WASWE, IU MAN WEA SAVVE HAPI? Sapos olsem, wanem nao mekem iu hapi? Waswe, hem famili, waka, or lotu bilong iu? Or maet hem samting wea iu luk forward long hem olsem for finisim hae skul, garem gudfala waka, baem touch screen phone, or baem car.

Staka pipol savve hapi taem olketa kasem samting wea olketa laekem tumas or goal wea olketa markem. Bat waswe, datwan mekem olketa for gohed hapi? Staka taem, olketa hapi for lelebet taem nomoa.

Wanfala buk sei, hapi hem wanfala feeling wea mekem man feel gud klosap evritaem, samfala taem hem savve feel satisfae nomoa and samfala taem hem savve barava hapi long laef bilong hem, and hem laekem datfala feeling for gohed.

From wei for hapi hem wanfala feeling wea hem no for lelebet taem, hem no depend long samting wea man kasem long laef, bat hem depend long wanem hem duim long laef bilong hem. Sapos man sei, “Bae mi hapi sapos . . . ,” hem olsem hem sei, narataem nao bae hem hapi, no distaem.

Iumi savve comparem wei for hapi olsem wei for garem gudfala health. Wanem nao savve helpem iumi for stap healthy? Iumi kaikaim healthy kaikai, exercise, and no duim samting wea bae spoelem body bilong iumi. Long sem wei tu, wei for hapi hem depend long wanem iumi duim long laef. Iumi savve hapi taem iumi duim olketa stretfala samting.

Wanem nao savve helpem iumi for hapi? Tingim samfala important samting hia:

• WEI FOR SATISFAE AND GIVIM SAMTING

• HEALTHY OR LANE FOR DEAL WITIM HEALTH PROBLEM

• LOVE

• FORGIVE

• MINIM WHY IUMI LAEF

• HOPE

Bible sei: “Olketa pipol wea laef blong olketa hemi stret fogud . . . olketa ya nao i hapi.” (Sams 119:1) Distaem, iumi bae storyim olketa samting hia wea savve mekem iumi hapi.