BIGFALA SIK OR WEI FOR DISABLE SAVVE BARAVA AFFECTIM LAEF BILONG MAN. Wanfala man wea nem bilong hem Ulf, wea firstaem hem strong and healthy, hem sei olsem bihaen hem paralaes: “Mi feel sorre tumas. Mi feel iusles, feel wik, and feel olsem mi no garem hope nao.”

Samting wea happen long Ulf hem showimaot nogud samting savve kasem iumi evriwan. Nomata olsem, iumi savve duim samting for helpem iumi for stap healthy. Bat waswe sapos iumi sik? Waswe, datwan minim iumi bae no savve hapi nao? Nomoa. Bae iumi storyim why nao olsem. Bat firstaem, iumi laek storyim samfala principle wea savve helpem iumi for stap healthy.

“NO OVA TUMAS LONG ENI SAMTING.” (1 Timothy 3:2, 11) Sapos iumi evritaem kaikai tumas or drinkim tumas alcohol, datwan bae spoelem health bilong iumi and bae iumi spendem staka selen tu! “Yu no joenem olketa hu i spaka an kaikai tumas. Olketa spakmasta an olketa hu kaikai tumas, bae olketa kamap puaman.”—Provebs 23:20, 21.

NO SPOELEM BODY BILONG IU. “Iumi mas klinim from body bilong iumiseleva eni samting wea savve mekem body or tingting bilong iumi for no klin.” (2 Corinth 7:1) Pipol spoelem body bilong olketa taem olketa kaikaim bilnat, kaikaim or smokem tobacco, drinkim tumas alcohol, or iusim drug. Datfala U.S. Centers for Disease Control and Prevention sei, wei for smoke “savve mekem man sik and hem spoelem klosap evri organ long body.”

TINGIM BODY AND LAEF BILONG IU HEM SPESOL. “[God] nao mekem iumi laef and savve wakabaot and duim samting.” (Acts 17:28) Taem iumi tinghae long datwan, iumi bae no duim eni samting wea savve spoelem body bilong iumi, nomata iumi long waka, hapitaem, or taem iumi draevem trak. No duim eni samting wea maet mekem iu hapi for lelebet taem, bat hem savve spoelem body bilong iu!

KONTROLEM FEELING. Wanem iumi tingim savve  affectim body bilong iumi. So trae for no wari tumas, no jealous, kontrolem kros, and kontrolem olketa narakaen nogud feeling. Sams 37:8 hem sei: “Yu no kros.” Bible sei tu: “No warim samting wea bae happen tumoro, leavim go datwan for tumoro nao, bikos evri day bae olketa problem kamap.”—Matthew 6:34.

TINGIM OLKETA GUDFALA SAMTING. Provebs 14:30 hem sei: “Garem kuaet tingting, bae yu helti.” Bible sei tu: “Man hemi hapi, laef hemi helti.” (Provebs 17:22) Diswan hem samting wea olketa scientist luksavve hem tru. Wanfala doctor long Scotland sei: “Sapos iu hapi, bae iu no savve sik tumas olsem olketa wea no hapi.”

DEAL WITIM HEALTH PROBLEM. Olsem Ulf, wea iumi storyim finis, maet iumi garem health problem wea no savve finis. Nomata olsem, iumi savve faendem olketa wei for deal witim datwan. Samfala barava feel wikdaon, and diswan mekem problem bilong olketa worse go moa. Bible sei: “Sapos iu feel wikdaon taem iu kasem trabol, bae iu no strong nao.” (Proverbs 24:10, NW)

Olketa narawan maet barava sorre long firstaem, bat bihaen, olketa mekem samfala change for helpem olketa deal witim samting wea kasem olketa. Hem nao wanem Ulf duim. Ulf sei, bihaen hem prea staka taem and ting raonem wanem Bible talem, datwan “helpem hem for luksavve long samting wea hem fit for duim and no tingim nomoa wanem hem no fit for duim.” And tu, hard samting wea kasem Ulf helpem hem for tingim and sorre long narawan. Diswan mekem hem laek storyim promis long Bible witim olketa narawan.

Steve tu nara man wea barava safa. Taem hem 15 year, hem foldaon from wanfala tree and hem paralaes. Taem hem 18 year, hem savve iusim moa tufala hand bilong hem. Then hem go skul long wanfala university, and long there hem iusim drug, drinkim tumas alcohol, and hem durong. Laef bilong hem nogud tumas, bat taem hem start for studyim Bible datwan helpem hem for lusim olketa nogud wei bilong hem and for hapi. Steve sei: “Firstaem, mi feel olsem laef bilong mi hem iusles, bat distaem mi hapi, satisfae, and garem peace.”

Samting wea Steve and Ulf talem hem mekem iumi for tingim Sams 19:7, 8, wea sei: “Lo blong [Jehovah] hemi barava stret fogud, an hemi mekem yumi fo filstrong moa. . . . Olketa tising blong [Jehovah] hemi stret, an olketa wea i gohed fo obeim i hapi. Olketa strongfala toktok blong hem hemi stret, an hemi gohed fo givim gudfala save long yumi.”