosap for Dae.” Bat samting wea bae happen long sikman wea redi for dae hem no semsem witim narawan. Nomata olsem, samfala samting wea box hia storyim hem happen long staka sikman.

Taem famili member hem dae, olketa wea lukaftarem hem and olketa narawan long famili needim comfort from olketa fren bilong olketa. Hem gud for talem long olketa, famili member hia hem rest and no safa nao. God wea wakem iumi olketa man hem sei “olketa wea dae finis nating savve long eni samting.”—Ecclesiastes 9:5.

Hem barava important for depend long God long taem wea famili member hem sik and bihaen hem dae tu. God savve iusim olketa narawan for talem toktok and for duim olketa samting wea bae helpem iu. Doreen sei: “Mi acceptim help bilong evriwan. Staka nao helpem mifala. Mi and hasband bilong mi savve help wea mifala kasem hem from Jehovah and hem olsem Jehovah sei, ‘Mi stap witim iutufala for helpem iutufala.’ Mi bae nating forgetim datwan.”

Tru nao, no eniwan savve lukaftarem iumi olsem Jehovah God. Hem nao wakem iumi, so hem barava minim gud sorre and pain wea iumi kasem. Hem fit and barava laek for helpem and encouragem iumi mekem iumi savve deal witim samting wea happen. Winim datwan, hem promis for finisim dae for olowe and for mekem staka billion pipol wea dae finis for laef bak. (John 5:28, 29; Revelation 21:3, 4) Long datfala taem, evriwan bae talem disfala toktok bilong aposol Paul: “Dae, iu lus nao bikos paoa bilong iu for mekem pipol safa hem finis.”—1 Corinth 15:55.