STAKA PIPOL TINGSE MAN WEA RICH AND GAREM STAKA SAMTING HEM HAPI AND GAREM GUDFALA LAEF. From staka million pipol garem tingting olsem, olketa waka hard tumas for kasem staka selen. Bat waswe, selen and olketa samting wea man garem savve mekem hem hapi? Tingim olketa point hia.

Datfala buk Journal of Happiness Studies sei sapos iumi garem finis ples for stap, kaikai, and kaleko, for garem staka selen no savve mekem iumi barava hapi go moa. Hem no rong for garem selen. Datfala magasin Monitor on Psychology sei: “Wei for waka hard for aftarem [selen] nao savve mekem man no hapi.” Olketa toktok hia klosap semsem witim wanem Bible talem klosap tu thousand year finis: “Enikaen nogud samting hem kamaot from wei for laekem tumas selen, and samfala wea garem kaen wei olsem . . . kasem staka problem wea barava spoelem olketa.” (1 Timothy 6:9, 10) Maet wanem nao samfala problem hia?

MAN WARI TUMAS AND NO SLEEP GUD BIKOS HEM LAEK PROTECTIM RICHES BILONG HEM. “Wakaman wea hemi gohed fo waka strong olowe, maet hemi kaikai lelebet nomoa o hemi kaikai go-go hemi fulap, bat hemi save barava slip gudfala long naet. Bat eni risman, hemi nating save slip long naet, bikos hemi wari tumas long evrisamting wea hemi garem.”—Eklesiastes 5:12.

MAN SORRE FROM HEM TINGSE BAE HEM HAPI BAT NATING NOMOA. Diswan savve happen bikos man wea laekem tumas selen bae no satisfae nomoa witim selen wea hem kasem. Bible sei: “Sapos yu laekem seleni tumas, bae yu nating hapi bikos yu no garem inaf seleni. An sapos yu laekem tumas fo kamap wanfala risman, bae yu nating save kasem nomoa evrisamting wea yu laekem.” (Eklesiastes 5:10) And tu, wei for laekem tumas selen savve mekem man for no duim olketa important samting wea savve mekem hem for hapi, olsem for spendem taem witim famili and olketa fren, or for worshipim God.

SORRE AND FEEL NOGUD TAEM INVESTMENT GO DAON OR SELEN HEM LUS. “Nogud yu hadwaka tumas fo kamap risman. Sapos yu waes bae yu no save waka olsem. Lukluk long risis blong yu, an seknomoa hemi finis, bae hemi flae go olsem bed.”—Provebs 23:4, 5.

WEI FOR SATISFAE. “Taem iumi born kam long disfala world iumi no tekem kam eni samting, and taem iumi dae iumi no tekem go eni samting witim iumi tu. So sapos iumi garem kaikai, kaleko, and ples for stap, iumi mas satisfae nomoa witim olketa samting hia.” (1 Timothy 6:7, 8) Pipol wea garem datfala wei for satisfae no savve komplen tumas or jealous long wanem narawan garem. And bikos olketa no laek for kasem staka samting wea olketa no fit for peim, datwan mekem olketa no stress tumas.

WILLING FOR GIVE. “Man wea givim samting hem barava hapi winim man wea kasem samting.” (Acts 20:35) Pipol wea givim samting olketa hapi bikos olketa laek mekem olketa narawan hapi, nomata sapos olketa savve givim nomoa lelebet taem and strong bilong olketa. Olketa savve kasem samting wea man no savve peim long selen, olsem love, respect, and olketa gudfala fren. And olketa fren hia bae willing tu for givim samting long olketa!—Luke 6:38.

PIPOL IMPORTANT WINIM OLKETA MATERIAL SAMTING. “Man hemi kaikai drae nomoa an filim lav, hemi lake moa winim man hemi kaikaim gudfala mit an filim heit.” (Provebs 15:17) Wanem nao scripture hia minim? For fren gud witim narawan hem important winim wanem iumi ownim. And for lovem narawan hem important samting wea bae mekem iumi hapi.

Sabina, wanfala woman from South America, luksavve wei for followim olketa Bible principle helpem hem for hapi. Taem hasband lusim olketa, Sabina stragol for kasem need bilong hem and tufala dota bilong hem. Hem waka long tufala difren waka and evriday hem wekap long 4:00 a.m. Nomata Sabina barava busy, hem disaed for studyim Bible. Wanem nao kamaot from diswan?

Hem no kasem staka selen, bat datwan helpem hem for hapi! Olsem example, wei for duim olketa spiritual samting helpem hem for hapi. (Matthew 5:3) Hem fren gud witim olketa narawan wea worshipim God. And taem hem sharem wanem hem lanem witim olketa narawan, datwan tu mekem hem for hapi.

Gud samting nao kamaot from wei for followim olketa Bible principle, olsem wei for satisfae, willing for give, and wei for tingim pipol important winim material samting. Datwan pruvim hem stret samting for duim!