IUMI EVRIWAN NEEDIM LOVE. Hard for olketa hasband and waef, famili, or olketa wea fren for stap gud tugeta sapos olketa no showimaot love. Wei for showimaot love hem important samting wea savve helpem iumi for hapi. Bat, wanem nao “love”?

Love wea iumi storyim long hia hem no kaen love wea man and woman savve garem for each other, nomata datkaen love hem important tu. Bat hem kaen love wea mekem man for tingim narawan and no hemseleva nomoa. Hem love wea followim olketa Bible principle, bat hem mekem man for kaen tu.

Bible talem disfala naes toktok abaotem love: “Man wea garem love hem patient and kaen. Hem no savve jealous, or tok praod, and hem no savve tinghae tumas long hemseleva. Hem evritaem showimaot respect, no tingim hemseleva nomoa, no kwiktaem for kros. Hem no tingim olowe nogud samting wea narawan duim long hem. Man wea garem love hem no hapi long olketa nogud samting, bat hem hapi long samting wea tru. Nomata wanem hem happen, man wea garem love hem hapi nomoa. . . . Hem evritaem garem hope, and no eni samting savve mekem hem givap. Love no savve finis.”—1 Corinth 13:4-8.

Kaen love olsem “no savve finis.” Hem bae stap for olowe. And hem savve gohed for kamap strong. From love olsem hem mekem man for patient, kaen, and forgivim narawan, “hem barava mekem pipol for wan mind.” (Colossae 3:14) Dastawe olketa wea showimaot diskaen love bae hapi and trustim each other nomata olketa no perfect. Olsem example, tingim hao diskaen love savve helpem tufala wea marit.

Jesus Christ teachim olketa important samting abaotem marit. Olsem example, hem sei: “‘Man bae lusim dadi and mami bilong hem and hem bae stap olowe witim waef bilong hem. Datfala man and woman bae kamap wanfala body nomoa.’ . . . So no eni man mas aotem samting wea God joinim finis.” (Matthew 19:5, 6) Disfala scripture storyim tufala important samting.

“DATFALA MAN AND WOMAN BAE KAMAP WANFALA BODY NOMOA.” Tufala wea marit savve barava fren gud tugeta, and love savve helpem tufala for faithful long each other, and for no kamap “wanfala body” witim narawan. (1 Corinth 6:16; Hebrew 13:4) Wei for no faithful hem mekem hasband and waef no trustim each other and savve barava spoelem marit bilong tufala. And sapos tufala garem pikinini, diswan savve barava affectim olketa tu. Olketa pikinini maet feel olsem no eniwan lovem olketa, no feel sef, or feel kros.

“SAMTING WEA GOD JOINIM FINIS.” Marit hem holy samting tu. Hasband and waef wea tinghae long datwan bae waka hard for strongim marit. Olketa bae no kwiktaem for lusim marit partner taem olketa kasem problem long marit. Love bilong tufala strong. Nomata wanem hem happen, tufala bae waka hard for stretem olketa problem mekem tufala wan mind and stap gud tugeta.

Taem dadi and mami showimaot love long each other, diswan savve barava helpem olketa pikinini for hapi and feel sef insaed famili. Wanfala young wan wea nem bilong hem Jessica, hem sei: “Dadi and mami barava lovem and respectim each other. Mi tinghae tumas long wei wea mami bilong mi savve respectim dadi, and datwan mekem mi for laek olsem hem.”

Love hem main fasin bilong God. Bible sei: “God hem love.” (1 John 4:8) And Bible sei tu, Jehovah hem “datfala hapi God.” (1 Timothy 1:11) Iumi tu bae hapi sapos iumi followim example bilong God for showimaot love, and followim olketa nara wei bilong hem tu. Ephesus 5:1, 2 sei: “From iufala olketa pikinini bilong God wea hem lovem, iufala mas followim wei bilong hem. Mekem hem wei bilong iufala for showimaot love.”