“HOPE HEM . . . IMPORTANT SAMTING WEA MEKEM IUMI FREN GUD WITIM GOD.” Hem nao samting wea datfala buk Hope in the Age of Anxiety hem talem. Datfala buk sei tu: “Hope savve helpem iumi for winim feeling for fraet, and for no feel olsem iumi no wei nao.”

Bible storyim hem important for iumi garem hope, and hem warnim iumi tu for no  putim hope long eni samting wea bae no kamap tru. Sams 146:3 sei: “Yufala mas no trastem olketa lida blong wol ya. Ya, yufala mas no dipen long eni man, bikos olketa ya i no save sevem yufala.” Iumi shud no trustim olketa man for stretem olketa problem long world, bat iumi shud trustim God, wea garem paoa for mekem evri promis bilong hem for kamap tru. Wanem nao hem promisim? Tingim olketa samting hia:

NOGUD PIPOL BAE FINIS, AND THEN OLKETA WEA RAETEOUS BAE STAP LONG PEACE FOR OLOWE: Sams 37:10, 11 sei: “No longtaem, bae olketa nogud pipol i lus. Nomata yu lukaotem olketa, bae yu no save faendem olketa. Olketa pipol wea i hambol, bae olketa onam lan wea [Jehovah] hemi bin promisim fo olketa. Nao bae olketa ya i hapi, bikos olketa stap gudfala, an olketa garem plande samting.” Sams 37:29 sei: “Bae olketa stretfala pipol . . . stap long [earth] olowe.”

WAR BAE FINIS: “[Jehovah] . . . hemi finisim olketa faet long evriples long wol. Hemi gohed fo brekem olketa bou, an hemi gohed fo spoelem olketa spia, an hemi gohed fo bonem olketa samting ya long faea.”—Sams 46:8, 9.

NO ENIWAN BAE SIK, SAFA, OR DAE: “Tent bilong God hem stap witim olketa man. . . . Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:3, 4.

STAKA KAIKAI FOR EVRIWAN: “Letem lan blong mifala hemi garem plande kaikai long hem, an bae olketa hil i fulap fogud long kaikai.”—Sams 72:16.

WANFALA GAVMAN BAE RULIM FULL EARTH, WEA HEM KINGDOM BILONG CHRIST: “Hemi mekem [Jesus Christ] fo kamap king, an hemi barava mekhae long hem, an hemi givim bikfala paoa long hem, mekem evri pipol blong evri kantri, an evri kala, an evri langguis, bae i wosipim hem. Paoa blong hem fo rul bae hemi stap olowe, an kingdom blong hem bae hemi no save finis.”—Daniel 7:14.

Why nao iumi fit for trustim olketa promis hia? Taem Jesus stap long earth, hem showimaot hem fit for kamap King wea bae mekem evri promis hia kamap tru. Hem healim olketa wea sik, hem feedim olketa wea poor, and hem resurrectim samfala man. And samting wea barava important nao, olketa teaching bilong hem bae helpem pipol for stap gud tugeta and wan mind for olowe. Jesus storyim tu olketa samting wea bae happen taem disfala world hem gogo for finis.

Jesus sei long olketa last day bae staka problem kamap. Hem storyim saen wea bae showimaot “world hem gogo for finis.” Hem sei war bae kamap long staka kantri, kaikai bae short, pipol bae kasem barava nogud sik, and olketa bigfala earthquake bae kamap. (Matthew 24:3, 7; Luke 21:10, 11; Revelation 6:3-8) Jesus sei tu: “From plande pipol duim olketa samting wea no stret, love bilong staka bae no strong nao olsem bifor.”—Matthew 24:12.

Long 2 Timothy 3:1-5, Bible storyim olketa nogud samting wea bae kamaot from wei wea love bilong staka no strong nao olsem bifor. Datfala scripture sei “long olketa last day” staka pipol bae tingim olketa seleva nomoa, laekem tumas selen, and interest nomoa for enjoyim olketa seleva. Olketa bae bighed and raf. Olketa long famili bae no showimaot love long each other, and olketa pikinini bae no obeyim dadi and mami bilong olketa. Pipol wea sei olketa worshipim God bae duim olketa nogud samting.

Olketa nogud samting hia showimaot world hem klosap for finis. Hem showimaot tu Kingdom hem klosap for rul. Long profesi bilong Jesus abaotem olketa last day, hem talem disfala promis: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matthew 24:14.

Datfala gud nius wea Jesus storyim hem givim warning long pipol wea duim nogud samting and hem givim hope long pipol wea duim stret samting. Diswan mekem pipol wea duim stret samting sure olketa promis bilong God klosap for kamap tru. Waswe, iu laek for lanem moa samting abaotem olketa promis bilong God? Sapos olsem, plis lukim last page long disfala magasin.